“Spider-Man: Far From Home” ရုပ်ရှင်ကတော့ ရုံတင်ပြီး ပထမဆုံးသီတင်းပတ်မှာပဲ ခန့်မှန်းထားတာထက် ကျော်လွန်ခဲ့တာကိုတွေ့ရပါတယ်။ အခုနောက်ဆုံး ထွက်လာတဲ့ Sony Pictures ရဲ့ အဲ့ဒီ Marvel စူပါဟီးရိုးရုပ်ရှင်ဟာ မြောက်အမေရိကဒေသရဲ့ ၃ ရက်ကြာ ပိတ်ရက်ကာလမှာ ဒေါ်လာ ၉၃ ဒဿမ ၆ သန်းနဲ့ ထိပ်ဆုံးမှာ ရပ်တည်နေတာကို တွေ့ရပါတယ်။

ဇူလိုင်လ ၂ ရက်နေ့မှာ ဖြန့်ချိခဲ့တဲ့ မင်းသား Tom Holland ပါဝင်ထားတဲ့ အဲ့ဒီရုပ်ရှင်ဟာ ဒေါ်လာ ၉၁ သန်းကျော်နဲ့ စတင်တာထွက်ခဲ့ပြီးတဲ့နောက် ၆ ရက်စာ ပေါင်းရင်တော့ ဒေါ်လာ ၁၈၅ သန်းအထိ ရှိလာခဲ့ပါတယ်။ ဒါကတော့ Sony ရဲ့ အဆိုအရ ဒေါ်လာ ၁၂၅ သန်းလောက်ပဲ စစချင်းရမယ်လို့ မှန်းထားခဲ့တာကြောင့် မှန်းထားတာထက်ပိုပြီး ရရှိခဲ့တယ်လို့ ဆိုနိုင်မှာပါ။

ဒါဟာ ရုပ်ရှင်ကို ထုတ်လုပ်ခဲ့တဲ့ စတူဒီယို အတွက်သာမက ရုပ်ရှင်လုပ်ငန်း တခုလုံးအတွက် သတင်းကောင်းလည်း ဖြစ်ပါတယ်။ ပြည်တွင်း ရုံဝင်ငွေစာရင်းမှာ မကြာသေးခင် သီတင်းပတ်တွေက ရုံတင်ခဲ့တဲ့ “Men In Black: International”၊ “Dark Phoenix” နဲ့ “Toy Story 4” ရုပ်ရှင်တွေက တာထွက်ကောင်းခဲ့တာတော့ မဟုတ်ပါဘူး။

အခုလိုမျိုး “Far From Home” ရုပ်ရှင်ရဲ့ ဝင်ငွေကောင်းမွန်မှုကို ကြည့်မယ်ဆိုရင် ဒါဟာ ပရိသတ်တွေ အနေနဲ့ ရုပ်ရှင်ကောင်းတွေ၊ နောက်ဆက်တွဲ ဇာတ်လမ်းတွေကို မျှော်လင့်နေကြတယ်ဆိုတဲ့ သက်သေပဲ ဖြစ်တယ်လို့ ဆိုပါတယ်။

“Avengers: Endgame” ရုပ်ရှင်ပြီးတဲ့နောက် Far From Home” ရုပ်ရှင်ဟာ ဝေဖန်ရေး ဝက်ဘ်ဆိုက် Rotten Tomatoes မှာ ၉၁ ရာခိုင်နှုန်း အကောင်းမြင်ခံခဲ့ရပါတယ်။ ဒါရိုက်တာ Jon Watts ရိုက်ကူးထားတဲ့ အဲ့ဒီရုပ်ရှင်ဟာ CinemaScore မှာတော့ “A” အဆင့် သတ်မှတ်ခံထားရပါတယ်။

Disney-Pixar ရဲ့ “Toy Story 4” ရုပ်ရှင်ကတော့ ပထမနေရာမှာ နှစ်ပတ် ဆက်တိုက် ရပ်တည်ခဲ့ပြီးတဲ့နောက် အခုတော့ ဒုတိယနေရာကို ဆင်းပေးသွားရပြီ ဖြစ်ပါတယ်။ မြောက်အမေရိက ပြည်တွင်းမှာ ဝင်ငွေ ဒေါ်လာ ၃၄ ဒဿမ ၃ သန်း ရရှိခဲ့ပါတယ်။ The Beatles အခြေခံ အချစ်ဟာသဇာတ်မြူးရုပ်ရှင် “Yesterday” ရုပ်ရှင်ကတော့ ခန့်မှန်းချေ ဝင်ငွေ ဒေါ်လာ ၁၀ ဒဿမ ၈ သန်းနဲ့ တတိယနေရာမှာ ရပ်တည်နေပါတယ်။

“Annabelle Comes Home” ရုပ်ရှင်ကတော့ ဒေါ်လာ ၉ ဒဿမ ၈ သန်းနဲ့ စတုတ္ထနေရာမှာ ရှိနေပါတယ်။ “Aladdin” ရုပ်ရှင်ကတော့ ဒေါ်လာ ၇ ဒဿမ ၆ သန်းနဲ့ ပဉ္စမနေရာမှာ ရပ်တည်နေခဲ့ပါတယ်။

Ref: aceshowbiz

You May Also Like These Stories:

တောင်ကိုရီးယားနိုင်ငံမှာ ကြည့်ရှုနှုန်း စံချိန်တင်နိုင်ခဲ့တဲ့ “Spider-Man: Far From Home”

နောက်တကား ရိုက်ဖို့ သေချာနေတဲ့ “Spider-Man: Into The Spider-Verse”

The post ခန့်မှန်းထားတာထက် ဝင်ငွေ ပိုရပြီး စံချိန်တင်ခဲ့တဲ့ “Spider-Man: Far From Home” ရုပ်ရှင် appeared first on ဧရာဝတီ.

မကြာသေးခင် လပိုင်းအတွင်းမှာ သီလရှင် ဝတ်ထားတဲ့ အဆိုတော် ဝိုင်းစုခိုင်သိန်းကတော့ ဆံပင်အတု တပ်ရတာ မကြိုက်တဲ့အတွက် ခေါင်းတုံး ဆံပင်ပေါက်နဲ့သာ ပွဲတွေ တက်ဖြစ်တယ်လို့ ပြောပါတယ်။

“ဆံပင်တုစွပ်ရင် ခေါင်းပူတာ၊ ခေါင်းကျပ်တာ မခံနိုင်ဘူး။ နဂိုတည်းက ခေါင်းစည်းထားရင် ကြာကြာ မစည်းနိုင်ဘူး။ ဘီးကုပ်တို့ ဘာတို့ ကြာကြာ မတပ်နိုင်ဘူး။ ဒီခေါင်းတုံးဆံပင်ပေါက်ကို နည်းနည်း တိုတုန်းက ဆံပင်တု တပ်ရတယ်။ နည်းနည်း ရှည်လာပြီ။ လွှတ်လို့ရပြီဆိုတာနဲ့ ခေါင်းတုံးနဲ့ပဲ ပွဲတက်တော့တယ်။ အရင်ကတည်းက ဆံပင်တိုနဲ့ နေလာတာဆိုတော့ ဆံပင်ရှည်ကို လုံးဝ သည်းမခံနိုင်ဘူး။ အမှန်တော့ ဒီနေ့ ဆံပင်တုလေး စွပ်မလို့ပဲ မေဦးက ဒီတိုင်းလေးက ပိုလိုက်တယ် ဆိုတာနဲ့ ဝမ်းသာအားရနဲ့ ပွဲတက်လာတာ” လို့ ဝိုင်းစုခိုင်သိန်းက ပြောပါတယ်။

ယခင်ကလည်း ဆံပင်အတို ထားရတာကို ကြိုက်တဲ့သူတယောက်ဖြစ်တာကြောင့် အခု ခေါင်းတုံးဆံပင်ပေါက်က ထူးခြားမှု သိပ်မရှိဘဲ ဆံပင်အတို ညှပ်ထားသလိုပဲ ဖြစ်နေတယ်လို့ ပြောပါတယ်။

“အရင်တုန်းက ဆံပင်ရှည်ထားတယ်။ နောက်ပိုင်း အတိုထားပြီးကတည်းက နေ့တိုင်းလည်း ခေါင်းလျှော်ဖြစ်တယ်။ Dryer မှုတ်ရတာကအစ အရမ်းလွယ်တယ်။ လွတ်လပ်တယ်လို့ ထင်တယ်။ အရင်ဆံပင်နဲ့လည်းသိပ်မကွာဘူးလေ။ ခေါင်းတုံး ဆံပင်ပေါက်သာ ဆိုတယ်၊ ဆံပင်အတို ညှပ်ထားသလိုပဲ ကိုယ့်စိတ်က ထင်နေတာ”

“အပြင်သွားလည်း ဆံပင်တု မတပ်ဘူး။ ဒီတိုင်းပဲ သွားတယ်။ ယုံကြည်မှုလည်း ရှိတယ်။ ကိုယ့်ကိုယ်ကိုယ်မှ မယုံကြည်ရင် ဘယ်သူက ကိုယ့်ကို ယုံကြည်မှာလဲ”လို့ ဝိုင်းစုခိုင်သိန်းက ပြောပါတယ်။

ခန္ဓာကိုယ်နဲ့ပတ်သက်ပြီးတော့လည်း တခြားသူများပိန်တယ်လို့ ပြောတာကြောင့် ၁ လလောက် အစားများများစားခဲ့တာကြောက့် အရမ်းဝလာပြီး ဝိတ်ပြန်ချနေရတယ်လို့ သိရပါတယ်။

“ဝိုင်းစု အိမ်ပြင်တုန်းက ဖုန်တွေရှူ၊ ဘာတွေရှူနဲ့ ပင်ပန်းပြီး ပိန်သွားတယ်။ အားလုံးက ပိန်တယ်လို့ ဝိုင်းပြောတော့ မဖြစ်သေးဘူး။ ဘာလုပ်ရင်ကောင်းမလဲ စဉ်းစားတယ်။ ဝိုင်းစုက အစား မက်တယ်။ တနေ့ကို ၆ နပ်စားတယ်။ Ensure ၃ ဘူး သောက်တယ်။ ဝ ချင်လို့။ အဲဒါကို ၁ လလောက် လုပ်လိုက်တာ အရမ်း ဝလာတယ်။ အဲဒါကို အစားက မရပ်နိုင်ဘူး။ အခု ပြန်ရပ်ပြီးတော့ ပြန်ချနေရတယ်။ ဝိတ်ချဖို့တော့ လွယ်တယ်။ မစားဘဲ မနေဘူး။ စားနေလို့ ဝနေတာ” လို့ ဝိုင်းစုခိုင်သိန်းက ပြောပါတယ်။

သူကိုယ်တိုင်ကတော့ ပိန်တာကိုကြိုက်ပြီး ပိန်ရင် ဘာဝတ်ဝတ် အဆင်ပြေပြီး ဝရင်တော့ ခန္ဓာကိုယ်က လေးလာတယ်လို့ ပြောပါတယ်။

“အမှန်တော့ ပိန်တာကို အရမ်းကြိုက်တယ်။ ဘယ်လောက် ပိန်တယ်ပဲ ပြောပြော ဝိုင်းစုကြိုက်တယ်။ ပိန်တာက ဘာဝတ်ဝတ် ရတယ်လေ။ ဝတဲ့အခါကျရင် ဝတ်ရတာက မကောင်းဘူး၊ လေးတယ်။ ဝိုင်းစုအဲ ဒါကို မကြိုက်ဘူး။ ဒါပေမယ့် ဝိုင်းစု ခန္ဓာကိုယ်တိုင်းရင် ဒီလောက်ပဲ။ ဒါပေမယ့် ဝတယ်လို့ ထင်တယ်။ ပိန်နေရင်လည်း ဝတယ်ပဲ ထင်တယ်။ အခု နည်းနည်းပြည့်လာတာကို မကြိုက်ဘူး။ ပြန်ချနေတယ်” လို့ ဝိုင်းစုခိုင်သိန်းက ပြောပါတယ်။

ဝိုင်းစုခိုင်သိန်းကတော့ သူ့ရဲ့နောက်ထပ် တကိုယ်တော်အခွေအတွက် သီချင်းများ သွင်းနေပြီး ၁၀ လပိုင်း၊ ၁၁ လပိုင်းလောက်မှာ ထွက်ဖို့ ရှိတယ်လို့ သိရပါတယ်။

The post ဆံပင်အတု တပ်ရတာ မကြိုက်လို့ ခေါင်းတုံးနဲ့ပဲ ပွဲတက်ဖြစ်နေတဲ့ ဝိုင်းစုခိုင်သိန်း appeared first on ဧရာဝတီ.

