Horror ရုပ်ရှင်ကြိုက်သူတွေဟာ စိတ်ချောက်ချားစရာ ကောင်းပြီး သည်းထိတ်ရင်ဖို ခံစားမှုမျိုးကို ပေးနိုင်တဲ့ ရုပ်ရှင်ဇာတ်ကားတွေကို အများအားဖြင့် ရွေးချယ် ကြည့်ရှူလေ့ ရှိကြပါတယ်။ အခုဖော်ပြပေးမယ့် ရုပ်ရှင်တွေကတော့ Horror ရုပ်ရှင် ကြိုက်သူတွေတောင် အဆုံးထိ ကြည့်ဖို့ ခဲယဉ်းပြီး စိတ်ချောက်ချားစရာ ကောင်းတဲ့ Horror ရုပ်ရှင်ကားကောင်းတွေပဲ ဖြစ်ပါတယ်။

(၁) Hereditary (2018)

“Conjuring”၊ “Annabelle” ဇာတ်ကားတွေထက် ပိုကြောက်စရာ ကောင်းပြီး သဘာဝကျတဲ့ သရုပ်ဆောင်မှုတွေ၊ စိတ်ချောက်ချားစရာ Sound Effect တွေကြောင့် ဇာတ်လမ်း အဆုံးထိ ကြည့်ရှုဖို့ ခဲယဉ်းတဲ့ Horror ရုပ်ရှင် ဇာတ်ကား ကောင်းတကားပဲ ဖြစ်ပါတယ်။

(၂) Silent Hill (2006)

မြူတွေပိတ်နေတဲ့ အဝေးပြေးလမ်းမ တခုရဲ့ မလှမ်းမကမ်းမှာ “Silent Hill” ဆိုတဲ့ မြို့အဝင် ဆိုင်းဘုတ်က လွဲပြီး ဘာဆိုဘာမှ ရှိမနေတာမျိုးကလည်း ရုပ်ရှင်ကို ကြည့်နေရင်းကနေ ရုပ်ရှင်ထဲရောက်သွားစေတဲ့ ခံစားချက်မျိုးကို ပေးစွမ်းနိုင်ပြီး စိတ်ချောက်ချားစရာ ကောင်းလွန်းတာကြောင့် အဆုံးထိ ကြည့်ရှုဖို့ ခက်ခဲတဲ့ ရုပ်ရှင်ကား တကားလည်း ဖြစ်ပါတယ်။

(၃) Mother (2017)

Horror ရုပ်ရှင်လို့ ပြောလို့ မရပေမယ့် စိတ်ချောက်ချားစရာ ကောင်းပြီး စိတ်အနှောင့်အယှက်တွေ အပြည့်နဲ့ (Thriller) သည်းထိတ်ရင်ဖို ခံစားမှုမျိုးကို ဇာတ်ဝင်ခန်း တိုင်းလိုလိုမှာ ကြည့်ရှုရမှာ ဖြစ်တာကြောင့် စိတ်ရှုပ်ထွေးနေချိန် မကြည့်ရှုသင့်တဲ့ ဇာတ်ကားတကားပဲ ဖြစ်ပါတယ်။

(၄) Vernoica (2017)

၂၀၁၄ ခုနှစ်က ထွက်ရှိခဲ့တဲ့ “Ouija” ရုပ်ရှင်ထဲက ဝိညာဉ်ခေါ်ကားချပ်နဲ့ စမ်းသပ် ကစားရာက ဖြစ်ပေါ်လာတဲ့ နောက်ဆက်တွဲတွေလိုပဲ Vernoica ရုပ်ရှင်ဟာလည်း လက်ရှိလောကကနေ အမှောင်ဘက်ခြမ်းဆီ ဖွင့်လိုက်မိတဲ့ တံခါးတချပ်ကြောင့် ဖြစ်ပေါ်လာတဲ့ ခြောက်လှန့်မှုတွေကို တွေ့မြင်ကြရမှာပါ။ ဖြစ်ရပ်မှန် ရုပ်ရှင်ဇာတ်ကားတကား ဖြစ်တာကြောင့်လည်း ဆက်လက် ကြည့်ရှုဖို့ မဝံ့မရဲ ဖြစ်နေစေမှာ အမှန်ပါပဲ။

(၅) Raw (2016)

နိုင်ငံတကာမှာ အောင်မြင်မှုတွေ ရရှိထားပြီး သည်းထိတ်ရင်ဖို ရုပ်ရှင်ကြိုက်သူတွေကြား နာမည်ကြီးခဲ့တဲ့ ဒီဇာတ်ကားကို စိတ်အာရုံ နောက်ကျိနေအောင် ကြည့်ရှုရမှာ ဖြစ်ပါတယ်။

Ref. www.buzzfeed.com

You may also like these stories:

ဇာတ်အိမ်ခိုင်ခိုင်မာမာနဲ့ စိတ်လှုပ်ရှားမှုတွေပေးနိုင်တဲ့ Ghoul (2018)

ဖြစ်ရပ်မှန် အကြောင်းတွေကို အခြေခံရိုက်ကူးထားတဲ့ သည်းထိတ်ရင်ဖို ရုပ်ရှင်ဇာတ်ကားများ

စိတ်ချောက်ချားမှု အပြည့်နဲ့ ကြည့်ရှုရမယ့် “Hereditary” ရုပ်ရှင်

ရင်တထိတ်ထိတ်နဲ့ ကြည့်ရှုသူကို ချောက်ချားစေမယ့် “The Eyes Of My Mother”

The post စိတ်ချောက်ချားစရာ ကောင်းတာကြောင့် အဆုံးထိ ကြည့်ဖို့ ခဲယဉ်းတဲ့ Horror ရုပ်ရှင်ကားများ appeared first on ဧရာဝတီ.

မကြာခင် ရုံတင်ပြသမယ့် “ကြိမ်နှုန်း” (Frequency) ရုပ်ရှင်ဇာတ်ကားမှာ ပါဝင် သရုပ်ဆောင်ထားတဲ့ အိန္ဒြာကျော်ဇင်ဟာ အဲဒီဇာတ်ကား ရိုက်ကူးချိန်မှာ ချောက်ချားစရာ စိတ်မျိုးတွေ ဖြစ်ခဲ့ရတယ်လို့ ပြောပါတယ်။

“ကြိမ်နှုန်း ဇာတ်ကား ဇာတ်ကိုက ချောက်ချားစရာ ဇာတ်မျိုးဆိုတော့ ကိုယ်တိုင်ကလည်း ရိုက်တဲ့အခါမှာ ညပိုင်းဆိုတော့ ရိုက်ရတဲ့ ဇာတ်ဝင်ခန်းတွေကလည်း ထိတ်လန့်စရာပဲ။ ရိုက်နေတဲ့ အချိန်မှာ စိတ်တွေတော့ ချောက်ချားတယ်။ ရိုက်ကွင်းအိမ်ကြီးကလည်း ချောက်ချားစရာ ဖြစ်တယ်။ ဇာတ်ကားတွေ ရိုက်တာ အရင်ဆို မဖြစ်ဖူးဘူး။ ဒီဇာတ်ကား ရိုက်ချိန်မှာတော့ ကြောက်တဲ့စိတ်မျိုးတော့ ဖြစ်တယ်”လို့ အိန္ဒြာကျော်ဇင်က ပြောပါတယ်။

ဆက်လက်ပြီး အိန္ဒြာကျော်ဇင်က ဒီဇာတ်ကားဟာ မြန်မာရုပ်ရှင် ဇာတ်ကားတွေထဲမှာ ကြည့်နေကျပုံစံမျိုးတွေနဲ့ မတူဘဲ ခွဲထွက်နေတဲ့ ရုပ်ရှင်ဇာတ်ကား တကားလို့ ဆိုပါတယ်။

“မြန်မာဇာတ်ကားတွေထဲမှာ ကြည့်နေကျပုံစံ၊ ဇာတ်လမ်းမျိုးတွေထဲက နည်းနည်း ခွဲထွက်သွားတယ်ပေါ့နော်။ အဲ့ထဲက ကာရိုက်တာက နည်းနည်းလေး ထူးခြားတယ်။ ကိုယ်လည်း မလုပ်ဖူးတာလေး လုပ်ရတယ်။ ပရိသတ်တွေ ကြည့်ရင်တော့ သိရမှာပါ။ ၁၉၁၃ ခုနှစ်က ချမ်းသာကြွယ်ဝတဲ့ အမျိုးသမီး၊ သူ့ရဲ့ ခံစားချက်တွေကို ကြည့်ရပါလိမ့်မယ်။ ထူးထူးခြားခြားလေးပေါ့”လို့ အိန္ဒြာကျော်ဇင်က ဆိုပါတယ်။

ဇာတ်ကားရိုက်ချိန်မှာ စိတ်ချောက်ချားခဲ့ပေမယ့် ရိုက်ကူးနေချိန်အတွင်း သရဲခြောက်ခံရတာမျိုးတွေတော့ မရှိပါဘူးလို့ အိန္ဒြာကျော်ဇင်က ပြောပါတယ်။

“ရိုက်ကူးနေချိန် ထူးခြားမှုတော့ ရှိတယ်။ ရိုက်ကတည်းကလည်း ကြောက်တယ်။ ဒါကလည်း ညဘက် ရိုက် ရတာကြောင့်ရယ်၊ ဒိုင်ယာလော့တွေကြောင့် စိတ်က ချောက်ချားတာပါ။ ထူးထူးခြားခြား ခြောက်ခံရတာတွေတော့ မရှိပါဘူး။ ဒါပေမဲ့ အရင်ဆို ကြောက်တတ်တဲ့ထဲ မပါဘူးလို့ ပြောလို့ ရတယ်။ အဲ့ကား ရိုက်ချိန်မှာတော့ အိမ်ကြီးထဲမှာပဲ ရိုက်ကြတာ။ အိမ်သာ သွားချိန်တွေဆို တယောက်ယောက်ကများ ကြည့်နေလားဆိုပြီး စိတ်က ချောက်ချားနေတာ အဲ့ဒါတော့ ဖြစ်ခဲ့တယ်”

“အမှတ်တရ ဖြစ်ခဲ့တဲ့ ဇာတ်ဝင်ခန်းဆို ညောင်ပင်အောက်မှာ ရိုက်တာ။ ည ၁၂ နာရီလောက် ရှိမယ်။ အဲ့ညောင်ပင်ကလည်း အရမ်း ချောက်ချားစရာ ကောင်းတယ်။ ညောင်ပင် မကောင်းဆိုးဝါးတွေကို သွား ဆုတောင်းတာ။ အဲ့မှာ ကျမတို့ နှစ်ယောက်တည်း အရမ်းကြောက်စရာ ကောင်းတယ်။ အမြန်ပြီးပါတော့ဆိုပြီး ရိုက်ခဲ့ရတာပေါ့”လို့ အိန္ဒြာကျော်ဇင်က ပြောပါတယ်။

“ကြိမ်နှုန်း” ရုပ်ရှင်ဇာတ်ကားကြီးကို ဇူလိုင်လ ၁၈ ရက်နေ့မှာ မြန်မာတနိုင်ငံလုံးက ရုပ်ရှင်ရုံတွေမှာ ရုံတင်ပြသသွားမှာ ဖြစ်ပါတယ်။ ဒီဇာတ်ကားကို ဒါရိုက်တာ ခန့်မာန်ထည် ရိုက်ကူးပြီး သရုပ်ဆောင် ထွန်းအိန္ဒြာဗို၊ အိန္ဒြာကျော်ဇင်တို့နဲ့အတူ သရုပ်ဆောင်သစ်များစွာ ပါဝင် သရုပ်ဆောင်ထားကြပါတယ်။

You may also like these stories:

၁၃ နှစ် အကြာမှာ ဒုတိယမြောက် အကယ်ဒမီဆု ရရှိခဲ့တဲ့ အိန္ဒြာကျော်ဇင်

“ဘာသာရေး ပိုလုပ်ချင်တာကြောင့် တနှစ်ကိုဇာတ်ကား ၂ကားလောက်သာရိုက်ကူးမယ်”လို့ ထွန်းအိန္ဒြာဗို ပြော

The post “ကြိမ်နှုန်း”ရုပ်ရှင် ရိုက်တုန်းက စိတ်ချောက်ချားခဲ့ရတယ်လို့ အိန္ဒြာကျော်ဇင် ပြော appeared first on ဧရာဝတီ.

The Voice Myanmar Season 2 သီချင်းဆိုပြိုင်ပွဲရဲ့ Winner ဖြစ်တဲ့ နိုဗန်ထူးကတော့ မွန် တိုင်းရင်းသားတယောက်ဖြစ်ပြီး သူ့အနေနဲ့ တိုင်းရင်းသားဆိုတဲ့ ခံစားချက်က ဘာနဲ့မှ လဲလို့ မရဘူးလို့ ပြောပါတယ်။

“ကျနော် အမေရိကန်စင်တာမှာ လုပ်ကတည်းကိုက မသိစိတ်ထဲက ဒီတိုင်းရင်းသားဆိုတဲ့ အရာကို ဂုဏ်ယူတယ်။ အဝတ်အစား ဝတ်တာကအစ ဒီဟာတွေက ကိုယ်ပိုင်ဟန်တွေ ရှိထားပြီးသား။ ကျနော် မွန်မှ မဟုတ်ပါဘူး။ ဘယ်အရာမဆို သဘောကျတယ်။ အနောက်တိုင်း ဆိုတာထက်စာရင် တိုင်းရင်းသားဆိုတဲ့ ခံစားချက်က ဘာနဲ့မှ လဲလို့မရဘူး။ ကိုယ်တိုင်ကလည်း ဖြစ်နေလို့လား မသိဘူး။ နောက်ပြီးတော့ စကားလုံးတွေအစ အရသာ ရှိတယ်။ ပြောရတာရော နားထောင်ရတာရော”လို့ နိုဗန်ထူးက ပြောပါတယ်။

နိုဗန်ထူးကတော့ မွန်တိုင်းရင်းသား တယောက်ဖြစ်ပြီး ပြိုင်ပွဲဝင်ခဲ့စဉ်က သူ့ရဲ့ မွန်တိုင်းရင်းသား ဝတ်စုံသာမက တခြားသော တိုင်းရင်းသားဝတ်စုံများ ဝတ်ဆင်ကာ သီဆို ယှဉ်ပြိုင်ခဲ့တာကိုလည်း တွေ့ရပါတယ်။ ဒါ့အပြင် နိုဗန်ထူးက ထူးထူးခြားခြား ကောင်းမွန်တဲ့ ဆံပင်ရှည်ကို ပိုင်ဆိုင်ထားပြီး သူ့ရဲ့ဆံပင်ကိုလည်း ထိန်းသိမ်းဖြစ်တယ်လို့ ဆိုပါတယ်။

