“Ant-Man And The Wasp” ရုပ်ရှင်ဟာ မြောက်အမေရိက ရုံဝင်ငွေစာရင်းမှာ ပွဲဦးထွက် ဝင်ငွေ ဒေါ်လာ ၇၆ သန်း နဲ့ ထိပ်ဆုံးမှာ ရပ်တည်နေတာကို တွေ့ရပါတယ်။ စူပါဟီးရိုးတွေအဖြစ် မင်းသား Paul Rudd နဲ့ မင်းသမီး Evangeline Lilly တို့ ပါဝင်ထားတဲ့ အဲဒီ Marvel ရုပ်ရှင်ဟာ ၂၀၁၅ ခုနှစ်မှာဖြန့်ချိခဲ့တဲ့ မူရင်း Ant-Man ရုပ်ရှင်က ပွဲဦးထွက်ဝင်ငွေ ဒေါ်လာ ၅၇ သန်း ရရှိခဲ့တာကြောင့် စံချိန်သစ် တင်လိုက်တာလည်း ဖြစ်ပါတယ်။
Disney ရဲ့ ပြည်တွင်းဖြန့်ချိရေး အကြီးအကဲ Cathleen Taff က “ရလဒ်တွေနဲ့ပတ်သက်လို့ တော်တော်လေးကို အံ့သြ ရပါတယ်။ Marvel သူဌေး Kevin Feige နဲ့ အဖွဲ့က အဲဒီရုပ်ရှင်တွေကို ဘယ်လိုဖန်တီးထားတယ်ဆိုက ကျမတို့ကို ဆက်တိုက်အံ့သြစေရပါတယ်။ Kevin နဲ့ သူ့အဖွဲ့ဟာ အမြဲတမ်း ကွဲပြားတဲ့ဇာတ်လမ်းကို ဖော်ထုတ်ဖို့ ကြိုးစားနေကြတာပါ” လို့ ပြောကြားခဲ့ပါတယ်။
ဒါ့အပြင် မင်းသမီး Evangeline ရဲ့ Wasp (နကျယ်မ) ဇာတ်ကောင်ဟာ Marvel Cinematic Universe မှာ ခေါင်းစဉ် အနေနဲ့ သီးသန့်ဖော်ပြရတဲ့ ပထမဆုံး အမျိုးသမီး ဇာတ်ကောင်ပဲ ဖြစ်တယ်လို့လည်း ဆိုပါတယ်။
ကြည့်ရှုပြီးသူတွေရဲ့ သဘောတွေ့တယ်ဆိုတဲ့ သုံးသပ်ချက်တွေကလည်း “Ant-Man and the Wasp” ရုပ်ရှင်ကို နိုင်ငံတကာဈေးကွက်မှာ လွှမ်းမိုးမှုရရှိစေခဲ့ပါတယ်။ အမေရိကန်နှင့် ကနေဒါ နိုင်ငံ ပြင်ပ ကမ္ဘာ့နိုင်ငံတွေမှာတော့ ဒေါ်လာ ၁၆၁ သန်း ရရှိထားပြီးဖြစ်ပါတယ်။ ဒါဟာ Marvel နဲ့မိခင်ကုမ္ပဏီဖြစ်တဲ့ Disney ရဲ့ အမှုဆောင်အရာရှိတွေအတွက် သတင်းကောင်းဖြစ်ပါတယ်။
၂၀၁၈ ခုနှစ်အတွင်းမှာပဲ ပြသထားတဲ့ “Avengers: Infinity War” ရုပ်ရှင်ဟာ ကမ္ဘာ့ရုံဝင်ငွေ ဒေါ်လာ ၂ ဘီလီယံ ရရှိထားပြီး “Black Panther” ရုပ်ရှင်ဟာ ၁ ဒသမ ၃ ဘီလီယံရရှိထားပြီးလည်း ဖြစ်ပါတယ်။
မြောက်အမေရိကရုံဝင်ငွေစာရင်းကို ပြန်ကြည့်မယ်ဆိုရင် Disney ရဲ့ Incredibles 2 ရုပ်ရှင်ဟာ ဒေါ်လာ ၂၉ သန်းနဲ့ ဒုတိယနေရာမှာ ရပ်တည်နေပြီး ပြည်တွင်းရုံဝင်ငွေ သမိုင်းမှာ “Finding Dory” ရုပ်ရှင်ကို ကျော်ဖြတ်ပြီး Pixar ရဲ့ ရုံဝင်ငွေအများဆုံး ရုပ်ရှင်ဖြစ်လာခဲ့ပါတယ်။ တတိယနေရာမှာ “Jurassic World: Fallen Kingdom” က ရပ်တည်နေပြီး ဇူလိုင်လ ၅ ရက်နေ့မှာတော့ ဒေါ်လာ ၁ ဘီလီယံကျော်ကိုရောက်ရှိခဲ့ပြီး သမိုင်းမှတ်တိုင် သစ်စိုက်ထူနိုင်ခဲ့ပါတယ်။
သည်းထိတ်ရင်ဖိုရုပ်ရှင် “The Purge” ရဲ့ မူရင်းဇာတ်လမ်းဖြစ်တဲ့ “The First Purge”ကတော့ နံပါတ် ၄ နေရာမှာ ရပ်တည်နေပြီး Sicario: Day of the Soldado” ရုပ်ရှင်ကတော့ နံပါတ် ၅ နေရာမှာ ရပ်တည်နေပါတယ်။
Ref:aceshowbiz
The post မြောက်အမေရိက ရုံဝင်ငွေစာရင်းမှာ ထိပ်ဆုံးရောက်နေတဲ့ “Ant-Man And The Wasp” appeared first on ဧရာဝတီ.