ဒါရိုက်တာ ကိုဇော် (အရုဏ်ဦး) ရိုက်ကူးတဲ့ “မောင်နာလီဇာ” ရုပ်ရှင်ကားကြီးမှာ အငြိမ့်မင်းသမီး နေရာက ပါဝင်ထားတဲ့ သရုပ်ဆောင် အေးဝတ်ရည်သောင်းက အငြိမ့်မင်းသမီး ကာရိုက်အတွက် လေ့လာခဲ့ရပုံတွေကို အခုလိုပဲ ပြောပါတယ်။

“လတ်တလောမှာတော့ မောင်နာလီဇာ ဆိုတဲ့ ကားလေး ရိုက်ထားတယ်။ ဒါရိုက်တာက ကိုဇော် (အရုဏ်ဦး) ပါ။ ဟာသကားလို့ ထင်ရပေမယ့် ဒရာမာ ချိုးလိုက်တဲ့ ကားပေါ့။ ဇာတ်ထဲက အဖြစ်အပျက်လေးကို ရိုက်ထားတာပေါ့။ မြင့်မြတ်ရယ်၊ စမိုင်းလ်ရယ်၊ မခိုင်လေးရယ် ပါတယ်။ ဇာတ်ကတော့ ခက်ခဲတယ်။ အကအတွက် ကြိုတင်ပြီးတော့လည်း လေ့ကျင့်ခဲ့ရတယ်”လို့ သရုပ်ဆောင် အေးဝတ်ရည်သောင်းက ပြောပါတယ်။

“ကျမတို့ ရိုက်ရတဲ့ ဇာတ်သဘင်ပုံစံက မြို့က ဇာတ်ပွဲတွေလို မဟုတ်ဘူး။ မြို့ဇာတ်ဆိုတာ ဖိုးချစ်တို့၊ ဟန်ဇာမိုးဝင်းတို့လို ဇာတ်မျိုး မဟုတ်ဘူး။ နယ်က ဇာတ်ပွဲလေးပေါ့။ ကိုယ်နဲ့ အလှမ်းဝေးတော့ သူတို့ နေတာ ထိုင်တာ၊ စားသောက်တာတွေကို မေးရတာပေါ့။ မန္တလေးက ယဉ်ကျေးမှုက သူတွေကလည်း အဝတ်အစားတွေရော နေပုံထိုင်ပုံတွေရော၊ အသုံးအဆောင်တွေရော၊ နောက် ဇာတ်သေတ္တာရော အဲ့သေတ္တာဆို နှစ် ၄၀ လောက်ရှိပြီ မင်းသမီး သုံးနေတာကို ပေးလိုက်တယ်”

“အမေ ကြည်ခိုင်မိုးကလည်း အကုန် သင်ပေးတယ်။ မိတ်ကပ်လိမ်းတာတွေကအစ အကုန် သင်ပေးတယ်။ ဇာတ်အဖွဲ့ထဲမှာ ပြောတဲ့ စကားလေးတွေကအစ သင်ပေးကြတယ်”လို့ အေးဝတ်ရည်သောင်းက ပြောပါတယ်။

သရုပ်ဆောင် အေးဝတ်ရည်သောင်းက MNTV ရုပ်သံလိုင်းမှာ လွှင့်ခဲ့တဲ့ Win Show Time အစီအစဉ်မှာ အဝင်းက သီချင်းဆိုပေးပါဆိုလို့ “Shake Shake” သီချင်းနဲ့ သီဆို ကပြဖြစ်ခဲ့တဲ့ အကြောင်းကိုလည်း အခုလိုပဲ ပြောပြပါတယ်။

“Win Show Time မှာ အဝင်းနဲ့ ပထမဆုံး ဆုံတာပဲ။ သူက စကားလည်း ပြောတတ်တယ်။ အရမ်းလည်း သွက်တယ်။ သူက Talent ရှိတယ်။ သူအိုက်တင် လုပ်တာလေးကအစ သူအမူအရာ လုပ်တာတွေ အဲ့ဒါတွေ ကောင်းတယ်။ သူ့ဆီက ပညာရတယ်။ အဲ့မှာ ဆိုဖြစ်တဲ့ သီချင်းလေးက ရေးထားတာ လွန်ခဲ့တဲ့ ၄၊ ၅ နှစ်ကတည်းက ရေးထားတာ။ ကိုဇော်ဇော် ရေးပေးထားတာ။ သီချင်းက ရယ်စရာ ဖြစ်နေတော့ မဆိုရဲဘူး”

“အစီအစဉ်မှာ သီချင်း မဆိုလို့ မရဘူး၊ ဆိုပေးပါ ဆိုပေးပါ ပြောတယ်။ အလွမ်းသီချင်း ဆိုမလား မေးတော့ အမြဲလွမ်းနေတာ အလွမ်းသီချင်း မဆိုချင်ဘူး။ ဒီသီချင်းလေးကို ကပြီး ဆိုဖြစ်သွားတာ။ ကိုယ်နဲ့လည်း အခု အဲ့သီချင်းက တိုက်ဆိုင်နေတော့ ဆိုဖြစ်သွားတာ။ အမြူးလေးဆိုတော့ ထူးထူးခြားခြားလေး ဖြစ်သွားတာပေါ့”လို့ အေးဝတ်ရည်သောင်းက ပြောပါတယ်။

သရုပ်ဆောင် အေးဝတ်ရည်သောင်းဟာ ၂၀၁၇ ခုနှစ်မှာ အနုပညာလောကထဲ တကျော့ ပြန်လည် ဝင်ရောက်ခဲ့တာဖြစ်ပြီး မအေးသောင်းအဖြစ် ပရိသတ်တွေရဲ့ အားပေးမှုကို အထူး ရရှိခဲ့ပါတယ်။ ၂၀၁၈ ခုနှစ် မြန်မာ့ရုပ်ရှင် ထူးချွန်ဆု အကယ်ဒမီ ပေးပွဲကြီးမှာ “မုန်းစွဲ” ရုပ်ရှင်ဇာတ်ကားနဲ့ “အကောင်းဆုံး အမျိုးသမီး ဇာတ်ပို့ဆု” အကယ်ဒမီ တစ် ကြိုပေးခြင်း ခံခဲ့ရပေမယ့် အကယ်ဒမီနဲ့ လွဲချော်ခဲ့ပါတယ်။

You May Also Like These Stories:

“သက်ငယ်မုဒိမ်း ကျူးလွန်သူတွေကို သေဒဏ် ပေးစေချင်တယ်”လို့ ပြောတဲ့ မအေးသောင်း 

“ကိုယ့်ကိုယ်ကိုယ် ပေါက်စီလို့ မသုံးတော့ဘဲ ကျမလို့ ပြောင်းသုံးတော့မယ်”လို့ ပြောတဲ့ မအေးသောင်း

သင်္ကြန်မှာ စတုဒီသာကျွေးပြီး အလှူလုပ်ခဲ့တဲ့ မအေးသောင်း

The post “မောင်နာလီဇာ” ရုပ်ရှင်မှာ အငြိမ့်မင်းသမီးအဖြစ် မြင်တွေ့ရမယ့် မအေးသောင်း appeared first on ဧရာဝတီ.

မေလအတွင်းက နေပြည်တော်မှာ ဖြစ်ပွားခဲ့တဲ့ အသက်၂ နှစ်နဲ့ ၁၁ လအရွယ် မိန်းကလေးငယ်အား လိင်အကြမ်းဖက်ခံရတဲ့ကိစ္စနဲ့ ပတ်သက်ပြီး သရုပ်ဆောင် ဇော်ဇော်အောင်က အမှုအမှန်ကို အမြန်ဆုံး ပေါ်စေချင်ကာ အမှုမှန် မြန်မြန်ပေါ်မှ အများပြည်သူလည်း စိတ်ချမ်းသာရမယ်လို့ ပြောပါတယ်။

“အမှုအမှန်အတိုင်း ပေါ်စေချင်တယ်။ ထိန်ချန်တာတွေ၊ သက်သေက သတ္တိ မရှိဘဲ မထွက်ဆိုတာတွေကို ပြည်သူတွေက အားမလို အားမရ ဖြစ်တယ်။ ကျနော်တို့လည်း အဲ့လိုဖြစ်ပါတယ်။ ဒီအမှုကြီးလည်း မြန်မြန်ပေါ်ပေါက်ပြီး မြန်မာပြည်ကြီးလည်း အေးချမ်းပြီး ပြည်သူလူထုအားလုံးလည်း စိတ်နှလုံး ရွှင်ပြသွားမယ် ထင်ပါတယ်” လို့ သရုပ်ဆောင် ဇော်ဇော်အောင်က ပြောပါတယ်။

အဆိုပါ အမှုမှန် ပေါ်ပေါက်ရေးအတွက် မြန်မာနိုင်ငံရှိ မြို့ကြီးတော်တော်များများမှာ ဆန္ဒပြပွဲများ ပြုလုပ်လျက်ရှိပြီး ရန်ကုန်မှာ ပြုလုပ်ခဲ့တဲ့ ဆန္ဒပြပွဲမှာ အနုပညာရှင်တယောက်အနေနဲ့ ပူးပေါင်း ပါဝင်ခဲ့တဲ့ ဇော်ဇော်အောင်က ကလေးငယ်ရဲ့မိဘတွေကို ဇွဲမလျှော့ဖို့ ပြောပါတယ်။

“အရမ်း သနားစရာကောင်းတဲ့ မိဘတွေပါ။ သူတို့အခြေအနေတွေကတော့ ဘေးကျပ်နံကျပ်တွေပါ။ အဘက်ဘက်က အခက်အခဲတွေ ဖြစ်နေတယ်။ ဘယ်တော့မှ ဇွဲမလျှော့ပါနဲ့လို့ ပြောချင်ပါတယ်”လို့ ဇော်ဇော်အောင်က ဆိုပါတယ်။

ဗစ်တိုးရီးယားလို့ လူမှုကွန်ရက်မှာ နာမည်ပေးထားတဲ့ အဲဒီ ကလေးငယ်အတွက် ဆန္ဒပြပွဲကို ဇူလိုင်လ ၆ ရက်နေ့က ရန်ကုန်မြို့မှာ ပြုလုပ်ခဲ့ပြီး ဇော်ဇော်အောင် အပါအဝင် တခြားသော အနုပညာရှင်များစွာလည်း ပါဝင်ခဲ့ပါတယ်။

“ဗစ်တိုးရီးယားကိစ္စကတော့ Facebook မှာလည်း အများပြည်သူတွေက ထောက်ပြတဲ့အချက်တွေ ခံစားမှုတွေ ဘာတွေနဲ့ ဆိုတော့ ကျနော်တို့လည်း ပြည်သူတွေဆန္ဒနဲ့ ထပ်တူ သွားရောက် ဝန်းရံ ဖြစ်တာပါ။ ဆန္ဒပြတဲ့နေရာမှာ အားလုံးက စည်းကမ်းတကျနဲ့ သွားကြတယ်။ သူတို့ပေးထားတဲ့ စာရွက်လေးတွေ အတိုင်းပဲ အော်ကြတယ်။ CID အရှေ့မှာ ငြိမ်းငြိမ်းချမ်းချမ်းဆန္ဒပြပြီး ပြန်လာခဲ့ကြတယ်။ အခုကတော့ ရန်ကုန်ပေါ့။ ပြီးရင် မန္တလေး၊ တောင်ကြီး၊ နေပြည်တော် တနိုင်ငံလုံး ပြန့်သွားရင်တော့ အကျိုးအများကြီး ရှိလာမှာပါ” လို့ဇော်ဇော်အောင်က ပြောပါတယ်။

ရန်ကုန် အပါအဝင် တခြားသော မြို့ကြီးများမှာလည်း ပြုလုပ်မယ့် အဆိုပါ ဆန္ဒပြများကို ဇော်ဇော်အောင်က တခြားမြို့များသို့ သွားရောက်ဖို့ အခက်အခဲရှိတာကြောင့် ရန်ကုန်မြို့မှာသာ သွားရောက်နိုင်ခဲ့တယ်လို့ ပြောပါတယ်။

“တခြားမြို့တွေကို သွားရောက် ဝန်းရံဖို့အတွက်ကျတော့ အခက်အခဲလေးတွေ ရှိတာပေါ့လေ။ လမ်းစရိတ်တို့ ဟိုမှာ တည်းခိုဖို့၊ စားစရိတ်တို့ရှိတော့ ဒီရက်ပိုင်းမှာလည်း ကျနော်တို့ ဇာတ်ပို့ ဇာတ်ရံတွေကလည်း အဆင်မပြေတာတွေ များတဲ့အတွက် အခြေအနေကို စောင့်ကြည့်ပါဦးမယ်”လို့ ဇော်ဇော်အောင်က ပြောပါတယ်။

သရုပ်ဆောင် ဇော်ဇော်အောင်ကတော့ ဇာတ်ပို့ သရုပ်ဆောင် တယောက်အနေနဲ့ အချိန်ကာလကြာမြင့်စွာ အနုပညာလောကမှာ ရပ်တည်နေသူ တယောက်ဖြစ်ပြီး ရုပ်ရှင်နဲ့ ဗီဒီယို ဇာတ်ကားပေါင်းများစွာမှာ ပါဝင် သရုပ်ဆောင်ခဲ့ပါတယ်။

You May Also Like These Stories:

Wisdom Hill အမှု အပေါ် သူတို့ အမြင်

ဗစ်တိုးရီးယားအတွက် အမှုမှန်ပေါ်ရေး ပူးပေါင်းမည်ဟု Wisdom Hill ကျောင်းကတိပြု

The post “ဗစ်တိုးရီးယားအမှု မြန်မြန်ပေါ်မှ အများပြည်သူလည်း စိတ်ချမ်းသာရမယ်”လို့ ဇော်ဇော်အောင် ပြော appeared first on ဧရာဝတီ.

