မကြာခင် ရုံတင် ပြသမယ့် “သူစိမ်းအိမ်” ရုပ်ရှင်ကားနဲ့ ပတ်သက်ပြီး ဒါရိုက်တာ ထူးပိုင်ဇော်ဦးက ဒီရုပ်ရှင်မှာ တကားလုံး လူသတ်ခန်းတွေ ပါတာကြောင့် အသက် ၁၃ နှစ်အောက် ကလေးတွေ ကြည့်ရှုဖို့ မသင့်တော်ဘူးလို့ ပြောပါတယ်။

“ကိုယ်ကိုယ်တိုင်လည်း ရုပ်ရှင်ကြည့်ရင် စိတ်လှုပ်ရှားနေရတာကို ကြိုက်တယ်။ ဒီဇာတ်ကားက ကြည့်ရှုရင်း ရင်ခုန် စိတ်လှုပ်ရှားနေရမယ်။ အသက်တွေ အောင့်ထားပြီး ဘာဖြစ်မလဲဆိုပြီး ရင်ဘတ်တွေ တဒုန်းဒုန်း ခုန်စေမယ့် ဇာတ်ကားပါ။ Trailer မှာထက် ရုပ်ရှင်ဇာတ်ကား တကားလုံး လူသတ် အခန်းတွေ များပါတယ်။ အဲဒါကြောင့် အရမ်းငယ်တဲ့ ကလေးတွေ ထိတ်လန့်သွားမှာကို ကျနော်တို့အနေနဲ့ မလိုလားဘူး။ ၁၃ နှစ်အောက် ကလေးတွေ ဒီဇာတ်ကားကို မကြည့်သင့်ဘူးဆိုပြီး Production က သတ်မှတ်ထားပါတယ်”လို့ ဒါရိုက်တာ ထူးပိုင်ဇော်ဦးက ပြောပါတယ်။

“သူစိမ်းအိမ်”ရုပ်ရှင်ရဲ့ Trailer က အွန်လိုင်းပေါ်မှာ အရမ်းပေါက်သွားသလို ကော်ပီလို့ ပြောနေတာနဲ့ ပတ်သက်ပြီး ဒါရိုက်တာ ထူးပိုင်ဇော်ဦးက သြဂုတ်လ ၁ ရက်နေ့ ရုံတင်ရင်တော့ ရှင်းရှင်းလင်းလင်း သိသွားမှာပါလို့ ဆိုပါတယ်။

“သူစိမ်းအိမ်ကို ကော်ပီလို့ ပြောနေကြတာ ကျနော်တို့ ဟုတ်တယ်၊ မဟုတ်ဘူး ပြောနေတာ အငြင်းအခုန် ဖြစ်နေတာပဲ ရှိမယ်။ ကျနော်တို့ အနေနဲ့လည်း ရုံမှာ ပြခွင့် မရသေးတော့ သြဂုတ် ၁ ရက်နေ့ ရုံတင်ရင်တော့ ရှင်းရှင်းလင်းလင်း သိသွားမှာပါ။ Trailer က ရုပ်ရှင်ဇာတ်ကား တကားလုံး မဟုတ်ပါဘူး”

“အဓိက ကောင်းမွန်တဲ့ ဇာတ်ကားဖြစ်ဖို့နဲ့ ကောင်းမွန်တဲ့ ဇာတ်ကား တကားကို ပရိသတ်တွေ ကြည့်ခွင့်ရဖို့က ကျနော်တို့ ရည်ရွယ်ချက် ဖြစ်တဲ့အတွက် ဒီဇာတ်ကား Trailer ကို ပရိသတ်တွေ စိတ်ဝင်စားတာ ကျနော်တို့အတွက် Plus ဖြစ်တယ်။ Trailer မှာ စိတ်ဝင်စားသလိုပဲ ရုပ်ရှင်ဇာတ်ကားကြီးမှာလည်း စိတ်ခံစားမှုတွေနဲ့ ကျေနပ်မှုတွေ ရမယ်လို့ ကျနော် ပြောရဲပါတယ်”လို့ ဒါရိုက်တာ ထူးပိုင်ဇော်ဦးက ပြောပါတယ်။

“သူစိမ်းအိမ်”ရုပ်ရှင်မှာ အပြင်က သရုပ်ဆောင်တွေထက် ဇာတ်ကောင်တွေကိုပဲ မြင်ချင်တဲ့အတွက် Pre Production မှာ အချိန်ယူ ပြင်ဆင်ဖြစ်ခဲ့တယ်လို့ ဒါရိုက်တာ ထူးပိုင်ဇော်ဦးက ဆိုပါတယ်။

“ကျနော်က ဒီဇာတ်ကားထဲမှာ ဇာတ်ကောင်တွေကိုပဲ မြင်ချင်တာပါ။ မြင်ချင်တဲ့အတွက် အပြင်မှာ မြင်ဖူးနေကျ ပုံစံမျိုးထက် သူတို့ရဲ့ သရုပ်ဆောင်၊ သမ္ဘာ၊ ဝါ၊ ကျွမ်းကျင်မှုတွေနဲ့ ပေါင်းပြီးတော့ ဒီဇာတ်ကောင်ကို ဘယ်လောက်ထိ အကောင်းဆုံး Support လုပ်နိုင်မလဲဆိုတာ ကျနော်တို့ ညှိနှိုင်းကြတာပါ။ Pre Production မှာ ၇ ရက်လောက် အချိန်ယူပြီး သူတို့နဲ့ ဆွေးနွေးကြတာပါ”

“ဒီဇာတ်ကားမှာ ကိုယ်ကိုယ်တိုင်ရော ပါဝင်တဲ့ သရုပ်ဆောင်တွေ အားလုံးနဲ့ ကင်မရာ အဖွဲ့သားတွေအပေါ် အားရကျေနပ်မှု ရှိပါတယ်။ သူတို့နဲ့ လက်တွဲ အလုပ်လုပ်ရတဲ့အတွက် အများကြီး ကံကောင်းတယ်လို့ ကျနော် ယူဆတယ်။ ထွက်လာမယ့် ရလဒ်အတွက်လည်း အများကြီး ရင်ခုန်နေပါတယ်”လို့ ထူးပိုင်ဇော်ဦးက ပြောပါတယ်။

ဒါရိုက်တာ ထူးပိုင်ဇော်ဦးဟာ သူ့ရဲ့ ပထမဆုံး ရုပ်ရှင်ကားကြီး “ည” ရုပ်ရှင် ရိုက်ကူးပြီးနောက် “သူစိမ်းအိမ်” ဆိုတဲ့ ဒုတိယမြောက် ရုပ်ရှင်ကားကြီးကို ရိုက်ကူးခဲ့ပါတယ်။ “သူစိမ်းအိမ်”ရုပ်ရှင်မှာတော့ သရုပ်ဆောင် လွင်မိုး၊ ထွန်းအိန္ဒြာဗို၊ ဖွေးဖွေး၊ လင်းဇာနည်ဇော်၊ ချာလီ၊ မြတ်နိုးအေး၊ ရှိန်းတင်ထူးတို့ အဓိက ပါဝင်သရုပ်ဆောင်ထားပြီး သြဂုတ်လ ၁ ရက်နေ့မှာ ရုံတင် ပြသသွားမှာ ဖြစ်ပါတယ်။

