တောင်ကိုရီးယားနိုင်ငံ၊ “၂၀၁၈ ခုနှစ်၊ PyeongChang ဆောင်းရာသီ အိုလံပစ်ပြိုင်ပွဲ” ဖွင့်ပွဲနဲ့ ပိတ်ပွဲ အခမ်းအနားအတွက် ညွှန်ကြားရေးမှူး Song Seung Hwan က ဖေဖော်ဝါရီလ ၂၆ ရက်နေ့မှာ ထုတ်လွှင့်ခဲ့တဲ့ tbs FM ရေဒီယိုလိုင်းရဲ့ “Kim Eo Jun’s News Factory” အစီအစဉ် ထုတ်လွှင့်မှုမှာ ပါဝင်ဆွေးနွေးခဲ့ပါတယ်။
အဆိုပါ ရေဒီယို အစီအစဉ် ထုတ်လွှင့်ချက်မှာတော့ ညွှန်ကြားရေးမှူး Song က အဲဒီအခမ်းအနား ၂ ခုလုံးအတွက် အသီးသီးသော အမြင်တွေကို ဆွေးနွေးခဲ့ပြီး အများက သိချင်နေကြတဲ့ မေးခွန်းတခုကိုလည်း ဖြေကြားပေးခဲ့ပါတယ်။
ရေဒီယိုအစီအစဉ် တင်ဆက်သူက “တော်တော်များများ ပြောနေကြတာ တခုရှိပါတယ်။ နိုင်ငံတကာမှာ နာမည်ကျော်တဲ့ အဆိုတော်တွေ အများကြီးရှိတဲ့ အထဲမှာမှ အဆိုတော် PSY (Gangnam Style သီချင်း သီဆိုသူ) က ဘာလို့ အသိအမှတ်ပြု မခံလိုက်ရတာလဲဆိုတဲ့ မေးခွန်းပါ။ လူတော်တော်များများက အဲဒီ အခမ်းအနားတွေမှာ PSY ဘာလို့ မဖျော်ဖြေတာလဲ ဆိုပြီး မေးနေကြပါတယ်” လို့ မေးမြန်းခဲ့ပါတယ်။
ညွှန်ကြားရေးမှူး Song က “ကျနော် PSY နဲ့တွေ့ခဲ့ပါတယ်။ ဒါပေမယ့် သူဟာ ‘Gangnam Style’ သီချင်းကိုပဲ ဆက်လက် ဖျော်ဖြေဖို့ ဆိုတဲ့ အတွေးနဲ့ စိတ်ဒုက္ခ ရောက်နေခဲ့ပါတယ်။ အဲဒီအစား ဖွင့်ပွဲအခမ်းအနား အတွင်းမှာ အားကစားသမားတွေ ဝင်လာချိန်မှာ “Gangnam Style” သီချင်းကို ဖွင့်ပြခဲ့ပါတယ်။ အဲဒီအတွက် PSY က သီချင်းကို သူကိုယ်တိုင် စီစဉ်မယ် ဆိုပြီး ပြောခဲ့ပါတယ်။ ဒါကြောင့် အသုံးပြုခဲ့တဲ့ အဲဒီသီချင်းဟာ PSY ကိုယ်တိုင် စီစဉ်ခဲ့တာ ဖြစ်ပါတယ်”လို့ ရှင်းပြခဲ့ပါတယ်။
ဒါ့အပြင် “PSY ဟာ ဖျော်ဖြေဖို့အတွက် ကမ်းလှမ်းချက်ကို ငြင်းပယ်ခဲ့ပါသလား” ဆိုတဲ့ မေးခွန်းကိုတော့ ညွှန်ကြားရေးမှူး Song က “မှန်ပါတယ်၊ အာရှအားကစား ပြိုင်ပွဲတုန်းက သူတော်တော်လေး ဝေဖန်ခံခဲ့ရတယ်လို့ ပြောခဲ့ပါတယ်” လို့ ဖြေကြားခဲ့ပါတယ်။ PSY ဟာ ၂၀၁၄ ခုနှစ်၊ အာရှအားကစားပြိုင်ပွဲ ဖွင့်ပွဲအခမ်းအနားမှာ ဖျော်ဖြေသူ တယောက်အဖြစ် ပါဝင်ခဲ့ပါတယ်။
ညွှန်ကြားရေးမှူး Song က “နာမည်ကျော်ကြားသူ တယောက်ဖြစ်ရတာ တော်တော်လေးခက်ခဲမယ်လို့ ကျနော် ထင်ပါတယ်။ တချို့ပွဲတွေမှာ သူတို့ ဖျော်ဖြေမယ်ဆိုရင် လူတွေက ဘာလို့ သူတို့ပါလာတာလဲ ဆိုပြီး ဝေဖန်ကြတယ်။ မဖျော်ဖြေပြန်ရင်လည်း မဖျော်ဖြေလို့ ဆိုပြီးတော့ အဝေဖန်ခံကြရပါတယ်” လို့ ပြောဆိုခဲ့ပါတယ်။
Ref ; soompi
The post ဆောင်းရာသီ အိုလံပစ် အခမ်းအနားတွေမှာ အဆိုတော် PSY ဘာကြောင့် မဖျော်ဖြေတာလဲ appeared first on ဧရာဝတီ.