သရုပ်ဆောင် အကယ်ဒမီ နေတိုးက လက်ရှိဖြစ်ပေါ်နေတဲ့ သက်ငယ်မုဒိမ်းမှုတွေနဲ့ ပတ်သက်ပြီး ပညာပေး အနေနဲ့ ရုပ်ရှင်ဇာတ်ကားတွေ ရိုက်ကူးထားတယ်လို့ ပြောပါတယ်။

“Box No.88 ဇာတ်ကားက အရွယ်မရောက်သေးတဲ့ ကလေးငယ်တွေနဲ့ ပတ်သက်ပြီးတော့ သက်ငယ်မုဒိမ်း ပညာပေးအနေနဲ့ ရိုက်ထားပါတယ်။ လူကုန်ကူးမှု တိုက်ဖျက်ရေးနဲ့ ဆက်နွယ်နေတာတွေလည်း ပါတယ်။ ဇာတ်လမ်းရဲ့ တည်ဆောက်မှုပုံစံနဲ့ တင်ပြတဲ့အပိုင်းကတော့ ပရိသတ်ဆီကို ပြည့်ပြည့်စုံစုံနဲ့ ရောက်လာမှာပါ။ သက်ငယ်မုဒိမ်းမှုနဲ့ လူကုန်ကူးမှု ပညာပေး ဇာတ်ကားလေး ဖြစ်ပါတယ်”

“ကျနော့် အနေနဲ့ သက်ငယ် မုဒိမ်းမှုအပေါ် အမြင်ကတော့ ကျနော်ရိုက်တဲ့ ဇာတ်ကားတွေမှာလည်း အမြဲတမ်း Message ကောင်းကောင်းလေးတွေ၊ အသိပညာနဲ့ ဗဟုသုတ ရစရာ အကြောင်းအရာတွေ၊ တွေးတောဆင်ခြင်နိုင်မယ့် အကြောင်းအရာတွေလည်း ပါပါတယ်။ တရားဥပဒေ စိုးမိုးရေးနဲ့ ပတ်သက်ပြီးတော့ အားနည်းချက်ရှိတဲ့ နိုင်ငံတနိုင်ငံ အနေနဲ့ အသိပေးချင်တဲ့ပုံမျိုး ဇာတ်ကားထဲမှာလည်း ထည့်ထားသလို ဒီဇာတ်ကားလေးက တွန်းအားလည်း ပေးတယ်။ ဘဝ ရှိတဲ့အခါကျတော့ ဘဝနဲ့ ပတ်သက်တဲ့ အကြောင်းအရာတွေကို ကျနော်တို့ တတ်တဲ့အနုပညာနဲ့ အတတ်နိုင်ဆုံး တင်ပြထားတယ်”လို့ နေတိုးက ပြောပါတယ်။

ပုဂံဒေသ အခြေပြု ရုပ်ရှင်ဇာတ်ကား တော်တော်များများမှာ အနုပညာရှင် တယောက်အနေနဲ့ ပါဝင် သရုပ်ဆောင် ရိုက်ကူးခဲ့တဲ့ နေတိုးက မကြာသေးခင်က ပုဂံဒေသကို ကမ္ဘာ့အမွေအနှစ်အဖြစ် သတ်မှတ်လိုက်တဲ့အပေါ် အခုလိုပဲ ပြောပါတယ်။

“ပုဂံကို ကမ္ဘာ့အမွေအနှစ်အဖြစ် သတ်မှတ်လိုက်တော့ အရမ်းဝမ်းသာပါတယ်။ ပုဂံမြို့ဟောင်းက ကျနော် အမြဲ နေထိုင်ပါဆိုရင်တောင် နေထိုင်ချင်တဲ့မြို့ ဖြစ်တဲ့အတွက် အခုလို ကမ္ဘာ့အသိအမှတ်ပြုတဲ့ အတွက် အရမ်း ဂုဏ်ယူမိပါတယ်။ ရှေးဟောင်းကို ထိန်းသိမ်း ပြုပြင်တဲ့ ပုံစံမျိုးတော့ မကြိုက်ဘူး။ ထိန်းသိမ်းတဲ့ ပုံစံမျိုးမှာ အဟောင်းကို မပျောက်ပျက်အောင် ထိန်းသိမ်းတဲ့ နည်းစနစ်တွေနဲ့ ကမ္ဘာမှာလည်း ရှေးဟောင်းတွေကို ဘယ်လိုမျိုး ပြင်ဆင်ထိန်းသိမ်းမလဲဆိုတဲ့ နည်းစနစ်တွေလည်း ရှိပါတယ်”

“အဲ့လို နည်းတွေနဲ့ ထိန်းသိမ်းစေချင်တယ်။ ပုဂံကို အရမ်းကြိုက်တယ်၊ နှစ်လည်း နှစ်သက်တယ်။ ပုဂံရောက်ရင် ခံစားမှုက အလိုလိုနေရင်း စိတ်ထဲမှာ ကြည်နူးမှုတွေ ဖြစ်တယ်၊ အင်အားတွေ ဖြစ်တယ်။ ထူးဆန်းတယ်”လို့ နေတိုးက ပြောပါတယ်။

ရုပ်ရှင်ဇာတ်ကားတွေမှာ ကျရာဇာတ်ရုပ်ကို ပီပြင်စွာ သရုပ်ဆောင်လေ့ရှိတဲ့ သရုပ်ဆောင် နေတိုးကတော့ “မိုးည အိပ်မက်မြူ”၊ “နက္ခတ်မှားတဲ့ တိုက်ပွဲ”၊ “တာတေကြီး”စတဲ့ ဇာတ်ကားများနဲ့ အကယ်ဒမီဆုများ ရရှိထားသူ ဖြစ်ပါတယ်။ နေတိုး ပါဝင် သရုပ်ဆောင်ထားတဲ့ “နှစ်ပါးသွား Update” ဇာတ်ကားကလည်း မကြာခင် ရုပ်တင် ပြသတော့မှာ ဖြစ်ပါတယ်။

You May Also Like These Stories:

“သက်ငယ်မုဒိမ်းနဲ့ ပတ်သက်ပြီး လူတွေ အသိဉာဏ်မဲ့လာတဲ့အတွက် ဝမ်းနည်းမိတယ်”

သက်ငယ်မုဒိမ်းမှုတွေ များလာတဲ့အခါ

“သက်ငယ်မုဒိမ်း ကျူးလွန်တဲ့ လုပ်ရပ်ဟာ လူ့ပတ်ဝန်းကျင်မှာ ရှိမနေသင့်ဘူး”

“သက်ငယ်မုဒိမ်း ကျူးလွန်သူတွေကို သေဒဏ် ပေးစေချင်တယ်”လို့ ပြောတဲ့ မအေးသောင်း 

“သက်ငယ်မုဒိမ်း ကျူးလွန်သူတွေကို မြန်မြန်ဖော်ထုတ်ပြီး ပြစ်ဒဏ်ပေးသင့်တယ်”လို့ ဖြိုးငွေစိုး ပြော

The post သက်ငယ်မုဒိမ်းမှုနဲ့ ပတ်သက်ပြီး ပညာပေးရုပ်ရှင်တွေ ရိုက်ကူးထားတဲ့ နေတိုး appeared first on ဧရာဝတီ.

ကိုရီးယားမင်းသား Kang Ha Neul နဲ့ မင်းသမီး Gong Hyo Jin တို့ဟာ KBS ရုပ်သံကနေ မကြာမီ ထုတ်လွှင့်မယ့် “When The Camellia Blooms” ဆိုတဲ့ ဒရာမာမှာ ပါဝင်လာမယ်လို့ သိရပါတယ်။

မင်းသမီး Gong Hyo Jin ကတော့ ဝေဖန်နှိမ့်ချမှုတွေ ရှိပေမယ့် ဘဝမှာ ကြိုးစားပမ်းစားနေထိုင်တဲ့ Dong Baek ဆိုတဲ့ အမျိုးသမီးနေရာကနေ သရုပ်ဆောင်မှာပါ။ အဲ့ဒီအမျိုးသမီးဟာ အရင်တုန်းက တခါမှ မချစ်ခဲ့ဖူးပေမယ့် သူဟာ ဘယ်လိုချစ်ရမယ်ဆိုတာ သိတဲ့သူလည်း ဖြစ်ပါတယ်။

တဖက်မှာတော့ အခုဒရာမာဟာ မကြာသေးခင်က စစ်မှုထမ်းပြီးစီးခဲ့တဲ့ မင်းသား Kang အတွက်တော့ ပထမဆုံး ဒရာမာလည်း ဖြစ်ပါတယ်။ သူဟာ အမှားမကျူးလွန်တဲ့ မှန်ကန်တဲ့သူ၊ အမှားအတွက် ဝန်ခံရဲတဲ့သူ Hwang Yong Shik အဖြစ် သရုပ်ဆောင်မှာဖြစ်တယ်။ သူ့မှာတော့ ထူးခြားတဲ့ဆွဲဆောင်မှုကို ပိုင်ဆိုင်ထားပါတယ်။

“When The Camellia Blooms” ဒရာမာမှာတော့ လူတဦးတယောက်ဟာ တခြားတယောက်အတွက် ကံကြမ္မာ ဖြစ်လာနိုင်သလားဆိုတဲ့ မေးခွန်းရဲ့ အဖြေကိုရှာဖွေ ဖော်ထုတ်မှာ ဖြစ်ပါတယ်။

အခုဒရာမာရဲ့ ထုတ်လုပ်သူကတော့ “ဒီဇာတ်လမ်းဟာ Kang Ha Neul နဲ့ Gong Hyo Jin တို့ရဲ့ ခိုင်မာတဲ့တွဲဖက်မှုကနေ တဆင့် အနွေးထွေးဆုံးနဲ့ အသန့်ရှင်းဆုံးအချစ်ကို ပြသသွားမှာဖြစ်ပါတယ်။ စိတ်ပါဝင်တစားနဲ့ စောင့်မျှော်ပေးကြဖို့ တောင်းဆိုလိုပါတယ်”လို့ ပြောပါတယ်။

အခုဒရာမာကိုတော့ “Fight My Way” ဇာတ်ညွှန်းရေးသားခဲ့သူ Im Sang Choon က ရေးသားပေးမှာဖြစ်ပါတယ်။ “Uncontrollably Fond” နဲ့ “Are You Human, Too?” တို့လိုမျိုး နာမည်ကျော် ဒရာမာတွေကို ရေးသားပေးခဲ့တဲ့ ဒါရိုက်တာ ha Young Hoon က ရိုက်ကူးမှာဖြစ်ပါတယ်။ အခုလာမယ့် စက်တင်ဘာလမှာ စတင်ထုတ်လွှင့်ပြသဖို့ စီစဉ်ထားပါတယ်။

Ref:soompi

You May Also Like These Stories:

တောင်ကိုရီးယားနိုင်ငံရဲ့ လက်ရှိနိုင်ငံရေးအကြောင်း မြင်တွေ့ရမယ့် စီးရီးအသစ်များ

သည်းထိတ်ရင်ဖို ကြည့်ရှုရမယ့် မင်းသား Park Seo Joon ရဲ့ ဇာတ်ကားသစ် “The Divine Fury”

The post အချစ် ဒရာမာအသစ်မှာ ပါဝင်မယ့် မင်းသား Kang Ha Neul နဲ့ မင်းသမီး Gong Hyo Jin appeared first on ဧရာဝတီ.

တရုတ်မင်းသမီး ဖန်ပင်းပင်းကတော့ ချစ်သူဟောင်း မင်းသား လီချန်းပေးထားတဲ့ လက်ဆောင်တွေကို ထုတ်ရောင်းဖို့ ပြင်ဆင်နေတယ်လို့ သိရပါတယ်။

အသက် ၄၀ နှစ်အရွယ် မင်းသားလီနဲ့ အသက် ၃၇ နှစ်အရွယ် မင်းသမီး ဖန်တို့ဟာ လမ်းခွဲလိုက်ပြီဖြစ်တဲ့အကြောင်း ပြီးခဲ့တဲ့ ဇွန်လ ၂၇ ရက်နေ့တုန်းက Weibo လူမှုကွန်ရက်မှာ ကြေညာခဲ့ပါတယ်။ ဒါပေမယ့် အဲ့လို လမ်းခွဲပြီး ၃ ရက်အကြာ မှာတော့ သူတို့နှစ်ဦး နေ့လယ်စာအတူ သုံးဆောင်နေခဲ့တာကို မြင်တွေ့ခဲ့ရပြီး အဲ့ဒါဟာ အလုပ်သဘော နေ့လယ်စာ စားတာသာဖြစ်တယ်လို့ ပရိသတ်တွေက သိရှိခဲ့ရပါတယ်။

အခုတော့ မင်းသမီးဖန်ဟာ ချစ်သူဟောင်းနဲ့ သံယောဇဉ် လုံးဝ ဖြတ်တောက်မယ့် သဘောမှာ ရှိနေပြီး အင်တာနက် သုံးစွဲသူတွေကတော့ အွန်လိုင်း တပတ်ရစ် ပစ္စည်းအရောင်းဆိုင်မှာ နှင်းဆီတွေနဲ့ ပြုလုပ်ထားတဲ့ ကြီးမားတဲ့ Teddy ဝက်ဝံရုပ်ကို ယွမ် ၃၈,၈၈၈ နဲ့ ရောင်းချဖို့ ပြင်ဆင်နေတာကို သတိပြုမိခဲ့ကြပါတယ်။

အဲ့ဒီဝက်ဝံရုပ်ဟာ ၂၀၁၇ ခုနှစ်တုန်းက မင်းသမီး ဖန်ကိုပေးခဲ့တဲ့ မင်းသားလီရဲ့ လက်ဆောင်ဖြစ်ပြီး တန်ဖိုးကတော့ ယွမ် ၉ သောင်းနီးပါးလောက် ရှိပါတယ်။ အဲ့ဒီဝက်ဝံရုပ်ရဲ့ နောက်မှာရှိတဲ့ ပစ္စည်းပုံတွေကို မြင်တွေ့ခဲ့ရတာကြောင့် မင်းသားလီရဲ့ ပိုင်ဆိုင်တဲ့ ပစ္စည်းတွေဟာ မင်းသမီးရဲ့ အိမ်ကနေ ဖယ်ရှားလိုက်ပြီဆိုတာ သိရှိရပါတယ်။

ဒါပေမဲ့ ဟောင်ကောင် Apple Daily မီဒီယာရဲ့ အဆိုအရ အဲ့ဒီ ဝက်ဝံရုပ်ကို မင်းသမီးရဲ့ အွန်လိုက်ဈေးဆိုင်မှာ ရောင်းချခဲ့ပြီး ယွမ် ၉၈၀ လောက်နဲ့ ရောင်းချဖို့ ပြင်ဆင်ထားတယ်လို့လည်း ဆိုပါတယ်။ သို့ပေမယ့်လည်း အဲ့ဒီဝက်ဝံရုပ်ဟာ ရောင်းချနေတုန်းပဲလား၊ နှစ်ဦးသား လမ်းမခွဲခင်ကတည်းက ရောင်းဖို့ ပြင်ထားတာလား၊ လမ်းခွဲပြီးမှ ရောင်းဖို့ပြင်ထားတာလား ဆိုတာကိုတော့ အသေးစိတ် ဖော်ပြခဲ့တာမျိုး မရှိခဲ့ပါဘူး။

မင်းသား လီကတော့ ကဏ္ဍစုံ အစီအစဉ်ဖြစ်တဲ့ Keep Running မှာ မကြာသေးခင်တုန်းက ပါဝင်ခဲ့ပြီး စေ့စပ်လက်စွပ်ဝတ်ထားတာတော့ မတွေ့ခဲ့ရပါဘူး။ တချို့ကတော့ သူတို့နှစ်ဦး လမ်းခွဲလိုက်တာဟာ နှစ်ဦးသားအတွက် ကောင်းတဲ့ကိစ္စဖြစ်တယ်လို့ မှတ်ချက်ပေးကြပါတယ်။

Ref: straitstimes

You may also like these stories:

လမ်းခွဲပြီး ၃ ရက်အကြာ စားသောက်ဆိုင်မှာ အတူတူ မြင်တွေ့ခဲ့ရတဲ့ ဖန်ပင်းပင်းတို့ စုံတွဲ

စေ့စပ်ထားတဲ့ ချစ်သူနဲ့ လမ်းခွဲလိုက်တဲ့ တရုတ်မင်းသမီး ဖန်ပင်းပင်း

ပရိသတ်ရှေ့မှောက် တဖန်ပြန်ရောက်လာခဲ့တဲ့ မင်းသမီး ဖန်ပင်းပင်း

The post ချစ်သူဟောင်း ပေးထားတဲ့ ဝက်ဝံရုပ်ကို ထုတ်ရောင်းဖို့ ပြင်ဆင်နေတဲ့ မင်းသမီး ဖန်ပင်းပင်း appeared first on ဧရာဝတီ.