You may also like these stories:

“ပေါကား မဟုတ်ကြောင်း ဖန်တီးမှုနဲ့ပဲ သက်သေပြဖို့ လိုတယ်”ဆိုတဲ့ ဒါရိုက်တာ ထူးပိုင်ဇော်ဦး

“ခသုံးလုံးရဲ့ တတိယမြောက်ရုပ်ရှင် ထူးပိုင်ဇော်ဦးကို အကုန်အပ်ထားတယ်”လို့ ထွန်းအိန္ဒြာဗိုပြော 

“ဘယ်ဇာတ်ကား အမျိုးအစားရိုက်ရိုက် အရည်အသွေးကောင်းဖို့က အရေးကြီးတယ်”

The post လူသတ်ခန်းတွေ ပါလို့ ၁၃ နှစ်အောက် ကလေးတွေ ကြည့်ဖို့ မသင့်တော်တဲ့ “သူစိမ်းအိမ်” appeared first on ဧရာဝတီ.

MRTV-4 ရုပ်သံ ဇာတ်လမ်းတွဲများမှတဆင့် ပရိသတ်များ သိရှိလာခဲ့တဲ့ သရုပ်ဆောင် မြတ်သူသူဇင်ဟာ စာသင်တဲ့ အသက်မွေးဝမ်းကြောင်း အလုပ်ကနေ သရုပ်ဆောင် တယောက် ဖြစ်လာတဲ့အပေါ် နောင်တ ရတာမျိုး မရှိဘဲ တခါတရံ အထင်သေးခံရင် ရှက်တယ်လို့ ဧရာဝတီကို ပြောပါတယ်။

“နောင်တတော့ မရဘူး။ ဝမ်းနည်းတယ်။ တခါတလေ အထင်သေးခံရရင် ရှက်တယ်။ မဟုတ်ဘဲနဲ့ အပြောခံရရင် ရှက်တယ်။ စိတ်တိုတယ်။ အဲ့စိတ်တွေပဲ ရှိတယ်။ ဒါပေမဲ့ ကိုယ့်လုပ်ချင်တဲ့ အလုပ်တခုနဲ့ အသက်မွေးဝမ်းကြောင်းပြုဖို့ဆိုတာ လူတိုင်းမှာ မလွယ်ကူနိုင်ဘူး။ အမြဲတမ်း တွေးတယ်။ ငါလုပ်ချင်တဲ့ အလုပ်တခုကို ငါဝါသနာပါတာကို အသက်မွေးဝမ်းကြောင်း ပြုနေရတာ သူများထက်စာရင် အဆင်ပြေတယ်။ အဲ့လိုမျိုး အတွေးနဲ့ပဲ လဲကျလည်း ပြန်ထတယ်။ နောက်ပြန်ဆုတ်ချင်တဲ့ စိတ်တော့ မရှိဘူး”လို့ မြတ်သူသူဇင်က ပြောပါတယ်။

သရုပ်ဆောင်တယောက် မဖြစ်ခင်အချိန်မှာတော့ စာသင်တဲ့ ဆရာမတယောက် အနေနဲ့ ရပ်တည်ခဲ့ပြီး ၂၀၁၂ ခုနှစ်မှ စတင်ကာ Miss ပြိုင်ပွဲ တပွဲ ဝင်ရောက် ယှဉ်ပြိုင်ခဲ့ရာကနေ သင်တန်းများစွာ တက်ရောက်ကာ သရုပ်ဆောင် တယောက် ဖြစ်လာခဲ့တယ်လို့ သိရပါတယ်။

“ဝါသနာ ပါခဲ့ပေမယ့် ကိုယ့်ဘာသာ တခြား အသက်မွေးဝမ်းကြောင်းတခုနဲ့ ရပ်တည်နေခဲ့တာ။ ကံအကြောင်း တိုက်ဆိုင်ပြီး ဒီလောကထဲ ရောက်လာတဲ့အချိန်မှာ ကိုယ့်ရဲ့ ပိုက်ဆံ ရနေတဲ့အလုပ်ကြီး တခုလုံးကို ဘုရင့်နောင်ဖောင်ဖျက် ကျောင်းသားတွေကအစ မျက်နှာလွှဲ ခဲပစ်လုပ်ပြီး ဒီထဲကို ဝင်လာခဲ့ရတာ။ ဝင်လာတဲ့ အချိန်တုန်းကလည်း အဆက်အသွယ် မရှိ၊ ဘာမရှိနဲ့ အရမ်းခက်ခဲတယ်။ ဒါပေမဲ့ ခက်ခဲတဲ့နေရာကနေ အခုချိန်ထိ မြတ်သူကိုသိတဲ့ ပရိသတ် အနည်းစုပေါ့။ အဲ့လို သိလာအောင် ကိုယ်ကြိုးစားခဲ့ရတာ အဲဒါကြောင့် လောဘကြီးတယ်။ လုပ်ချင်တဲ့ ကာရိုက်တာလည်း များတယ်”လို့ မြတ်သူသူဇင်က ပြောပါတယ်။

အနုပညာနဲ့ ပတ်သက်ရင် လောဘကြီးပြီး အနုပညာအလုပ်ဟာ စီးပွားရေးတခုဖြစ်သလို ဘဝရဲ့ရပ်တည်ချက်ဖြစ်လာတယ်လို့ မြတ်သူသူဇင်က ဆိုပါတယ်။

“အနုပညာနဲ့ ပတ်သက်ပြီးတော့ လောဘကြီးတယ်။ ဒါက ကိုယ့်ရဲ့ စီးပွားရေး ဖြစ်တယ်။ ဘဝ ရပ်တည်ချက်ဖြစ်တယ်။ ပြီးတော့ ကိုယ်လုပ်တတ်တာလည်း ဒီတခုတည်း ရှိတယ်။ ဒါကလည်း ဝါသနာ အရမ်းပါတယ်။ ဒီလမ်းကြောင်းပေါ်ကို ရောက်လာဖို့အတွက်က သူများတွေလို နောက်ခံ Background ရှိလို့၊ အဆက်အသွယ်ရှိလို့၊ အရမ်းချောမောလှပနေလို့၊ အရည်အချင်းတွေ အရမ်းပြည့်စုံနေလို့ ကိုယ်က အဲ့လို ရောက်လာတာ မဟုတ်ဘူး”လို့ မြတ်သူသူဇင်က ပြောပါတယ်။

မြတ်သူသူဇင် ပါဝင်ခဲ့တဲ့ “ပျားရည်အိုင်” ဇာတ်လမ်းတွဲဟာလည်း ပရိသတ်ကြားမှာ ရေပန်းစားခဲ့ပြီး မြညို ကာရိုက်တာနဲ့ သူ့ကို ပရိသတ်တွေ အထူး အားပေးခဲ့ကြပါတယ်။ အခုအချိန်မှာတော့ မြတ်သူသူဇင်ဟာ ဇာတ်လမ်းတွဲ ၇ ခု ရိုက်ကူး ပြီးစီးသွားပြီဖြစ်ပြီး မကြာခင်မှာလည်း သူပါဝင်ထားတဲ့ “တတိယမြောက်ဆုံမှတ်” ဇာတ်လမ်းတွဲ ပြသတော့မှာ ဖြစ်ပါတယ်။

You may also like these stories:

“ပျားရည်အိုင်”တဖွဲ့လုံး ကိုယ်စား ဆုရလိုက်တယ်လို့ သတ်မှတ်ထားတဲ့ မေမီကိုကို

“ပျားရည်အိုင်”ဇာတ်လမ်းတွဲ ပြီးသွားမှာ နှမြောနေတဲ့ မေမီကိုကို

The post စာသင်တဲ့အလုပ် လုပ်ကိုင်ရာကနေ သရုပ်ဆောင် ဖြစ်လာတဲ့ မြတ်သူသူဇင် appeared first on ဧရာဝတီ.

