မကြာသေးမီရက်ပိုင်းက မိန်းကလေး ၅ ယောက် ပါဝင်သီဆိုထားတဲ့ “Realize” သီချင်းမှာ ပရိသတ်များကြား ရေပန်း စားနေပါတယ်။ အဲဒီသီချင်းဆို စတိုင်ဟာ မြန်မာလူငယ်ပရိသတ်တချို့ နှစ်သက်ကြတဲ့ K Pop ဂီတအမျိုးအစား ဖြစ်ပြီး ပါဝင်သီဆိုကြတဲ့ အဖွဲ့ဝင် ၅ ဦးကလည်း မတူညီတဲ့လူမျိုး ၃ မျိုးနဲ့ ဖွဲ့စည်းထားတာ ဖြစ်ပါတယ်။
ဒီအဖွဲ့မှာ ဆိုရင်တော့ မြန်မာလူမျိုးများဖြစ်ကြတဲ့ နေခြည် ၊ စင်ဒီ ၊ ထိုင်းလူမျိုးများဖြစ်ကြတဲ့ Earn ၊ Eing နဲ့ ကိုရီးယား လူမျိုး ဖြစ်တဲ့ Sung Shin တို့နဲ့ဖွဲ့စည်းထားတာဖြစ်ပါတယ်။ ပရိသတ် စိတ်ဝင်စားနေကြတဲ့ “Rose Quartz” အဖွဲ့ အကြောင်းကို ဖော်ပြပေးချင်တာကြောင့် ဧရာဝတီ သတင်းထောက် ယုဖြူဟန်က “Rose Quartz” အဖွဲ့ နဲ့ သီးသန့် တွေ့ဆုံ မေးမြန်းထားပါတယ်။
မေး။ ။ ပထမဆုံး Rose Quartz အဖွဲ့ ဖွဲ့စည်းဖြစ်တဲ့ အကြောင်းလေး ပြောပြပေးပါ။
ဖြေ။ ။ ညီမတို့ Rose Quartz ဖြစ်ပေါ်လာတာကတော့ 0316 Entertainment က Audition ကနေ အရင်ဆုံး Eing က ဝင်လာတယ်။ နောက်ပြီးတော့ Earn ဝင်လာတယ်။ ပြီးတော့ Sung Shin နောက်ဆုံးမှ နေခြည်နဲ့ စင်ဒီက JBJ Entertainment ကနေ ဝင်ပြီးတော့ Rose Quartz အနေနဲ့ ဖြစ်ပေါ်လာတာပါ။
မေး။ ။ ဒီအဖွဲ့မှာ မြန်မာရယ် ထိုင်းရယ် ကိုရီးယားရယ် ပါလာတာတွေ့ရယ်။ အဲဒါဘယ်လို ချိတ်ဆက်မိသွားတာလဲ။
ဖြေ။ ။ အခုဆိုရင် ဟောလိဝုဒ်ထိ K Pop ထိုးဖောက်နေပြီပေါ့နော်။ အရင်တုန်းက စိတ်ကူးကတော့ ထိုင်းနိုင်ငံလိုမျိုး K Pop အရမ်းကြိုက်ကြတဲ့အတွက် K Pop သီချင်းတွေမဟုတ်ဘဲနဲ့ ထိုင်း Lyric နဲ့ ထိုင်းနိုင်ငံမှာ K Pop ဒီဇိုင်းနဲ့ ထွက်ကြမယ်လို့ စိတ်ကူးရာကနေ JBJ Entertainment နဲ့ Join ဖြစ်တယ်။ အဲဒီလို Join ဖြစ်သွားတော့ မြန်မာလူမျိုး တွေလည်း ပါတဲ့အတွက် မြန်မာဘာသာ၊ ထိုင်းဘာသာနဲ့ စတင်ပြီးတော့ နောက်ပိုင်းမှာ Global ထိရောက်နိုင်အောင် ကြိုးစားသွားမှာပါ။