“ဆံပင်အရှည်ကတော့ ၂၀၁၅ ခုနှစ်လောက်က စထားတယ်။ တော်တော်များများကတော့ မိုက်တယ်လို့ ပြောတယ်။ ကျနော်ကလည်း ထိန်းသိမ်းတယ်ဗျ။ ဒါတွေကတော့ လျို့ဝှက်ချက်တွေပေါ့။ ကြော်ငြာတွေ ဘာတွေ လာကမ်းလှမ်းရင်လည်း ရိုက်မှာပါ” လို့ နိုဗန်ထူးက ဆိုပါတယ်။

လုပ်ငန်းခွင်ဝင်တဲ့ အချိန်မှာလည်း ဆံပင်ညှပ်ရမယ် ဆိုတာတွေ ရှိခဲ့ပေမယ့် အဲဒီအပေါ်မှာတော့ ဆိုးတယ်၊ ကောင်းတယ် ဆိုတာကို မခံစားရပါဘူးလို့ ပြောပါတယ်။

“လုပ်ငန်းခွင်ဝင်တော့ ဒီဆံပင်ကြီး ညှပ်ရမယ်တို့ ဘာတို့ ရှိတယ်။ အဲ့အပေါ်မှာတော့ ဘာမှ ဆိုးတယ်၊ ကောင်းတယ် မခံစားရပါဘူး။ လူကြီးတွေမြင်တဲ့ အမြင်က ရှိပြီးသားဆိုတော့ အေးဆေးပါပဲ။ ဝိုင်းပြောခံရတာကြီးက နေသားကျနေပြီဆိုတော့ ဘာမှ မဖြစ်တော့ပါဘူး”လို့ နိုဗန်ထူးက ပြောပါတယ်။

ဂီတလောကထဲကို ရောက်ရှိလာတာ ကြာခဲ့ပြီ ဖြစ်သော်လည်း The Voice Myanmar Season 2 ကို ဝင်ရောက်ယှဉ်ပြိုင်ခဲ့ရာ ယခင်က သူ့ကို မသိသေးတဲ့သူများလည်း သိရှိသွားခဲ့ပြီး အခုနောက်ပိုင်းမှာဆိုရင် အမျိုးသမီး ပရိသတ်များကပါ နိုဗန်ထူးကို အားပေးလာကြတာ တွေ့ရပါတယ်။

နိုဗန်ထူးရဲ့ အချစ်ရေးကို မေးကြည့်တဲ့အခါ “အချစ်ရေးကတော့ ကျနော့် ပုံစံကို ကြိုက်မယ့်လူက နည်းနည်းတော့ ရှားလိမ့်မယ်။ ကျနော်က ဆိုးတယ်။ Relationship တခုကို အကြာကြီး မတည်ဆောက်နိုင်ဘူး။ ပြီးတော့ မိန်းမယူဖို့ ဆန္ဒကလည်း သိပ်မရှိဘူး။ ကလေးတွေ ဘာတွေ မွေးရတာလည်း မကြိုက်ဘူး”

“ဒီလောကကြီးမှာ လူသားတယောက် ဖြစ်သွားရင် ကြောက်စရာကြီး။ မိန်းမယူပြီး ကလေးယူဖို့ ကိစ္စကို မစဉ်းစားနိုင်သေးဘူး။ ကိုယ့်ဟာနဲ့ ကိုယ်တောင် ရပ်တည်ဖို့တောင် တိုင်ပတ်နေတယ်။ အချစ်ရေးကတော့ ဟိုလိုလို ဒီလိုလိုပါပဲ။ တိုင်ပတ်တယ်ပေါ့။ စော်ကြည်ဖို့ကတော့ သိပ်မလွယ်ပါဘူး”လို့ နိုဗန်ထူးက ပြောပါတယ်။

နိုဗန်ထူးကတော့ The Voice Myanmar Season 2 သီချင်းဆို ပြိုင်ပွဲ ပြီးဆုံးပြီးနောက်ပိုင်းမှာ သူ့ရဲ့ ကိုယ်ပိုင် Band နဲ့အတူ သီချင်းများ ဖန်တီးနေပြီး အခွေထွက်ဖို့ ပြင်ဆင်နေတယ်လို့ သိရပါတယ်။

You May Also Like These Stories:

The post “တိုင်းရင်းသားဆိုတဲ့ ခံစားချက်က ဘာနဲ့မှ လဲလို့မရဘူး”လို့ ပြောတဲ့ နိုဗန်ထူး appeared first on ဧရာဝတီ.

နည်းပညာတွေ တိုးတက်လာတဲ့ အင်တာနက်ခေတ်ကြီးမှာ လူတိုင်းလိုလို ဖုန်း၊ ကွန်ပျူတာ စတာတွေကို ကျွမ်းကျွမ်းကျင်ကျင် အသုံးပြုတတ်နေကြပေမယ့် အခုဖော်ပြပေးမယ့် အောင်မြင်ကျော်ကြားတဲ့ ကမ္ဘာကျော် အနုပညာရှင်တွေကတော့ အင်တာနက်ကို ကောင်းကောင်း နားမလည်၊ အသုံးမပြုတတ်ကြဘူးလို့ ဝန်ခံပြောဆိုထားကြသူတွေပဲ ဖြစ်ပါတယ်။

(၁) Angelina Jolie

ကမ္ဘာကျော် မင်းသမီးချော Angelina Jolie ဟာဆိုရင် သူဟာ အင်တာနက် နည်းပညာတွေနဲ့ အလှမ်းဝေးသူတဦးဖြစ်တယ်လို့ နဲ့ USA Today နဲ့ အင်တာဗျူးတခုမှာ ဖြေကြားခဲ့ပါတယ်။ ၂၀၁၁ ခုနှစ်လောက်တုန်းက Amazon ကနေ Online Shopping ပြုလုပ်ဖို့ တော်တော်လေး အခက်တွေ့ခဲ့ရပြီး မကြာခဏ ကွန်ပျူတာ အဖွင့်အပိတ်ကို မေ့လျော့နေတတ်တယ်လို့ ဆိုပါတယ်။

(၂) Jennifer Lawrence

ကမ္ဘာကျော် မင်းသမီးတဦးဖြစ်တဲ့ Jennifer Lawrence ကတော့ BBC နဲ့အင်တာဗျူးမှာ သူ့အနေနဲ့ ဖုန်းတွေ၊ နည်းပညာတွေကို ကောင်းကောင်း မသုံးတတ်သလို အီးမေးလ်လည်း မပို့တတ်ဘူးလို့ ဆိုပါတယ်။ ဒါ့အပြင် Twitter ဟာဆိုရင်လည်း သူ့အတွက် အသုံးပြုရမှာ ရှုပ်ထွေးလွန်းတာကြောင့် အသုံးပြုဖြစ်မယ် မထင်ဘူးလို့လည်း ဆိုပါသေးတယ်။

(၃) DMX

နာမည်ကျော် အမေရိကန် Rapper တဦးဖြစ်တဲ့ DMX ဟာဆိုရင်လည်း Google ကို အသုံးပြုပြီး ကိုယ်ရှာချင်တာတွေကို အလွယ်တကူ ရှာဖွေကြည့်ရှုနိုင်တယ်ဆိုတာကို အချိန်တော်တော်ကြာအထိ မသိရှိခဲ့ဘူးလို့ အင်တာဗျူးတခုမှာ ဖြေခဲ့ဖူးပါတယ်။

The post အင်တာနက်ကို ကောင်းကောင်း အသုံးမပြုတတ်ကြတဲ့ ကမ္ဘာကျော် အနုပညာရှင်များ appeared first on ဧရာဝတီ.

ပုံမှန် ဇာတ်လမ်းတွဲတွေနဲ့ ကွဲထွက်ပြီး ဇာတ်ညွှန်း ဆန်းပြားတဲ့ “Hotel Del Luna” ကတော့ စတင် ပြသတဲ့ ရက်မှာပဲ တာထွက်ကောင်းခဲ့ပါတယ်။

ဒီဇာတ်လမ်းတွဲမှာ နာမည်ကြီး သရုပ်ဆောင် IU အဓိက ပါဝင် သရုပ်ဆောင်ထားတဲ့ အချက်ကလည်း ပရိသတ်တွေရဲ့ စိတ်ဝင်စားမှုကို ပိုမြင့်စေခဲ့တာပါ။ စပြပြချင်း ဇူလိုင် ၁၃ ရက်နေ့ညမှာပဲ ပရိသတ် ကြည့်ရှုမှုနှုန်း အမြင့်ဆုံး ရထားခဲ့တဲ့ “Arthdal Chronicles” ဇာတ်ကား စံချိန်ကို ကျော်လွန်သွားခဲ့ပါတယ်။

စိတ်ကူးယဉ် စိတ်ချောက်ချားစရာ အချစ်ဇာတ်ကား တကားဖြစ်တဲ့ “Hotel Del Luna” မှာ မင်းသား ယိုဂျင်ဂူးက သရဲတွေအတွက် ဖွင့်လှစ်ထားတဲ့ ဟိုတယ်မှာ အလုပ်ဝင်ဖို့ ဖြစ်လာခဲ့ပြီး ထူးခြား ဆန်းကြယ်တဲ့ ဟိုတယ်ကြီးရဲ့ ပိုင်ရှင်ကတော့ IU ပါ။ ဒါ့အပြင် တက်သစ်စ အနုပညာရှင်တွေဖြစ်တဲ့ P.O နဲ့ ဂမ်မီနာတို့လည်း အားဖြည့် ပါဝင်ထားပါတယ်။

ရုပ်သံ ကြည့်ရှုနှုန်းတွေကို ဖော်ပြတဲ့ Nielsen Korea မှာ ပထမတရက်တည်းမှာတင် ၇ ဒဿမ ၃ ရာခိုင်နှုန်းရှိခဲ့ပြီး တနိုင်ငံလုံးမှာ အမြင့်ဆုံး ဖြစ်ခဲ့ချိန်ကတော့ ၈ ဒဿမ ၇ ရာခိုင်နှုန်းထိ ရောက်ခဲ့ပါတယ်။ ဒါဟာ ရှေ့မှာပြခဲ့တဲ့ “Arthdal Chronicles” ရဲ့ စံချိန်တွေကို အကုန်ရိုက်ချိုးပြီး စံချိန်တင်လိုက်နိုင်တာပါ။

“Arthdal Chronicles” ကတော့ ပျမ်းမျှကြည့်ရှုနှုန်း ၆ ဒဿမ ၇ ရာခိုင်နှုန်းရခဲ့ပြီး နောက်ဆုံ းဇာတ်သိမ်းပိုင်းမှာတော့ ၆ ဒဿမ ၈ ရာခိုင်နှုန်းထိပဲ ရှိခဲ့တာပါ။ “Hotel Del Luna” ကို ကြည့်ရှုသူတွေရဲ့ ပျမ်းမျှ အသက်ကတော့ ၂၀ ကနေ ၄၉ နှစ်အတွင်း ရှိပြီး ပျမ်းမျှကြည့်ရှုနှုန်း ၄ ဒဿမ ၈ ရာခိုင်နှုန်းနဲ့ အမြင့်ဆုံးကတော့ ၆ ဒဿမ ၄ ထိ ရှိခဲ့တယ်လို့ သိရပါတယ်။

အပတ်စဉ် tvN ရုပ်သံလိုင်းကနေ စနေ၊ တနင်္ဂနွေမှာပြသမယ့် “Hotel Del Luna” ဟာ ဇူလိုင် ၁၄ ရက်ညမှာ ဒုတိယပိုင်း ဆက်လက် ထုတ်လွှင့် ပြသခဲ့ပါတယ်။ တချိန်တည်းမှာပဲ tvN ရုပ်သံလိုင်းက ပရိသတ်ကြည့်ရှုနှုန်း မြင့်ခဲ့တဲ့ “Arthdal Chronicles” ရဲ့ Part 3 ကို စက်တင်ဘာလ ၇ ရက်နေ့မှာ ထုတ်လွှင့်ပြသမယ်လို့ ကြေညာ လိုက်ပါတယ်။

“Arthdal Chronicles” ဇာတ်လမ်းတွဲက အပိုင်း ၃ ပိုင်းရှိပြီး တပိုင်းကို အခန်း ၆ ခန်း ရှိတာပါ။ အခု အပိုင်း ၂ ပိုင်း ပြသခဲ့ပြီး နောက်ဆုံးကျန်ရှိတဲ့ ၃ ပိုင်းမြောက်ကို ပြသမယ့်ရက် ကြေညာခဲ့ပါတယ်။

Ref: Soompi

You May Also Like This Story:

“Goblin” စီးရီး Season 2 မှာ ပါဝင်ချင်တယ်လို့ မင်းသား ဂေါင်ယိုး ဆို

The post ပထမဆုံး ပြသတဲ့ ရက်မှာတင် ကြည့်ရှုနှုန်း စံချိန်တင်ခဲ့တဲ့ “Hotel Del Luna” ဇာတ်လမ်းတွဲ appeared first on ဧရာဝတီ.

Harper’s Bazaar China မဂ္ဂဇင်းပေါ်က အဆိုတော် Rihanna ရဲ့ ဖက်ရှင်စတိုင်ဟာ ယဉ်ကျေးမှုဆိုင်ရာ ဆီလျော်မှု ရှိ၊ မရှိဆိုတာနဲ့ ပတ်သက်လို့ ပရိသတ်တွေကြားမှာ လှုပ်လှုပ်ခတ်ခတ် ဖြစ်သွားခဲ့တာကို တွေ့ရပါတယ်။

အဆိုတော် Rihanna ရဲ့ အာရှစတိုင် အသားပေးထားတဲ့ ဝတ်စုံတွေနဲ့ ရိုက်ကူးထားတဲ့ ဓာတ်ပုံတွေအပေါ် အကောင်းအဆိုး ရောထွေးတဲ့ တုံ့ပြန်ချက်တွေ ထွက်ပေါ်လာခဲ့ပြီး တချို့ကတော့ ဒါဟာ ယဉ်ကျေးမှုကို မဆီမလျော်တဲ့ ပုံစံမျိုးနဲ့ ဖျက်ဆီးလိုက်တာပဲလို့ စွပ်စွဲတာတွေလည်း ရှိခဲ့ပါတယ်။

Instagram က Harper’s Bazaar China စာမျက်နှာမှာ ဝေမျှထားတဲ့ ဓာတ်ပုံ တပုံပေါ်မှာ မှတ်ချက်လာရေးသွားသူတဦးကတော့ “ကျနော်က အာရှတိုက်သား ဖြစ်တယ်။ ဒါကိုတော့ စော်ကားလိုက်တယ်လို့ မြင်ပါတယ်”လို့ ရေးပါတယ်။ သူ့ရဲ့ပြောဆိုချက်အရ အာရှပုံစံကို ဖန်တီးချင်တယ်ဆိုရင် ဘာလို့ အာရှတိုက်သား အနုပညာရှင်လည်း မဖိတ်ကြားတာလဲ ဆိုပြီး မဂ္ဂဇင်းကို ဝေဖန်တာမျိုးလည်း ရှိခဲ့ပါတယ်။