ဒါရိုက်တာ ခရစ္စတီးနားခီကတော့ သူရိုက်ကူးထားတဲ့ “ထာဝရနှောင်ကြိုး” (Now and Ever) ရုပ်ရှင်ကား အချိန် ကြာနေတာနဲ့ ပတ်သက်ပြီး ရုံပေါ်ရောက်လာတဲ့အခါ ဘာကြောင့် ကြာနေတာလဲဆိုတာ သိရမယ်လို့ ပြောပါတယ်။

“ကျမတို့ ဇာတ်ကားထွက်ဖို့ ကြာနေပြီလို့ ပရိသတ်တွေက ထင်လိမ့်မယ်။ ကျမတို့အတွက် အချိန် လုံးဝ မလောက်ဘူး။ နေ့ရော ညရော လုပ်တယ်ပေါ့။ နှစ်ကျော့ သုံးကျော့လောက် တာဝန်ယူရတဲ့ အပိုင်းတွေ ဖြစ်လာတယ်။ ကိုဇဏ်ဆိုရင် ဘာမှ မလုပ်တော့တာ သူ့ဆီလာတဲ့ ဇာတ်ညွှန်းတွေကို ဖတ်လည်း မဖတ်ဘူး။ တခြားမှာလည်း သွားမရိုက်ဘူး။ ဒီဇာတ်ကားထဲကိုပဲ အကုန်ထည့်ပေးနေတယ်”

“ဒါပေမဲ့လည်း ကျမတို့ ထင်ထားသလို တနှစ် ၁ ကားဆိုတာလည်း မဖြစ်လာဘူး။ အရမ်း လုပ်ရတယ်။ အဲ့ဒါလေးတွေကို နားလည်ပေးပါ။ ရုပ်ရှင်ရုံပေါ် ရောက်လာရင် ဘာကြောင့် ဒီလောက်ကြာလဲ ဆိုတာကို သိရပါမယ်။ အရမ်းတော့ အောင်မြင်ချင်တယ်။ ဒီထက်ကောင်းတဲ့ ကားတွေ ပိုရိုက်ချင်တယ်။ ဒီထက် ကောင်းတဲ့ကားကို ဆက်ရိုက်ဖို့ ‘ထာဝရနှောင်ကြိုး’ က အရမ်းအောင်မြင်မှ လုပ်လို့ ရမှာပါ”လို့ ဒါရိုက်တာ ခရစ္စတီးနားခီက ပြောပါတယ်။

ဆက်လက်ပြီး ဒါရိုက်တာ ခရစ္စတီးနားခီက မြန်မာနိုင်ငံမှာ ရုပ်ရှင်ရုံတွေ ပိုများလာပေမယ့် မလုံလောက်သေးတာကြောင့် ဒီထက်ပိုပြီး ရုံတွေ ပိုများဖို့နဲ့ ကြည့်တဲ့သူတွေ ပိုများလာဖို့ ဆုတောင်းတယ်လို့ ဆိုပါတယ်။

“ရုပ်ရှင်ရုံတွေ များလာတယ်ဆိုပေမယ့် ကျမတို့ နိုင်ငံအတွက်တော့ မလုံလောက်သေးပါဘူး။ ရုံတွေရဲ့ အနေအထားပေါ်မှာ မူတည်ပြီး ပြန်ရငွေက တွက်ကြည့်လို့ ရတယ်။ ပြန်ရငွေ နည်းနေသေးသရွေ့တော့ ကျမတို့ ရုပ်ရှင်သွားရတဲ့ နှုန်းက နှေးနေဦးမှာပဲ။ ဇာတ်ကားရိုက်ပြီးသွားရင် ပြဖို့ ရုံက နည်းနေတော့ ရုံရက် ရဖို့ကလည်း စောင့်ရတယ်။ ရုံများများဖြစ်လာရင်တော့ ဒီဘက်ကလည်း များများ ရိုက်လို့ရတာပေါ့။ ဒီထက်ပိုပြီး ရုံတွေ ပိုများလာပါစေ။ ကြည့်တဲ့သူတွေ ပိုများလာပါစေပဲ ဆုတောင်းတယ်”လို့ ခရစ္စတီးနားခီက ဆိုပါတယ်။

“ဇာတ်ကားတွေ ရုံတင်ဖို့ အရမ်းကြာတော့ ပရိုဂျူဆာတွေအတွက် မကိုက်တော့ဘူး ပိုပို ဖြစ်လာတာပေါ့။ အဲ့အခါကျတော့ မကိုက်လေ၊ လျော့ရိုက်တာတွေကို ဒါရိုက်တာတွေက ထိပ်တိုက် ရင်ဆိုင်ရတာပေါ့။ ငွေရေးကြေးရေးက ဒါရိုက်တာ ကိုင်တာ မဟုတ်ပေမယ့် ငွေကြေး အမြတ်အရှုံးပေါ် မူတည်ပြီး ဒါရိုက်တာ လုပ်ပိုင်ခွင့်ကလည်း လျော့သွားတယ်လေ”

“အဲ့တော့ သေချာ ရိုက်မှလည်း ရုံတွေကလည်း တင်မယ့် သဘော ဖြစ်လာတယ်။ သူတို့ကလည်း Business လုပ်နေတာဆိုတော့ ငွေရေးကြေးရေး မြတ်မှပဲ လူလာကြည့်မယ့် ကားမျိုးကို တင်မှာပေါ့။ ဘယ်သူ့ကိုမှလည်း အပြစ်ပြောလို့ မရဘူး ဖြစ်နေတာပေါ့”လို့ ဒါရိုက်တာ ခရစ္စတီးနားခီက ပြောပါတယ်။

ဒါရိုက်တာ ခရစ္စတီးနားခီကတော့ “ဥပါယ်တံမျဉ်”၊ “မုဒြာရဲ့ခေါ်သံ” စတဲ့ ရုပ်ရှင်ကားများနဲ့ အောင်မြင်တဲ့ အမျိုးသမီး ဒါရိုက်တာ တယောက်ဖြစ်ပြီး လက်ရှိမှာလည်း သူ့ရဲ့ တတိယမြောက် ရုပ်ရှင်ကား “ထာဝရနှောင်ကြိုး” အတွက် အကောင်းဆုံး ပြင်ဆင်နေတယ်လို့ သိရပါတယ်။ ခင်ပွန်းဖြစ်သူ ဇဏ်ခီကလည်း အောင်မြင်တဲ့ မင်းသား တလက်ဖြစ်ပြီး သူတို့နှစ်ဦးကို ခီမောင်နှံ အဖြစ် ပရိသတ်က အထူးအားပေးလျက်ရှိပါတယ်။

