ဒီတပတ်ရုံတင်ပြသလာတဲ့ မြန်မာရုပ်ရှင်ဇာတ်ကားကတော့ “လိပ်ပြာစံအိမ်” ဆိုတဲ့ဇာတ်ကားပဲ ဖြစ်ပါတယ်။ ဒီဇာတ်ကားဟာ ရုပ်ရှင်ကြည့်ပရိသတ်တွေကို ထိတ်လန့်ခြောက်လန့်မှုအပြည့်အဝရစေမယ့် သရဲကား စစ်စစ်ဖြစ်ပြီး ထိုင်းဒါရိုက်တာရိုက်ကူးပြီး မြန်မာသရုပ်ဆောင်များပါဝင်ထားပါတယ်။
လိပ်ပြာစံအိမ်ဇာတ်ကားဇာတ်လမ်းအကျဉ်းကတော့ ..
နိုင်းနိုင်းက နာမည်ကြီးဓာတ်ပုံဆရာတယောက်ဖြစ်ပြီး ဝတ်မှုံရွှေရည်ကတော့ နိုင်းနိုင်းရဲ့ ဇနီးအဖြစ်ပါဝင်ထားပါတယ်။ သူတို့မှာ တဦးတည်းသောသမီးလေး ပြည့်ပြည့်ရှိပြီး သမီးဖြစ်သူက စိတ်ပုံမှန်မဟုတ်တဲ့အတွက်ပဲ ကျောင်းမှာ တခြားကလေးငယ်များကို ထိခိုက်စေတဲ့အတွက် ကျောင်းကနေအနားပေးခံရတဲ့ ကလေးငယ်တဦးပါ။ မိခင်တာဝန်မကျေပွန်ဘဲ သမီးကို မဆုံးမနိုင်ဘူးလို့ ဝတ်မှုံရွှေရည်က ကိုယ့်ကိုယ်ကို အမြဲတမ်းအပြစ်တင်နေသူ တဦးလည်းဖြစ်ပါတယ်။
ဓာတ်ပုံဆရာနိုင်းနိုင်းက နယ်မြို့လေးတမြို့ကိုမိသားစုလိုက်ပြောင်းရွေ့နေထိုင်ပြီး ဟိုးအရင် ကိုလိုနီခေတ်က အိမ်ဟောင်းကြီးမှာ သူတို့နေရဖို့ ဖြစ်လာပါတယ်။ အိမ်ထဲမှာ ရှေးခေတ်က မိသားစုကလေးဓာတ်ပုံတွေကို ကပ်ထားတာကို တွေ့ရပြီး ဓာတ်ပုံဆရာဖြစ်တဲ့နိုင်းနိုင်းက ဖြုတ်မပစ်ဘဲ သဘောကျတဲ့အတွက် ဆက်လက်ချိတ်ထားခဲ့ပါတယ်။ အိမ်တက်ကိုရောက်ရှိလာတဲ့ ဘုန်းကြီးတပါးက ဒီပုံကို ဖြုတ်ပစ်လိုက်ဖို့ ပြောခဲ့ပေမယ့် နိုင်းနိုင်းကတော့ အမှုမဲ့အမှတ်မဲ့ပဲ နေခဲ့ပါတယ်။
အိမ်ကြီးကိုရောက်ပြီး မကြာခင်မှာပဲ သမီးဖြစ်သူက ညညတယောက်တည်းမိုးလင်းထိ ထဆော့နေပြီး တနေကုန်အိပ်နေတတ်ပါတယ်။ မိခင်ဖြစ်သူနဲ့ အရင်က မတဲ့ပေမယ့် သမီးဖြစ်သူက အိမ်ကြီးရောက်ပြီးမကြာခင်မှာတော့ လိမ္မာတဲ့ကလေးတယောက်ဖြစ်လာပါတော့တယ်။ ဒါပေမယ့် ဒါတွေဟာ မကောင်းဆိုးဝါးတွေနဲ့ ဘယ်လိုစပ်ဆက်နေလဲ ဆိုတာ ရုပ်ရှင်ဇာတ်လမ်းကို ဆက်လက်ကြည့်ရှှုစေချင်ပါတယ်။