အမျိုးသား ၂ ဦးနဲ့ အမျိုးသမီး ၂ ဦးပါဝင်တဲ့ K-pop အဖွဲ့ KARD ဟာ အခုလထဲမှာ ဘောလိဝုဒ် အနုပညာကြီးစိုးရာ အိန္ဒိယနိုင်ငံကို သွားရောက်ကာ ပွဲဦးထွက် ဖျော်ဖြေပွဲ ပြုလုပ်တော့မှာ ဖြစ်ပါတယ်။

နယူးဒေလီမြို့ အခြေစိုက် Pink Box Events ကုမ္ပဏီကနေ စီစဉ်တဲ့ အဲ့ဒီဖျော်ဖြေပွဲနဲ့ ပတ်သက်လို့ ပြီးခဲ့တဲ့ သီတင်းပတ်ထဲမှာ ကြေညာချက် ထုတ်ပြန်ခဲ့တာ ဖြစ်ပါတယ်။ အဲ့ဒီကုမ္ပဏီက “ကျနော်တို့ဟာ တဖြည်းဖြည်းချင်း စတင်မှုနဲ့ အတူ လွန်ခဲ့တဲ့ ၄ နှစ်က ပေးခဲ့တဲ့ကတိအတိုင်း ကိုရီးယား အနုပညာရေလှိုင်းကို အမိအိန္ဒိယနိုင်ငံဆီ သယ်ဆောင်လာပါပြီ။ ဒီ ဇူလိုင်လမှာ KARD အဖွဲ့ကို လာဖျော်ဖြေမှာပါ” လို့ Instagram မှာ ရေးသားခဲ့ပါတယ်။

“Play Your Kard Right Tour 2019” လို့ နာမည်ပေးထားတဲ့ KARD အဖွဲ့ရဲ့ အိန္ဒိယ နယ်လှည့်ဖျော်ဖြေပွဲဟာ အိန္ဒိယနိုင်ငံမှာ ပြုလုပ်တဲ့ အဲဒီအဖွဲ့ရဲ့ ပထမဆုံး ဖျော်ဖြေပွဲလည်း ဖြစ်ပါတယ်။ သူတို့အဖွဲ့ဟာ ဇူလိုင်လ ၁၂ ရက်နေ့မှာ နယူးဒေလီနဲ့ ဇူလိုင်လ ၁၄ ရက်နေ့မှာ ဂါဝါဟာတီမြို့တို့မှာ ဖျော်ဖြေပွဲတွေ ပြုလုပ်မှာဖြစ်ပါတယ်။

အဖွဲ့ဝင် ၄ ဦးပါဝင်တဲ့ သူတို့အဖွဲ့ဟာ အိန္ဒိယမှာတော့ ပရိသတ်တွေကြား လူကြိုက်များတဲ့ K-pop အဖွဲ့တွေထဲက တဖွဲ့ ဖြစ်ပါတယ်။ ပြီးခဲ့တဲ့ ၂၀၁၇ ခုနှစ်တုန်းက အဖွဲ့ဝင် J.Seph က ၂၀၀၈ ခုနှစ်တုန်းက ရုပ်ရှင်ဖြစ်တဲ့ “Rab Ne Bana Di Jodi” ထဲက ဇာတ်ဝင်တေးကို သီဆိုဖျော်ဖြေခဲ့တာကြောင့် ဘောလိဝုဒ်သီချင်းတွေသာ နာမည်ကျော်ကြားတဲ့ အိန္ဒိယက ပရိသတ်တွေကြားမှာ အထူးအားပေးမှုကို ရရှိခဲ့ပါတယ်။

KARD အဖွဲ့ဟာ အိန္ဒိယမှာ နယ်လှည့်ဖျော်ဖြေပွဲ ပြုလုပ်ဖို့ အခုနောက်ဆုံး ကြေညာလိုက်တဲ့ အဖွဲ့လည်း ဖြစ်ပါတယ်။ IN2IT နဲ့ VAV အဖွဲ့တို့ဟာလည်း ပြီးခဲ့တဲ့ ၂ လလောက်တုန်းက အိန္ဒိယမှ ဖျော်ဖြေပွဲတွေကို ပြုလုပ်ခဲ့ပြီးဖြစ်ပါတယ်။ BM, J.Seph, Somin နဲ့ Jiwoo တို့ပါဝင်တဲ့ KARD အဖွဲ့ဟာ DSP Media လက်အောက်က ဖြစ်ပါတယ်။

၂၀၁၇ ခုနှစ်မှာ တရားဝင် စတင် ပွဲဦးထွက်ခဲ့တဲ့ အဖွဲ့လည်း ဖြစ်ပါတယ်။ သူတို့အဖွဲ့ဟာ Kpop အဖွဲ့တွေထဲမှာ ရှားရှားပါးပါး အမျိုးသားနဲ့ အမျိုးသမီးအဖွဲ့တွေကို ပေါင်းစပ်ထားတာကြောင့် ပရိသတ် စိတ်ဝင်စားမှုကို ခံခဲ့ရတဲ့အဖွဲ့လည်း ဖြစ်ပါတယ်။ ပြီးခဲ့တဲ့ မတ်လမှာတော့ “Bomb Bomb” ဆိုတဲ့ သီချင်းကို ဖြန့်ချိထားပါသေးတယ်။

Ref: gulfnews

You May Also Like These Stories:

Coachella ပွဲတော်ကြီးမှာ အောင်မြင်မှု စိုက်ထူနိုင်ခဲ့တဲ့ BlackPink

ထွက်ရှိပြီး အချိန်တိုအတွင်း ကြည့်ရှုသူအများဆုံးဖြစ်ခဲ့တဲ့ BlackPink အဖွဲ့ရဲ့ “Kill This Love”

The post အိန္ဒိယအထိ ခြေဆန့်လာပြီဖြစ်တဲ့ ကိုရီးယား အနုပညာရေလှိုင်း appeared first on ဧရာဝတီ.

The post အစွန့်ပစ်ခံ အမျိုးသမီးတွေ နေထိုင်ဖို့ အိမ်တလုံး ဆောက်ပေးခဲ့တဲ့ အဆိုတော် Steven Tyler appeared first on ဧရာဝတီ.

မင်းသားကြီး Will Smith ရဲ့ သားဖြစ်သူ အဆိုတော့ Jaden Smith ဟာ အိမ်ရာမဲ့တွေအတွက် စားသောက်ဆိုင်တဆိုင် ဖွင့်လှစ်ထားကြောင်း သူ့ရဲ့ လူမှုကွန်ရက် စာမျက်နှာမှာ တင်ထားပါတယ်။ အသက် ၂၁ နှစ်အရွယ် ရှိပြီ ဖြစ်တဲ့ Jaden Smith ရဲ့ စားသောက်ဆိုင် နာမည်ကတော့ “I Love You” ဖြစ်ပြီး သက်သတ်လွတ် ဟင်းလျာတွေကို ဝန်ဆောင်ပေးတယ်လို့ သိရပါတယ်။

ဒီစားသောက်ဆိုင်ဟာ အမေရိကန်နိုင်ငံ၊ လော့အိန်ဂျလစ်မြို့၊ စကစ်ရိုး ဧရိယာတလျှောက်မှာ စားစရာတွေ ဝေပေးခဲ့ပြီး ဒီလို ပြုလုပ်ရတာဟာ အမေရိကန်နိုင်အတွင်း များပြားလာတဲ့ အိမ်ရာမဲ့တွေကို ကူညီပေးဖို့ ဖြစ်တယ်လို့ သိရပါတယ်။ ဇူလိုင်လ ၇ ရက်နေ့က စတင်တဲ့ ဒီပရဟိတ စားသောက်ဆိုင်ဟာ အစပဲ ရှိသေးတယ်လို့ Jaden Smith က ပြောပါတယ်။

သူ့ရဲ့ လူမှုကွန်ရက် စာမျက်နှာမှာတော့ ” I Love You စားသောက်ဆိုင်ဟာ ထိုက်တန်တဲ့ သူတွေကို ထိုက်တန်အောင် လှူဒါန်းတဲ့ စားသောက်ဆိုင် ဖြစ်ပါတယ်။ အရသာရှိပြီး ကောင်းမွန်တဲ့ သက်သတ်လွတ် ဟင်းလျာတွေကို ဝန်ဆောင် ပေးပါတယ်”လို့ ရေးသားထားပါတယ်။

အစားအသောက်တွေကို မြို့ထဲ သွားရောက် လှူဒါန်းခဲ့ပြီး အိမ်ရာမဲ့ အများအပြား လာရောက် စားသုံးခဲ့တဲ့ ဗီဒီယိုဖိုင်ကိုလည်း တင်ထားတာ တွေ့ရပါတယ်။ Jaden Smith ဟာ ဇူလိုင် ၅ ရက်နေ့က သူ့ရဲ့ တကိုယ်တော်ခွေ ထွက်ရှိထားပြီး Tyler, The Creator နဲ့ အတူ “Igor” လို့ အမည်ရတဲ့ နယ်လှည့် ဖျော်ဖြေရေးအစီအစဉ်ပြုလုပ်ဖို့ ရှိတယ်လို့ သိရပါတယ်။

Ref. revolt.tv

You may also like these stories:

အိမ်ရာမဲ့သူ လူ ၁၀၀၀ ကျော်ကို ဆံပင် လိုက်ညှပ်ပေးတဲ့ ဆံသဆရာ

Chess Championship မှာ ချန်ပီယံဖြစ်သွားတဲ့ အသက် ၈ နှစ်အရွယ် အိမ်ရာမဲ့ ကလေး

အိမ်ရာမဲ့တွေနဲ့ ဆင်းရဲသူတွေကို သင်ကူညီနိုင်မယ့် နည်းလမ်းမျာ

The post အိမ်ရာမဲ့တွေအတွက် ရွေ့လျား စားသောက်ဆိုင် ဖွင့်လှစ်ခဲ့တဲ့ Jaden Smith appeared first on ဧရာဝတီ.

Beauty Blogger တယောက်အနေနဲ့ စတင်ခဲ့ပြီး ပရိသတ် ချစ်ခင်မှု ရရှိခဲ့တဲ့ နေခြည်ဦးကတော့ အလှအပအတွက် မိတ်ကပ်များသာ ပြန်လည် မျှဝေခြင်း မဟုတ်ဘဲ သူမရဲ့ Lifestyle၊ ဖက်ရှင်များကိုပါ တွဲဖက်ကာ မျှဝေ လေ့လာနေပြီး ဖက်ရှင်တွေကို အမြဲတမ်း မျက်ခြေမပြတ် လေ့လာဖြစ်တယ်လို့ ပြောပါတယ်။

“ဖက်ရှင်တွေကို လေ့လာရတာ နံပါတ် ၁ က ပိုက်ဆံ အရမ်းကုန်တယ်။ ၂ အချက် ရင်းနှီးမြှုပ်နှံမှု လုပ်ရတယ်။ ၃ အချက် စာအများကြီး ဖတ်ရတယ်။ ၄ အချက် ရှိသမျှ မီဒီယာတွေ၊ ရှိသမျှ ဖက်ရှင် Collection တွေကို လေ့လာရတယ်။ ကိုယ်က ဒီလောက်ထိ လုပ်လာခဲ့ပြီးမှ သြော် ငါတို့ အားပေးခဲ့တဲ့ နေခြည်ဦးက ဒီလောက်ထိ လုပ်လာနိုင်တယ်ဆိုတဲ့ သူတို့ရဲ့ အားကိုလည်း လိုချင်တယ်”လို့ နေခြည်ဦးက ပြောပါတယ်။

ဖက်ရှင်နဲ့ ပတ်သက်ပြီး နည်းနည်း နောက်ကျတာနဲ့ ပရိသတ်က ဝေဖန်ကြတဲ့အတွက် နေခြည်ဦးက အမြဲတမ်း ကြိုးစားရပြီး ပွဲတပွဲ တက်ဖို့အတွက်လည်း အများကြီး ပြင်ဆင်ရတယ်လို့ ဆိုပါတယ်။

“ကိုယ်က အရှေ့ကို သွားလေလေ၊ ပရိသတ်က နောက်က လိုက်လာလေလေ ဖြစ်တဲ့အတွက် နေခြည် နည်းနည်း နောက်ကျတာနဲ့ ပရိသတ်က ဝေဖန်လို့ ရတာပေါ့။ ဒါကြောင့် အမြဲတမ်းတော့ ကြိုးစားရတယ်။ ပင်တော့ ပင်ပန်းတယ်။ ပွဲတပွဲတက်ဖို့ နေခြည်တို့ အများကြီး ပြင်ဆင်ရတယ်။ ဒါပေမဲ့ ပရိသတ်တွေ ကြိုက်တယ်၊ မှတ်မိနေမယ်ဆိုရင်တော့ နေခြည်တို့ လုပ်ရတာ တန်ပါတယ်”လို့ နေခြည်ဦးက ပြောပါတယ်။