တခြား အသုံးပြုသူတဦးကတော့ “ဒါဟာ အာရှယဉ်ကျေးမှုရဲ့ မျက်နှာကို လုံးဝ အိုးမဲ သုတ်လိုက်တာပဲ”လို့ ဆိုပါတယ်။ ဒါပေမဲ့ Rihanna ဘက်ကနေ ကာကွယ် ပြောဆိုသူတွေကတော့ အဲဒီ ဓာတ်ပုံတွေမှာ ပါဝင်တဲ့ ပုံစံဟာ ယဉ်ကျေးမှုကို တန်ဖိုးထားမှုဖြစ်တယ်လို့ ဖော်ပြရေးသားပါတယ်။

ထောက်ခံသူတဦးကတော့ “သူတို့ဟာ တရုတ် ယဉ်ကျေးမှုဆိုင်ရာ ပုဂ္ဂိုလ်တွေကို အလေးအမြတ်ပြုဖို့ Rihanna ရဲ့ နာမည်ကျော်ကြားမှုကို အသုံးပြုခဲ့တာပါ။ ဒီ Instagram ဆိုက်မှာ မော်ဒယ် လုပ်နေတဲ့ တရုတ်အမျိုးသမီးတွေ ပြတ်လပ်သွားတာမျိုး မရှိပါဘူး။ စိတ်အေးအေး ထားကြပါ။ ကိုယ့်လူတို့”လို့ ဆိုပါတယ်။

ပုံစာတွေမှာတော့ Harper’s Bazaar China က အဲ့ဒီမျက်နှာဖုံးရဲ့ ရည်ရွယ်ချက်ဟာ Rihanna အတွက်တော့ အနောက်တိုင်း စတိုင်သမားတယောက်ဟာ အရှေ့တိုင်းအလှ မျက်နှာစာနဲ့ တွေ့ဆုံတဲ့ ပုံစံကို ပြသထားတာ ဖြစ်တယ်လို့ ရေးသားထားပါတယ်။ အသက် ၃၁ နှစ်အရွယ် အဆိုတော် Rihanna ကတော့ အဲ့ဒီဓာတ်ပုံတွေ ကိစ္စနဲ့ ပတ်သက်လို့ မှတ်ချက်ပေးတာမျိုး မရှိသေးပါဘူး။

Ref: nydailynews

You may also like these stories:

ကုန်ပစ္စည်းနာမည်ကိစ္စနဲ့ ပတ်သက်ပြီး ဖခင်ဖြစ်သူကို Rihanna တရားစွဲ

၂၀၁၉ ခုနှစ်မှာ အယ်လ်ဘမ်သစ်ဖြန့်ချိမည်ဟု Rihanna အတည်ပြု

ချစ်သူဟောင်း Rihanna ရဲ့ Sexy ပုံမှာ Comment ပေးမိလို့ ဝေဖန်ခံနေရတဲ့ Chris Brown

The post Harper’s Bazaar China မဂ္ဂဇင်းပေါ်က အာရှဒီဇိုင်း ဝတ်စုံတွေကြောင့် အဆိုတော် Rihanna ဝေဖန်ခံရ appeared first on ဧရာဝတီ.

တောင်ကိုရီးယား နာမည်ကျော်အမျိုးသားအဖွဲ့ BTS ရဲ့ ဒီလအတွင်းမှာပဲ ဂျပန်နိုင်ငံမှာ ကျင်းပခဲ့တဲ့ ဖျော်ဖြေပွဲ ၄ ပွဲကို လာရောက် ကြည့်ရှုတဲ့ ပရိသတ် အရေအတွက်ဟာ ၂ သိန်း ၁ သောင်းအထိ ရှိခဲ့ပါတယ်။ ဒါဟာ တောင်ကိုရီးယားနဲ့ ဂျပန်နိုင်ငံကြား ကုန်သွယ်ရေးနဲ့ သံတမန်ရေးဆိုင်ရာ ကိစ္စရပ်တွေ ဆိုးရွားနေချိန်မှာတောင် BTS အဖွဲ့ရဲ့ ကမ္ဘာလှည့် ဖျော်ဖြေပွဲအောင်မြင်ခဲ့တာ မြင်တွေ့ခဲ့ရတာ ဖြစ်ပါတယ်။

ပြီးခဲ့တဲ့ ဇူလိုင် ၁၃ နဲ့ ၁၄ ရက်နေ့တု့ိမှာ ဂျပန်နိုင်ငံ၊ Shizuoka မြို့က ပရိသတ် ၅ သောင်းဆန့်တဲ့ ECOPA ကွင်းမှာ BTS အဖွဲ့ဝင်တွေက “Love Yourself: Speak Yourself” ဆိုတဲ့ နာမည်နဲ့ ဖျော်ဖြေပွဲတွေကို ပြုလုပ်ခဲ့တာလည်း ဖြစ်ပါတယ်။

ပြီးခဲ့တဲ့ သီတင်းပတ်ကုန်ပိုင်းတုန်းကလည်း အိုဆာကာမြို့က ပရိသတ် ၄၇,၀၀၀ ဆန့်တဲ့ Yanmar Stadium Nagai ကွင်းမှာ ဖျော်ဖြေပွဲတွေကို ပြုလုပ်ခဲ့ပါသေးတယ်။ စုစုပေါင်း ဂျပန်နိုင်ငံမှာ ပြုလုပ်ခဲ့တဲ့ အဖွဲ့ရဲ့ ဖျော်ဖြေပွဲ ၄ ပွဲမှာ ပရိသတ် ၂ သိန်း ၁ သောင်းလောက် လာကြည့်ရှုခဲ့တယ်လို့ အဖွဲ့ရဲ့ စီမံခန့်ခွဲရေးအေဂျင်စီ Big Hit အင်တာတိန်းမန့်က ဆိုပါတယ်။

“Love Yourself: Speak Yourself” ဖျော်ဖြေပွဲတွေကို အမေရိကန်နိုင်ငံမှာ ရှိတဲ့ Pasadena’s Rose Bowl အားကစားကွင်းမှာ ပြီးခဲ့တဲ့ မေလကစလို့ ကျင်းပနေပြီး အဲ့ဒီနောက်မှာတော့ ဘရာဇီး၊ အင်္ဂလန်နဲ့ ပြင်သစ်နိုင်ငံတွေမှာလည်း အဲဒီ ဖျော်ဖြေပွဲတွေကို ပြုလုပ်ခဲ့ပါတယ်။

အခုဂျပန်မှာ ပြုလုပ်တဲ့နယ်လှည့်ဖျော်ဖြေပွဲမှာဆိုရင်တော့ အဖွဲ့ရဲ့ ကမ္ဘာကျော်သီချင်းဖြစ်တဲ့ “Boy With Luv” ကို ဂျပန်ဘာသာနဲ့ သီဆိုထားတဲ့ ဗားရှင်းကို စင်မြင့်အထက်မှာ ပထမဆုံး ဖျော်ဖြေခဲ့တာကိုလည်း တွေ့ရပါတယ်။

ဇူလိုင် ၁၄ ရက်နေ့ Shizuoka မှာ ပြုလုပ်ခဲ့တဲ့ ဖျော်ဖြေပွဲကိုတော့ ဂျပန်ရုပ်ရှင်ပေါင်း ၂၇၇ ခုမှာ တိုက်ရိုက်ထုတ်လွှင့် ပြသခဲ့တယ်လို့ Big Hit က ဆိုပါတယ်။ BTS အဖွဲ့ရဲ့ ဂျပန်မှာ တထောက်နားတဲ့ ဖျော်ဖြေပွဲ ပြုလုပ်နေချိန်ဟာ တောင်ကိုရီးယားနဲ့ ဂျပန်နိုင်ငံကြားမှာ သံတမန်ရေးနဲ့ ကုန်သွယ်ရေး အခြေအနေတွေ အနည်းငယ်ဆိုးရွား ပြင်းထန်နေချိန်နဲ့လည်း တိုက်ဆိုင်နေပါတယ်။

ဒုတိယကမ္ဘာစစ် အတွင်းက အတင်းအဓမ္မ အလုပ်စေခိုင်းတာခံခဲ့ရတဲ့ ကိုရီးယား ပြည်သူတွေကို နစ်နာကြေးပေးဖို့ ဂျပန်ကုမ္ပဏီတွေကို ကိုရီးယားတရားရုံးက အမိန့်ချလိုက်တာနဲ့ ပတ်သက်လို့ ဆန္ဒပြမှုတွေ လုပ်နေတာအပြင် တပိုင်းလျှပ်ကူးပစ္စည်းတွေနဲ့ Display ထုတ်လုပ်မှုကို တောင်ကိုရီးယားတင်ပို့ခွင့် ဂျပန်နိုင်ငံက ကန့်သတ် လိုက်တာမျိုးတွေ ရှိနေပါတယ်။

အခုလိုမျို းနှစ်နိုင်ငံကြားမှာ မကျေလည်တာတွေ ရှိခဲ့ပေမယ့် မကြားသေးခင်က ဂျပန်နိုင်ငံမှာ ပြုလုပ်ခဲ့တဲ့ ဖျော်ဖြေပွဲတွေကို ကြည့်မယ်ဆိုရင် ပရိသတ်တွေဟာ BTS အဖွဲ့ရဲ့ ဖျော်ဖြေမှုတွေကို တခဲနက် စိတ်အားထက်သန်စွာ လာရောက် ကြည့်ရှုအားပေးခဲ့တာကို မြင်တွေ့ခဲ့ရပါတယ်။

Ref:Yonhap

You May Also Like These Stories:

လပေါ်သွားမယ့် နာဆာ ခရီးစဉ်အတွက် သီချင်းစာရင်းမှာ BTS အဖွဲ့ သီချင်း ၃ ပုဒ် ပါဝင်

Billboard ဂီတဆုပေးပွဲမှာ BTS အဖွဲ့ ဆု ၂ ဆု ရရှိ

သီချင်းဗီဒီယို အသစ်နဲ့ ဂင်းနစ်ကမ္ဘာ့စံချိန် ၃ ခုကို ချိုးဖျက်လိုက်တဲ့ BTS အဖွဲ့

The post နှစ်နိုင်ငံ ဆက်ဆံရေး အခြေအနေ ဆိုးရွားနေပေမယ့် BTS အဖွဲ့ရဲ့ ဂျပန်ဖျော်ဖြေပွဲ အောင်မြင်ခဲ့ appeared first on ဧရာဝတီ.

Sony ရဲ့ “Spider-Man: Far From Home” ရုပ်ရှင်ဟာ နိုင်ငံရပ်ခြား နယ်မြေတွေမှာတော့ ဝင်ငွေအကောင်းဆုံး ပင့်ကူလူသားရုပ်ရှင်အဖြစ် သမိုင်းမှတ်တမ်းသစ် တခုကို စိုက်ထူနိုင်လိုက်ပြီ ဖြစ်ပါတယ်။

ရုပ်ရှင်ရုံတွေမှာ ရုံတင်ပြသအပြီး ၁၇ ရက်အကြာမှာ စူပါဟီးရိုး စွန့်စားခန်းရုပ်ရှင်ဟာ နိုင်ငံတကာမှာ ဝင်ငွေ ဒေါ်လာ ၅၇၂ ဒဿမ ၅ သန်းရရှိခဲ့ပြီးတော့ “Spider-Man 3” ရုပ်ရှင်ရဲ့ ဒေါ်လာ ၅၅၅ သန်းနဲ့ တင်ခဲ့တဲ့ စံချိန်ကို ကျော်ဖြတ်သွားနိုင်ခဲ့တာ ဖြစ်ပါတယ်။ မြောက်အမေရိက ပြည်တွင်းဈေးကွက် ဝင်ငွေ ဒေါ်လာ ၂၇၄ သန်းနဲ့ ပေါင်းမယ်ဆိုရင်တော့ အဲ့ဒီ ပင့်ကူလူသား ရုပ်ရှင်ဟာ ဒေါ်လာ သန်း ၈၀၀ ဝင်ငွေရခဲ့ပြီး လက်ရှိအထိတော့ ဒေါ်လာ ၈၄၇ သန်းနဲ့ ရပ်တည်နေတာကို တွေ့ရပါတယ်။

Marvel Cinematic Universe ရဲ့ ၂၃ ကားမြောက် ရုပ်ရှင်ဟာ အီတလီမှာ ပွဲဦးထွက်ပြသချိန်မှာ ဒေါ်လာ ၆ သန်းရရှိမှု အပါအဝင် ဈေးကွက် ၆၇ ခုမှာ ဝင်ငွေ ဒေါ်လာ သန်း ၁၀၀ ထပ်မံရရှိထားပါတယ်။ Disney ရဲ့ ကာတွန်းရုပ်ရှင်ကို ပြန်လည် အသက်သွင်းထားတဲ့ “The Lion King” ရုပ်ရှင်ကတော့ တရုတ်နိုင်ငံမှာ ရုံတင်ခဲ့ပြီး ဝင်ငွေ ၅၄ ဒဿမ ၇ သန်းရရှိခဲ့တာ တွေ့ရပါတယ်။

အဲ့ဒီ စာရင်းအရဆိုရင် Diseny ကနေ ရုံတင်ခဲ့တဲ့ “The Jungle Book”၊ “Beauty and the Beast” နဲ့ “Aladdin” ရုပ်ရှင်တို့ရဲ့ ဝင်ငွေထက် ကျော်လွန်သွားခဲ့တာကို တွေ့ရပါတယ်။ ဒီရုပ်ရှင်ဟာ မြောက်အမေရိက ဈေးကွက်မှာလည်း ပြသနေပြီး လာမယ့် သီတင်းပတ်ကုန် ပိုင်းကစလို့ ကျန်ရှိတဲ့ ဈေးကွက်အ များစုမှာလည်း ပွဲဦးထွက် ပြသတော့မှာ ဖြစ်ပါတယ်။

ပြီးခဲ့တဲ့ သီတင်းပတ်ကုန်ပိုင်းမှာပဲ စတင်ပြသခဲ့တဲ့ နောက်ထပ် ရုပ်ရှင်တကားကတော့ Paramount ရဲ့ သည်းထိတ်ရင်ဖိုရုပ်ရှင် “Crawl” ဖြစ်ပါတယ်။ နိုင်ငံတကာဈေးကွက်ပေါင်း ၂၀ မှာ ဝင်ငွေ ဒေါ်လာ ၄ ဒဿမ ၈ သန်း ရရှိခဲ့ပါတယ်။ ဒါ့အပြင် အရှေ့အလယ်ပိုင်းဒေသမှာတော့ ဒေါ်လာ ၁ ဒဿမ ၄ သန်းနဲ့ ဝင်ငွေအကောင်းဆုံး ဖြစ်ခဲ့ပါတယ်။ မလေးရှားနဲ့ အင်ဒိုနီးရှားတို့မှာလည်း ဝင်ငွေကောင်းခဲ့တာ တွေ့ရပါတယ်။

Warner Bros. ရဲ့ သဘာဝလွန် သည်းထိတ်ရင်ဖိုရုပ်ရှင် “Annabelle Comes Home” ကတော့ နိုင်ငံတကာ ဈေးကွက် ၇၈ ခုမှာ ဒေါ်လာ ၁၈ သန်း ရရှိခဲ့ပါတယ်။ အခုအထိဆိုရင် ဝင်ငွေ ဒေါ်လာ ၁၇၃ သန်းရရှိထားပြီ ဖြစ်ပါတယ်။

Universal နဲ့ Illuminations တို့ရဲ့ “The Secret Life of Pets 2” ရုပ်ရှင်ဟာ ဈေးကွက် ၆၆ ခုမှာ ဝင်ငွေဒေါ်လာ ၁၄ သန်းရရှိခဲ့ပြီး စုစုပေါင်း ဝင်ငွေ ဒေါ်လာ ၂၉၈ သန်း ရရှိထားပြီလည်း ဖြစ်ပါတယ်။ ဒါပေမဲ့ သူ့အရင်ရုပ်ရှင်ဖြစ်တဲ့ “The Secret Life of Pets” က ၂၀၁၆ ခုနှစ်မှာ ဒေါ်လာ ၈၇၅ သန်းရရှိခဲ့တာမို့လို့ ပထမစံချိန်ကို လိုက်မီနိုင်ဖို့ အတော်လေး ကွာဟနေတာကို တွေ့ရပါတယ်။

Ref: variety

You may also like these stories:

ခန့်မှန်းထားတာထက် ဝင်ငွေ ပိုရပြီး စံချိန်တင်ခဲ့တဲ့ “Spider-Man: Far From Home” ရုပ်ရှင်

တောင်ကိုရီးယားနိုင်ငံမှာ ကြည့်ရှုနှုန်း စံချိန်တင်နိုင်ခဲ့တဲ့ “Spider-Man: Far From Home”

အသစ်ထွက်လာမယ့် ‘Spider-Man’ ရုပ်ရှင်မှာ ဗီလိန်အဖြစ် ပါဝင်ထားတဲ့ Jake Gyllenhaal

Iron Man ကို ပြန်အသက်သွင်းပေးရန် Marvel ပရိသတ်များ တောင်းဆို

The post ကမ္ဘာအနှံ့ ရုံဝင်ငွေ အကောင်းဆုံး ပင့်ကူလူသားရုပ်ရှင် ဖြစ်လာတဲ့ “Spider-Man: Far From Home” appeared first on ဧရာဝတီ.

