အဆိုတော် Selena Gomez ဟာ ပြန်လည်သန်စွမ်းရေးကုသမှုကနေ ထွက်လာခဲ့ပြီဖြစ်ပြီး အရင်ကထက် ပိုပြီး ပျော်ပျော်ရွှင်ရွှင် ကျန်းကျန်းမာမာရှိနေတာကို မြင်တွေ့ခဲ့ရပါတယ်။
စိတ်ပိုင်းခံစားမှု ပျက်ယွင်းတဲ့ ဝေဒနာကို ခံစားခဲ့ရပြီးတဲ့နောက် ကုသမှုခံယူခဲ့ရတဲ့ အသက် ၂၆ နှစ်အရွယ် အဆိုတော်နဲ့ မင်းသမီး Selena ဟာ သူ့သူငယ်ချင်းတွေရဲ့ Instagram အကောင့်မှာ တင်တဲ့ ဓာတ်ပုံတွေထဲ ပါဝင်လာခဲ့ပါတယ်။
ပြီးခဲ့တဲ့ ဒီဇင်ဘာလ ၁၈ ရက်နေ့မှာ သူ့ရဲ့ အရင်းနှီးဆုံးသူငယ်ချင်းနဲ့ Puma ကမ်ပိန်း သရုပ်ဆောင်ဖြစ်သူ Connar Franklin နဲ့ “Wizards of Waverly Place” မှာ အတူတွဲသရုပ်ဆောင်ခဲ့ဖူးတဲ့ Bailee Madison တို့နဲ့အတူ နှင်းတွေ ဖုံးလွှမ်းနေတဲ့နေရာတွေဆီ သွားရောက်လည်ပတ်နေတဲ့ ဓာတ်ပုံတွေကို ဝေမျှခဲ့ပါတယ်။ အဆိုတော် Selena ဟာ ကယ်လီဖိုးနီးယားပြည်နယ်မှာရှိတဲ့ Big Bear မြို့မှာ သူငယ်ချင်းတွေနဲ့အတူ ရောက်ရှိနေခဲ့တာပဲ ဖြစ်ပါတယ်။
နှင်းတောကို နောက်ခံထားပြီး ရိုက်ကူးခဲ့တဲ့ ဓာတ်ပုံတွေထဲမှာဆိုရင်တော့ သူဟာ သူငယ်ချင်းတွေနဲ့အတူ ပြုံးပြုံးရွှင်ရွှင်ရှိနေခဲ့တာကိုလည်း မြင်ခဲ့ရပါတယ်။ သူဟာ အပေါ်ရုံအင်္ကျီ၊ ဂျာကင်၊ဘောင်းဘီ၊ လက်အိတ်နဲ့ ခေါင်းစွပ်တို့ကို အနက်ရောင်ချည်းပဲ ဝတ်ဆင်ခဲ့ပြီး နွေးနွေးထွေးထွေးရှိနေခဲ့ပါတယ်။
အခုတော့ Selena ဟာ အိမ်ပြန်ရောက်နေပြီလို့ သတင်းရင်းမြစ်တစ်ခုက အတည်ပြုထားပါတယ်။ အဲဒီ့သတင်းရင်းမြစ်က “သူက တော်တော်လေး ကောင်းမွန်လာပြီဖြစ်ပြီး ပုံမှန်ဖြစ်ဖို့ မျှော်လင့်ရပါတယ်။ သူဟာ သူငယ်ချင်းတွေ၊ မိသားစုနဲ့အတူ အချိန်ကုန်ဆုံးနေပါတယ်” လို့ပြောဆိုခဲ့ပါတယ်။
Selena ဟာပြီးခဲ့တဲ့ နိုဝင်ဘာလမှာ ပြန်လည်သန်စွမ်းရေး ကုသမှုကနေ ထွက်လာခဲ့တာဖြစ်ပါတယ်။ နယူးယောက်မြို့မှာ ကုသမှုခံယူခဲ့တာဖြစ်ပြီး ပိုပြီးသက်သာလာပြီလို့လည်း ဆိုပါတယ်။
သူဟာ ပြီးခဲ့တဲ့ စက်တင်ဘာလ နှောင်းပိုင်းနဲ့ အောက်တိုဘာလအစောပိုင်းတို့မှာ သွေဖြူဥလျော့နည်းမှုကြောင့် ဆေးရုံနှစ်ကြိမ် တက်ခဲ့ရတာ ဖြစ်ပါတယ်။
Ref: aceshowbiz
The post ပျော်ရွှင်ကျန်းမာစွာနဲ့ ခရီးထွက်နေတဲ့ အဆိုတော် Selena Gomez appeared first on ဧရာဝတီ.