နေခြည်ဦးကတော့ သူများနဲ့ မတူတဲ့ ဖက်ရှင်မျိုးကို ကြိုက်နှစ်သက်ပြီး ပုံမှန်အားဖြင့် ယောကျာ်းလေးလို ဝတ်ရတာ ကြိုက်တယ်လို့ ဆိုပါတယ်။

“သူများတွေနဲ့ မတူတာကို ကြိုက်တယ်။ ပုံမှန်အားဖြင့်တော့ ယောကျာ်းလို ဝတ်ရတာ ကြိုက်တယ်။ အပြင်သွားရင်တော့ စိတ်ထဲမှာ ရှိတဲ့ Mood ကို ဝတ်ဖြစ်တယ်။ ကြိုတင် ပြင်ဆင်တာ မရှိဘူး။ ကိုယ်ဘာဝတ်ဝတ် ယုံကြည်မှုရှိတယ် ဆိုတဲ့ Mood ကို ထည့်ထားလိုက်တယ်” လို့ နေခြည်ဦးက ပြောပါတယ်။

နေခြည်ဦးရဲ့ ဖက်ရှင်များကတော့ အမြဲတမ်း ရှေ့ပြေးတခုလို ဖြစ်ပြီး တဖက်မှာလည်း တချို့သော သူများက နေခြည်ဦးဟာ Rich Kid ဖြစ်တာကြောင့် အများကြီးလုပ်ပြတယ်ဆိုတဲ့ ဝေဖန်မှုများလည်း ရှိနေပါတယ်။

နေခြည်ဦးက ယခုနောက်ပိုင်းမှာ ရုပ်ရှင်ကားများစွာ ရိုက်ကူးထားပြီး သူ ပါဝင် သရုပ်ဆောင်ထားတဲ့ ရုပ်ရှင်ကား ၂ ကားဟာလည်း ရုံတင်ပြသပြီး ဖြစ်ပါတယ်။ မကြာခင်မှာလည်း ရုံတင်ပြသသွားမယ့် ရုပ်ရှင်ကားများလည်း ရှိနေတယ်လို့ သိရပါတယ်။

You may also like these stories:

“မေမေက နေခြည်ဆိုးသမျှကို သည်းခံပေးတဲ့အတွက် ကျေးဇူးတင်တယ်”

“အခမ်းနားဆုံးမေတ္တာ” ရုပ်ရှင်အကြောင်း ပြောပြတဲ့ နေခြည်ဦး

နေတိုးနဲ့ တွဲပြီး သရုပ်ဆောင်ရမှာ အရမ်းရှိန်နေတဲ့ နေခြည်ဦး

The post ဖက်ရှင်တွေကို အမြဲတမ်း မျက်ခြေမပြတ် လေ့လာနေတဲ့ နေခြည်ဦး appeared first on ဧရာဝတီ.

မြန်မာ့ဂုဏ်ဆောင် အလှမယ်တဦးအဖြစ် ရပ်တည်နေတဲ့ အလှမယ် ရွှေအိမ်စည်က လတ်တလော ဆိုရှယ်မီဒီယာမှာ ပျံ့နှံ့နေတဲ့ နေပြည်တော်က သက်ငယ် မုဒိမ်းမှုကို မြန်မြန်ပြီးစေချင်တယ်လို့ ပြောပါတယ်။

“သက်ငယ် မုဒိမ်းမှုအပေါ် အမြင်ဆိုရင် အိမ်စည်က မြန်မြန်ပြီးစေချင်တယ်။ တရားခံကို ရှာချင်ရင် အိမ်စည်သာဆို ကလေးကို အရင်မေးမှာပဲလေ။ အိမ်စည် အရှင်းလင်းဆုံး တွေးတာပေါ့။ အခုတော့ ဘာဖြစ်နေမှန်း မသိဘူး။ ရှုပ်သင့်တာထက် ပိုရှုပ်နေတယ်လို့ ထင်တယ်။ အဓိက DNA စစ်တဲ့အခါမှာ ဘယ်သူနဲ့ လိင်ဆက်ဆံတယ် ဆိုတာကိုပဲ ဖော်ပြတာလေ”

“ဗစ်တိုးရီးယားလေး ကိစ္စမှာ ကလေးဖြစ်တဲ့အတွက် ခွင့်ပြုချက် မရှိဘူး။ သက်ငယ်မုဒိမ်း အကုန်လုံးကို ခြုံကြည့်လိုက်ရင်တော့ ခွင့်ပြုချက် ရှိလား၊ မရှိဘူးလားကို စစ်ဖို့က Rape Case နဲ့ စစ်မှ ရမှာ။ DNA စစ်တာကတော့ ဖြစ်ခဲ့ကြတယ် ဆိုတာကိုပဲ ဖော်ပြတာပေါ့”လို့ ရွှေအိမ်စည်က ပြောပါတယ်။

ပြစ်မှုကျူးလွန်သူတွေကို ရွှေအိမ်စည်က သေဒဏ် မပေးသင့်ဘူးလို့ ဆိုပြီး မသေစေချင်ဘဲ တရားခံအနေနဲ့ အရှင်လတ်လတ် ခံစားရအောင် လုပ်သင့်တယ်လို့ ဆိုပါတယ်။

“ကျူးလွန်သူကို အရူးထောင် ပို့သင့်တယ် ထင်တယ်။ လူတယောက်က ကလေး တယောက်ကို လုပ်တာမို့ အရူးဖြစ်တဲ့အတွက် ပို့စေချင်တာပါ။ သူကို သေဒဏ်ပေးကြပါ ပြောနေတာတွေတော့ ရှိတာပေါ့။ ဒါပေမဲ့ လူတယောက်ရဲ့ အသက်က မလွယ်ဘူးလေ။ တသက်တကျွန်း ချတာက တကယ်တမ်းတော့ သေလို့ ရှိရင် ဘာမှ မခံစားရတော့ဘူးလေ”

“ခံလိုက်ရတဲ့ ကလေးကတော့ ဒါကြီးကို မှတ်မိပြီးတော့ အားငယ်စိတ်တွေတော့ ခံစားရမှာပဲ။ ဒီလူတွေကို ဘယ်လို ပြစ်ဒဏ်ပေးသင့်လဲဆို မသေဘဲနဲ့ အရှင်လတ်လတ် ခံစားလို့ရအောင် လုပ်သင့်တယ် ထင်တယ်” လို့ ရွှေအိမ်စည်က ပြောပါတယ်။

အလှမယ် ရွှေအိမ်စည်ကတော့ ယခုအခါမှာ ရုပ်ရှင် ဇာတ်ကားတွေလည်း လက်ခံရိုက်ကူးနေပြီး ဒါရိုက်တာ မေဘရဏီ ရိုက်ကူးမယ့် “ခေါ်သံ” ရုပ်ရှင်ဇာတ်ကားမှာလည်း ပါဝင် သရုပ်ဆောင်သွားမယ်လို့ သိရပါတယ်။

You May Also Like These Stories:

သက်ငယ်မုဒိမ်းမှုနဲ့ ပတ်သက်ပြီး ပညာပေးရုပ်ရှင်တွေ ရိုက်ကူးထားတဲ့ နေတိုး

“သက်ငယ်မုဒိမ်းနဲ့ ပတ်သက်ပြီး လူတွေ အသိဉာဏ်မဲ့လာတဲ့အတွက် ဝမ်းနည်းမိတယ်”

“သက်ငယ်မုဒိမ်း ကျူးလွန်တဲ့ လုပ်ရပ်ဟာ လူ့ပတ်ဝန်းကျင်မှာ ရှိမနေသင့်ဘူး”

“သက်ငယ်မုဒိမ်း ကျူးလွန်သူတွေကို သေဒဏ် ပေးစေချင်တယ်”လို့ ပြောတဲ့ မအေးသောင်း 

“သက်ငယ်မုဒိမ်း ကျူးလွန်သူတွေကို မြန်မြန်ဖော်ထုတ်ပြီး ပြစ်ဒဏ်ပေးသင့်တယ်”လို့ ဖြိုးငွေစိုး ပြော

The post “သက်ငယ်မုဒိမ်း ကျူးလွန်သူတွေကို အရူးထောင် ပို့သင့်တယ်”လို့ အလှမယ် ရွှေအိမ်စည် ပြော appeared first on ဧရာဝတီ.

သရုပ်ဆောင် ခင်လှိုင်ကတော့ လက်ရှိ ဖြစ်ပေါ်နေတဲ့ သက်ငယ်မုဒိမ်းမှုတွေနဲ့ ပတ်သက်ပြီး ကျူးလွန်သူတွေကို ဥပဒေအရ ပြင်းပြင်းထန်ထန် အရေးယူလိုက်ရင် လုပ်တဲ့သူတွေ လျော့သွားကာ ပပျောက်သွားမယ်လို့ ခင်လှိုင်က ပြောပါတယ်။

“အမှန်တော့ ဥပဒေ မစိုးမိုးနိုင်ရင် ဖြစ်နေမှာပဲ။ လုယက်မှုတွေ၊ လူသတ်မှုတွေ၊ သက်ငယ်မုဒိမ်းတွေ စသည်အားဖြင့်ပေါ့။ ဥပဒေ ပြင်းပြင်းထန်ထန် အရေးယူလိုက်ရင် လုပ်တဲ့သူတွေ လျော့သွားပြီး ပပျောက်သွားမှာပဲ။ မပြင်းထန်သေးတော့ မကြောက်ဘူး။ ဘာမှ မဖြစ်ပါဘူး ဒါလေး လုပ်တာပဲဆိုပြီး ပေါ့ပေါ့ပါးပါး ဖြစ်နေကြတယ်။ သူများ တိုင်းပြည်တွေမှာက အပြစ်ကြီးကြီး လုပ်မှ မဟုတ်ဘူး။ အပြစ်သေးသေးလေး လုပ်တာနဲ့ကို သူတို့ဆီမှာ အရေးယူတာ။ ကျနော်တို့ ဆီမှာလည်း ပြင်းပြင်းထန်ထန်နဲ့ ဥပဒေ တင်းကြပ်လိုက်ရင် လူတွေက ကြောက်တတ်လာကြမှာပါ”လို့ ခင်လှိုင်က ပြောပါတယ်။

လတ်တလောမှာလည်း ဆိုရှယ်မီဒီယာမှာ ပျံ့နှံ့နေတဲ့ သက်ငယ်မုဒိမ်းမှုတွေနဲ့ ပတ်သက်ပြီးတော့လည်း ဒါဟာ လူမဆန်တဲ့ လုပ်ရပ်ဖြစ်တာကြောင့် အဲ့လို လုပ်တဲ့သူတွေကို သေဒဏ်ပေးဖို့ ကောင်းတယ်လို့ ခင်လှိုင်က ဆိုပါတယ်။

“သက်ငယ်မုဒိမ်းမှုအပေါ် အမြင်ကို ပြောရရင် တော်တော်ကို ဘယ်လိုမှ စဉ်းစားလို့ မရတဲ့၊ လူမဆန်တဲ့ လူတွေပေါ့။ လူမဆန်တဲ့ လုပ်ရပ်ပေါ့။ ကိုယ့်မှာ သားသမီးပဲ ရှိရှိ၊ တူ၊ တူမပဲ ရှိရှိ သူ့မှာ ဒါနဲ့ ပတ်သက်ပြီး နားလည် ခံစားတတ်တာလည်း မဟုတ်ဘူး။ ကိုယ်ကရော ဘယ်လောက်တောင် အဲ့ပေါ်မှာ သာယာနိုင်မှာ မလို့လဲ။ သူကရော ခံစားတတ်မှာ မလို့လဲ။ တော်တော်လည်း အောက်တန်းကျလွန်း အားကြီးတယ်”

“ဒီခေတ်မှာ အရမ်းပေါပါတယ်။ ငွေကြေးနဲ့ ပျော်ပါးရင်လည်း ပျော်ပါးလို့ ရနေတာကြီးကို ဘာဖြစ်လို့များ သူများသားသမီး တဘဝလုံး ပန်းကောင်း အညွှန့် ချိုးပစ်တယ်။ အဲ့လိုလူတွေကို သတ်ပစ်ဖို့ကောင်းတယ်”လို့ ခင်လှိုင်က ဆိုပါတယ်။

အနုပညာသက်တမ်း အနှစ် ၂၀ ကျော် ရှိနေပြီဖြစ်တဲ့ သရုပ်ဆောင် ခင်လှိုင်ကို ဟာသ သရုပ်ဆောင်အနေနဲ့ ဗီဒီယို ဇာတ်ကားတွေကနေ တဆင့် ပရိသတ်တွေ အားပေးခဲ့ကြတာပါ။ လူရွှင်တော် အဖြစ်လည်း လုပ်ကိုင်တဲ့ ခင်လှိုင်ဟာ အခုလက်ရှိ အချိန်အထိ ပရိသတ် ခိုင်ခိုင်မာမာနဲ့ ရပ်တည်နေတဲ့ အနုပညာရှင် တဦး ဖြစ်ပါတယ်။

You May Also Like These Stories:

“သက်ငယ်မုဒိမ်း ကျူးလွန်သူတွေကို အရူးထောင် ပို့သင့်တယ်”လို့ အလှမယ် ရွှေအိမ်စည် ပြော

“သက်ငယ်မုဒိမ်းနဲ့ ပတ်သက်ပြီး လူတွေ အသိဉာဏ်မဲ့လာတဲ့အတွက် ဝမ်းနည်းမိတယ်”

“သက်ငယ်မုဒိမ်း ကျူးလွန်တဲ့ လုပ်ရပ်ဟာ လူ့ပတ်ဝန်းကျင်မှာ ရှိမနေသင့်ဘူး”

“သက်ငယ်မုဒိမ်း ကျူးလွန်သူတွေကို သေဒဏ် ပေးစေချင်တယ်”လို့ ပြောတဲ့ မအေးသောင်း 

“သက်ငယ်မုဒိမ်း ကျူးလွန်သူတွေကို မြန်မြန်ဖော်ထုတ်ပြီး ပြစ်ဒဏ်ပေးသင့်တယ်”လို့ ဖြိုးငွေစိုး ပြော

The post “ဥပဒေနဲ့ ပြင်းပြင်းထန်ထန် အရေးယူရင် ပြစ်မှုကျူးလွန်သူတွေ လျော့သွားမှာပါ”လို့ ခင်လှိုင် ပြော appeared first on ဧရာဝတီ.