ရုပ်ရှင်နဲ့ ဗီဒီယို ဇာတ်ကားပေါင်းများစွာ ပါဝင်သရုပ်ဆောင်ခဲ့တဲ့ သရုပ်ဆောင် ခင်လှိုင်ကတော့ သူ ငယ်စဉ်အခါက အရမ်းဆင်းရဲခဲ့တာကြောင့် သားသမီးတွေကို လူတန်းစေ့ နေနိုင်အောင် ကြိုးစားခဲ့ရတယ်လို့ ဆိုပါတယ်။

“ကျနော် မချမ်းသာပါဘူး။ ငယ်ငယ်တုန်းက အရမ်းဆင်းရဲခဲ့တော့ ကျနော့် သားသမီးတွေကျရင် လူတန်းစေ့လေး နေနိုင်အောင် ကြိုးစားမယ်ဆိုပြီး ကြိုးစားခဲ့တယ်။ ကျနော့် အမျိုးသမီး တော်တာလည်း ပါတယ်။ သူက စုတတ်လို့ပေါ့။ လှူတာနဲ့ ပတ်သက်ရင်လည်း အမျိုးသမီးက ဘာမှ မပြောပါဘူး။ စားတာလည်း ကောင်းကောင်း ကျွေးပါတယ်”

“ကျနော်တို့က မချမ်းသာပါဘူး။ ကျနော့် မိသားစုကို လူတန်းစေ့ ထားနိုင်တယ်။ ကံကောင်းချင်တော့ ကျနော် အလုပ်တွေ ပါးချိန်မှာ သမီးအလုပ်တွေ ဝင်လာတယ်။ သားကလည်း အလုပ်လေးတွေ အဆင်ပြေနေတယ်။ သားအကြီးကလည်း သူ့အလုပ်နဲ့သူ ရှာဖွေ ကျွေးနိုင်တော့ ကျနော်တို့ ခုသာ ခံသာတော့ ရှိတာပေါ့။ တအိမ်လုံးမှာ တယောက်တည်း ရုန်းရတာထက်စာရင် အကုန်လုံး ဝိုင်းလှော်တော့ မြန်မြန်ရောက်တာပေါ့” လို့ ခင်လှိုင်က ပြောပါတယ်။

တချိန်က အနုပညာလောကမှာ “ခင်လှိုင်”လို့ နာမည်ရှိနေချိန် ဆိုးခဲ့တာတွေကြောင့် အနုပညာလောက ကနေ အဝေးကို လွှင့်သွားခဲ့ဖူးတယ်လို့ ခင်လှိုင်က ပြောပါတယ်။

“ကျနော် တကြိမ် ဒီလောကကနေ လွှင့်သွားဖူးပါတယ်။ ကျနော်က ရိုက်ကွင်းကို အချိန်မှန် မရောက်ဘူး။ အဲ့အချိန်တုန်းကလည်း ခင်လှိုင်ဆိုပြီး နာမည်ရှိနေချိန်၊ အဲ့အချိန်မှာ ကျနော် ဆိုးခဲ့တယ်။ လုပ်ချင်တာလုပ်၊ အချိန်မှန်လည်း မလာဘူး။ အဲ့လို ဖြစ်ရင်း ကျနော့်နေရာကို သူများကို ဖယ်ပေးရတဲ့အချိန် ရောက်လာတယ်။ ကျနော့်ကို လူတွေက ဖယ်လာကြတယ်။ ပညာတော့ ကောင်းတယ်။ ခင်လှိုင်နဲ့ အလုပ်လုပ်ရတာ စိတ်ညစ်တယ်ဆိုတာ ဖြစ်လာတယ်”

“ကျနော် ဇာတ်ကရင်း ၃ နှစ် စဉ်းစားတယ်။ ဒီလောကကို ပြန်ဝင်ရင် ဘယ်လိုပုံစံနဲ့ နေမလဲ၊ ရပ်တည်မလဲ ဆိုပြီး ဆုံးဖြတ်တယ်။ ကျနော် လူကောင်း တယောက်အနေနဲ့ ရပ်တည်မလား၊ ငါနဲ့ အလုပ် လုပ်ချင်လာအောင် ဘယ်လိုလုပ်မလဲဆိုပြီး ကျနော် အချိန်မှန်ခြင်း၊ ကတိတည်ခြင်းတွေ လုပ်တော့မယ်ဆိုပြီး လုပ်လာတယ်။ နောက် အဝတ်အစား ပြင်ဆင်မှုတွေ သေချာလေး ဂရုစိုက်တယ်”

“လုပ်ရမယ့် ကာရိုက်တာကို စေတနာ ထားပြီး လုပ်တယ်။ ထုတ်လုပ်သူတွေက အရင်လို မဟုတ်တော့ဘူး။ အလုပ်လုပ်လို့ ကောင်းလာပြီဆိုပြီး သဘောကျလာတယ်။ နောက် ဘာသာရေးအားတွေလည်း ပါတာပေါ့နော်။ နောက်ပိုင်း ဘာကားပဲ ရိုက်ရိုက်၊ ထုတ်လုပ်သူတွေက ကျနော့်ကို သတိရကြတယ်လို့ ထင်ပါတယ်”လို့ ခင်လှိုင်က ဆိုပါတယ်။

အနုပညာသက်တမ်း ၂၅ နှစ် ကျော်ကို ရောက်ရှိခဲ့ပြီဖြစ်တဲ့ သရုပ်ဆောင် ခင်လှိုင်ကို ဟာသ သရုပ်ဆောင် တယောက်အနေနဲ့ ဗီဒီယို ဇာတ်ကားတွေကနေတဆင့် ပရိသတ်တွေ အားပေးလာခဲ့ကြတာပါ။ သရုပ်ဆောင် ခင်လှိုင်ဟာ အခုလက်ရှိ အချိန်ထိ ပရိသတ် ခိုင်ခိုင်မာမာနဲ့ ရပ်တည်နေတဲ့ သရုပ်ဆောင် တဦးလည်း ဖြစ်ပါတယ်။ ခင်လှိုင်ရဲ့ သားနဲ့ သမီးကလည်း လက်ရှိမှာ သရုပ်ဆောင်အဖြစ်နဲ့ လုပ်ကိုင်လျက် ရှိပါတယ်။

You may also like these stories:

“ဥပဒေနဲ့ ပြင်းပြင်းထန်ထန် အရေးယူရင် ပြစ်မှုကျူးလွန်သူတွေ လျော့သွားမှာပါ”လို့ ခင်လှိုင် ပြော

“ဇဝန” ဖောင်ဒေးရှင်းကနေ လစဉ် လှူဒါန်းမှုတွေ ပြုလုပ်ပေးနေတဲ့ သရုပ်ဆောင် ခင်လှိုင်

“အစ်ကို နှစ်ယောက်ကို ကြည့်ပြီး အချစ်ရေး မစဉ်းစားသေးဘူး”လို့ ပြောတဲ့ သဇင်ထူးမြင့်

သမီးဖြစ်သူကို အနုပညာလောကရဲ့ လောကဓံတွေ မခံနိုင်မှာ စိုးရိမ်တဲ့ ခင်လှိုင်

The post “ငယ်ငယ်တုန်းက ဆင်းရဲခဲ့တော့ သားသမီးတွေ လူတန်းစေ့ နေနိုင်အောင် ကြိုးစားခဲ့ရတယ်” appeared first on ဧရာဝတီ.

သရုပ်ဆောင် ရဲတိုက်ကို မင်းသားတလက် အဖြစ် မွေးထုတ်ပေးခဲ့တဲ့ ဆာတိုရီ ရုပ်ရှင်ထုတ်လုပ်ရေးကနေ နောက်ထပ် သရုပ်ဆောင်အနေနဲ့ နွေဦးကို ထပ်မံ မွေးထုတ်ခဲ့ပြီး နွေဦးကတော့ စီနီယာဖြစ်တဲ့ ရဲတိုက်အပေါ် အမြင်ကို အခုလိုပဲ ပြောပါတယ်။

“ကိုရဲတိုက်က မျက်လုံး အားသာတယ်။ စိတ်ခံစားမှုပေါ်မှာ စီးမျောတဲ့ အားက သာတယ်ဆိုတော့ ကြည့်ရတာ မမြင်ဖူးတဲ့ လူတယောက်ကို မြင်လိုက်ရတယ်။ သူက တခြားအပြင်မှာ ဘယ်လိုနေနေ၊ ရုပ်ရှင်ထဲမှာ ပရိသတ် ကြည့်တဲ့အခါမှာ သူက တကယ့်ကို သရုပ်ဆောင်ကောင်း တယောက်ပဲ။ အဲဒါကိုတော့ ကျနော်ပြောရဲတယ်”လို့ နွေဦးက ပြောပါတယ်။

ရဲတိုက်က ရုပ်ပိုင်းဆိုင်ရာထက် စိတ်ခံစားချက်ကို ပိုဦးစားပေးတဲ့ သူတယောက် ဖြစ်တဲ့အတွက် ရုပ်ပိုင်းဆိုင်ရာ ချို့တဲ့လာတဲ့အခါမှာလည်း စိတ်ခံစားချက်နဲ့ ထိန်းထားနိုင်တဲ့အတွက် သူ့အပေါ် ခံစားချက်က အရင်အတိုင်း ဖြစ်နေတာလို့ နွေဦးက ပြောပါတယ်။

“သူက Physical ထက် Mental ကို အားသာတယ်လို့ ပြောလို့ရတယ်။ သရုပ်ဆောင်တဲ့ အခါကျရင် သူက စိတ်ခံစားချက်ကို ပို ဦးစားပေးတယ်။ ဒီ Physical က ချို့တဲ့လာရင်လည်း သူ့ရဲ့ Mental ပိုင်းနဲ့ ထိန်းထားနိုင်တော့ သူ့ကို ကျနော်တို့ ခံစားရတာ အရင်အတိုင်းပါပဲ” လို့ နွေဦးက ပြောပါတယ်။

နွေဦးကတော့ ရဲတိုက်ရဲ့ ဇာတ်ကားများစွာထဲက “မြစ်” ဆိုတဲ့ ဇာတ်ကားကို ကြိုက်ပြီး အဲဒီဇာတ်ကားမှာ ရဲတိုက်က လွတ်လပ်ပြီး လွှင့်မျောနေတဲ့ လူငယ် တယောက် အနေနဲ့ သရုပ်ဆောင် ပြနိုင်တာကို အံ့သြတယ်လို့ ဆိုပါတယ်။

“သူ့ရဲ့ဇာတ်ကားတွေထဲမှာဆိုရင် “မြစ်” ကို ကျနော်ကြိုက်ပါတယ်။ လွတ်လပ်ပြီးတော့ လွင့်မျောနေတဲ့ လူငယ်လေး တယောက်၊ မတူတဲ့ သရုပ်ဆောင်ချက်တွေကို တူအောင် သရုပ်ဆောင်ရတဲ့၊ သူနဲ့ အလှမ်းအရမ်းဝေးတဲ့ ဇာတ်ကောင်ကို လုပ်ပြသွားနိုင်တာ အရမ်းအံ့သြတယ်။ ရိုက်ချက်တွေရော ဖန်တီးမှုတွေရော အသံပိုင်းမှာရော တကယ်ကို အဓိပ္ပာယ် ရှိတယ်”လို့ နွေဦးကပြောပါတယ်။

မကြာခင်မှာလည်း ဆာတိုရီ ရုပ်ရှင်ထုတ်လုပ်ရေးမှ ရိုက်ကူးမယ့် ရုပ်ရှင်ဇာတ်ကားကြီးမှာတော့ ရဲတိုက်နဲ့ အတူ သရုပ်ဆောင်သွားဖို့ ရှိပြီး နွေဦးရဲ့ပထမဆုံး ရုပ်ရှင်ဇာတ်ကားဖြစ်တယ်လို့လည်း သိရပါတယ်။

“ကျနော်တို့ ရှေ့လထဲလောက်ကို ဆာတိုရီနဲ့ Pre Production ဝင်မယ်။ အခု ဇာတ်ညွှန်း ပြီးသွားပြီ။ နောက်နှစ်လောက်တော့ မြင်ရမယ် ထင်တယ်။ အဲ့ကားကတော့ ကိုရဲတိုက်နဲ့ ကျနော်နဲ့ပေါ့။ ကျနော့်ရဲ့ ပထမဆုံးရုပ်ရှင် ဇာတ်ကားပါ” လို့ နွေဦးကပြောပါတယ်။

နွေဦးကတော့ ဆာတိုရီ ရုပ်ရှင်ထုတ်လုပ်ရေးနဲ့ လက်တွဲလာတာ ကြာခဲ့ပြီဖြစ်ပြီး သူ သရုပ်ဆောင်ဖို့အတွက် အကောင်းဆုံး ဖြစ်မယ်လို့လည်း ယုံကြည်တယ်လို့ ဆိုပါတယ်။ ဆာတိုရီ ရုပ်ရှင်ထုတ်လုပ်ရေးကတော့ ရဲတိုက်ရဲ့ ရုပ်ရှင်ဇာတ်ကားကောင်း များစွာကို ဖန်တီးပေးနိုင်ခဲ့ပြီး ထပ်မံပြီးလည်း နွေဦးအတွက် ရုပ်ရှင်ဇာတ်ကားများ ဖန်တီးပေးတော့မှာပဲ ဖြစ်ပါတယ်။

You may also like these stories:

ကိုယ်တိုင်ရိုက်ချင်တဲ့ ကာရိုက်တာတခုအတွက် ဇာတ်ညွှန်းရေးနေတဲ့ ရဲတိုက်

“ရဲတိုက်ရဲ့ မျက်လုံးတွေကို မကြည့်ရဲအောင် သရုပ်ဆောင် ကောင်းတယ်”လို့ ရွှေထူး ပြော

“အပြင်မှာ အရမ်း အစွဲအလမ်းကြီးပြီး ချစ်တတ်တဲ့သူ တယောက်ပါ”လို့ ပြောတဲ့ ဝတ်မှုံရွှေရည်

The post “ရဲတိုက်က စိတ်ခံစားချက်ကို ဦးစားပေးတဲ့ သရုပ်ဆောင်ပါ”လို့ ပြောတဲ့ နွေဦး appeared first on ဧရာဝတီ.