မေး။ ။ ပထမဆုံး ထွက်လာတဲ့မြန်မာစာသားနဲ့ သီချင်း “Realize” သီချင်းကို Facebook မှာပရိသတ်တွေ လူကြိုက်များတာတွေ့ရတယ်။ အဲဒီအပေါ် တချို့ကလည်း မြန်မာစာသားတွေ မပီသဘူးဆိုပြီး ဝေဖန်မှုတွေပြုကြတဲ့ အပေါ်မှာ ဘယ်လိုများ ပြောချင်ပါသလဲ။
ဖြေ။ ။ဒီလိုမျိုးတွေ ကြုံတွေ့ရမယ်ဆိုတာ ခန့်မှန်းထားပါတယ်။ သီဆိုကြတဲ့ သူတို့လည်း ၁၀၀ ရာခိုင်နှုန်း မြန်မာ လူမျိုး မဖြစ်ဘူး။ မြန်မာစကားကို အခုမှသင်ယူနေတာဖြစ်တဲ့အတွက် အခုလိုမျိုး လိုအပ်ချက်တွေ ရှိနေတဲ့ကြားထဲမှာ ကြိုက်ပေးတဲ့အတွက် ကျေးဇူးတင်ပါတယ်။ နောက်ထပ်ကြိုးကြိုးစားစား သင်ယူပြီးတော့ ထပ်ပြီးကောင်းတဲ့ဟာတွေ ပြသနိုင်တဲ့ Rose Quartz အနေနဲ့ကြိုးစားသွားပါမယ်။
မေး။ ။ အဖွဲ့ဝင် ၅ယောက်က နိုင်ငံချင်း ၊ ဘာသာစကားချင်း မတူဘူးဆိုတော့ တယောက်နဲ့တယောက် ပြောဆို ဆက်သွယ်တဲ့အခါ ၊ သီချင်းတွေဖန်တီးတဲ့အခါမှာ အခက်အခဲဖြစ်တာ မျိုးရှိလား။
ဖြေ။ ။အခက်အခဲကတော့ အစပိုင်းမှာ အများကြီး ရှိခဲ့ပါတယ်။ ညီမတို့ကလည်း ထိုင်းလို မပြောတတ်ဘူး ဆိုတော့ သူတို့နဲ့အဆက်အသွယ် လုပ်ချင်တဲ့အခါမှာ ခက်ခဲခဲ့တာပေါ့။ သီချင်းဆိုတဲ့အခါမှာလည်း အဲဒီလိုပဲ။ ဒါပေမယ့် အဖွဲ့ဝင်တွေ အချင်းချင်း သင်ပေးကြတယ်။ ညီမတို့ကလည်း သူတို့ကို မြန်မာလို သင်ပေးတယ်။ သူတို့ကလည်း သင်ပေးကြတယ်။ အခက်အခဲဆိုတာ နောက်ပိုင်းမှာ မရှိတော့ပါဘူး။
မေး။ ။အဓိက အဖွဲ့ဝင်တွေကြားထဲမှာ အသုံးပြုတဲ့ ဘာသာစကားက ဘာဖြစ်မလဲ။
ဖြေ။ ။ စင်ဒီက ကိုရီးယားလို ပြောတတ်တော့ Sung Shin ကိုပြောတယ်။ Sung Shin က ထိုင်းလိုပြန်ပြောတယ်။ အဓိကကတော့ ကိုရီးယားစကားကို ပိုပြောဖြစ်တယ်။
မေး။ ။အဖွဲ့ဝင်တွေကို ကိုရီးယားမှာ ဘယ်လိုမျိုး Train လုပ်ပေးတာလဲ။ အခုလိုပရိသတ်ဆီ မိတ်မဆက်ခင် လေ့ကျင့်ခဲ့ရတဲ့ အချိန်တွေ ဘယ်လောက်ကြာခဲ့လဲ။
ဖြေ။ ။ ကိုရီးယားမှာ သွားပြီးတော့ Train တာတော့ မဟုတ်ဘူး။ ထိုင်းမှာရှိတဲ့ 0316 Entertainment မှာ Train ခဲ့တာပါ။ ဒါပေမယ့် Trainer တွေအကုန်လုံးက ကိုရီးယားတွေ၊ Eing ဆိုရင် ၃ နှစ် Earn ဆိုရင် ၂နှစ် ၊ Sung Shin က တနှစ်ခွဲ နေခြည်နဲ့ စင်ဒီက ၄လရှိပါပြီ။