You may also like these stories:

ပွဲတွေ မတက်ဖြစ်တဲ့အကြောင်း ပြောပြတဲ့ ခီမောင်နှံ

“အခုချိန်မှာ ဆင်ဆာမိမှာကို အကြောက်ဆုံးပဲ”လို့ ပြောလာတဲ့ ခရစ္စတီးနားခီ

သားလေးရဲ့ ဘာသာစကား မကွဲပြားတဲ့ ပြဿနာအကြောင်း ပြောပြတဲ့ ဒါရိုက်တာ ခရစ္စတီးနားခီ

“အနုပညာလောကမှာ ဘယ်သူမှ နှိုင်းယှဉ်ခံရတာကို မကြိုက်ကြဘူး”လို့ ဇဏ်ခီပြော

The post “ထာဝရနှောင်ကြိုး” ရုပ်ရှင် ကြာနေတဲ့ အကြောင်းရင်းကို ပြောပြတဲ့ ဒါရိုက်တာ ခရစ္စတီးနားခီ  appeared first on ဧရာဝတီ.

အနုပညာလောကထဲမှာ လူချစ်လူခင် ပေါများတယ်လို့ လူသိများတဲ့ ဟောင်ကောင်မင်းသား Simon Yam ဟာ ပရိသတ်တွေနဲ့ တွေ့ဆုံဖို့ တောင်းဆိုချက် အများစုကိုတော့ လက်ရှိအချိန်မှာတော့ လက်ခံဦးမှာ မဟုတ်ဘူးလို့ ဆိုပါတယ်။

ပြီးခဲ့တဲ့ ဇူလိုင်လ ၂၀ ရက်နေ့က တရုတ်နိုင်ငံ တောင်ပိုင်းမှာရှိတဲ့ Zhongshan မြို့မှာ ဓားထိုးခံခဲ့ရပြီးနောက် သူ့ရဲ့ စီမံခန့်ခွဲရေး အေဂျင်စီက ပရိသတ် တွေ့ဆုံမှုတွေနဲ့ ပတ်သက်လို့ ပိုပြီး စိစစ်သွားမယ်လို့ ဆိုပါတယ်။ အဲ့ဒီလိုမျိုး ပွဲအခမ်းအနားတွေအတွက် လုံခြုံရေးဆိုင်ရာ စီမံမှုတွေကို အဆင့်မြှင့်သွားမှာဖြစ်ပြီး နောက်နောင် အလားတူ တိုက်ခိုက်မှုမျိုးကို အပြည့်အဝ ကာကွယ်ဖို့ ဖြစ်တယ်လို့လည်း သိရပါတယ်။

ပြီးခဲ့တဲ့ သီတင်းပတ်ကုန်ပိုင်းမှာ မင်းသား Yam ကို ဓားနဲ့ ထိုးပြီး လက်ကို ဓားနဲ့ ခုတ်ခဲ့တဲ့ အမျိုးသားကတော့ စိတ်ပိုင်းဆိုင်ရာ မတည်ငြိမ်သူ ဖြစ်တယ်လို့ ဆိုပါတယ်။ မင်းသားဟာ ကနဦးမှာတော့ တရုတ်နိုင်ငံမှာ ဆေးကုသမှု ခံယူခဲ့ပြီး ဟောင်ကောင်ကို ပြောင်းရွှေ့ခဲ့တာပါ။ အဲ့ဒီနောက် ခွဲစိတ်မှုတခုကို ထပ်မံခံယူခဲ့ရပါတယ်။

အဲ့ဒီ ဒုတိယမြောက် ခွဲစိတ်မှုမှာတော့ သူ့ရဲ့ လက်ချောင်းထဲက အာရုံကြောတွေ ထိခိုက်မှု မရှိစေရေးအတွက် သေချာအောင် လုပ်ဆောင်ခဲ့တယ်လို့လည်း ဆိုပါတယ်။ ပြီးခဲ့တဲ့ ဇူလိုင်လ ၂၄ ရက်နေ့မှာပဲ ဆေးရုံကနေ ဆင်းသွားပြီဖြစ်တဲ့ Yam ဟာသူ့ရဲ့ ကံဆိုးမှုကို မိသားစုတွေထံ အကျိုးသက်ရောက်မှု မရှိစေဖို့ ကြိုးစားခဲ့တာ ဖြစ်ပါတယ်။

on.cc Portal ရဲ့ အဆိုအရ သူ့ရဲ့ ဇနီး စူပါမော်ဒယ် Qi Qi က “သူက ကျမတို့ကို သတင်းကောင်းတွေပဲ။ ဘယ်တော့မှာ သတင်းဆိုးကို မပြောဘူး။ သူ့ကို ကျမတို့ စိတ်မပူစေချင်ဘူး။ ဒါကြောင့် သူ မကြာခင် ပြန်ကောင်းလာလိမ့်မယ်လို့ ကျမ မျှော်လင့်ပါတယ်။ မိသားစုတွေသာမက သူ့ရဲ့မိတ်ဆွေ သူငယ်ချင်းတွေကလည်း စိတ်ပူနေလိမ့်မယ်လို့ ကျမထင်ပါတယ်။ ဒါပေမဲ့ အရာအားလုံး အဆင်ပြေသွားမှာပါ”လို့ ပြောကြားခဲ့ပါတယ်။

လူကောင်း သူကောင်းလို့ ဆိုကြတဲ့ မင်းသား Yam ဟာ Zhongshan မြို့မှာ လုပ်ခဲ့တဲ့ ပွဲစီစဉ်သူတွေထံ နစ်နာကြေးကိုလည်း တောင်းခံမှာ မဟုတ်ဘူးလို့ ဆိုပါတယ်။ အဲ့ဒီဖြစ်စဉ်နဲ့ ပတ်သက်လို့ ပွဲစီစဉ်သူတွေရဲ့ အပြစ်လို့ မခံယူဘဲ တိုက်ခိုက်ခဲ့သူရဲ့ စိတ်ကျန်းမာရေးကို ကူညီဖို့သာ ပိုအရေးကြီးတယ်လို့ မင်းသားက ခံစားနေရတဲ့ အကြောင်း သူ့မန်နေဂျာက ပြောဆိုခဲ့ပါတယ်။ မင်းသားရဲ့ ဆေးကုသ ကုန်ကျစရိတ် အားလုံးကို အေဂျင်စီက ကျခံမယ်လို့ မန်နေဂျာက ဆိုပါတယ်။

Ref. asiaone

The post မင်းသား Simon Yam ဆေးရုံဆင်းလာပြီ ဖြစ်ပေမယ့် ပရိသတ်ရှေ့ ပြန်လာဖို့ အစီအစဉ် မရှိသေး appeared first on ဧရာဝတီ.