James Bond ရုပ်ရှင်နဲ့ ပတ်သက်တဲ့ ကောလာဟလတွေ အများကြီး ထွက်ပေါ်နေတဲ့ အထဲကမှ လူမည်းအမျိူးသမီး James Bond ဖြစ်နိုင်ချေ ရှိတယ်ဆိုတဲ့ သတင်းက နာမည်အကြီးဆုံး ဖြစ်နေပါတယ်။

လွန်ခဲ့တဲ့ ၂ လခန့်က ထွက်ရှိခဲ့တဲ့ Captain Marvel ရုပ်ရှင်ဇာတ်ကားမှာ Captain Marvel ရဲ့ သူငယ်ချင်းအဖြစ် သရုပ်ဆောင်ခဲ့သူ မင်းသမီး Lashana Lynch ကို အမျိုးသမီး 007 အဖြစ် တွေ့ရဖို့ ရှိနေတာလည်း ဖြစ်ပါတယ်။ James Bond အနေနဲ့ တွေ့ရမှာမျိုးတော့ မဟုတ်ပေမယ့် M16 ကနေ အနားယူသွားတဲ့ James Bond အစား ဝင်လာမယ့် အမျိုးသမီး အဖြစ်တွေ့မြင်ရမှာပါ။

တာဝန်ရှိသူ တဦးကတော့ “ရုပ်ရှင်ရဲ့ အခရာကျတဲ့ နေရာဖြစ်တဲ့ ဇာတ်လမ်းအစမှာ 007 အသစ်ကို မြင်တွေ့ရမှာ ဖြစ်ပြီး 007 ဟာ လှပကျော့ရှင်းတဲ့ လူမည်းအမျိုးသမီးကို တွေ့မြင်ရမှာပါ။ ဟာခနဲ ဖြစ်သွားမယ်လို့ ယုံကြည်ပါတယ်။ James Bond က James Bond အတိုင်းရှိနေပေမယ့် 007 ကို အမျိုးသမီး အဖြစ်မြင်ရမှာပါ”လို့ ပြောပါတယ်။

၂၅ ကားမြောက် ရုပ်ရှင်အဖြစ် ထွက်ရှိလာမယ့် ဒီရုပ်ရှင်အကြောင်းကို သေသေချာချာ မသိရသေးပေမယ့် ၂၀၂၀ ပြည့်နှစ်ထဲမှာ ရုံတင်သွားဖို့ ရှိနေပါတယ်။ Disney က ထွက်ရှိမယ့် “Little Mermaid” ရုပ်ရှင်ဇာတ်ကားမှာလည်း လူမည်း ရေသူမကို အသုံးပြုသွားမယ်ဆိုတဲ့ သတင်းတွေ ထွက်ရှိပြီးနောက်မှာ အခုလို လူမည်းအမျိုးသမီး James Bond အကြောင်း ကောလာဟလတွေ ထွက်ပေါ်လာတာပဲ ဖြစ်ပါတယ်။

လူမျိုးရေး ခွဲခြားမှုတွေ မရှိအောင် ပြုလုပ်နေတယ်လို့ ပြန်လည် ဖြေရှင်းတာတွေ ရှိနေပေမယ့် သမိုင်းတလျှောက် နာမည်ကြီးခဲ့တဲ့ ဇာတ်ကောင်တွေနေရာမှာ လူမည်းတွေ အလွန်အမင်း သုံးနေတာမျိုးကိုတော့ ဟောလိဝုဒ် အနေနဲ့ ဝေဖန်ခံနေရပါတယ်။ လူမည်းတွေ အနေနဲ့လည်း အခုလို ပြုလုပ်နေတာကို အပို ပြုလုပ်နေတယ်ဆိုတဲ့ အကြောင်းကို ဗီဒီယိုတွေ ရိုက်ကူးပြီး လှောင်ပြောင်နေတာကို တွေ့ရပါတယ်။

Ref. comicbook.com

You May Also Like These Stories:

ဂျိမ်းစ်ဘွန်းမင်းသားသစ်အဖြစ် Tom Hardy ကို သရုပ်ဆောင်စေချင်တဲ့ မင်းသား Pierce Brosnan

ဂျိမ်းစ်ဘွန်းနေရာမှာ ဘယ်တော့မှ အမျိုးသမီး ဖြစ်မလာနိုင်ဘူးလို့ ထုတ်လုပ်သူ ပြောကြား

The post နောက်ထွက်မယ့် James Bond ရုပ်ရှင်မှာ လူမည်းအမျိုးသမီး 007 ကို တွေ့မြင်ရဖွယ်ရှိ appeared first on ဧရာဝတီ.

မကြာခင် ရုံတင် ပြသတော့မယ့် “ကြိမ်နှုန်း” (Frequency) ရုပ်ရှင်နဲ့ ပတ်သက်ပြီး အဲ့ဒီရုပ်ရှင်ကို ရိုက်ကူးခဲ့တဲ့ လူငယ် ဒါရိုက်တာ ခန့်မာန်ထည်က အခုလိုပဲ ပြောပါတယ်။

“ကျနော် ပြင်ဦးလွင်သွားပြီး ရွှေစံအိမ်မှာ တည်းတုန်းက အနောက်ဖက်မှာ Governor’s House ရှိတော့အဲ့ကို သွားခဲ့တယ်။ အရင်တုန်းကလည်း ကျနော်လုပ်လက်စ ဇာတ်အပိုင်းအစတွေ ရှိတယ်။ အဲ့အပိုင်းအစတွေနဲ့ ကြိမ်နှုန်း ဇာတ်ကားကို ဖန်တီးဖြစ်ခဲ့တာပါ”လို့ ဒါရိုက်တာ ခန့်မာန်ထည်က ပြောပါတယ်။

“ကြိမ်နှုန်းဆိုတာ ဝိညာဉ်လောကနဲ့ လူ့လောကကြားထဲက တံခါးတချပ်လို့ ပြောလို့ ရတယ်။ ပြင်ဦးလွင်က အိမ်မှာပဲ ရိုက်ကူးရေးက ၉၀ ရာခိုင်နှုန်းလောက် ပါတယ်။ ၁၀ ရာခိုင်နှုန်းက ရန်ကုန်မှာ ရိုက်တယ်။ ဇာတ်ကား ရိုက်ကူးချိန် ပရလောကသားတွေနဲ့ ဘာမှ တွေ့ကြုံတာတွေ မရှိပါဘူး။ တခြားသူတွေတော့ ကြားရ၊ တွေ့ရတယ်လို့တော့ ပြောတယ်”

“နိုင်ငံခြားနဲ့ လုပ်ရတာတော့ အများကြီး အတွေ့အကြုံတွေ ရတာပေါ့။ ဒီကား ရုံမတင်ခင်ကတည်းက ပရိသတ်အားပေးမှု ရရှိတဲ့အတွက်လည်း အရမ်း ဝမ်းသာရပါတယ်။ နောက်ရိုက်မယ့် ဇာတ်ကားတွေလည်း ရှိပါတယ်။ အဲ့ကားတွေလည်း Horror အမျိုးအစားတွေပါပဲ”လို့ ဒါရိုက်တာ ခန့်မာန်ထည်က ဆိုပါတယ်။

ကိုယ်တိုင်ကလည်း ဒါရိုက်တာအသစ် ဖြစ်သလို သရုပ်ဆောင် အသစ်တွေကိုလည်း အနုပညာလောကမှာ နေရာ တနေရာ ရစေချင်တာကြောင့် ထည့်သွင်း ရိုက်ကူးဖြစ်တယ်လို့ သူက ပြောပါတယ်။

“စိတ်ဖိစီးမှုတွေကတော့ ရှိခဲ့တယ်။ မခိုင်ကြီးရော၊ မအူဝဲရောက တချိန်က ကျနော် သူတို့ရဲ့ ပရိသတ်၊ အခုချိန်မှာတော့ အစ်မတို့နဲ့ လက်တွဲခွင့်ရခဲ့တာက ကျနော့်အတွက် အရမ်းစိတ်လှုပ်ရှားဖို့ ကောင်းတယ်။ ဇာတ်ကောင်တွေအတွက် ဇာတ်လမ်းပေါ်မှာပဲ မူတည်ပြီး စဉ်းစားခဲ့ပါတယ်။ သရုပ်ဆောင်အသစ်တွေလည်း ပါတော့ သူတို့တွေလည်း အခက်အခဲ မဖြစ်အောင် သူတို့ကို Casting ရွေးတယ်”

“မော်လမြိုင်ရယ်၊ မန္တလေးရယ်၊ ရန်ကုန်မှာရယ် ရွေးပြီးတော့ သူတို့ကို Training ၆ လ ဝင်ပြီးမှ ရိုက်ကူးရေး စခဲ့တာပေါ့။ အသစ်တွေကို ထည့်ဖြစ်တာက ကျနော် ကိုယ်တိုင်ကလည်း အသစ်လေ။ အနုပညာလောကမှာ နေရာ တနေရာ ရချင်ကြတယ်။ အဲ့အတွက် လူငယ်တွေကို နေရာ တနေရာ ရစေချင်တဲ့ စိတ်နဲ့ SY Film Production က လုပ်ပေးတာပါ”လို့ ဒါရိုက်တာ ခန့်မာန်ထည်က ပြောပါတယ်။

“ကြိမ်နှုန်း” ရုပ်ရှင်ဇာတ်ကားကြီးကို ဇူလိုင်လ ၁၈ ရက်နေ့မှ စပြီး မြန်မာတနိုင်ငံလုံးက ရုပ်ရှင်ရုံတွေမှာ ရုံတင်ပြသသွားမှာ ဖြစ်ပါတယ်။ ဒီဇာတ်ကားကိုတော့ ဒါရိုက်တာ ခန့်မာန်ထည် ရိုက်ကူးပြီး သရုပ်ဆောင် ထွန်းအိန္ဒြာဗို၊ အိန္ဒြာကျော်ဇင်တို့နဲ့ အတူ သရုပ်ဆောင်သစ်များစွာ ပါဝင် သရုပ်ဆောင်ထားကြပါတယ်။

The post ဒါရိုက်တာ ခန့်မာန်ထည် ပြောပြတဲ့ “ကြိမ်နှုန်း” ရုပ်ရှင်ကားအကြောင်း appeared first on ဧရာဝတီ.

ရုပ်ရှင်ဇာတ်ကားများကို အချိန်ကာလ အတော်ကြာ ရိုက်ကူးမှု မလုပ်တာ ကြာပြီဖြစ်တဲ့ သရုပ်ဆောင် အကယ်ဒမီ ပန်းဖြူကတော့ သရုပ်ဆောင် မလုပ်တော့တဲ့အတွက် သရုပ်ဆောင်ချင်တဲ့ပိုး ပေါ်လာရင် မျိုသိပ်ထားရတယ်လို့ ပြောပါတယ်။

“ရုပ်ရှင် ပြန်ရိုက်ဖို့တော့ အစီအစဉ် မရှိပါဘူး။ ကျမ အမျိုးသားရဲ့ အလုပ်တွေကိုပဲ ဝိုင်းကူ လုပ်ပေးနေတာပါ။ သူ့ရဲ့ ကားထဲထည့်တဲ့ ဆီသန့်ဆေးတို့ ဘာတို့ သွင်းတာတွေ ရှိတယ်။ အဲဒါတွေကိုပဲ သူ့ကို ဝိုင်းကူ လုပ်ပေးတာပါ။ ပိုးက ပေါ်လာရင်လည်း ပေါ်လာမှာပေါ့။ မျိုသိပ် ထားရမှာပေါ့”လို့ ပန်းဖြူက ပြောပါတယ်။

ပန်းဖြူတို့ ခေတ်က ဖြတ်သန်းခဲ့တဲ့ ခေတ်ဟာ ဖလင်ခေတ် ဖြစ်ခဲ့တဲ့အတွက် စိတ်ဖိစီးမှု များစွာဖြစ်ခဲ့ပြီး ယနေ့ခေတ် လူငယ်တွေကတော့ လွတ်လွတ်လပ်လပ် သရုပ်ဆောင်နိုင်ကြတယ်လို့ ပြောပါတယ်။

“ကျမတို့တုန်းကဆိုရင် ဖိစီးမှု များသလိုပဲ။ အခုခေတ်ကလေးတွေ သရုပ်ဆောင်ရတာ အရမ်း လွတ်လပ်တယ်။ ကျမတို့ ခေတ်က ဖလင်နဲ့ လုပ်ကြရတာဆိုတော့ ဖလင်ရဲ့ ကုန်ကျစရိတ်ကလည်း ကြီးမားတယ်။ အဲ့အပေါ်မှာလည်း စိတ်ဖိစီးမှုတွေ ရှိတယ်။ အခုကျတော့ လွတ်လွတ်လပ်လပ် သရုပ်ဆောင်လို့ရတော့ သူတို့လေးတွေ သရုပ်ဆောင်တာလည်း အရမ်းကောင်းတယ်”လို့ ပန်းဖြူက ပြောပါတယ်။

မြန်မာရုပ်ရှင်ဇာတ်ကားများ နိုင်ငံတကာမှာ သွားရောက် ပြသခွင့် ရတဲ့အပေါ်မှာ “မြန်မာရုပ်ရှင်ကား သရုပ်ဆောင်မှုတွေကို ဒီနိုင်ငံတကာက မြင်တွေ့ခွင့်ရတယ်ဆိုတာ ကျမတို့အတွက် ဂုဏ်ယူစရာပေါ့။ အနုပညာလောကအတွက်လည်း ခြေလှမ်းအသစ်တွေ ဖြစ်တာပေါ့။ ကောင်းပါတယ်”လို့ ပန်းဖြူက ဆိုပါတယ်။

