“ကျနော် ၁၀ လ ထောင်ထဲမှာ နေရတာပေါ့”လို့ အဆိုတော် အစ္စဏီ ပြော

မုဒိမ်းမှုအပါအဝင် ပုဒ်မ ၃ ခုနဲ့ တရားစွဲဆို ခံထားရတဲ့ အဆိုတော် အစ္စဏီရဲ့ တရားရုံးချိန်းတွေကတော့ ယခုလအတွင်းမှာ ၁၀ လ ပြည့်မြောက်တော့မှာပဲ ဖြစ်ပြီး လက်ရှိမှာတော့ အမှုစစ်ဆေးမှုများ မပြုလုပ်နိုင်သေးဘဲ ရုံးချိန်းများဖြင့်သာ ဖြတ်သန်းနေလျက် ရှိပါတယ်။

“ကျနော် ၁၀ လ ထောင်ထဲမှာ နေရတာပေါ့။ တိုင်းကလည်း ပြန်မကျသေးဘူ။ ကြာနေတာပါ။ အဓိကကတော့ စိတ်ပိုင်းဆိုင်ရာကို ဘုရား တရားနဲ့ပြန်ပြီးတော့ စိတ်ဓာတ်မကျအောင် လုပ်နေရပါတယ်။ ကျနော့်ပရိသတ်တွေကိုလည်း သတိရပါတယ်။ သီချင်းတွေလည်း ဆိုချင်ပါသေးတယ်” လို့ အဆိုတော် အစ္စဏီက ဒီကနေ့ ဖေဖော်ဝါရီ ၇ ရက်နေ့ ရုံးချိန်းမှာ ပြောသွားခဲ့ပါတယ်။

အဆိုတော် အစ္စဏီရဲ့ ၂၃ကြိမ်မြောက် တရားရုံးချိန်းကိုတော့ ယနေ့ ဖေဖော်ဝါရီလ ၇ ရက်နေ့၊ ရန်ကုန်တိုင်းဒေသကြီး တာမွေမြို့နယ် တရားရုံးမှာ ပြုလုပ်ခဲ့ပြီး နောက်တကြိမ် ရုံးချိန်းအတွက် ရက်ချိန်းကိုသာ ပြန်လည်ချိန်းဆိုခဲ့ပါတယ်။

အဆိုပါအမှုနဲ့ ပတ်သက်ပြီး အဆိုတော် အစ္စဏီရဲ့ရှေ့နေဖြစ်သူက “ကျနော်တို့ကတော့ တိုင်းက တစုံတရာ အမိန့်ချတဲ့အပေါ် မူတည်ပြီးတော့ စောင့်ဆိုင်းနေရတယ်။ တရားရုံးတော်အနေနဲ့ အမြန်ဆုံး ဆောင်ရွက်ပေးရင်တော့ မြန်ဆန်သွားမှာပေါ့။ သက်ဆိုင်ရာ ရုံးတခုကို ပြန်ရောက်သွားရင် ဒါမှမဟုတ် မူလရုံးကို ပြန်ရောက်သွားရင် ဥပဒေနဲ့အညီ ထုချေ ရှင်းလင်းဖို့အတွက် ရှိပါတယ်။ တရားရုံးတော်တွေရဲ့ အာမခံပေးလို့ မရတဲ့အပေါ် မူတည်ပြီးတော့ ချုပ်နှောင်ထားတာဆိုတော့ တစုံတရာ မှတ်ချက်ပေးဖို့ မရှိပါဘူး”လို့ တရားလွှတ်တော်ရှေ့နေ ဦးကျော်ဇင်ဦးက ပြောပါတယ်။

အဆိုတော် အစ္စဏီရဲ့ အမှုတွဲကတော့ တိုင်းဒေသကြီး တရားလွှတ်တော်ကို ရောက်ရှိနေပြီး လက်ရှိမြို့နယ်တရားရုံးကို ပြန်လည် မရောက်ရှိလာသေးတဲ့အတွက် စစ်ဆေးမှုများ မပြုလုပ်နိုင်တာဖြစ်တယ်လို့ သိရပါတယ်။

အဆိုတော် အစ္စဏီကိုတော့ ရည်းစားဟောင်းဖြစ်သူ မော်ဒယ် စူးရှထက်မှ တာမွေမြို့နယ်တရားရုံးမှာ ဥပဒေပုဒ်မ ၃၇၆၊ ၃၂၄ ၊ ၃၂၃ တို့ဖြင့် တရားစွဲဆိုထားတာ ဖြစ်ပြီး နောက်တကြိမ်ရုံးချိန်းကိုတော့ ဖေဖော်ဝါရီလ ၂၁ ရက်နေ့ကို ပြန်လည် ချိန်းဆိုခဲ့ပါတယ်။

The post “ကျနော် ၁၀ လ ထောင်ထဲမှာ နေရတာပေါ့”လို့ အဆိုတော် အစ္စဏီ ပြော appeared first on ဧရာဝတီ.