မင်းသမီး Tessa Thompson ရဲ့ “Valkyrie” ဇာတ်ကောင်ဟာ MCU လို့ခေါ်တဲ့ Marvel Cinematic Universe မှာ ပထမဆုံး လူသိရှင်ကြား ကြေညာထားတဲ့ LGBTQ+ စူပါဟီးရိုးအနေနဲ့ ပါဝင်လာမှာဖြစ်တယ်လို့ သိရပါတယ်။

အသက် ၃၅ နှစ်အရွယ် မင်းသမီးဟာ “Thor: Ragnarok” နဲ့ “Avengers: Endgame” ရုပ်ရှင်တွေမှာ ပါဝင်ခဲ့ပြီး သူ့ရဲ့ဇာတ်ကောင်ဟာ မူရင်း Comics ထဲမှာ လိင်နှစ်မျိုး နှစ်သက်သူလည်း ဖြစ်ပါတယ်။ အခုတော့ Valkyrie ဇာတ်ကောင်ဟာ သူ့ရဲ့ဘုရင်မ ဖြစ်လာမယ့်သူကို ရှာဖွေနေပြီလို့ Marvel စတူဒီယို ဥက္ကဋ္ဌ Kevin Feige က ပြောဆိုခဲ့ပါတယ်။

“San Diego Comic-Con” ရုပ်ရှင်ပွဲတော်မှာ မင်းသမီး Tessa က “ဘုရင်အသစ်အနေနဲ့ သူ (Valkyrie) ဟာ သူ့ရဲ့ ဘုရင်မကို ရှာဖွေဖို့ လိုပါတယ်။ ဒါဟာ ဦးစားပေးကိစ္စ ဖြစ်လာမှာပါ။ သူ့မှာ အကြံဉာဏ်အချို့ ရှိပါတယ်”လို့ ဆိုပါတယ်။ Valkyrie ဇာတ်ကောင်ဟာ LGBTQ+ ဇာတ်ကြောင်းပုံစံနဲ့ လာမှာလားဆိုတဲ့ မေးခွန်းကိုတော့ ဥက္ကဋ္ဌ Feige က “ဟုတ်ပါတယ်”လို့ ပြန်ဖြေခဲ့ပါတယ်။

“Thor 4” ရုပ်ရှင်မှာတင်မဟုတ်ဘဲ သူတို့ရဲ့ ရုပ်ရှင်တွေ တလျှောက်လုံးမှာ ဘယ်လိုတင်ဆက်ပုံမျိုးနဲ့ ချိတ်ဆက်မယ် ဆိုတာ မြင်တွေ့ရမှာဖြစ်ပါတယ်လို့ ဆိုပါတယ်။ နောက်ထပ် ထွက်ရှိလာမယ့် Thor ရုပ်ရှင်ဟာ “Thor: Love and Thunder” ဖြစ်တယ်လို့လည်း သိရပါတယ်။

အဲဒီရုပ်ရှင်မှာတော့ မင်းသမီး Natalie Portman လည်း ပြန်လည် ပါဝင်လာမှာဖြစ်ပြီး အခုတခေါက် ရုပ်ရှင်မှာတော့ အမျိုးသမီး Thor အဖြစ် သရုပ်ဆောင်မှာ ဖြစ်တယ်လို့ ဆိုပါတယ်။

Jane Foster အနေနဲ့ သရုပ်ဆောင်ခဲ့တဲ့ အော်စကာဆုရမင်းသမီး Portman ဟာ MCU မှာ Thor ရဲ့ ချစ်သူအနေနဲ့ ၂၀၁၁ ခုနှစ်နဲ့ ၂၀၁၃ ခုနှစ်တို့မှာထွက်ရှိခဲ့တဲ့ Thor ရုပ်ရှင် ပထမဆုံး ၂ ကားမှာ ပါဝင်ခဲ့ပါတယ်။ ဒါရိုက်တာ Taika Waititi က “Thor: Love And Thunder” ကို ရိုက်ကူးမှာဖြစ်ပါတယ်။

Ref. asiaone

You may also like these stories:

မြောက်အမေရိက ရုပ်ရှင်ရုံ ဝင်ငွေစာရင်းမှာ ဦးဆောင်ခဲ့တဲ့ “Men In Black: International” ရုပ်ရှင်

LGBT နဲ့ အမျိုးသမီး အခွင့်အရေးဆိုင်ရာ ဝေဖန်မှုများကြောင့် ဆော်ဒီဖျော်ဖြေပွဲမှ Nicki Minaj နုတ်ထွက်

မကြာမီထွက်ရှိလာမည့် ရုပ်ရှင်တွင် “ ဂေးစူပါဟီးရိုး” ပါဝင်လာမည်ဟု Russo Brothers အတည်ပြု

The post MCU ရဲ့ ပထမဆုံး LGBT စူပါဟီးရိုးဖြစ်လာမယ့် မင်းသမီး Tessa Thompson appeared first on ဧရာဝတီ.

မကြာခင် ရုံတင်မယ့် “သူစိမ်းအိမ်” ရုပ်ရှင်မှာ ပါဝင်သရုပ်ဆောင်ထားတဲ့ လင်းဇာနည်ဇော်က ဒီဇာတ်ကားကို ကြည့်ပြီးတာ ၃ ခေါက်ရှိပြီ ဖြစ်ပေမယ့် မရိုးသေးဘူးလို့ ပြောပါတယ်။

“သူစိမ်းအိမ်ကို ကြည့်တာ ၃ ခေါက် ရှိပြီပေါ့။ ၃ ခေါက်ကြည့်တာတောင် မရိုးသေးဘူးလို့ ပြောရတယ်။ ခါတိုင်း ကားတွေ ကြည့်ရင် ၁ ခါ၊ ၂ ခါ ကြည့်ပြီးရင် ပျင်းသွားတတ်တယ်လေ။ ၃ ခေါက်ထိကြည့်ပြီး မပျင်းသေးဘူးပေါ့။ ကျမ ကာရိုက်တာတော့ သိပ်ပြီး မပြောပြချင်ဘူး။ ဒီကားကို ရိုက်ဖြစ်တာက ကိုထူးပိုင် ပြောချိန်မှာ ကျမ ကားမရိုက်တာ ကြာပြီလေ။ အပြင်အလုပ်တွေ လုပ်နေတဲ့အတွက် တခြားသူပဲ ပြောင်းပါလားဆိုတော့ မဟုတ်ဘူး၊ ဒီနေရာမှာ မလင်း မျက်နှာနဲ့ကိုပဲ အံဝင်ခွင်ကျ ဖြစ်တယ်ဆိုတာနဲ့ ရိုက်ဖြစ်တာပါ”လို့ လင်းဇာနည်ဇော်က ပြောပါတယ်။

ဆက်လက်ပြီး ဒီဇာတ်ကားက သာမန် ဇာတ်ကားတွေနဲ့ မတူဘဲ ဆန်းသစ်ပြီး ဒါရိုက်တာ ထူးပိုင်ဇော်ဦးကိုလည်း နှစ်သက်တာကြောင့် လက်ခံဖြစ်ခဲ့တာလို့ လင်းဇာနည်ဇော်က ဆိုပါတယ်။