မြန်မာ့ရုပ်ရှင်လောကဟာ အရင်ကနဲ့ မတူတော့ဘဲ ရုံ အပြိုင်အဆိုင် တင်မှုများ၊ တခြားသော ပြိုင်ဆိုင်မှုများနဲ့ ပြည့်နက်နေပြီး အဆိုပါ အကြောင်းအရာများကိုတော့ ကောင်းတဲ့ တိုးတက်မှုတွေ ဖြစ်တယ်လို့ ပန်းဖြူက ဆိုပါတယ်။

“ကောင်းတဲ့ဘက်ကနေ တွေးရင် တိုးတက်မှုလို့ပဲ မြင်ပါတယ်။ ဆုတ်ယုတ်မှုကတော့ အခုထိ မတွေ့သေးဘူး။ အပြိုင်အဆိုတွေ ရှိလာတဲ့အပေါ်မှာ ဆုတ်ယုတ်မှုလို့ ပြောချင်ပြောကြမယ်ပေါ့။ ဒါပေမဲ့ အပြိုင်အဆိုင်တွေက ကောင်းသော ပြိုင်ဆိုင်ခြင်းတွေပေါ့။ ကျမကတော့ အားပေးတယ်” လို့ ပန်းဖြူကပြောပါတယ်။

သရုပ်ဆောင် အကယ်ဒမီ ပန်းဖြူကတော့ အနုပညာလောကထဲက အနားယူခဲ့ပြီး နောက်ပိုင်း Body Shamimg လုပ်ခံရတဲ့ အကြောင်း ရိုက်ကူးထားတဲ့ “ဂယက်တွေ ပါဟယ်” ရုပ်ရှင်ဇာတ်ကားထဲမှာ ပါဝင် သရုပ်ဆောင်ခဲ့ပါတယ်။

You may also like these stories:

အနုပညာနဲ့ ပတ်သက်ရင် အိုက်တင်တွေပဲ လုပ်ချင်နေတဲ့ ဆုပန်ထွာ

သက်ငယ်မုဒိမ်းမှုနဲ့ ပတ်သက်ပြီး ပညာပေးရုပ်ရှင်တွေ ရိုက်ကူးထားတဲ့ နေတိုး

The post “သရုပ်ဆောင်ပိုး ပေါ်လာရင် မျိုသိပ်ထားရတယ်”လို့ ပန်းဖြူ ပြော appeared first on ဧရာဝတီ.

ဖိုက်စတား လူရွှင်တော်အဖွဲ့မှ လူရွှင်တော် အောင်သော်ဟာ သက်ကြီး သဘင်ပညာရှင်များကို တတ်နိုင်သလောက် ကူညီပေးနေပြီး သူ့အနေနဲ့ ရန်ကုန်မြို့၊ လှိုင်သာယာမြို့နယ်ဘက်မှာ လူနာတင်ယာဉ် မတည်ကာ အခမဲ့ ကူညီမှုများ ပြုလုပ်ပေးနေတယ်လို့ သိရပါတယ်။

“ကျနော့်အနေနဲ့ အမှန်တကယ် လိုအပ်နေတဲ့ သက်ကြီးပညာရှင်တွေကို ကျန်းမာရေးအတွက် ဆေးဖိုးဝါးခတွေကို ကူညီပေးနေပါတယ်။ နောက်ပြီး ကျနော် ဦးစီးပြီးတော့ လှိုင်သာယာဘက်မှာ လူနာတင်ယာဉ် ထောင်ထားပါတယ်။ အဲဒီကားနဲ့ပဲ သဘင်သမားတွေတင် မကပါဘူး၊ ပရိသတ်တွေထဲက တကယ် မသွားနိုင်၊ မလာနိုင်ဖြစ်နေတဲ့သူတွေနဲ့ လိုအပ်နေသူတွေကို အခမဲ့ စနစ်နဲ့ ကူညီပေးနေပါတယ်”လို့ လူရွှင်တော် အောင်သော်က ဧရာဝတီကို ပြောပါတယ်။

ဒါ့အပြင် လူရွှင်တော် အောင်သော်ဟာ လွန်ခဲ့သော လပိုင်းအတွင်းက လူမှုကွန်ရက် စာမျက်နှာမှာ ပျံ့နှံခဲ့တဲ့ မန္တလေးမြို့မှာ တောင်းရမ်း စာသောက်နေရတယ်ဆိုတဲ့ လူရွှင်တော်ကြီး ဦးတိုင်းကျော်ကိုလည်း မြင်ဆရာ၊ ကြားဆရာအနေနဲ့ သတ်မှတ်ထားတယ်လို့ ဆိုပါတယ်။

“လူရွှင်တော် တော်တော်များများက သေတဲ့အထိ ဇာတ်ထဲမှာ နေထိုင်သွားကြတာ များပါတယ်။ ဦးတိုင်းကျော်ဆိုတာ ကျနော်တို့ရဲ့ ဆရာပါပဲ။ သင်ဆရာ၊ မြင်ဆရာ၊ ကြားဆရာထဲမှာ ပါတယ်ပေါ့နော်။ သူ့ဆီကနေ ပညာ မယူဘူးပေမယ့် မြင်ဆရာ ကြားဆရာထဲမှာတော့ ပါပါတယ်။ ဘဘ ဦးတိုင်းကျော်အနေနဲ့ ဘယ်လိုနည်းနဲ့ပဲ စီးပွားရေးရှာရှာ သဘင်ရဲ့ ပုံရိပ်တခုကတော့ ညှိုးနွမ်းသွားတာတော့ အမှန်ပါပဲ”လို့ လူရွှင်တော် အောင်သော်က ပြောပါတယ်။

သက်ကြီး သဘင်ပညာရှင်များကို ကူညီရာမှာ အမှန်တကယ် လိုအပ်နေသူများအား ကူညီမှုပေးပါက ပိုပြီး ထိရောက်တဲ့ ကူညီမှုဖြစ်တယ်လို့ အောင်သော်က ဆိုပါတယ်။

“နောက်တခုက ခြေထောက် ၂ ဖက် မသန်တဲ့ မင်းသမီးကြီး တလက်ဆီကို ကျနော်ကိုယ်တိုင် မြင်းခြံဘက်ကို သွားခဲ့ဖူးပါတယ်။ ခြေထောက်၂ ဖက် မသန်ပေမယ့် သူ ဈေးရောင်းစားနေတယ်။ သူ့မှာ အသက် ၅၀ ကျော် ရှိပြီဖြစ်တဲ့ ကျပ်မပြည့်တဲ့ သားတယောက် ရှိတယ်။ အဲဒီ သားကို ဈေးရောင်းပြီး ရှာကျွေးနေတာ ဖြစ်တယ်။ ဆိုတော့ နှိုင်းယှဉ်ကြည့်လိုက်ပါ။ တကယ့် တကယ်တမ်းမှာဆိုရင် အဲဒီလိုဖြစ်နေတဲ့ သူမျိုးကို ကူညီထိုက်ပါတယ်။ ကျနော်တို့ သဘင်သမားတွေအတွက် ပိုပြီး ကုသိုလ်ရမယ်လို့ ထင်ပါတယ်”လို့ အောင်သော်က ပြောပါတယ်။

အနုပညာလောကမှာ အချိန်တော်ကြာ ရပ်တည်နေတဲ့ ဟာသ သရုပ်ဆောင်၊ လူရွှင်တော် အောင်သော်ဟာ လူရွှင်တော်အဖြစ် လုပ်ကိုင်ခဲ့ပြီး ဗီဒီယို၊ ရုပ်ရှင် ဇာတ်လမ်းတွဲများမှာလည်း သရုပ်ဆောင်အနေနဲ့ လုပ်ကိုင်လျက် ရှိပါတယ်။ လူရွှင်တော် အောင်သော်ဟာ လက်ရှိအချိန်ထိ 5 Star လူရွှင်တော်အဖွဲ့မှာ လူရွှင်တော် ကျင်ဝှက်၊ ကြာစိ၊ အောင်မော်၊ မျောက်ရှုံးတို့နဲ့အတူ ကပြဖျော်ဖြေလျက် ရှိတယ်လို့ သိရပါတယ်။

You may also like these stories:

လူရွှင်တော် သက်ကြီးပူဇော်ပွဲ ကျင်းပပြုလုပ်မည်

သက်ကြီးပန်းချီဆရာ ပူဇော်ပွဲ မန္တလေးတွင် ပထမဆုံးအကြိမ် ကျင်းပမည်

“ငယ်ငယ်တုန်းက ဆင်းရဲခဲ့တော့ သားသမီးတွေ လူတန်းစေ့ နေနိုင်အောင် ကြိုးစားခဲ့ရတယ်”

The post သက်ကြီးသဘင်ပညာရှင်များကို တတ်နိုင်သလောက် ကူညီပေးနေတဲ့ လူရွှင်တော် အောင်သော် appeared first on ဧရာဝတီ.

Netflix ကုမ္ပဏီဟာ နာမည်ကျော် “13 Reasons Why” စီးရီးတွဲထဲက အငြင်းပွားဖွယ် ဇာတ်ဝင်ခန်း ဖြစ်တဲ့ ကိုယ့်ကိုယ်ကို အဆုံးစီရင်တဲ့ ဇာတ်ဝင်ခန်းကို ဆေးပညာဆိုင်ရာ ကျွမ်းကျင်သူတွေထံက အကြံဉာဏ်အတိုင်း ပယ်ဖျက်လိုက်ပြီလို့ ကုမ္ပဏီရဲ့ Twitter အကောင့်မှာ ဇူလိုင်လ ၁၆ ရက်နေ့က ဖော်ပြထားပါတယ်။

နာမည်တူ ဝတ္ထုကို အခြေခံထားတဲ့ အဲ့ဒီစီးရီးရဲ့ Season 1 နောက်ဆုံးအပိုင်းမှာ ဇာတ်ဆောင်တဦးဟာ ကိုယ့်ကိုယ်ကို အဆုံးစီရင်တဲ့ ဇာတ်ဝင်ခန်းကို ပါဝင် သရုပ်ဆောင်ထားပါတယ်။ ဇာတ်ကားထဲက ဇာတ်ကောင် Hannah ဟာ ရေချိုးဇလုံထဲမှာ လက်ကောက်ဝတ်ကို လှီးဖြတ်တဲ့ ဇာတ်ဝင်ခန်း ပါဝင်ခဲ့တာ ဖြစ်ပါတယ်။

An update on 13 Reasons Why

If you or someone you know needs help finding crisis resources please visit https://t.co/cNtjtuNG1p pic.twitter.com/SxGjbYpZF6

— Netflix US (@netflix) July 16, 2019

Netflix မှ ကိုယ်စားလှယ်တဦးကတော့ အခုလိုမျိုး ဇာတ်ဝင်ခန်း ပယ်ဖျက်လိုက်တဲ့ အကြောင်းနဲ့ ပတ်သက်ပြီး မှတ်ချက် တစုံတရာပေး ပြောကြားသွားတာမျိုး မရှိသေးပါဘူူး။ ကုမ္ပဏီကတော့ ဆေးပညာဆိုင်ရာ ကျွမ်းကျင်သူတွေရဲ့ အကြံပေးချက်အရ ဖန်တီးရှင် Brian Yorkey နဲ့ “13 Reasons Why” ရဲ့ ထုတ်လုပ်သူတွေဟာ ဇာတ်ကောင် Hannah ကိုယ့်ကိုယ်ကို အဆုံးစီရင်လိုက်တယ်ဆိုတဲ့ ဇာတ်ဝင်ခန်းကို တည်းဖြတ်လိုက်ဖို့ ဆုံးဖြတ်ခဲ့ကြကြောင်း Twitter မှာ ကြေညာခဲ့ပါတယ်။

အဲ့ဒီစီးရီးကို စတင်ပြသစဉ်ကတည်း Parents Television Council (PTC) အပါအဝင် ဝေဖန်ရေးအဖွဲ့တွေက ဆယ်ကျော်သက်တွေ ကိုယ့်ကိုယ်ကို အဆုံးစီရင်မှုကို အထူးဦးစားပေး ပြသထားတယ်ဆိုပြီး ပြောဆိုကန့်ကွက်တာမျိုးတွေ ရှိခဲ့ပါတယ်။

အဲ့ဒီ စီးရီးတတွဲလုံးကို ဖြုတ်ချပေးဖို့ Netflix ကို တိုက်တွန်းခဲ့ဖူးတဲ့ PTC အဖွဲ့ကတော့ အခုလိုမျိုး ဇာတ်ဝင်ခန်း ပယ်ဖျက်မှုအတွက် ချီးကျူးပြောဆိုခဲ့ပါတယ်။ အဲ့ဒီအဖွဲ့က “Netflix ဟာ ကလေးတွေအပေါ် သက်ရောက်မှုရှိနိုင်တဲ့ ’13 Reasons Why’ ထဲက ကိုယ့်ကိုယ်ကို အဆုံးစီရင်တဲ့ ဇာတ်ဝင်ခန်းလိုမျိုး အကဲဆတ်တဲ့အကြောင်းအရာဟာ ထိခိုက်မှုရှိတဲ့ အကျိုးသက်ရောက်မှု ဖြစ်နေတယ်ဆိုတာကို နောက်ဆုံးတော့ သဘောပေါက်သွားပါပြီ”လို့ ပြောပါတယ်။

အမေရိကန်လေ့လာရေးအဖွဲ့ တဖွဲ့ရဲ့အဆိုအရ အဲ့ဒီစီးရီးကို ပြသခဲ့တဲ့ ၂၀၁၇ ခုနှစ် နှောင်းပိုင်းကစလို့ အမေရိကန်လူငယ်တွေ ကိုယ့်ကိုယ်ကို သတ်သေမှုနှုန်းဟာ ၃ ပုံ ၁ ပုံလောက် မြင့်တက်လာတယ်လို့ ဖော်ပြထားပါတယ်။

အမျိုးသားကျန်းမာရေး အင်စတီကျူရဲ့ လေ့လာချက်မှာတော့ ၂၀၁၇ ခုနှစ်၊ ဧပြီလမှာ အသက် ၁၀ နှစ်ကနေ ၁၇ နှစ်အထိ ရှိတဲ့အမေရိကန် လူငယ်တွေကြား ကိုယ့်ကိုယ်ကို အဆုံးစီရင်နှုန်းဟာ ၂၈ ဒဿမ ၉ ရာခိုင်နှုန်း မြင့်တက်လာခဲ့တယ်လို့ ဆိုပါတယ်။ ၂၀၁၇ ခုနှစ်၊ ဧပြီလကနေ ဒီဇင်ဘာလအထိ အဲ့ဒီ အသက်အရွယ်တွေကြားမှာ ကိုယ့်ကိုယ်ကို အဆုံးစီရင်တဲ့ အကြိမ်ရေ ၁၉၅ ကြိမ် ရှိခဲ့ပါတယ်။

“13 Reasons Why” ရဲ့ ဒုတိယမြောက် Season ကို ၂၀၁၈ ခုနှစ်၊ မေလမှာ ဖြန့်ချိခဲ့ပြီး တတိယမြောက် Season ကိုလည်း ပြသဖို့ စီစဉ်နေပြီ ဖြစ်ပါတယ်။

Ref. Asiaone

You may also like these stories:

13 Reasons Why တီဗီစီးရီး ကြည့်ရှုပြီး အမေရိကန်လူငယ်တွေ ကိုယ့်ကိုယ်ကို သတ်သေမှုနှုန်း မြင့်တက်

“13 Reasons Why” မှာ နောက်ထပ် မပါဝင်နိုင်တော့တဲ့ မင်းသမီး Katherine Langford

Netflix မှာ ကြည့်ရှုသူ စံချိန်တင်ခဲ့တဲ့ “Stranger Things Season 3”

Kingdom စီးရီး Season 2 အတွက် ဓာတ်ပုံများထွက်ပေါ်လာ

The post “13 Reasons Why” စီးရီးမှ ကိုယ့်ကိုယ်ကို အဆုံးစီရင်တဲ့ ဇာတ်ဝင်ခန်းကို Netflix ပယ်ဖျက် appeared first on ဧရာဝတီ.