မင်းသားကြီး Tom Hanks ဟာ သူ့ရဲ့ မွေးနေ့မှာ စတိုင်ကျကျနဲ့ ဘယ်လို ဖြတ်သန်းရမယ်ဆိုတာ သိတဲ့သူ တယောက် ဖြစ်ပြီး သူ့ရဲ့ အသက် ၆၃ နှစ်ပြည့် မွေးနေ့မှာ ရိုက်ကူးထားတဲ့ အထူးဗီဒီယို တခုကို မျှဝေခဲ့တာ တွေ့ရပါတယ်။

“The Da Vinci Code” မင်းသား Hanks က “ကျနော့် အသက် ၆၃ နှစ်ပြည့် မွေးနေ့အတွက် ဝတ်ထားတဲ့ ကမ်းခြေ ဝတ်စုံလေးကို ကြည့်လိုက်ပါဦး” လို့စာရေးပြီး Twitter မှာ ဗီဒီယိုတင်ခဲ့ပါတယ်။ အဲ့ဒီ ဗီဒီယိုထဲမှာတော့ မင်းသားကြီးဟာ အဝတ်အစား မချွတ်ဘဲ ရွက်လှေထိပ်ကနေ ခုန်ချခဲ့တာကို မြင်တွေ့ရပါတယ်။

Look at the cool beach clothes I got for my 63rd Birthday! Hanx! pic.twitter.com/r89pNZp02L

— Tom Hanks (@tomhanks) July 9, 2019

အဲ့ဒီဗီဒီယိုဟာ မင်းသားကြီးရဲ့ ပရိသတ်တွေကြားထဲမှာ တော်တော်လေး လူပြောများခဲ့ရပြီး ကြည့်ရှုတဲ့ အကြိမ်ရေ ၂ ဒဿမ ၁ သန်းကျော် ရှိသွားခဲ့ပြီဖြစ်ပါတယ်။ ဒါ့အပြင် မင်းသားကြီးဟာ သားဖြစ်သူ Colin Hanks ဆီကနေ မွေးနေ့ ဆုတောင်းစကားကိုလည်း လက်ခံ ရရှိခဲ့ပါတယ်။

“Fargo” ရုပ်ရှင်မင်းသား Colin က “ကျနော့် အဖေရဲ့ ပျော်ရွှင်ဖွယ် ၆၃ နှစ်ပြည့် မွေးနေ့အတွက် ဆုမွန်ကောင်း တောင်းချင်ပါတယ်။ သူဟာ ဟာသအမြင်ရှိတဲ့ လူကောင်းတယောက် ဖြစ်ပါတယ်။ ချစ်တယ် အဖေ” လို့ Twitter မှာ ရေးတင်ခဲ့ပါတယ်။

မင်းသားကြီး Hanks ကို ၁၉၅၆ ခုနှစ်၊ ဇူလိုင်လ ၉ ရက်နေ့၊ ကယ်လီဖိုးနီးယားပြည်နယ်မှာ မွေးဖွားခဲ့တာ ဖြစ်ပါတယ်။ လက်ရှိကမ္ဘာပေါ်မှာ နာမည်အကျော်ကြားဆုံးနဲ့ လူအသိအမှတ်ပြု အခံရဆုံး ရုပ်ရှင်တွေထဲမှာ ပါဝင်ခဲ့သူလည်း ဖြစ်ပြီး အမေရိကန်ရဲ့ စံပြပုဂ္ဂိုလ်အဖြစ် သတ်မှတ်ခံထားရသူလည်း ဖြစ်ပါတယ်။

ဒါရိုက်တာကြီး Steven Spielberg ရိုက်ကူးခဲ့တဲ့ “Saving Private Ryan”၊ “Catch Me If You Can” ၊ “The Terminal၊ Bridge of Spies” နဲ့ “The Post” ရုပ်ရှင်တွေမှာ ပါဝင်ခဲ့ပြီး ပရိသတ်တွေရဲ့ အထူးနှစ်ခြိုက်အားပေးမှုကို ခံခဲ့ရသူ ဖြစ်ပါတယ်။ “Forrest Gump” ရုပ်ရှင်ထဲက ဇာတ်ကောင်နဲ့ နာမည်ကျော်တဲ့ မင်းသားကြီးဟာ အော်စကာဆု ၂ ခု၊ ရွှေကမ္ဘာလုံးဆု ၄ ခုနဲ့ အမ်မီဆု ၇ ခုရရှိထားပြီး အခြားဆုတွေကိုလည်း သိမ်းပိုက်ရရှိထားသူ ဖြစ်ပါတယ်။

Ref: etcanada

You May Also Like These Stories:

စူပါဟီးရိုးအဖြစ် သရုပ်ဆောင်ဖို့ ကမ်းလှမ်းခံရဖူးခြင်း မရှိဘူးလို့ ပြောတဲ့ Tom Hanks

ပရိသတ်တွေကို Surprise လုပ်ပြီး စားထားသမျှ ရှင်းပေးခဲ့တဲ့ Tom Hanks

The post အသက် ၆၃ နှစ်ပြည့် မွေးနေ့ကို ထူးထူးခြားခြား ဖြတ်သန်းခဲ့တဲ့ မင်းသားကြီး Tom Hanks appeared first on ဧရာဝတီ.

မကြာသေးခင်အချိန်က လွတ်ငြိမ်းချမ်းသာခွင့်နဲ့အတူ အကျဉ်းထောင်မှ ပြန်လည် လွတ်မြောက်လာခဲ့တဲ့ သရုပ်ဆောင် မိုးအောင်ရင်ရဲ့ ပထမဆုံး ရုပ်ရှင်ဇာတ်ကားကိုတော့ မအေးအေးဝင်းရဲ့ စီစဉ်မှုဖြင့် ရိုက်ကူးတော့မှာဖြစ်တယ်လို့ လက်ကီးဆဲဗင်း ထုတ်လုပ်ရေးရဲ့ ပိုင်ရှင် မအေးအေးဝင်းက ပြောပါတယ်။

“မိုးအောင်ရင်ဆိုတာ အစကတည်းက ကိုယ့်သားလိုပဲလေ။ အခုလည်း လူသစ်စိတ်သစ်နဲ့ ဇာတ်ကားတွေ ရိုက်ဖို့ ရှိပါတယ်။ ကျမတို့ကလည်း သူ့အတွက် ဇာတ်လမ်းတွေရောဘာရော စီစဉ်ထားပါတယ်။ အခု ပထမဆုံး ပြန်ရိုက်မယ့် ကားကတော့ ဒါရိုက်တာ နေပိုင်ပေါ့။ မြင့်မြတ်နဲ့ တွဲပြီးတော့ အပြိုင်ဇာတ်လေးကို စီစဉ်ထားပါတယ်”လို့ မအေးအေးဝင်းက ပြောပါတယ်။

အဆိုပါရုပ်ရှင်ဇာတ်ကားကိုတော့ ဒါရိုက်တာနေပိုင်ကရိုက်ကူးမှာဖြစ်ပြီး သြဂုတ် ၁ရက်နေ့မှာ စတင်ရိုက်တော့မှာ ဖြစ်တယ်လို့ သိရပါတယ်။

“သူကတော့ စိတ်အားထက်သန်နေပါတယ်။ အခုတောင် Boxing တွေ ဘာတွေထိုးနေတာ အက်ရှင် ရိုက်ဖို့ အတွက်ပါ။ သေချာလေ့လာပြီး သေချာကို လုပ်နေပါတယ်။ မင်းသမီးကတော့ ချိတ်နေတုန်းပါ” လို့ မအေးအေးဝင်းက ပြောပါတယ်။

မအေးအေးဝင်းရဲ့ လပ်ကီးဆဲဗင်း ရုပ်ရှင်ထုတ်လုပ်ရေးမှ ရုပ်ရှင်ဇာတ်ကားများစွာ ရိုက်ကူးဖို့ ရှိပြီး ရုံတင်ဖို့အတွက်လည်း ရုပ်ရှင်ဇာတ်ကား ၂၀ နီးပါးလောက် ရှိသေးတယ်လို့ သိရပါတယ်။

“ဒီနှစ်ထဲမှာ ကျမတို့ ထုတ်လုပ်ရေးက ရုပ်ရှင်ဇာတ်ကားတွေ အများကြီး ရိုက်ဖို့ ရှိပါတယ်။ အနီးစပ်ဆုံးကတော့ သြဂုတ်လ ၁ ရက်နေ့မှာ မြင့်မြတ်နဲ့ မိုးအောင်ရင်နဲ့ ရိုက်ဖို့ ရှိပါတယ်။ ဒါရိုက်တာ နေပိုင် ရိုက်မှာပါ။ ကျမဆီမှာ ရိုက်ထားပြီး ရုံမတင်ရသေးတာ ၁၀ ကားကျော်၊ ကား ၂၀ နီးပါးလောက် ရှိသေးတယ်။ ဒီနှစ်ထဲမှာ ၅ ကား တင်ထားတော့ ကျန်ပါတယ်။ ဆင်ဆာကျပြီးသားတွေတော့ များပါတယ်”လို့ မအေးအေးဝင်းက ပြောပါတယ်။

မိုးအောင်ရင်ရဲ့ဇာတ်ကားများကို စောင့်မျှော်နေတဲ့ ပရိသတ်များကိုလည်း မအေးအေးဝင်းက “ မိုးအောင်ရင်ကို စောင့်မျှော်နေတဲ့ ပရိသတ်အတွက် ကားကောင်းတွေ အများကြီးလာမှာပါ။ ကျမတို့ စီစဉ်နေပါတယ်” လို့ ပြောပါတယ်။

You May Also Like These Stories:

“မိသားစုကို ဒုက္ခပေးခဲ့ရတဲ့အတွက် နောင်တရလို့ မဆုံးပါဘူး”လို့ မိုးအောင်ရင် ပြော

မိုးအောင်ရင် ထောင်က ထွက်လာပြီးနောက် လူမှုရေး အကျိုးပြုလုပ်ငန်းတွေ လုပ်ဖို့ စီစဉ်နေ

The post မအေးအေးဝင်း စီစဉ်မှုနဲ့ သရုပ်ဆောင် မိုးအောင်ရင် ရုပ်ရှင် ပြန်ရိုက်တော့မည် appeared first on ဧရာဝတီ.

“ရွှေရွှေ စုံတွဲ”လို့ ပရိသတ်တွေက ချစ်စနိုးနဲ့ ခေါ်ကြတဲ့ အနုပညာရှင်စုံတွဲ အဆိုတော် ရွှေထူးနဲ့ သရုပ်ဆောင်ရွှေမှုံရတီတို့ နှစ်ဦးဟာ သူတို့ရဲ့ အနုပညာအလုပ် အသီးသီးမှာ တယောက်နဲ့ တယောက် အကြံဉာဏ်များပေးဖြစ်ပြီး ရွှေမှုံရတီကတော့ ရုပ်ရှင်နဲ့ ပတ်သက်တဲ့ ဝေဖန်ခံရမှုများကို ရွှေထူးအပေါ် ပြောပြဖြစ်တယ်လို့ ဆိုပါတယ်။

“သဲတို့ကျတော့ ရုပ်ရှင်နဲ့ ပတ်သက်ပြီး ဝေဖန်တာတွေက အသားကျနေပြီ။ ဒူပေနာပေဖြစ်နေပြီ ဆိုတော့ ကိုရွှေထူးကို အဲဒါနဲ့ ပတ်သက်ပြီး အတွေ့အကြုံလေး ပြောပြတာက လွဲပြီးတော့ ကျန်တာတော့ ဘာမှ မရှိပါဘူး။ သူလည်း အနုပညာရှင် တယောက်ပဲလေ”လို့ ရွှေမှုံရတီက ခင်ပွန်းဖြစ်သူ ရွှေထူးအပေါ် အကြံပေးဖြစ်ပုံနဲ့ ပတ်သက်ပြီး ပြောပါတယ်။

အဆိုတော် တယောက်အဖြစ်ကနေ ရုပ်ရှင်သရုပ်ဆောင် အနေနဲ့ လုပ်ကိုင်နေပြီဖြစ်တဲ့ ရွှေထူးရဲ့ တတိယမြောက် ရုပ်ရှင်ဇာတ်ကားကြီး “ဒဏ္ဍာရီမိုး” ရုံတင်မယ့်ရက်နဲ့ ဇနီးဖြစ်သူ ရွှေမှုံရတီ ပါဝင်သရုပ်ဆောင်ထားတဲ့ “ချာလီဘ” ရုပ်ရှင်ဇာတ်ကားတို့ဟာ တရက်တည်းမှာ တပြိုင်တည်း ရုံတင် ပြသသွားမှာ ဖြစ်ပါတယ်။

“သူနဲ့ ရုံတင်မှာက ၁၁ ရက်နေ့ တရက်တည်းပဲလား မသိဘူး။ သွားအားပေးရမှာပေါ့။ သူ့ကားလေးက ခေါင်းဆောင်အဖြစ် ဒုတိယမြောက်ကားလို့ ပြောလို့ရတယ်။ သွားကြည့်ဖြစ်မှာပါ”လို့ ရွှေမှုံရတီက ပြောပါတယ်။

“ချာလီဘ” ရုပ်ရှင်ဇာတ်ကားထဲမှာတော့ ရွှေမှုံရတီက ခပ်ကဲကဲ ကောင်မလေးတယောက်အဖြစ် သရုပ်ဆောင်ထားပြီး ရုပ်ရှင်ဇာတ်ကား ရိုက်ကူးစဉ်က နည်းနည်းဝနေခဲ့တယ်လို့ ပြောပါတယ်။