“ဇာတ်လေးက တော်တော်လေး ဆန်းတာရယ်၊ ထူးပိုင် ရိုက်တဲ့ ‘ည’ကားကို ကျမ ကြည့်ပြီးကတည်းက ထူးပိုင်ဇော်ဦးကို ကိုယ်အသိအမှတ် ပြုထားတဲ့ ဒါရိုက်တာလည်း ဖြစ်နေတော့ လက်ခံဖြစ်တာပါ။ သရုပ်ဆောင်သစ်တွေ အရမ်းတော်ပြီး အရမ်းကောင်းကြပါတယ်။ ကျမကကျတော့ အနုပညာသမား တယောက် ဖြစ်တဲ့အတွက် ကိုယ်လောက တိုးတက်လေ ကြိုက်လေပဲပေါ့။ အခု သူတို့ လူငယ်လေးတွေ ဆိုပေမယ့် အရမ်းတော်ကြတယ်”လို့ လင်းဇာနည်ဇော်က ပြောပါတယ်။

လင်းဇာနည်ဇော်ကတော့ အနုပညာကို ဝါသနာပါပေမယ့် စီးပွားရေးလုပ်နေတာကြောင့် အနုပညာ အလုပ်တွေ နည်းနေတဲ့အကြောင်းကိုလည်း အခုလိုပဲ ပြောပါတယ်။

“အနုပညာအလုပ် ဆိုတာကတော့ အရင်တုန်းကလောက်တော့ အများကြီး ရိုက်ရတာမျိုး မရှိပါဘူး။ ကိုယ့်အသက်အရွယ်နဲ့ကတော့ ကာရိုက်တာပိုင်းကို အရမ်းကြီး ရွေးသွားပြီဆိုတော့ ဇာတ်ကား ရိုက်တာကတော့ နည်းပါတယ်။ အပြင်အလုပ်တွေကိုပဲ အဓိက လုပ်ဖြစ်ပါတယ်။ အနုပညာအလုပ်က ကိုယ်အရမ်း ဝါသနာပါတဲ့အလုပ် ဖြစ်နေတာကြောင့် လုပ်တာကတော့ လုပ်ဖြစ်ပါတယ်။ ပြီးခဲ့တဲ့ လတုန်းကလည်း ဇာတ်လမ်းတွဲလေးတခု ရိုက်ဖြစ်ပါတယ်”

“ရိုက်တဲ့ သူတွေကတော့ ရိုက်နေကြပါတယ်။ ကိုယ်တွေကတော့ ကလေးတွေနဲ့ သွားယှဉ်လို့တော့ မရတော့ပါဘူး။ သွက်သွက်လက်လက် လုပ်နိုင်တဲ့အချိန်လည်း မဟုတ်ပါဘူး။ ကိုယ်က အနုပညာအလုပ်တွေကို ဝါသနာ ပါပေမယ့်လည်း သမီးလေးကလည်း ရှိသေးတော့ စီးပွားရေးကလည်း လုပ်ရပါတယ်။ အဲဒီအတွက်ကြောင့်မို့လို့ အနုပညာ အလုပ်တွေ လုပ်တာ နည်းတာပါ။ အခြားအလုပ်တွေလည်း သူ့ဟာနဲ့ သူတော့ အဆင်ပြေပါတယ်”လို့ လင်းဇာနည်ဇော်က ပြောပါတယ်။

သရုပ်ဆောင် လင်းဇာနည်ဇော်ကတော့ လက်ရှိမှာ အနုပညာအလုပ်တွေကို သိပ်လုပ်ကိုင်တာ မတွေ့ရတော့ဘဲ အစ်မဖြစ်သူ ချစ်ချစ်ဇော်နဲ့ အတူ ပွဲတွေမှာ ဝါသနာအရ ရွှေတောင်ခေါက်ဆွဲ ချက်ပြုတ် ရောင်းချတဲ့ အလုပ်ကို လုပ်ကိုင်နေပါတယ်။

ဒါ့အပြင် လင်ဇာနည်ဇော်တို့ မောင်နှမများက ကိုယ်ပိုင်ရုပ်ရှင် ထုတ်လုပ်ရေးတခု တည်ထောင်ထားပြီး သူတို့ရဲ့ ထုတ်လုပ်ရေးကနေ ပထမဆုံး ပွဲဦးထွက် ဇာတ်ကားအဖြစ် “မြန်မာပေါကားတွေ ရပ်”ဆိုတဲ့ ရုပ်ရှင်ကား ရိုက်ကူးထားတယ်လို့ သိရပါတယ်။

You may also like these stories:

လူသတ်ခန်းတွေ ပါလို့ ၁၃ နှစ်အောက် ကလေးတွေ ကြည့်ဖို့ မသင့်တော်တဲ့ “သူစိမ်းအိမ်”

“ဘယ်ဇာတ်ကား အမျိုးအစားရိုက်ရိုက် အရည်အသွေးကောင်းဖို့က အရေးကြီးတယ်”

“ခသုံးလုံးရဲ့ တတိယမြောက်ရုပ်ရှင် ထူးပိုင်ဇော်ဦးကို အကုန်အပ်ထားတယ်”လို့ ထွန်းအိန္ဒြာဗိုပြော

အစ်ကိုဖြစ်သူ ဒါရိုက်တာ မိုက်တီးရဲ့ လက်ရှိ ကျန်းမာရေးအကြောင်း ပြောပြတဲ့ လင်းဇာနည်ဇော်

The post “သူစိမ်းအိမ်” ရုပ်ရှင်ကို ၃ ခေါက် ကြည့်ပြီးပေမယ့် မရိုးသေးဘူးလို့ ပြောတဲ့ လင်းဇာနည်ဇော် appeared first on ဧရာဝတီ.

MRTV-4 ရုပ်သံ ဇာတ်လမ်းတွဲများမှ တဆင့် သရုပ်ဆောင် တယောက် ဖြစ်လာခဲ့ပြီး အခုအချိန်မှာ ပရိသတ်တွေရဲ့ အားပေးမှု ရရှိလာခဲ့တဲ့ သရုပ်ဆောင် သုတအောင်ဟာ ငယ်ငယ်ကတည်းက သရုပ်ဆောင်ချင်တဲ့ ပိုးပါတာကြောင့် သူငယ်ချင်းတွေက သူ့ကို မင်းသားရူးလို့ ခေါ်ကြကြောင်း ဧရာဝတီကို ပြောပါတယ်။

“သရုပ်ဆောင်ချင်တဲ့ ပိုးကတော့ ငယ်ငယ်ကတည်းက ပါတာ၊ သူငယ်ချင်းတွေကဆို မင်းသားရူးလို့ ခေါ်ကြတယ်။ ကောင်းတဲ့ ပြောခြင်းနဲ့တော့ မဟုတ်ဘူး။ ရွဲ့ကြတာပေါ့။ ဒီကောင် မဖြစ်နိုင်ပါဘူး။ တောသားကြီး၊ တောသားကြီးကနေ ဘာလို့ ဖြစ်ရမှာလဲ ဆိုပြီးပြောကြတယ်။ ကျနော်ကတော့ ဘာမှ မဖြစ်ပါဘူး။ လုပ်ချင်တာကိုတော့ ရအောင် လုပ်ခဲ့ပါတယ်”လို့ သုတအောင်က ပြောပါတယ်။