“The Little Mermaid” ရုပ်ရှင်ထုတ်လုပ်ရေး အဖွဲ့သားတွေကဟာ မင်းသား Eric နေရာမှာ သရုပ်ဆောင်ဖို့ တက်သစ်စ လူငယ်တဦးကို ရှာဖွေနေတယ်လို့ သိရပါတယ်။ လောလောဆယ်တော့ အဆိုတော်၊ မင်းသား Harry Styles ဟာ Disney ရဲ့ ရေအောက် စွန့်စားခန်းရုပ်ရှင်မှာ Prince Eric အဖြစ် သရုပ်ဆောင်ဖို့ ကနဦးဆွေးနွေးမှုတွေ လုပ်ဆောင်နေတယ်လို့ ဆိုပါတယ်။

One Direction အဖွဲ့ဝင်ဟောင်း Harry ဟာ ၂၀၁၇ ခုနှစ်တုန်းက “Dunkirk” ရုပ်ရှင်မှာ ပွဲဦးထွက် ပါဝင်ခဲ့ပြီးနောက် သူ့ရဲ့ အနုပညာ သရုပ်ဆောင်မှုနဲ့ ပတ်သက်လို့ အကောင်းမြင် မှတ်ချက် ပေးခံခဲ့ရသူလည်း ဖြစ်ပါတယ်။ သူ့ရဲ့ အသံစွမ်းရည်နဲ့ ရုပ်ရည်ချောမောမှုတို့ဟာ “The Little Mermaid” ရုပ်ရှင်ထဲက ဇာတ်ရုပ်နဲ့ လိုက်ဖက်ညီတယ်လို့လည်း ဆိုပါတယ်။

Chloe x Halle အဖွဲ့မှ အဆိုတော် Halle Bailey ကတော့ အဓိကဇာတ်ဆောင် ရေသူမလေး Ariel အဖြစ် သရုပ်ဆောင်မှာ ဖြစ်ပါမယ်။ မင်းသမီး Melissa McCarthy ကတော့ ဗီလိန် ရေဘဝဲစုန်းမကြီး Ursula အဖြစ် သရုပ်ဆောင်မယ်လို့ ကောလာဟလ ထွက်နေပါတယ်။

ကနေဒါ မင်းသား Jacob Tremblay ကတော့ ငါးလေး Flounder အဖြစ် သရုပ်ဆောင်မယ်လို့ ယူဆရပြီး “Crazy Rich Asians” ရုပ်ရှင်စတား Awkwafina ကတော့ ဝံပိုငှက် Scuttle အဖြစ် သရုပ်ဆောင်ဖို့ ဆွေးနွေးနေပါတယ်။ ကဏန်းလေး Sebastian နဲ့ ဘုရင် Triton နေရာမှာ သရုပ်ဆောင်ဖို့ အခုထိတော့ လူမရွေးရသေးဘူးလို့လည်း သိရပါတယ်။

ကာတွန်းရုပ်ရှင်ကနေ လူသား သရုပ်ဆောင်တွေနဲ့ ပြန်ဖန်တီးမယ့် “The Little Mermaid” ရုပ်ရှင်ကို ဒါရိုက်တာ Rob Marshall က ရိုက်ကူးမှာ ဖြစ်ပါတယ်။ “Moana” ရုပ်ရှင်တွေ သီချင်းတွေကို Lin-Manuel Miranda ကတော့ အခုရုပ်ရှင်အတွက် Alan Menken နဲ့အတူ သီချင်းတွေကို ဖန်တီးပေးမှာ ဖြစ်ပါတယ်။

ရုပ်ရှင်ထုတ်လုပ်ရေး လုပ်ငန်းတွေကိုတော့ လာမယ့် အစောပိုင်းမှာ စတင်မယ်လို့ မျှော်လင့်ရပါတယ်။ မိန်းကလေး ပရိသတ်တွေရဲ့ တောင်းဆိုမှုထဲမှာတော့ Prince Eric အဖြစ် BTS အဖွဲ့ဝင် Jimin ကိုလည်း သရုပ်ဆောင်စေချင်တယ်လို့ တွေ့ရပါတယ်။

Ref: etcanada

The post “The Little Mermaid” ရုပ်ရှင်မှာ Prince Eric အဖြစ် Harry Styles သရုပ်ဆောင်နိုင်ဖွယ်ရှိ appeared first on ဧရာဝတီ.

PurplePort လို့ ခေါ်တဲ့ လူမှုကွန်ရက်ဟာ Facebook ၊ Instagram စတဲ့ လူမှုကွန်ရက်တွေလိုပဲ ဓာတ်ပုံ၊ ဗီဒီယိုတွေကို တင်ရတဲ့ လူမှုကွန်ရက်ဖြစ်ပြီး မော်ဒယ်၊ မိတ်ကပ်ပညာရှင်နဲ့ ဓာတ်ပုံဆရာတွေ အသုံးများပါတယ်။

အဲဒီ PurplePort လူမှုကွန်ရက်မှာ လတ်တလော ရေပန်းစားနေသူကတော့ အင်္ဂလန်နိုင်ငံမှာ နေထိုင်တဲ့ အသက် ၅၀ ကျော်အရွယ် အမျိုးသား မော်ဒယ်တဦး ဖြစ်တဲ့ Pip ပဲ ဖြစ်ပါတယ်။ သူဟာ မော်ဒယ်အဖြစ် လုပ်ကိုင်နေတာ အချိန်ကာလ ၄ နှစ်ရှိပြီ ဖြစ်ပြီး သူ အသက် ၅၀ ပြည့်ပြီးနောက်ပိုင်းမှ မော်ဒယ်အလုပ်ကို စတင် လုပ်ကိုင် ဖြစ်ခဲ့တာလို့ သိရပါတယ်။

“Pip The Gentleman”လို့ လူသိများတဲ့ သူဟာ ဖက်ရှင် တက္ကသိုလ် ၂ ခုမှာ လူငယ်တွေကို သင်ကြားပေးနေသူ ဖြစ်ပြီး ကျောင်းသားတွေ ထုတ်တဲ့ မဂ္ဂဇင်းတစောင်မှာ ဖက်ရှင်ပိုင်းကို စိတ်ဝင်စားတဲ့ သက်လတ်ပိုင်း အမျိုးသားတယောက် လိုအပ်တာကြောင့် ကူညီပေးရင်း မော်ဒယ် လုပ်ဖြစ်ခဲ့တာလို့ သိရပါတယ်။ မော်ဒယ် ကိုယ်စားလှယ် လုပ်ငန်းတခုကနေ သူ့ကို သဘောကျပြီး စာချုပ်ချုပ်ခဲ့ပြီးနောက် Pip ဟာ မော်ဒယ် လောကကို တရားဝင် ဝင်ရောက်ခဲ့တာ ဖြစ်ပါတယ်။

“ကျနော့်အနေနဲ့ ဒီအလုပ်ကို လုပ်ဖို့ စိတ်ကူး မရှိခဲ့ပါဘူး။ ဒီအသက်အရွယ်ကြီး ရောက်တော့မှ အောင်မြင်လာမယ်ဆိုတဲ့ မျှော်လင့်ချက်လည်း မထားခဲ့တာ အမှန်ပါပဲ။ ဒီအလုပ်ကို စတင်လုပ်ပြီးနောက်မှ ဖန်တီးမှုစွမ်းရည်နဲ့ ပျော်ရွှင်မှုတွေ များလာတယ်”လို့ Pip က ပြောပါတယ်။

သူဟာ ဓာတ်ပုံ ရိုက်တဲ့အခါတွေမှာ စိတ်ရောကိုယ်ပါ နှစ်ပြီး ပြုလုပ်လေ့ ရှိတယ်လို့ ဓာတ်ပုံဆရာတွေက မှတ်ချက်ပေးလေ့ ရှိပါတယ်။ မော်ဒယ် ဖြစ်ချင်တဲ့သူတွေအတွက် “ကိုယ်က ဘယ်လို ဓာတ်ပုံ ရိုက်ချင်တယ်၊ ဘာကို ကိုယ်စားပြုတဲ့ မော်ဒယ်ဖြစ်ချင်လဲဆိုတာကို အရင်စဉ်းစားပါ။ ပျော်ပျော်နေပါ။ တီထွင် ဖန်တီးပါ။ အိပ်မက်တွေက တကယ်ဖြစ်လာပါလိမ့်မယ်”လို့ Pip က အကြံပေးထားပါတယ်။

Ref. boredpanda

You may also like these stories:

လူမှုကွန်ရက်မှာ ရေပန်းစားနေတဲ့ ထိုင်းနိုင်ငံက အသက် ၅၆ နှစ်အရွယ် မော်ဒယ်

ပါရီမြို့ဖက်ရှင်ပွဲတွေကို တက်ရောက်ခဲ့ကြတဲ့ ကိုရီးယားနာမည်ကျော် မင်းသားများ

Women In Film Gala ပွဲကို တက်ရောက်တဲ့ ပထမဆုံး ကိုရီးယားမင်းသမီး Claudia Kim

နာမည်မကြီးခင်က ထူးထူးဆန်းဆန်း အလုပ်တွေ လုပ်ခဲ့တဲ့ ကမ္ဘာကျော်များ

The post အသက် ၅၀ ကျော်မှ မော်ဒယ်အလုပ်ကို စတင်ခဲ့တဲ့ အမျိုးသား appeared first on ဧရာဝတီ.

မိခင်ဖြစ်သူရဲ့ ကျန်းမာရေးကြောင့် ရုပ်ရှင်ဇာတ်ကား ရိုက်ကူးမှုများ နည်းပါးသွားခဲ့တဲ့ သရုပ်ဆောင် မိုးဟေကိုဟာ မကြာခင် ရိုက်ကူးမယ့် ရုပ်ရှင်ဇာတ်ကားမှာ နေတိုးနဲ့အတူ တွဲဖက် သရုပ်ဆောင်မှာဖြစ်ပြီး နေတိုးနဲ့ အချိန် ၃ နှစ်ကြာမှ အခုလို ပြန်ဆုံတာလို့ မိုးဟေကိုက ပြောပါတယ်။

“ကားတွေတော့ မရေတွက်ထားမိဘူး။ ဒီကားက မိုးနဲ့ ကိုနေတိုးနဲ့ ၃ နှစ်လောက် ကြာမှ တွေ့တဲ့ ကားပေါ့နော်။ အစ်ကိုက အရမ်းကို တော်တယ်။ ပြောမယ်ဆိုရင်တောင် ပြောလို့ မကုန်ဘူး။ အပြင်မှာလည်း အနေအေးတယ်။ ဇာတ်ကား တကား ရိုက်ပြီဆိုတာနဲ့ ဇာတ်နဲ့လည်း အံဝင်ခွင်ကျ ဖြစ်တယ်ဆိုတော့ အရမ်းတော်ပါတယ်”လို့ မိုးဟေကိုက ပြောပါတယ်။

နေတိုးနဲ့အတူ မိုးဟေကို ပါဝင် သရုပ်ဆောင်မယ့် “ကျွန်တော့်ရဲ့သူ” ရုပ်ရှင်ဇာတ်ကားကိုတော့ မိုးဟေကိုက ဇာတ်လမ်းရဲ့ တင်ပြပုံ ဆန်းကြယ်တဲ့အတွက် စိတ်ဝင်စားပြီး ရိုက်ဖြစ်ခဲ့တာလို့ ဆိုပါတယ်။

“ဇာတ်လမ်းတွေ လာပြောတဲ့အချိန်မှာ ဒီကားက မိုးရဲ့ပထမဆုံး ပြန်ရိုက်ကူးခြင်းပေါ့။ ဇာတ်လမ် းဖတ်လိုက်တယ်။ ရိုက်နေကျဆိုပေမယ့် တင်ပြပုံ ဆန်းကြယ်တယ်။ ဇာတ်လမ်းလေးမှာလည်း အပြောင်းအလဲလေးတွေရှိတော့ မိုးလည်း စိတ်ဝင်စားပြီးတော့ ရိုက်ဖြစ်သွားတာပေါ့”လို့ မိုးဟေကိုက ပြောပါတယ်။

၂၀၁၉ ခုနှစ်အတွင်းမှာတော့ မိုးဟေကိုအနေနဲ့ ဒါရိုက်တာ ဝိုင်း ရိုက်ကူးတဲ့ “ပပဝတီစီရင်ခန်း” ရုပ်ရှင်ဇာတ်ကား ၁ ကားသာ ရိုက်ကူးခဲ့ပြီး မိုးဟေကိုက သူရိုက်ရမယ့် ဇာတ်ကားများကို သူ့ရဲ့အနေအထားနဲ့ လုပ်ရမယ့် ကာရိုက်တာကို ကြည့်ပြီးမှသာ ရိုက်ဖြစ်တယ်လို့ ဆိုပါတယ်။

“ဒီနှစ်ထဲမှာတော့ ကိုဝိုင်းနဲ့ ပပဝတီ စီရင်ခန်း ရိုက်ပါသေးတယ်။ ပြီးသွားတော့ ဇာတ်လမ်းတွေ မကြိုက်ရင်း မကြိုက်ရင်းနဲ့ ငြင်းပြီးတော့မှ ဒီကားကကျတော့ အဘက်ဘက်က ပြည့်စုံနေတယ်။ ငြင်းစရာလည်း မရှိတဲ့အတွက် မိုးကိုယ်တိုင်လည်း ကြိုက်တာကြောင့် ရိုက်ဖြစ်တာပါ”

“အများကြီးပဲ။ အဘက်ဘက်ကို ကြည့်ရတာပေါ့။ တခုတည်းကို ကြည့်လို့ မရဘူး။ ပြီးတော့ မိုးရောက်နေတဲ့ အနေအထားရယ်၊ လုပ်ရမယ့်ကာရိုက်တာကို အရမ်းကြည့်တယ်။ ကာရိုက်တာပိုင်းကို အရမ်းကြည့်ပါတယ်”လို့ မိုးဟေကိုကပြောပါတယ်။