“ကိုမြင့်မြတ်နဲ့ အမှတ်တရတွေကတော့ ထွေထွေထူးထူးတော့ သိပ်မရှိဘူး။ ဒီကားရိုက်နေတုန်းတော့ သဲကိုဝလာတယ်ချည်းပဲ ပြောတာ။ သဲက ဒီကားရိုက်တုန်းက နည်းနည်းပြည့်လာတယ်။ အစပိုင်းကတော့ နည်းနည်း ပိန်တယ်။ နောက်ပိုင်းကျတော့ တဖြည်းဖြည်းနဲ့ ပြည့်ပြည့်လာတယ်။ ဒါပေမယ့် သိပ်တော့ မသိသာပါဘူး။ ကိုယ့်ဘာသာပဲ သိတာပေါ့”လို့ ရွှေမှုံရတီက ပြောပါတယ်။

ရွှေမှုံရတီကတော့ ဘယ်လို ဇာတ်ရုပ်မျိုးပဲဖြစ်ဖြစ် သူမအတွက် ခက်ခဲမှုရှိပြီး သာမန်လောက်ပဲ မလုပ်ပြချင်တာကြောင့် ခက်ခက်ခဲခဲ ကြိုးစား သရုပ်ဆောင်တယ်လို့ ပြောပါတယ်။

“ဘယ်အရာမှတော့ လွယ်ကူတယ်တော့ မရှိပါဘူး။ ဟာသပဲဖြစ်ဖြစ်၊ ဒရာမာပဲဖြစ်ဖြစ်၊ ရိုမန့်စ်ပဲဖြစ်ဖြစ်၊ ဘာအရာပဲဖြစ်ဖြစ် သဲအတွက် ခက်ခဲတယ်။ ဘာဖြစ်လို့လဲဆိုရင် ကြိုးစားရတာပေါ့နော်။ ပုံမှန်လေးပဲ လုပ်လိုက်လို့ရပေမယ့် သဲ ခက်ခက်ခဲခဲ ကြိုးစားချင်တယ်”လို့ ရွှေမှုံရတီက ပြောပါတယ်။

You may also like these stories:

“ဧည့်သည်” ဇာတ်ကားနဲ့ ပတ်သက်ပြီး ပရိသတ် အားမပေးမှာ စိုးရိမ်နေတဲ့ ရွှေထူး

အိမ်ထောင်ကျပြီးနောက်ပိုင်း ပိုပြီး တည်ငြိမ် ရင့်ကျက်လာတဲ့ သရုပ်ဆောင် ရွှေမှုံရတီ

သရုပ်ဆောင်ပိုင်းနဲ့ ပတ်သက်လို့ မသိတာရှိရင် ရွှေမှုံရတီကို မေးတယ်လို့ ပြောတဲ့ ရွှေထူး

“အိမ်ထောင်ကျပြီးမှ ပိုချစ်တယ်လို့ ခံစားရတယ်”လို့ ရွှေမှုံရတီ ပြော

The post ရွှေထူးကို ရုပ်ရှင်နဲ့ ပတ်သက်တဲ့ ဝေဖန်ခံရမှုတွေ ပြောပြတဲ့ ရွှေမှုံရတီ appeared first on ဧရာဝတီ.

ကိုရီးယားမင်းသား Kang Ji-hwan ဟာ သူ့ရဲ့ အေဂျင်စီက ဝန်ထမ်းထဲက တဦးကို လိင်ပိုင်းဆိုင်ရာ အကြမ်းဖက်ခဲ့ပြီး နောက်တဦးကို ဗလက္ကာရ ပြုလုပ်ခဲ့တယ်ဆိုတဲ့ သံသယနဲ့ ဝရမ်းမပါဘဲ ဖမ်းဆီးခဲ့တယ်လို့ ရဲတပ်ဖွဲ့က ဇူလိုင်လ ၁၀ ရက်နေ့မှာ ပြောဆိုခဲ့ပါတယ်။

ဂွမ်ဂျူရဲစခန်းက အသက် ၄၁ နှစ်အရွယ် မင်းသားကို ဆိုးလ်မြို့၊ တောင်ဘက်မှာရှိတဲ့ ဂွမ်ဂျူမြို့က သူ့ရဲ့နေအိမ်ကနေ ဇူလိုင်လ ၉ ရက် ည ၁၀ နာရီ ၅၀ မိနစ်အချိန်မှာ ဖမ်းဆီးခဲ့တာ ဖြစ်တယ်လို့ သိရပါတယ်။ မင်းသား Kang ဟာ အရက်သောက် ဝိုင်းဖွဲ့တွေ့ဆုံမှုအပြီး သူ့ရဲ့ အိမ်က အခန်းတခုမှာ အိပ်ပျော်နေကြတဲ့ အမျိုးသမီးတွေကို လိင်ပိုင်းဆိုင်ရာ အနိုင်ကျင့်ခဲ့တယ်လို့ ဆိုပြီး သံသယရှိထားခံရပါတယ်။

မင်းသားနဲ့ အဲ့ဒီအမျိုးသမီး နှစ်ဦးဟာ နေရာတခုမှာ အေဂျင်စီက အခြားအဖွဲ့ဝင်တွေနဲ့ ပါတီတခုကို ကျင်းပခဲ့ပြီးတဲ့နောက် အိမ်ထဲမှာ အရက်သောက်နေခဲ့ကြတာလို့ ဆိုပါတယ်။

လိင်ပိုင်းဆိုင်ရာ အကြမ်းဖက်မှု ပြုကျင့်ခံရတဲ့ အမျိုးသမီးတဦးရဲ့ သူယ်ချင်းတဦးက သူ့သူငယ်ချင်းဟာ မင်းသား Kang ရဲ့ အိမ်မှာ အရက်သောက်နေခဲ့ပြီး တံခါးပိတ်ခံထားရတယ်လို့ စာတို လက်ခံ ရရှိခဲ့တာကြောင့် အဲ့ဒီနေ့ ည ၉ နာရီ ၄၁ မိနစ်အချိန်မှာ ရဲတပ်ဖွဲ့ထံ သတင်းပေးတိုင်ကြားခဲ့လို့ အဲ့ဒီ လိင်ပိုင်းဆိုင်ရာ အကြမ်းဖက်မှု ပေါ်ပေါက်ခဲ့တာဖြစ်ပါတယ်။ အဲ့ဒီအမှုနဲ့ ပတ်သက်လို့ မင်းသားကို ဖမ်းဆီးခဲ့တာလည်း ဖြစ်ပါတယ်။

ရဲတပ်ဖွဲ့ဟာ မင်းသားရဲ့အိမ်ကို ရောက်ရှိလာခဲ့ပြီး အမျိုးသမီးနှစ်ဦးနဲ့ မင်းသားကို သီးခြားစီ ခွဲထုတ်ပြီးတဲ့နောက် အဲ့ဒီအမျိုးသမီး နှစ်ဦးဆီကနေ စစ်ချက်ရယူခဲ့ကာ မင်းသားကို ဖမ်းဆီးထိန်းသိမ်းလိုက်တာလည်း ဖြစ်ပါတယ်။

စုံစမ်းစစ်ဆေးသူတွေရဲ့ စစ်မေးချက်အတွင်းမှာ မင်းသား Kang က “ကျနော် သူတို့နဲ့ အရက်သောက်နေခဲ့တယ် ဆိုတာကိုပဲ မှတ်မိပါတယ်။ ဒါပေမယ့် အဲ့ဒီနောက်ပိုင်း ကျနော် မမှတ်မိပါဘူး။ သူတို့ အိပ်နေခဲ့တဲ့ တခန်းမှာ ကျနော် နိုးလာခဲ့တာပါ” လို့ ပြောဆိုခဲ့ပါတယ်။

ရဲတပ်ဖွဲ့ကတော့ ဇူလိုင်လ ၁၀ ရက်နေ့ နှောင်းပိုင်းမှာ မလျော်မကန် ပြုကျင့်မှုနဲ့ သူ့ကို ဆက်လက် စစ်ဆေးမေးမြန်းဦးမှာ ဖြစ်ပါတယ်။ မင်းသား Kang ဟာ TV Chosun ရုပ်သံကနေ ထုတ်လွှင့်နေတဲ့ “Joseon Survival” ဒရာမာမှာ ပါဝင်သရုပ်ဆောင်နေသူလည်း ဖြစ်ပါတယ်။

Ref: Yonhap

You May Also Like These Stories:

ကမ္ဘာပေါ်မှာ မုဒိမ်းမှု အဖြစ်ပွားဆုံး နိုင်ငံများ

ရုပ်ရှင်ထုတ်လုပ်သူ Harvey Weinstein ကို မုဒိမ်းမှုဖြင့် စွဲချက်တင်မည်

The post ဝန်ထမ်းများအပေါ် လိင်အကြမ်းဖက်မှုနဲ့ ဗလက္ကာရ ပြုလုပ်မှုတို့ဖြင့် မင်းသား Kang Ji-hwan ဖမ်းဆီးခံရ appeared first on ဧရာဝတီ.

ဟာသနဲ့ သရဲကား ကြိုက်တဲ့ ပရိသတ်တွေအတွက် Horror Comedy ဇာတ်လမ်း အမျိုးအစား ရိုက်ကူးမယ့် “ခေါ်သံ” ရုပ်ရှင် မိတ်ဆက်ပွဲကို ဇူလိုင်လ ၉ ရက်နေ့ မနက်ပိုင်းက ရန်ကုန်မြို့၊ M3 Food Center မှာ ပြုလုပ်ခဲ့ပါတယ်။ “ခေါ်သံ” ရုပ်ရှင်နဲ့ ပတ်သက်ပြီး ဒီဇာတ်ကားကို ရိုက်ကူးမယ့် ဒါရိုက်တာနဲ့ ပါဝင်သရုပ်ဆောင်များက အခုလိုပဲ ပြောပါတယ်။

ဒါရိုက်တာ မေဘရဏီ

“ခေါ်သံ” ဇာတ်ကားလေးက သရဲ ဟာသ ကားလေးပါ။ ဒီမှာပါတဲ့ ယောကျာ်လေး ၆ ယောက်ဆို ကာရိုက်တာတွေ မတူအောင် ထည့်ထားတယ်။ ဒီကားလေးက လူတွေရဲ့ စွဲလမ်းတတ်တာတွေရယ်၊ ကိုယ်လုပ်တဲ့ အရာကို တာဝန်ယူစိတ်ရယ် အဲဒါတွေကို အဓိကပြသွားမှာပါ။ ကျမအတွက်တော့ ပထမဆုံး ရုပ်ရှင်ကားပါ။ အဲ့အတွက် အရမ်းလည်း စိတ်လှုပ်ရှားပါတယ်။ အကောင်းဆုံးတော့ ကြိုးစားသွားမှာပါ။ နေရာကတော့ သန်လျင်ဘက်နဲ့ နောင်ချိုမှာ ရိုက်ဖို့ စီစဉ်ထားပါတယ်။

ထွန်းထွန်း

ဒီဇာတ်ကားက ကာရိုက်တာနည်းပြီးတော့ တင်ပြမှုကောင်းတဲ့ ဇာတ်ကားမျိုး မဟုတ်ပေမယ့် သရဲကားဖြစ်တဲ့အတွက် သရုပ်ဆောင်များလေ ပိုမြိုင်လေပေါ့။ ဒါမှ ပရိသတ်ကြည့်တဲ့အခါမှာ ပိုကောင်းနိုင်မယ့် ဇာတ်ကား တကားလို့တော့ ပြောလို့ရတယ်။ ဒီကားမှာတော့ “သုခ” ဆိုတဲ့ နေရာတကာပါတဲ့ ကောင်လေးတယောက်နေရာက သရုပ်ဆောင်မယ်။

ခင်လှိုင်

ကျနော်က ဇာတ်ကားတိုင်းမှာ ဆံပင် စီးရင်စီး၊ မစီးရင် ကတုံး ဆံပင်နဲ့ အတွေ့များတယ်ပေါ့နော်။ ဒါပေမယ့် ဒီဇာတ်ကားမှာတော့ ပုံစံတမျိူးလေး လုပ်ဖို့ စီစဉ်ထားပါတယ်။ ဒါက ရယ်စရာကောင်းပြီးတော့ အူကြောင်ကြောင် ခပ်ပိန်းပိန်း ပုံစံပေ့ါနော်။ အဲဒီလို ကာရိုက်တာ ဖြစ်အောင် လုပ်ရမှာပေါ့နော်။

အိချောပို

ဒီဇာတ်ကားထဲမှာ အိချောက ကွမ်းတောင်ကိုင်၊ ပန်းတောင်ကိုင် ကောင်မလေး “စံပယ်”ဆိုတဲ့ နေရာက သရုပ်ဆောင်ရမှာပါ။ ဒီဇာတ်ကားရဲ့ ထူးခြားချက်က ခရီးတွေ အတူတူ ထွက်ကြတာ ဖြစ်တဲ့အတွက် မင်းသား ၅ ယောက်နဲ့အတူ အမြဲတမ်း ပါနေမယ်။ အဝတ်အစားဆိုရင်လည်း တစုံလောက်နဲ့တောင် သွားရင် သွားမှာပါ။ ပရိသတ် ထင်မထားတဲ့ ကာရိုက်တာလေးကို မြင်ရမှာပါ။

အောင်မြင့်မြတ်

“ဒီဇာတ်ကားထဲမှာတော့ သူငယ်ချင်း ၅ ယောက်ပေါ့နော်။ တယောက်တမျိူးစီ ဆိုးကြတယ်။ အဲဒီ အထဲမှာမှ တယောက်ပေါ့။ ဒါက သရဲကားဆိုပေမယ့် ဟာသလေးတွေလည်း ပါတယ်။ ဒါပေမယ့် ကျနော့် ကာရိုက်တာမှာတော့ ဟာသ မပါသလောက်ပဲ။ အဲဒါကြောင့်လည်း ရိုက်ဖြစ်တာပါ။ ကျနော်က ဟာသအပိုင်းကို အားနည်းတယ်လေ။ အခုကားက ကျတော့ ကိုယ်နဲ့လိုက်တဲ့ ကာရိုက်တာလေးလည်းဖြစ်နေ နောက်စီနီယာအစ်ကိုတွေနဲ့လည်း တွဲဖက်သရုပ်ဆောင်ရမို့ လက်ခံဖြစ်ခဲ့တာပါ”လို့ အောင်မြင့်မြတ်က ပြောပါတယ်။

“ခေါ်သံ” ရုပ်ရှင်ဇာတ်ကားကြီးကို Bo Bo ရုပ်ရှင်ထုတ်လုပ်ရေးက ထုတ်လုပ်မှာဖြစ်ပြီး ဒါရိုက်တာ မေဘရဏီနဲ့ ဒါရိုက်တာ စိုးမိုးမင်းတို့ ရိုက်ကူးပုံဖော်သွားမှာ ဖြစ်ပါတယ်။ ဒီဇာတ်ကားမှာ သရုပ်ဆောင် ထွန်းထွန်း၊ ကျော်ကျော်ဗိုလ်၊ ရဲတိုက်၊ ရဲရင့်အောင်၊ အောင်မြင့်မြတ်၊ ခင်လှိုင်၊ ဂျိူကာ၊ အိချောပို၊ မေမြင့်မိုရ်နဲ့ ရွှေအိမ်စည်တို့က အဓိက ပါဝင်သရုပ်ဆောင်သွားမှာ ဖြစ်ပါတယ်။ ဇူလိုင်လ အတွင်းမှာ စတင်ရိုက်ကူးသွားမယ်လို့ သိရပါတယ်။

You May Also Like These Stories:

ရေကူးဝတ်စုံ ဝတ်ပြီး ရိုက်ခဲ့တဲ့ ရုပ်ရှင်အကြောင်း ပြောတဲ့ သရုပ်ဆောင် အိချောပို

ဟာသကားရိုက်ရရင် ပျော်တဲ့ သရုပ်ဆောင် အိချောပို

ကိုယ်လုပ်တဲ့ အလုပ်တခုကို ပရိသတ်ရင်ထဲ ကျန်နေခဲ့စေချင်တဲ့ အိချောပို

The post ဟာသနဲ့ သရဲကား ကြိုက်သူတွေအတွက် Horror Comedy ရုပ်ရှင် “ခေါ်သံ” appeared first on ဧရာဝတီ.