MRTV-4 မှ ာသရုပ်ဆောင် တယောက် ဖြစ်ဖို့အတွက် နယ်မှ တက်လာကာ ကိုယ်တိုင် တယောက်တည်း ကြိုးစားခဲ့ရပြီး အနုပညာနဲ့ ပတ်သက်တဲ့ ပညာများစွာကိုလည်း ကြိုးစားသင်ယူခဲ့ရတယ်လို့ ဆိုပါတယ်။

“ကျနော် သရုပ်ဆောင် မလုပ်ခင်က ကျနော်က မန္တလေးတိုင်း၊ မတ္တရာမြို့နယ်၊ ဆည်တော်ကြီး ကျေးရွာကနေ လာတာ။ အဲ့ရွာက တက်လာပြီးတော့ ဆယ်တန်းအောင်တော့ တရုတ်ပြည်ဘက်မှာ ကုန်တင်ကုန်ချ သွားလုပ်တယ်။ အဲဒါပြီးတော့မှ ရန်ကုန်ကို တက်လာတာ”

“အဲ့အချိန်မှာ သရုပ်ဆောင်လုပ်ချင်တော့ ဘယ်မှာ သွားရမှန်း မသိဘူး။ စုံစမ်းလိုက်တော့ အမျိုးသားနဲ့ ယဉ်ကျေးမှု တက္ကသိုလ်ကို ရောက်တယ်။ ရုပ်ရှင်ဌာနမှာ သရုပ်ဆောင် အထူးပြုနဲ့ ၃ နှစ် တက်ပြီး ဘွဲ့ရတယ်။ နောက်ပြီးတော့ သဘင်မှာ ဒီပလိုမာ ရထားတယ်။ အဲ့မေဂျာ၂ ခုနဲ့ ဘွဲ့ရပြီးတဲ့အခါမှာ MRTV-4 က သရုပ်ဆောင် ခေါ်တယ်။ ဝင်ပြိုင်တယ်။ လူ ၂၀၀၀ ကျော်မှာ ၄၈ ယောက်ထဲ ပါသွားတာ”လို့ သုတအောင်က ပြောပါတယ်။

အနုပညာအလုပ် လုပ်လာခဲ့တဲ့ ၃ နှစ်အတွင်းမှာတော့ ဇာတ်လမ်းတွဲများစွာ ရိုက်ခဲ့ပေမယ့် လူမသိခဲ့ဘဲ မကြာသေးခင် အချိန်က MRTV-4 မှာ ထုတ်လွှင့်ပြသခဲ့တဲ့ “အလင်းထဲကလူ” နဲ့ “ကြယ်ကလေးရဲ့ ကောင်းကင်” ဇာတ်လမ်းတွဲတို့ ပြသချိန်မှာတော့ သူ့အတွက် ပရိသတ်တွေ ရှိလာခဲ့တယ်လို့ ဆိုပါတယ်။

“ကြယ်ကလေးရဲ့ကောင်းကင် အရှေ့မှာ ‘အလင်းထဲကလူ’ ဇာတ်လမ်းတွဲ ရှိတယ်။ အဲ့မှာ ပရိသတ်တွေကသိသွားတယ်။ အဲဒါပြီးမှ ကြယ်ကလေးရဲ့ကောင်းကင်မှာ သိတာ။ အဲ့အရှေ့မှာ ကျနော့်ကို သိတဲ့သူ တယောက်မှ မရှိဘူး။ We Love ဆိုတာလည်း မရှိဘူး။ Fan ဆိုတာလည်း မရှိဘူး။ ဒါပေမဲ့ အခုကျတော့ ရှိလာတယ်။ ရှိလာတော့ ကျနော် မနေတတ် မထိုင်တတ် ဖြစ်တယ်။ ပျော်တာပေါ့။ သူတို့ကလည်း ကျနော့်ကို ဂရုစိုက်တယ်။ ကျနော်ကလည်း သူတို့ကိုလည်း ဂရုစိုက်တယ်။ တဦးပေါ် မေတ္တာ၊ တဦးပေါ် စေတနာကြောင့် လူရာ ဝင်လာတယ်လို့ ထင်ပါတယ်”လို့ သုတအောင်က ပြောပါတယ်။

ဇာတ်လမ်းတွဲ ၆ ခုလောက် ရိုက်ကူးခဲ့ပေမယ့် ကံအကြောင်း မတိုက်ဆိုင်ခဲ့တာကြောင့် လူမသိခဲ့ဘဲ အခုအချိန်မှသာ သိရှိခဲ့ရတာလို့ သူက ဆိုပါတယ်။

“ပရိသတ်ကတော့ ကိုယ်ကောင်းမှ သိမှာလေ။ အဲ့တော့ ကိုယ်က အဆင်ပြေအောင် သရုပ်ဆောင်တယ်။ ဘယ်ကားမဆို အကောင်းဆုံးတော့ လုပ်တာပဲ။ ဒါပေမဲ့ လူဆိုတာက ကံ၊ ဉာဏ်၊ ဝီရိယ အားလုံးပေါင်းမှ အဲ့တော့ ကံလည်း လိုတယ်၊ စန်းလည်း လိုတယ်၊ ဝီရိယလည်း လိုတယ်၊ ပညာလည်း လိုတယ်။ အဲ့တော့ အရှေ့မှာလည်း ပြည့်ပြည့်စုံစုံ လုပ်ခဲ့တယ်။ ဒါပေမဲ့ သိချိန် မတန်လို့ မသိတာပေါ့နော်။ သိချိန် တန်လာတော့ သိကြတယ်။ အားပေးတယ်။ အဲ့အချိန်မှာ ကျနော်က ဘယ်လို ဆက်ကြိုးစားမလဲ ဆိုတာကို စဉ်းစားပြီး ကြိုးစားသွားပါမယ်”လို့ သုတအောင်က ပြောပါတယ်။

သုတအောင်ကတော့ မန္တလေးတိုင်း၊ မတ္တရာမြို့နယ်၊ ဆည်တော်ကြီးကျေးရွာကနေ ရန်ကုန်သို့ အနုပညာအလုပ်များလုပ်ရန် ရောက်ရှိလာခဲ့တာ ၈ နှစ်တာ ရှိပြီးဖြစ်ပြီး အခုချိန်ထိတော့ မိဘများကို မထောက်ပံ့နိုင်သေးဘူးလို့ ဆိုပါတယ်။

“ရန်ကုန်ရောက်တာ ၈ နှစ် ရှိပြီ။ ကျနော် အခုထိတော့ မိဘကို ပြန်မပေးနိုင်သေးဘူး။ ကျနော့် အဖေက အရင်က ဓာတ်ပုံ ရိုက်တယ်။ အမေက ကျနော်တို့ အိမ်ရှေ့မှာ ၁၀၀ တန်၊ ၂၀၀ တန် မုန့်တီတို့၊ ခေါက်ဆွဲသုပ်၊ ကြာဆံသုပ်တွေ ရောင်းတာပါ”လို့ သုတအောင်က ပြောပါတယ်။