မေး။ ။ နောက်ထပ် Rose Quartz အဖွဲ့အနေနဲ့ ဖန်တီးမယ့် သီချင်းအကြောင်းအရာတွေ သိချင်ပါတယ်။ ကိုရီးယား ဘာသာ ၊ ထိုင်းဘာသာစကားတွေနဲ့ သီချင်းတွေ သီဆိုဖို့ရောရှိလား။
ဖြေ။ ။ နောက်သီချင်း ၃ ၊ ၄ပုဒ်လောက်ကတော့ မြန်မာလိုနဲ့ ထိုင်းလိုပဲ ပြင်ဆင်ထားသေးတယ်။ ဒါပေမယ့် ပရိသတ် ဘက်က ကိုရီးယားလို အင်္ဂလိပ်လို တောင်းဆိုလာရင်တော့ သီဆိုဖို့ရှိပါတယ်။
မေး။ ။ မြန်မာပရိသတ်တွေ အကြိုက်တွေ့စေမယ့် ဘယ်လိုသီချင်းမျိုးတွေကို ဖန်တီးသွားမလဲ။
ဖြေ။ ။ နောက်ပိုင်းမှာ Hip Hop၊ Rap စတဲ့အမျိုးမျိုးသော သီချင်းအမျိုးအစားတွေ ပြင်ဆင်ထားပါတယ်။ အဲဒီအတွက် လည်း ပရိသတ်တွေအကြိုက်တွေ့မယ်လို့ မျှော်လင့်ပါတယ်။
မေး။ ။ အခုမြန်မာပြည်ကို လာတဲ့အတောအတွင်း ဘယ်လိုဖျော်ဖြေမှုတွေ ပြုလုပ်သွားဖို့ရှိလဲ။
ဖြေ။ ။ မြန်မာနိုင်ငံမှာ ရှိနေတဲ့ အတောအတွင်း ၂၂ရက်နေ့ကျရင် မြန်မာပလာဇာမှာ လုပ်တဲ့ပွဲတခုမှာ ဖျော်ဖြေ သွားဖို့ ရှိတယ်။ ၂၃ရက်နေ့ကျရင် K Pop Festival မှာ ဖျော်ဖြေသွားဖို့ ရှိပါတယ်။
မေး။ ။မြန်မာနိုင်ငံမှာဆိုရင် K Pop သီချင်းတွေ K Pop ပရိသတ်တွေ အရမ်းများလာကြတဲ့အပေါ် အမြင်ပြောပြပေးပါ။
ဖြေ။ ။ Sung Shin ကK Pop Fan တွေ အများကြီးရှိတယ်ဆိုတာကို ကိုရီးယားမှာတုန်းက မသိခဲ့ဘူး။ ထိုင်းနဲ့ မြန်မာနိုင်ငံကို လာတဲ့အခါမှာ K Pop သီချင်းတွေ ဓာတ်ပုံတွေ အများကြီးကိုတွေ့ရတယ်။ အဲဒီလို တွေ့ရတဲ့ အခါမှာ K Pop က အရမ်းကိုဟော့ဖြစ်နေတာပါလားဆိုပြီး ခံစားမိတယ်။ အဲဒီလိုခံစားမိတာက အံ့လည်းအံ့သြတယ်။ ထူးလည်း ထူးဆန်းတယ်။ ကျေးဇူးတင်ပါတယ်လို့ ပြောပါတယ်။
မေး။ ။ Rose Quartz ကိုအားပေးနေတဲ့ ပရိသတ်ကြီးကို ပြောချင်တဲ့စကားရှိရင် ပြောပေးပါ။
ဖြေ။ ။အားပေးကြတဲ့ Fan တွေ Support လုပ်ပေးကြတဲ့ Fan တွေအားလုံးကို ကျေးဇူးတင်ပါတယ်။ ရှေ့ဆက်ပြီးတော့ ကြိုးစားသွားမယ့် Rose Quartz ဖြစ်တဲ့အတွက် အားပေးကြပါဦးလို့ ပြောချင်ပါတယ်။ ။
The post Global အထိ ထိုးဖောက်သွားမယ့် “Rose Quartz” အဖွဲ့ appeared first on ဧရာဝတီ.