အဆိုတော် Nicki Minaj ဟာ လာမယ့် သီတင်းပတ်ထဲ ဆော်ဒီအာရေးဗီးယားနိုင်ငံမှာ ပြုလုပ်ဖို့ စီစဉ်ထားတဲ့ ဖျော်ဖြေပွဲမှာ ပါဝင်တင်ဆက်မယ့် အစီအစဉ်ကို ဖျက်သိမ်းလိုက်ပါတယ်။ အကြောင်းကတော့ သူဟာ LGBT နဲ့ အမျိုးသမီးအခွင့်အရေးတွေကို ထောက်ခံတဲ့အတွက် ဆိုပြီးတော့ ပြောဆိုထားပါတယ်။

အခုလိုမျိုး ဆော်ဒီရဲ့ Jeddah မြို့မှာ ကျင်းပမယ့် ပွဲတော်မှာ ပွဲဝင်ဖို့ စီစဉ်တာကို ဖျက်သိမ်းလိုက်ရတာဟာ အဲ့ဒီနိုင်ငံရဲ့ လူ့အခွင့်အရေး မှတ်တမ်းတွေအပေါ် ဝေဖန်သူတွေထံကနေ ရှုတ်ချမှုနဲ့ ရင်ဆိုင်ခဲ့ရလို့ ဖြစ်တယ်လို့လည်း ဆိုပါတယ်။ တချို့သူတွေကတော့ ရှေးရိုးဆန်လွန်းတဲ့ Conservative ဘုရင့်နိုင်ငံမှာ ဘယ်လိုအဝတ်အစားတွေ ဝတ်ပြီး ဘယ်လိုစာသားတွေကို သီဆိုမယ်ဆိုတာကို မေးခွန်းထုတ်နေကြပါတယ်။

ဆော်ဒီနိုင်ငံဟာ ဖျော်ဖြေရေး ကဏ္ဍအပေါ်မှာ တင်းကြပ်မှုတွေကို ဖြေလျှော့ဖို့ ကြိုးစားနေပြီး အနုပညာကဏ္ဍမှာလည်း တိုးတက်ဖွံ့ဖြိုးမှုတွေရှိနေစေဖို့ တွန်းအားပေးလုပ်ဆောင်နေပါတယ်။

အဲ့ဒီနိုင်ငံရဲ့ လူ့အခွင့်ရေးမှတ်တမ်း စိစစ်မှုဟာ ပြီးခဲ့တဲ့ အောက်တိုဘာလတုန်းက အစ္စတန်ဘူလ်မြို့မှာရှိတဲ့ ဆော်ဒီကောင်စစ်ဝန်ရုံးမှာ ဂျာနယ်လစ် Jamal Khashoggi လုပ်ကြံ သတ်ဖြတ်ခံလိုက်ရပြီးတဲ့နောက် ပိုပြီးဆိုးရွားလာခဲ့ပါတယ်။ ပြီးခဲ့တဲ့ မတ်လမှာပဲ ဆော်ဒီဟာ အမျိုးသမီးအခွင့်အရေး တက်ကြွလှုပ်ရှားသူ ၁၀ ဦးကို တရားရုံးမှာ စွဲချက်တင်ခဲ့တာကြောင့် ဝေဖန်မှုတွေ ပိုမိုတိုးလာခဲ့ပါတယ်။

“တော်တော်လေး စဉ်းစား သုံးသပ်ပြီးတဲ့နောက်မှာ Jeddah World Fest မှာ ပြုလုပ်ဖို့ စီစဉ်ထားတဲ့ ဖျော်ဖြေပွဲကို ရှေ့ဆက် လုပ်ဆောင်ခြင်း မပြုဖို့ ဆုံးဖြတ်လိုက်ပါတယ်။ အမျိုးသမီးတွေ၊ LGBTQ လူမှု အသိုက်အဝန်းတွေရဲ့ အခွင့်အရေးနဲ့ လွတ်လပ်စွာ ထုတ်ဖော်ခွင့်ကို ထောက်ခံတာကို ရှင်းရှင်းလင်းလင်း ပြသဖို့ အရေးကြီးတယ်လို့ ယုံကြည်တာကြောင့် ဒီကိစ္စတွေအပေါ် ကိုယ့်ကိုယ်ကိုယ် ပိုသိစေပြီးရင်တော့ ဆော်ဒီမှာ ရှိတဲ့ ကျမရဲ့ ပရိသတ်တွေဆီကို ဖျော်ဖြေပွဲ ယူဆောင်လာမှာဖြစ်ပါတယ်”လို့ အဆိုတော် Nicki Minaj က ဆိုပါတယ်။

ပြီးခဲ့တဲ့ ဇူလိုင်လ ၅ ရက်နေ့မှာ အမေရိကန်အခြေစိုက် လူ့အခွင့်အရေး ဖောင်ဒေးရှင်းက အဆိုတော် Nicki ထံ အိတ်ဖွင့်ပေးစာတစောင် ပေးပို့ခဲ့ပြီး ဇူလိုင်လ ၁၈ ရက်နေ့မှာ ကျင်းပမယ့် ပွဲကနေ နုတ်ထွက်ပေးဖို့ တိုက်တွန်းခဲ့ပါတယ်။ ဒါ့အပြင် အဲဒီ ဆော်ဒီနိုင်ငံရဲ့ ငွေကို လက်မခံဖို့နဲ့ ထိန်းသိမ်းထားတဲ့ အမျိုးသမီး တက်ကြွ လှုပ်ရှားသူတွေကို ပြန်လွှတ်ပေးဖို့ တောင်းဆိုရေး သူ့ရဲ့လွှမ်းမိုးမှုကို အသုံးချဖို့ တောင်းဆိုခဲ့ပါတယ်။

Ref:BBC

You May Also Like These Stories:

“Angry Birds 2” ရုပ်ရှင်မှာ အသံသရုပ်ဆောင်မယ့် Nicki Minaj

Shanghai Music Festival မှာ ဖျော်ဖြေဖို့ ငြင်းဆန်ခဲ့တဲ့ Nicki Minaj

ကျေးဇူးတော်နေ့မှာ ကြက်ဆင်တွေအခမဲ့ဝေငှပေးခဲ့တဲ့ Nicki Minaj

The post LGBT နဲ့ အမျိုးသမီး အခွင့်အရေးဆိုင်ရာ ဝေဖန်မှုများကြောင့် ဆော်ဒီဖျော်ဖြေပွဲမှ Nicki Minaj နုတ်ထွက် appeared first on ဧရာဝတီ.

ဇူလိုင်လ ၄ ရက်နေ့ အမေရိကန်နိုင်ငံရဲ့ လွတ်လပ်ရေးနေ့မှာ စတင်ပြီး ပြသခဲ့တဲ့ Stranger Things ဇာတ်လမ်းတွဲဟာ ပြသပြီး ၄ ရက်အတွင်းမှာပဲ ကြည့်ရှုသူ ၄၀ ဒဿမ ၇ မီလီယံနဲ့ ကြည့်ရှုသူ အများဆုံးစံချိန်တင်ခဲ့ပါတယ်။

Netflix ဟာ ကြည့်ရှုသူစာရင်းကို ထုတ်ပြန်လေ့ မရှိပေမယ့် ဒီတခါမှာတော့ ထူးထူးခြားခြား ထုတ်ပြန်ခဲ့တာလည်း ဖြစ်ပါတယ်။ ဒါဟာ Netflix ရဲ့ တရားဝင်ထုတ်ပြန်တဲ့ စာရင်းဖြစ်ပြီး အပြင်က တရားမဝင်တဲ့ ရုပ်သံတွေမှာလည်း ကြည့်ရှုသူတွေ သန်းနဲ့ ချီပြီး ရှိနေပါသေးတယ်။

နောက်ထပ် ထူးခြားချက် တခုကတော့ Stranger Things Season 3 စတင်ပြသပြီး ၂ ရက်အတွင်းမှာ ဇာတ်လမ်းတွဲမှာ ပါဝင်တဲ့ အပိုင်း ၈ ပိုင်းလုံးကို ကြည့်ရှုပြီးသူ ၁၈ မီလီယံ ကျော်ရှိပြီး ဖြစ်နေတာပါ။ ကျန်တဲ့ သူတွေရဲ့ ၇၀ ရာခိုင်နှုန်းကလည်း ကြည့်ရှုပြီးတော့မှာ ဖြစ်တယ်လို့ စစ်တမ်းတွေ အရ သိရပါတယ်။

ဇာတ်လမ်းတွဲ ထွက်ရှိပြီး တပတ်အတွင်းမှာ အခုလောက် အောင်မြင်မှုရတာဟာ ဝမ်းသာစရာပဲလို့ တာဝန်ရှိသူတွေက ဆိုပါတယ်။

“ကြည့်ရှုသူ နည်းနည်းများများ ကျနော်တို့ အနေနဲ့ နောက်ထပ် Season တခုကို ထပ်ရိုက်ဖို့ စီစဉ်ထားပြီး ဖြစ်ပါတယ်။ အခုလို ကြည့်ရှုသူ များတော့လည်း ဝမ်းသာရတာပေါ့။ နောက်ထွက်မယ့် Season ဟာ နောက်ဆုံး ဖြစ်ဖို့ များပါတယ်။ ဒါကို ဇာတ်လမ်းတွဲ ဖန်တီးသူတွေ ဖြစ်တဲ့ Matt နဲ့ Ross Duffer တို့ကလည်း လက်ခံကြတယ်”လို့ Stranger Things ဇာတ်လမ်းတွဲ ထုတ်လုပ်မှု တာဝန်ခံဖြစ်သူ Shawn Levy က ပြောပါတယ်။

Stranger Things ဇာတ်လမ်းတွဲရဲ့ ပထမ Season နဲ့ ဒုတိယ Season တို့ဟာ ၂၀၁၆ ခုနှစ်နဲ့ ၂၀၁၇ ခုနှစ်တို့မှာ ထွက်ရှိထားပြီး ပရိသတ်အားပေးမှုကို အပြည့်အဝ ရရှိခဲ့ပါတယ်။ ဒီဇာတ်လမ်းတွဲမှာ ကလေး သရုပ်ဆောင်တွေ ဖြစ်တဲ့ Millie Bobby Brown, Fin Wolfhard, Gaten Matarazzo, Caleb McLaughlin နဲ့ Noah Schnapp တို့က အဓိက ပါဝင်သရုပ်ဆောင်ထားပါတယ်။

၁၉၈၀ ခုနှစ် ဝန်းကျင်ကို ဇာတ်အိမ်တည်ထားတဲ့ ဒီဇာတ်လမ်းတွဲဟာ ချောက်ချားဖွယ် စိတ်ကူးယဉ်သိပ္ပံ ဇာတ်ကားဖြစ်ပြီး ထွက်ရှိခဲ့တဲ့ ကာလတလျှောက်လုံးမှာ ဆုပေါင်းများစွာကို ရရှိခဲ့တဲ့ ဇာတ်လမ်းတွဲဆိုရင်လည်းမမှားပါဘူး။ Season ၃ ခုစလုံးဟာ IMDB Rating (9/10)၊ (8.9/10) နဲ့ (9/10) အထိ ရရှိထားတဲ့ ဇာတ်လမ်းတွဲလည်း ဖြစ်ပါတယ်။

Ref. tvline.com

You may also like these stories:

မင်းသား ရှရွတ်ခန် ပါဝင်မယ့် အထူးအစီအစဉ်ကို Netflix ကနေ ထုတ်လွှင့်မည်

13 Reasons Why တီဗီစီးရီး ကြည့်ရှုပြီး အမေရိကန်လူငယ်တွေ ကိုယ့်ကိုယ်ကို သတ်သေမှုနှုန်း မြင့်တက်

Netflix ရုပ်ရှင်များကို အော်စကာဆုမပေးရန် အကြံပြုမည့် Steven Spielberg ၏အစီအစဉ် ဝေဖန်ခံရ

Netflix မှပြသသည့် ရုပ်ရှင်များကို လာမည့်နှစ်မှ စတင်ကာ အော်စကာဆု ရွေးချယ်ပေးအပ်မည်

The post Netflix မှာ ကြည့်ရှုသူ စံချိန်တင်ခဲ့တဲ့ “Stranger Things Season 3” appeared first on ဧရာဝတီ.