မြစ်ဆုံဆည်စီမံကိန်း အပြီးတိုင် ရပ်တန့်နိုင်ရန်အတွက် ရည်ရွယ်ပြုလုပ်တဲ့ “ဧရာဝတီကို ပြန်ရွေးကြမယ်” စကားဝိုင်း ဆွေးနွေးပွဲကို ဧပြီလ ၂၀ရက်နေ့က ရန်ကုန်မြို့ Novotel Hotel မှာ ကျင်းပပြုလုပ်ခဲ့ပြီး သရုပ်ဆောင် ဒေါင်း၊ ပိုင်ဖြိုးသု၊ အောင်ထက်တို့နှင့်အတူ အသိပညာရှင် ၊ အတတ်ပညာရှင်များကလည်း ကလည်း ပါဝင်ဆွေးနွေးခဲ့ကြပါတယ်။ ပါဝင်ဆွေးနွေးခဲ့တဲ့ သရုပ်ဆောင်များရဲ့ စကားသံများကို အခုလို ဖော်ပြပေးလိုက်ပါတယ်။
သရုပ်ဆောင် ဒေါင်း
“ကျနော်တို့ ချစ်မြတ်နိုးတာတွေ အမြဲဆုံးရှုံးခဲ့ကြပါတယ်။ အဲ့လိုပဲ အခုလည်း ဧရာဝတီကို ကျနော်အပါအဝင် ကျနော်တို့ ပြည်သူတွေ ဆုံးရှုံးရမှာကို ကြောက်မှာပါ။ အခုမြစ်ဆုံမှာ ခံစားရသလောက်တွေ့ရတဲ့အချက်က ကျနော်တို့ အားလုံး ညီညွတ်ကြပါတယ်။ ကျနော်တို့ ပြည်သူတွေမှာ အယူဝါဒ ကွဲပြားမှုတွေ ရှိတယ်။ တိုင်းရင်းသားရေးတွေ နိုင်ငံရေးပါတီတွေ အခြားယူဝါဒကွဲပြားမှုတွေအများကြီး ရှိတယ်။ ဒါပေမဲ့ မြစ်ဆုံမှာတော့ တူညီတဲ့ စည်းလုံးခြင်း ရှိတယ်”
“အဲ့ဒါက အရမ်းကိုကြည်နူးစရာကောင်းတဲ့ အရမ်းကို ချစ်စရာကောင်းတဲ့ ခံစားချက် တခုပါ။ ကျနော်တို့ မြစ်ဆုံမှာ အများကြီး မျှော်လင့်ချက်ထားတယ်။ အဲ့မျှော်လင့်ချက်တွေ ကုန်ဆုံးသွားရင် ဘာဖြစ်မှာလည်း ကျနော် မတွေးရဲဘူး။ ကျနော်က အနုပညာသမားတယောက်၊ သရုပ်ဆောင် တယောက်။ သရုပ်ဆောင်တယောက်က ပြည်သူတွေနဲ့ အလုပ်လုပ်နေတာ ပြည်သူတွေရဲ့ ခံစားချက်တွေနဲ့ ရပ်တည်ရှင်သန်နေတာ။ အနုပညာသမားတယောက်အနေနဲ့ ရပ်တည်ရှင်သန်နေတယ် ဆိုကလည်း ပြည်သူတွေရဲ့ ခံစားချက်တွေသိမှရပ်တည်ရှင်သန်လို့ရတာ။ ပြည်သူတွေဆီက တဒေါ်လာ ကောက်တာလည်း ဘာမှလုပ်ချင်လို့ မဟုတ်ဘူး။ ပြည်သူတွေက လက်မခံဘူးဆိုတာကို အကောင်းဆုံး နည်းလမ်းနဲ့ ဖော်ပြတာပါ”
“အဲ့ဒါ သမိုင်းတခုရေးထိုးတာ ဖြစ်ကောင်းဖြစ်လိမ့်မယ်။ အကြောင်းအရာ တခု ဖြစ်ကောင်း ဖြစ်မယ်။ အဲ့ထက် ထိရောက်တာ မရှိဘူး။ သမိုင်းအခွင့်အရေးကို ကျနော်တို့မရေးထိုးရင် ကျနော်တို့ ညံ့လို့ပဲ။ ကျနော်တို့ ဆွဲမခေါ်ချင်ဘူး။ ဆွဲခေါ်တယ်ဆိုတာ အတင်းအကျပ် လုပ်ရာရောက်တယ်။ အားလုံ းနှလုံးသားထဲမှာ ရှိတယ်လို့ ယုံကြည် ပြီးသား”လို့ သရုပ်ဆောင်ဒေါင်းက ပြောပါတယ်။
သရုပ်ဆောင် ပိုင်ဖြိုးသု
