ကိုရီးယားပေ့ါပ်အဆိုတော်အဖွဲ့တခုဖြစ်တဲ့ EXO အဖွဲ့မှ အဖွဲ့ဝင်တဦးဖြစ်သူ Kai တစ်ယောက် Dazed မဂ္ဂဇင်းနဲ့ အင်တာဗျူးမှာ စိတ်အားငယ် စိတ်ဓာတ်ကျခြင်းတွေနဲ့ ရင်ဆိုင်နေရတယ်လို့ ဖွင့်ဟပြောဆိုခဲ့ပါတယ်။
အမြဲတမ်း ပျော်ရွှင်နေတဲ့ အပြုံးတွေနဲ့ မိန်းကလေးပရိသတ်တွေရဲ့ရင်ကို ဖမ်းစားနိုင်တဲ့ Kai က တခါတလေ သူ့မျက်နှာ ညှိုးနွမ်းနေရခြင်းက သူ့စိတ်တွေအရမ်းပင်ပန်းနေလို့ပါလို့ ဆိုပါတယ်။
သူစိတ်အားငယ်တဲ့အခါ တစ်ယောက်ထဲနေပြီး ငိုလိုက်ချင်ပါတယ်တဲ့။ အဲဒီလိုအချိန်တွေဆို အိမ်မှာပဲအနေများပြီး စိတ်အားမငယ်အောင် လုပ်လို့မရပါဘူးလို့လည်း ပြောခဲ့ပါတယ်။
အမှန်တကယ်တော့ ပြဿနာတွေနဲ့ဝေးတဲ့နေရာကို ထွက်ပြေးသွားချင်ပေမယ့် စိတ်ဓာတ်ကျနေတဲ့ အခြေအနေကို သူ့အနေနဲ့ ပုန်းရှောင်မနေဘဲ ရင်ဆိုင်လိုက်တယ်လို့လည်း ဆိုပါတယ်။ ဒါ့အပြင် Kai က စိတ်ဓာတ်ကျတယ်ဆိုတာ ရှက်စရာတော့မဟုတ်ပါဘူးလို့လည်း ဆိုပါတယ်။
Kai က စိတ်ဓာတ်ကျရင် စိတ်ပျော်အောင် ဘယ်လိုလုပ်ရတယ်ဆိုတာကိုလည်း ဖွင်ဟခဲ့ပါတယ်။ “ပျော်ရွှင်မှုဆိုတာ ကိုယ်တိုင် ဖန်တီးယူရတဲ့အရာဖြစ်ပါတယ်။ ပျော်ရွှင်ချင်တယ်ဆို ပျော်ရွှင်အောင်ကြိုးစားရမယ်။ ပျော်ရွှင်မှုကိုရဖို့အတွက် အရမ်းကြီးကြိုးစားစရာမလိုပါဘူး”လို့ သူကပြောပြခဲ့ပါတယ်။
Kai သာမက BigBang အဖွဲ့ဝင် G-Dragon နဲ့ T.O.P တို့ပါ ယခင်က စိတ်ဓာတ်ကျခြင်းနဲ့ ရင်ဆိုင်ခဲ့ဖူးပါတယ်။ Allkpop ရဲ့ ဖော်ပြချက်အရ T.O.P ဟာ စိတ်ဓာတ်ကျတာရော၊ သောကတွေပါ ခံစားခဲ့ရပြီး ဆေးရုံတောင်တက်ခဲ့ရဖူးတယ်လို့ သိရပါတယ်။ G-Dragon လည်း သူရဲ့ Heartbreaker သီချင်းဟာ ခိုးကူးထားတာပါလို့ စွပ်စွဲခံရတဲ့အတွက် အချိန်တော်တော်ကြာ စိတ်ဓာတ်ကျခဲ့ဖူးပါတယ်။
သရုပ်ဆောင်အဆိုတော်မလေး Suzy သည်လည်း သူ့ဘဝမှာ နောက်တနေ့ကိုတောင် မကျော်ဖြတ်နိုင်တော့ဘူးလို့ ထင်ခဲ့တဲ့ နေ့တွေလည်းရှိခဲ့ပါတယ်လို့ သူစိတ်ဓာတ်ကျခဲ့တဲ့အကြောင်း ဝန်ခံပြောဆိုခဲ့ဖူးပါတယ်။
Ref : koreaportal
သုန္ဒြီ ဆီလျော်အောင် ဘာသာပြန်ဆိုသည်။
The post EXO အဖွဲ့ဝင် Kai စိတ်ဓာတ်ကျခြင်းနဲ့ ရင်ဆိုင်နေရဟုဆို appeared first on ဧရာဝတီ.