အခုလို ရုပ်ရှင်ဇာတ်ကား ပြန်လည် ရိုက်ကူးဖြစ်တာကလည်း မိခင်ဖြစ်သူရဲ့ကျန်းမာရေး ပြန်လည်ကောင်းမွန်လာတာကြောင့် အနုပညာ အလုပ်များကို အရင်လို ခပ်စိပ်စိပ် လုပ်လာနိုင်ပြီး ပေးရတဲ့ အချိန်အတွက် အကျိုးရှိအောင်လည်း ကောင်းမွန်တာတွေကိုပဲ လုပ်ဖြစ်တယ်လု့ိ သိရပါတယ်။

“အခုလို ရိုက်ကူးဖြစ်တယ်ဆိုတာ ဒီနှစ်ထဲမှာ အမေက ကျန်းမာရေး ကောင်းလာတယ်လေ။ အဲဒီလို အခုနောက်ပိုင်းမှာ အနုပညာအလုပ်တွေ ခပ်စိပ်စိပ် လုပ်လာနိုင်တယ်။ အဓိကကတော့ အမေ့ရဲ့ကျန်းမာရေးကို လျစ်လျူရှုရတယ် ဆိုပေမယ့် ဒီဘက်မှာ ပေးဆပ်လိုက်ရတဲ့ အချိန်သည် ကိုယ်လည်း အကျိုး မယ်။ ပရိသတ်တွေလည်း အကျိုး ရှိမယ်။ နှစ်ဦးနှစ်ဖက် အကျိုးရှိမယ့်ဟာမျိုးတွေ ရိုက်ဖြစ်ပါတယ်”လို့ မိုးဟေကိုက ပြောပါတယ်။

သရုပ်ဆောင် တယောက်ဖြစ်တဲ့အတွက် ကာရိုက်တာကိုတော့ အမျိုးမျိုး ပြောင်းလဲချင်နေပြီး လုပ်ချင်တဲ့ကာရိုက်တာနဲ့ ကွက်တိကျမှသာ ရိုက်ဖြစ်တယ်လို့ သူက ဆိုပါတယ်။

“သရုပ်ဆောင်တွေဖြစ်တဲ့အတွက် ကာရိုက်တာက အမျိုးမျိုးပြောင်းချင်နေတာ။ လာပေးတဲ့ဟာနဲ့ မိုးလုပ်ချင်တာနဲ့ ကွက်တိ ဖြစ်တယ်ဆိုရင် ရိုက်ဖြစ်တယ်။ မလုပ်ချင်သေးဘူး။ မလုပ်နိုင်ဘူး ထင်တဲ့ဟာဆိုရင် မလုပ်ဖြစ်ဘူးပေါ့” လို့ မိုးဟေကိုက ပြောပါတယ်။

မိုးဟေကိုကတော့ မိသားစုအပေါ်သိတတ်တဲ့  သမီးတယောက်ဖြစ်ပြီး မိခင်ဖြစ်သူ ကျန်းမာရေးကြောင့် သူ့ရဲ့ အနုပညာအလုပ်များကို အများကြီး မလုပ်ဖြစ်ဘဲ မကြာသေးခင်ကလည်း သာသနာ့ဘောင် ဝင်ရောက်ခဲ့ပါသေးတယ်။

You may also like these stories:

“အောင်ရဲလင်းနဲ့ မိုးဟေကိုက အောင်မြင်သွားလည်း မပြောင်းလဲဘူး”လို့ ဂျွန်လွင် ပြော

ယနေ့ထိတိုင် ဆွဲဆောင်မှုရှိတဲ့ သရုပ်ဆောင် မိုးဟေကိုရဲ့ လျှို့ဝှက်ချက်

မိုးဟေကို ပြောပြတဲ့ အလှအပနဲ့ ကျန်းမာရေး အကြောင်း

“ကိုယ်ပေးရတဲ့အချိန်နဲ့ တန်တဲ့ဇာတ်ကားမျိုးပဲ ရွေးပြီးရိုက်တော့မယ်”

The post ၃ နှစ်အကြာမှ နေတိုးနဲ့ ရုပ်ရှင်အတူ ပြန်တွဲရိုက်ဖြစ်တဲ့ မိုးဟေကို appeared first on ဧရာဝတီ.

Myanmar Idol Season 1 သီချင်းဆို ပြိုင်ပွဲကနေ ပရိသတ် အားပေးမှု ရရှိလာခဲ့ပြီး ခန္ဓာကိုယ် ပြည့်ပြည့်လေးနဲ့ ချစ်စရာကောင်းတဲ့ အဆိုတော် နင်ဇီမေကတော့ သူ့ရဲ့ ခန္ဓာကိုယ်နဲ့ ပတ်သက်ပြီး နှိမ်ချ ပြောဆိုတဲ့ လူတွေနဲ့ တွေ့ကြုံဖူးတယ်လို့ မီဒီယာများကို ပြောပါတယ်။

“အပြင်မှာတွေ့ရင် မိန်းကလေး အချင်းချင်း Body Shaming လုပ်တာတွေ၊ မထိ တထိ လုပ်တာတွေ ကြုံရတယ်။ အမြဲတမ်း ဘယ်မိန်းကလေးမဆို ကြုံရမှာပဲ။ ညီမကတော့ အဲဒါကို လုံးဝ မကြိုက်ဘူး။ ဒါပေမဲ့ ဘယ်လိုလုပ်လဲ ဆိုတော့ အဲဒါတွေကို Motivation အဖြစ် ယူတယ်။ သူတို့ကို မကောင်းလည်း မပြောဘူး၊ ပြန်လည်း မဆဲဘူး၊ ဒါတွေက ဝိတ်ချမယ့် လူတွေအတွက် Motivation ယူဖို့ အရမ်းလွယ်တယ်”

“အရမ်းပြည့်လာတော့ အဆင်မပြေဘူးဆိုပြီး ဝိတ်ချနေတာ။ အသံနားထောင်ကြတယ် ဆိုပေမယ့် စင်ပေါ်တက်ရတဲ့သူဆိုတော့ ဝိတ်ကို နည်းနည်းလေး ပြန်ထိန်းဖြစ်တာပေါ့။ အစားအသောက်နဲ့ ထိန်းတယ်။ GYM ဆော့ဖို့တော့ ပျင်းတာနဲ့ မသွားဖြစ်ဘူး။ ကတော့ ကတယ်။ ညီမတို့ သူငယ်ချင်းတွေ စုပြီးမှ ဆရာမင်းမင်း ဆီမှာ ကကြတယ်”လို့ အဆိုတော် နင်ဇီမေက ပြောပါတယ်။

ဆက်လက်ပြီး နင်ဇီမေကတော့ ကိုယ်က အစားတလိုင်း ဖြစ်တာကြောင့် သူငယ်ချင်းတွေ စနောက်တာမျိုး ရှိပေမယ့် စိတ်မဆိုးဘူးလို့လည်း ဆိုပါတယ်။

“အစားတလိုင်း သမားတွေရဲ့ စိတ်ခံစားချက်ကတော့ အမြဲတမ်း ကိုယ်နဲ့ အစားနဲ့က တွဲနေတာပေါ့နော်။ အမြဲတမ်း သူငယ်ချင်းတွေက စကြ နောက်ကြတယ်။ အစားဆိုရင် နင်ဇီ ပါမှပေါ့။ ဒီလိုပြောလို့လည်း ဘာမှမဖြစ်ပါဘူး နင်ဇီ ကတော့ ပျော်တယ်”လို့ နင်ဇီမေက ပြောပါတယ်။

နင်ဇီမေက လတ်တလောမှာတော့ အနုပညာ လှုပ်ရှားမှု အနေနဲ့ အဆိုတော် ဆိုဖီယာနဲ့အတူ ပေါင်းပြီး ပရိသတ်တွေ အံ့သြသွားအောင် သီချင်းတပုဒ် ထွက်ဖို့ရှိတယ်လို့ ပြောပါတယ်။

“နင်ဇီ လကုန်လောက်မှာ အတွဲ သီချင်းတပုဒ် ထွက်မယ်။ ပရိသတ်တွေ အရမ်းအံသြသွားရအောင် အစွမ်းကုန် ကြိုးစားထားပါတယ်။ မဆိုဖီယာနဲ့က ပြိုင်ပွဲပြီးကတည်းက စီစဉ်ထားတာ အခုမှ လုပ်ဖြစ်တာပေါ့။ သူကလည်း သူ့လိုင်းနဲ့သူ ရှိပြီးသား နင်ဇီက အဆွေးပေါ့။ တယောက် တမျိုးစီ ဆိုထားတယ်။ မဆိုဖီယာက အရမ်းတော်တယ်”

“Music Video ကတော့ မရိုက်ရသေးဘူး။ MV မှာ အမိုက်စားတော့ အရမ်း မဖြစ်ဘူး ထင်တယ်။ ညီမနဲ့ လိုက်တဲ့ ပုံစံမျိုးရယ်၊ နောက် ပရိသတ်တွေ အမြင်တမျိုး မြင်ရအောင် လုပ်ထားတယ်။ သီချင်းလေး ထွက်လာရင် အားပေးကြပါလို့။ မဆိုဖီယာရယ်၊ နင်ဇီရယ် အကောင်းဆုံး ကြိုးစားထားပါတယ်”လို့ နင်ဇီမေက ပြောပါတယ်။

အဆိုတော် နင်ဇီမေဟာ Myanmar Idol Season 1 သီချင်းဆို ပြိုင်ပွဲပြီးကတည်းက ဂီတအလုပ်တွေ ဆက်တိုက် လုပ်နေပြီး ပြိုင်ပွဲကြီး ပြီးသွားတဲ့ နောက်မှာလည်း ဖျော်ဖြေပွဲတွေမှာ ပါဝင်သီဆိုနေရသလို တကိုယ်တော်ခွေ “NIN ZI MAY” ဆိုတဲ့ တေးစီးရီးလည်း ထွက်ရှိထားပါတယ်။

You may also like these stories:

ခန္ဓာကိုယ်ဝတဲ့ အမျိုးသမီးများ စိတ်ဓာတ်မကျသွားဖို့ ပြောတဲ့ စမိုင်းလ်

အရင်တုန်းက ခန္ဓာကိုယ်နဲ့ ပတ်သက်ပြီး Body Shaming လုပ်ခြင်းခံခဲ့ရတဲ့ ထူးအောင်

ရဲလေးနဲ့ အလုပ်တွဲလုပ်ရတာ ပျော်တယ်ဆိုတဲ့ အဆိုတော် နင်ဇီမေ

The post ခန္ဓာကိုယ်နဲ့ ပတ်သက်ပြီး Body Shaming လုပ်ခံရဖူးတယ်လို့ နင်ဇီမေ ပြော appeared first on ဧရာဝတီ.

၂၀ ရာစုရဲ့ “Rock and Roll ဘုရင်”လို့ တင်စားခြင်း ခံရသူ Elvis Presley ရဲ့ အတ္ထုပတ္တိ ရုပ်ရှင်ဇာတ်ကားအတွက် သရုပ်ဆောင်စာရင်း ပေါ်ထွက်လာပြီ ဖြစ်ပါတယ်။ အသက် ၂၇ နှစ်ရှိပြီ ဖြစ်တဲ့ မင်းသား Austin Butler က Presley ရဲ့ နေရာမှာ သရုပ်ဆောင်မှာ ဖြစ်ပြီး Austin Butler ဟာ အမေရိကန် ရုပ်သံကွန်ရက် ဖြစ်တဲ့ Nickelodeon နဲ့ Disney တို့မှာ သရုပ်ဆောင်ဖူးခဲ့သူ ဖြစ်ပါတယ်။

ဒီ အတ္ထုပတ္တိကို ရိုက်ကူးမယ့် ဒါရိုက်တာဖြစ်သူ Baz Luhrmann က သူ့ရဲ့ လူမှုကွန်ရက် စာမျက်နှာမှာ Presley ပုံနဲ့ မင်းသားဖြစ်သူ Austin Butler ရဲ့ ပုံတို့ကို ယှဉ်တွဲဖော်ပြထားပါတယ်။

“ကျနော့်အနေနဲ့ ဒီရုပ်ရှင်ကို ရိုက်ကူးဖို့ဆိုတာ အရမ်း ကြီးလေးတဲ့ တာဝန်ကို ခေါင်းပေါ် ထမ်းထားရသလိုပါပဲ။ မင်းသား ရွေးချယ်တဲ့ နေရာမှာလည်း အများကြီး စဉ်းစားပြီးမှ ရွေးချယ်ခဲ့တာ ဖြစ်ပါတယ်”လို့ ဒါရိုက်တာ Baz Luhrmann က Deadline မီဒီယာကို ပြောပါတယ်။

Presley ရဲ့ မန်နေဂျာဖြစ်သူ Tom Parker ရဲ့ နေရာမှာတော့ မင်းသားကြီး Tom Hank ပါဝင် သရုပ်ဆောင်သွားမှာ ဖြစ်ပါတယ်။

Austin Butler ဟာ မကြာခင်မှာ ထွက်ရှိလာတော့မယ့် “Once Upon a Time in Hollywood” ရုပ်ရှင်မှာ မင်းသားကြီးတွေ ဖြစ်တဲ့ Leonardo DiCaprio ၊ ဘရက်ပစ်တို့နဲ့ တွဲဖက် သရုပ်ဆောင်ထားပြီး Entertainment Tonight သတင်းရဲ့ ဖော်ပြချက်အရ သူဟာ Presley ရဲ့ ဇာတ်ရုပ်ကို သရုပ်ဆောင်ဖို့ အခြားနာမည်ကြီး မင်းသားတွေကို ကျော်လွန်ပြီး ရွေးချယ်ခံခဲ့ရတာလို့ သိရပါတယ်။

မင်းသား Austin Butler ဟာ ကလေးအရွယ်ကတည်းက Disney နဲ့ Nickelodeon တို့မှာ ကလေးသရုပ်ဆောင်အနေနဲ့ ပါဝင်ခဲ့သူ ဖြစ်ပြီး အခုလို Presley နေရာမှာ သရုပ်ဆောင်ရမယ်ဆိုတဲ့ သတင်းထွက်ရှိလာပြီး နောက်မှာ သူ့ရဲ့ ချစ်သူ ဖြစ်တဲ့ မင်းသမီး Vanessa Hudgens ကလည်း အရမ်းကို ဝမ်းသာပျော်ရွင်နေတယ်လို့ သိရပါတယ်။

Ref. www.cbsnews.com

You May Also Like This Story:

အဆိုတော်ကြီး အဲဗစ်ပရက်စလေရဲ့ အတ္ထုပ္ပတ္တိရုပ်ရှင်ရိုက်ကူးရန် သရုပ်ဆောင်ရွေးချယ်နေပြီဖြစ်

The post Elvis Presley အတ္ထုပတ္တိ ရုပ်ရှင်မှာ Presley အဖြစ် Austin Butler သရုပ်ဆောင်မည် appeared first on ဧရာဝတီ.