“ကျမ အသက် ၂၁ နှစ်တုန်းက တဦးသော အစ်မကို ဆုံးရှုံးခဲ့ဖူးတယ်။ အဲ့ထဲက ဘဝနဲ့ ပတ်သက်ပြီး အမြင်တွေ ပြောင်းလဲလာခဲ့တယ်။ ဘဝဆိုတာ တိုတိုလေး အဲ့တော့ နေခွင့်ရတဲ့ အချိန်လေးမှာ ကိုယ့် ပတ်ဝန်းကျင်မှာရှိတဲ့ လူသားတွေကို ချစ်တတ်ဖို့ ကြိုးစားခဲ့တယ်။ ပြီးတော့ သဘာဝပတ်ဝန်းကျင်တွေကိုလည်း တန်ဖိုးထားတတ်လာခဲ့တယ်”
“အခု အိမ်ထောင်ကျပြီးချိန်မှာ တချိန်ချိန်ကျရင် ကျမသားသမီးလေးတွေ ရလာမယ်။ နောက်နှစ်တွေ အများကြီး ကြာတဲ့အခါမှာလည်း မြေးလေးတွေလည်းရလာမှာပေါ့နော်။ ကိုယ်ချစ်တဲ့ သားသမီးတွေ မြေးလေးတွေကို မြန်မာ ပြည်ကြီးကဘယ်လောက်ချစ်ခင်ဖို့ကောင်းလဲ၊ ဧရာဝတီမြစ်ကြီးက ဘယ်လောက်လှလဲ၊ ဧရာဝတီမြစ်ကြီးက ပြည်သူပြည်သားတွေ အသက်မွေးဖို့ ဘယ်လိုကူညီပေးနိုင်လဲ။ မြစ်ဆုံဆိုတာဘယ်လောက်လှလဲ၊ မြန်မာပြည်မှာ တောအုပ်တွေ တောင်တန်းတွေက ဘယ်လောက်လှလဲဆိုတာကို ညအိပ်ရာဝင်ပုံပြင်တခုကို ကလေးတွေကို မပြောပြချင်ပါဘူး”
“ဧရာဝတီမြစ်ကြီးဆီကို ခေါ်ပြပြီး တွေ့လားဘယ်လောက်လှလဲ ဆိုတာကိုသူတို့ လက်လေးတွေ ဆွဲခေါ်ပြီးသွားပြချင်ပါတယ်။ မြန်မာပြည်သူပြည်သားတွေရဲ့ စိတ်ထဲမှာလည်း ကျမလိုပဲဖြစ်မယ်လို့ ထင်ပါတယ်။ အဲ့အတွက် ကျမတို့ ချစ်တဲ့ ဧရာဝတီကြီးကို ရွေးယူခွင့် ရချင်ပါတယ်”လို့ သရုပ်ဆောင် ပိုင်ဖြိုးသုက ပါဝင်ဆွေးနွေးခဲ့ပါတယ်။
အဆိုတော် အောင်ထက်
“ကျနော်တို့ ခံစားချက်တွေ ပါဝင်ဆွေနွေးပေးပါဆိုလို့ ပါဝင်ဆွေးနွေးတာပါ။ ဒီစီမံကိန်းသာဖြစ်သွားရင် ကျနော့်မှာ စိုးရိမ်မိတာ အများကြီးရှိပါတယ်။ ကျနော်တို့က အလှအပတရားတွေကို ခံစားကြတယ်။ အလှအပတွေ အားလုံး ပျောက်ဆုံးသွားမှာကို ကြောက်ပါတယ်။ ဧရာဝတီကို မှီခိုနေတဲ့ သူတွေအတွက် မြစ်ရေ မရှိရင် ဒုက္ခရောက်ကြလိမ့်မယ်”
“ဧရာဝတီကို မှီခိုနေကြတဲ့ သူအားလုံးလည်း ဧရာဝတီကြီးမှ မရှိတော့ဘူးဆိုရင် ပူပန်စရာတွေကတော့ အများကြီးပါပဲ။ ကျနော်တို့ ဧရာဝတီနဲ့ ပတ်သက်ပြီး အရမ်းစိုးရိမ်မိပါတယ်။ အဲ့လို စိုးရိမ်စရာတွေ ပူပန်စရာတွေ မရှိအောင် ပြည်သူတွေပါဝင်ပေးဖို့ တိုက်တွန်းပါရစေ”လို့ အဆိုတော် အောင်ထက်က ပြောပါတယ်။
The post “ဧရာဝတီကို ပြန်ရွေးကြမယ်” စကားဝိုင်းမှ အနုပညာရှင်များရဲ့ စကားသံများ appeared first on ဧရာဝတီ.