“Liam” ဆိုတဲ့ သားလေးတယောက်ကို ပိုင်ဆိုင်ထားတဲ့ ယွန်းဝတီလွင်မိုးကတော့ ငယ်ရွယ်နေသေးတဲ့အချိန်မှာ ကလေး မွေးဖွားခဲ့ပြီး ပရိသတ်များကို အံ့အားသင့်စေခဲ့ပါတယ်။
အခုအချိန်မှာဆိုရင် ယွန်းဝတီလွင်မိုးကို ချစ်ခင်ကြတဲ့ပရိသတ်များက သူမရဲ့သားဖြစ်သူ Liam လေးကိုပါ ချစ်ခင်လာကြပါတယ်။ ယွန်းဝတီလွင်မိုးက သူမရဲ့သားလေးနဲ့ ပတ်သက်တဲ့ အကြောင်းအရာများကို အခုလိုပဲ ပြောပြခဲ့ပါတယ်။
“Liam လေးကအခု အဖွားနဲ့ အတူနေတယ်။ အပေါ်နဲ့ အောက်နဲ့ပဲ။ ညီမနဲ့ အိပ်လိုက်၊ မနက်မိုးလင်းရင် သွားတွေ့လိုက်နဲ့ပဲ။ သူက ၁ လကျော်နဲ့ ခေါင်း စထောင်ပြီ။ စကားလေးတွေ ပြောတတ်နေပြီ။ လူကြီးလို တပုံစံထဲပြန်လုပ်တတ်နေပြီ။ အိပ်ရာပေါ်မှာ လှိမ့်နေပြီ”
“၃ လကျော်ပဲ ရှိသေးတယ်။ လမ်းကလည်း လျှောက်ချင်နေပြီ။ ခြေထောက်ကို ဆန့်ပြီး တောင့်ပြီးတော့ လူကြီးပေါ်မှာ လျှောက်တာပဲ ကြိုက်တယ်။ သူ့ကို လှဲလိုက်ရင် ငိုတယ်။ အမေကလည်း ကလေးမွေးတာ စောလို့လား မသိဘူး။ သူလည်း လူကြီးဖြစ်ချင်တာ အရမ်းစောနေတယ်” လို့ ယွန်းဝတီလွင်မိုးက ပြောပါတယ်။
ယွန်းဝတီလွင်မိုးက နောက်နှစ်၊ ၂ လပိုင်းရောက်တဲ့အခါ သြစတြေးလျနိုင်ငံမှာ ကျောင်းသွားတက်ရတော့မှာဖြစ်ပြီး သားလေးကို အဘွားဖြစ်သူနဲ့ပဲ ထားခဲ့ရမှာ ဖြစ်တာကြောင့် မသွားခင်အချိန်မှာ သားလေးကိုပဲ အချိန်ပေးဖြစ်နေတယ်လို့ ဆိုပါတယ်။
“ညီမ ကိုယ်ဝန် ၆ လထိ တက္ကသိုလ်သွားတုန်းပဲ။ ကိုယ်ဝန်နဲ့ ကျောင်းတက်တယ်။ ကိုယ်ဝန်နဲ့ စာမေးပွဲအောင်ခဲ့ပြီးပြီ။ အခု ဒုတိယပိုင်း သွားတက်မယ်။ နောက်တယောက်တော့ လိုချင်တယ်။ တက္ကသိုလ်ပြီးအောင် တက်မယ်။ တက္ကသိုလ်ပြီးရင် အလုပ်လျှောက်လို့ရတယ်။ အတွေ့အကြုံရအောင် လုပ်ပြီး မြန်မာပြည်မှာ ပြန်လာလုပ်မယ်။ အလုပ်က တည်ငြိမ်တဲ့အချိန်ရောက်ရင် ဒုတိယတယောက် လိုချင်တယ်”လို့ ယွန်းဝတီလွင်မိုးက ပြောပါတယ်။
တခြား လူငယ်များနဲ့ မတူဘဲ ရင့်ကျက်တည်ငြိမ်မှု ရှိတဲ့ပုံစံက ယွန်းဝတီလွင်မိုးကို ပရိသတ်တွေ ချစ်ကြရတဲ့ အချက်တွေထဲက တခုဖြစ်ပြီး သားလေးမွေးဖွားပြီးတဲ့ အခါမှာဆိုရင် ပိုပြီးရင့်ကျက် တည်ငြိမ်တဲ့ပုံစံကို တွေ့မြင်ရပါတယ်။
“ငယ်ငယ်လေးနဲ့ အိမ်ထောင်ကျသွားတယ်။ ငယ်ငယ်လေးနဲ့ ကလေးရသွားတယ်ဆိုတာ ညီမက ပြောရင်လည်း သေချာ ရှောင်ပြောရတယ်။ လူတွေက အထင်လွဲသွားမှာ ကြောက်တယ်။ ပြောချင်တာကတောာ့ စိတ်ကရင့်ကျက်ဖို့လိုတယ်။ ကိုယ်ဝန်မရခင် ၆ လကတည်းက ယောကျ်ားနဲ့ စေ့စပ်ထားတာ။ အစကတည်းက စိတ်ကို အဆင်သင့် လုပ်ထားတယ်။ ရင့်ကျက်ရတော့မယ်။ အသက်လည်း ၂၀ ပြည့်ပြီ”
“အခု ကလေးလည်း ရှိတော့ အရာရာက ကလေးအတွက် စဉ်းစားတယ်။ စိတ်က အလိုလိုရင့်ကျက်သွားတယ်။ ငယ်ငယ်ကတည်းက မိဘ ဆုံးမတယ်။ စိတ်ရင့်ကျက်သွားတယ်ဆိုတာ ငယ်ငယ်ကတည်းက တဖြည်းဖြည်းလေးနဲ့ ဖြစ်လာတဲ့ အရာတွေပါ” လို့ ယွန်းဝတီလွင်မိုးက ဆိုပါတယ်။
သားလေး Liam ကတော့ နိုင်ငံခြားမှာမွေးခဲ့တာဖြစ်တာကြောင့် ကျောင်းတက်လို့ရတဲ့ အရွယ်ရောက်လာတဲ့အခါမှာ နိုင်ငံခြားမှာ ကျောင်းတက်ဖို့အတွက် အခက်အခဲရှိမှာ မဟုတ်ပေမယ့် မြန်မာနိုင်ငံမှာပဲ ထားဖို့အတွက် စဉ်းစားထားတယ်လို့လည်း သိရပါတယ်။
ယွန်းဝတီလွင်မိုးကတော့ သားလေးရဲ့ နာမည်ကို အဘိုးဖြစ်သူ လွင်မိုးနဲ့ ယောကျ်ားဖြစ်သူထက်ဦးလှိုင်တို့ရဲ့ နာမည်တို့ကို ပေါင်းစပ်ပြီး “လွင်ထက်”လို့ နာမည်ပေးထားကာ ပရိသတ်များကိုလည်း သူမကို ချစ်တဲ့ အချစ်တွေ သားလေးကို ပေးလိုက်ပါလို့ ပြောခဲ့ပါတယ်။
ဆက်စပ် သတင်းလင်ခ့် – “အဖေကနေ ညီမ၊ ညီမကနေ သားလေးအထိ ချစ်ပေးကြလို့ ကျေးဇူးတင်ပါတယ်”
The post အလုပ်တည်ငြိမ်တဲ့အခါ ဒုတိယ ကလေးတယောက် ထပ်လိုချင်တဲ့ ယွန်းဝတီလွင်မိုး appeared first on ဧရာဝတီ.