မိန်းကလေးပရိသတ်များအခိုင်အမာရရှိထားတဲ့ မင်းသားချောဒေါင်းက ဒီဇာတ်လမ်းမှာ ပရိသတ်မထင်ထားတဲ့ အဓိကနေရာကနေ ဇာတ်ကို ဆွဲခေါ်သွားမှာ ဖြစ်ပါတယ်။
ဒါက ဇာတ်လမ်းအကျဉ်းဖြစ်ပြီး အဓိက သရုပ်ဆောင်တွေဖြစ်တဲ့ နိုင်းနိုင်း၊ ဝတ်မှုံရွှေရည်၊ ဒေါင်း နဲ့ကလေးသရုပ်ဆောင် ပြည့်ပြည့်တို့ဟာ မြင်နေကျမြန်မာဇာတ်ကားတွေထဲကလို သရုပ်ဆောင်နေတယ်လို့ မထင်ရလောက်အောင် သရုပ်ဆောင်ကောင်းနေပြီး အခန်းတိုင်းအခန်းတိုင်းက ပရိသတ်ကို ဆွဲခေါ်သွားနိုင်ပါတယ်။
တမလွန်နဲ့ ဒီဘက်ခေတ်က မိခင်နှစ်ဦးရဲ့ အားပြိုင်မှုလို့ပြောရမှာ ဖြစ်ပြီး အဓိက ဝတ်မှုံရွှေရည်ဟာ ဒီဇာတ်ကားမှာ မိတ်ကပ်ကို မလိမ်းသလောက်မျက်နှာကိုချထားပြီး ဒီဇာတ်ကားထဲက မေနှင်းဆိုတဲ့ အမျိုးသမီးနဲ့ ကွက်တိကျအောင် သရုပ်ဆောင်သွားနိုင်ပါတယ်။ သရဲဝင်ပူးတဲ့အခန်းတွေမှာ ဝတ်မှုံရွှေရည်ရဲ့ အခန်းက သရုပ်ဆောင်တာ အပိုအလိုမရှိ ကွက်တိဖြစ်မှ ကြည့်ရတာ အဆင်ပြေစေမယ့် အခန်းကို ဝတ်မှုံရွှေရည်က ပိုင်နိုင်စွာသရုပ်ဆောင်နိုင်သွားပါတယ်။ The Only Mom ဆိုတဲ့အတိုင်း မိခင်မေတ္တာကို အသားပေးရိုက်ကူးသွားတာ ဖြစ်ပါတယ်။
ဒီဇာတ်ကားမှာ နိုင်းနိုင်းက ဓာတ်ပုံဆရာလို့ပြောပေမယ့် အဓိက ဓာတ်ပုံရိုက်တဲ့အခန်းက သိပ်မပါဘဲ သူရဲ့ ဇာတ်ကောင်ကို စကားပြောနဲ့သာ ပုံဖော်ထားတာတွေ့တာက အားနည်းချက်လို့ မြင်မိပါတယ်။
အသံပိုင်းစနစ်က ကောင်းမွန်တာပြီး ကာလာအယူအဆ၊ ဇာတ်လမ်းအလှည့်အပြောင်း တင်ဆက်ပုံတွေက ဇာတ်လမ်းကို ကြည့်ရှုရတာ ပိုပြီးအရှိန်မြင့်စေပါတယ်။ ဒီဇာတ်ကားက ထိုင်းဒါရိုက်တာရိုက်ကူးထားတာမို့ မြန်မာဒါရိုက်တာတွေလည်း ဒီလိုအဆင့်တန်းမြင့်မြင့် ဇာတ်ကားမျိုးရိုက်ကူးနိုင်ဖို့ မြန်မာပရိသတ်တွေကလည်း မျှော်လင့်နေကြပါတယ်။
The post မြန်မာသရဲကားစစ်စစ် (သို့မဟုတ်) လိပ်ပြာစံအိမ် appeared first on ဧရာဝတီ.