လက်ရှိမှာတော့ သူ ပါဝင် သရုပ်ဆောင်ထားတဲ့ “ကြယ်ကလေးရဲ့ ကောင်းကင်” ရုပ်သံ ဇာတ်လမ်းတွဲ ပြသနေပြီး မကြာခင်မှာလည်း “မာယာလှည့်ကွက်” ဇာတ်လမ်းတွဲ ပြသသွားမယ်လို့ သိရပါတယ်။

You may also like these stories:

“ဟစ်တိုင်” ဇာတ်ကားထဲမှာ အိန္ဒြာကျော်ဇင်ရဲ့ သူငယ်ချင်းနေရာက သရုပ်ဆောင်ထားတဲ့ မုဏ်း

အနုပညာနဲ့ ပတ်သက်ရင် အိုက်တင်တွေပဲ လုပ်ချင်နေတဲ့ ဆုပန်ထွာ

သမီးဖြစ်သူ ပန်းရောင်ခြယ်ကို အမြဲ ဆုံးမ အားပေးတယ်လို့ အဆိုတော် ဂရေဟမ် ပြော

The post သရုပ်ဆောင် မဖြစ်ခင်က “တောသားကြီး၊ မင်းသားရူး”လို့ အပြောခံခဲ့ရတဲ့ သုတအောင် appeared first on ဧရာဝတီ.

မင်းသမီး ဆောင်းဟေဂိုနဲ့ မင်းသား ဆောင်းဂျွန်ကီတို့ရဲ့ ကွာရှင်းမှုနဲ့ ပတ်သက်ပြီး ကောလာဟလတွေ ဖြန့်ချိနေတာနဲ့ မလိုမုန်းထားတဲ့ မှတ်ချက်တွေကို ရေးသားနေကြတဲ့ အင်တာနက် အသုံးပြုသူတွေကို ရဲတပ်ဖွဲ့ထံ ဇူလိုင်လ ၂၅ ရက်နေ့မှာပဲ တိုင်ကြားလိုက်ပါတယ်။

ဆိုးလ်မြို့ တောင်ဘက်မှာရှိတဲ့ ဆောင်နမ်မြို့က ဘွန်ဒန်ရဲစခန်းထံ တိုင်ကြားချက်ထဲမှာ UAA အင်တာတိန်းမန့်ဟာ ဆိုရှယ်မီဒီယာနဲ့ အွန်လိုင်း အသိုက်အဝန်း အသီးသီးမှာ ကောလာဟလတွေကို ဖြန့်ဖြူးပြီး မင်းသမီးကို အသရေ ဖျက်နေတယ်လို့ သံသယရှိသူတွေကို အပြစ်ပေးဖို့ တောင်းဆိုခဲ့ပါတယ်။

UAA က “ကျနော်တို့ဟာ ထင်ရှားတဲ့ ကောလာဟလ သတင်းအမှားတွေကို ဖြန့်ဖြူးပြီး ရန်လိုတဲ့ လုပ်ငန်းတွေကို လုပ်ဆောင်နေတဲ့ လူတော်တော်များများကို တိုင်ကြားချက် ကနဦးမှာ လျှောက်ထားခဲ့ပါပြီ။ သူတို့အတွက် ကျနော်တို့ဟာ သက်သေတွေ စုဆောင်းမှု ပြီးစီးခဲ့ပါပြီ”လို့ ကြေညာချက်မှာ ပြောကြားခဲ့ပါတယ်။

အေဂျင်စီကတော့ သက်သေတွေကို စုဆောင်းခဲ့ပြီးတဲ့နောက်မှာ မင်းသမီးကို နာမည်ဖျက်နေတဲ့အတွက် Youtube နဲ့ အွန်လိုင်း အသိုင်းအဝန်းတွေထဲက အသုံးပြုသူတွေကို ရာဇဝတ်မှုဆိုင်ရာအရ တရားစွဲဖို့ စီစဉ်နေပြီး ဇွန်လ ၂၈ ရက်နေ့မှာ တရားရေးရာ ကိုင်တွယ်ဖို့ ဥပဒေကုမ္ပဏီ Kim & Chang ကိုလည်း ခန့်အပ်ထားပြီလို့ သိရပါတယ်။

သတင်းအမှားတွေနဲ့ ကောလာဟလတွေ ဖြန့်ချိ ရေးသားနေသူတွေကို သနားငဲ့ညှာမှာ မဟုတ်ဘူးလို့လည်း ဆိုပါတယ်။ ပြီးခဲ့တဲ့ ဇူလိုင်လ ၂၂ ရက်နေ့တုန်းကတော့ မိသားစု တရားရုံးကနေ မင်းသားနဲ့ မင်းသမီး ကွာရှင်းဖို့ လျှောက်ထားချက်ကို အတည်ပြုပေးခဲ့ပြီ ဖြစ်ပါတယ်။

ပြီးခဲ့တဲ့လမှာတော့ သူတို့နှစ်ဦးရဲ့ တရားရေးဆိုင်ရာ ကိုယ်စားလှယ်တွေကနေ ၂ နှစ်ကြာ အိမ်ထောင်ရေးကို အဆုံးသတ်ပြီး ကွာရှင်းခွင့် လျှောက်ထားခဲ့တာလည်း ဖြစ်ပါတယ်။ အသက် ၃၃ နှစ်အရွယ် မင်းသား ဆောင်းဟာ သူ့ထက် အသက် ၄ နှစ်ကြီးတဲ့ မင်းသမီး ဆောင်းနဲ့ ၂၀၁၇ ခုနှစ် အောက်တိုဘာလမှာ လက်ထပ်ခဲ့တာ ဖြစ်ပါတယ်။

တောင်ကိုရီးယားနိုင်ငံမှာတော့ နာမည်ကျော် ပုဂ္ဂိုလ်တွေကို အွန်လိုင်းမီဒီယာတွေပေါ်မှာ အသရေဖျက်နေသူတွေ၊ အပုပ်ချနေသူတွေ၊ ကောလာဟလ လွှင့်သူတွေကို တရားစွဲဆိုတာ၊ တိုင်တန်းတာတွေကို လုပ်ဆောင်ပြီး နစ်နာသူ အနုပညာရှင်တွေကို ကာကွယ်ပေးလေ့ ရှိပါတယ်။

မြန်မာနိုင်ငံမှာလည်း Facebook လူမှုကွန်ရက်မှာ အနုပညာရှင်တွေကို အပုပ်ချတာတွေ၊ အသရေဖျက်တာတတွေ၊ သတင်းအမှား လွှင့်တာမျိုးတွေကို ပြုလုပ်ကြသူတွေရှိပြီး အဲဒီလို ပြုလုပ်ရင်တော့ အနုပညာရှင်များက ဥပဒေ ပုဒ်မ ၆၆ ဃ ဒါမှမဟုတ်၊ အသရေဖျက်မှုနဲ့ ပြုလုပ်သူများကို ပြန်လည် တရားစွဲဆို တိုင်ကြားလေ့ ရှိပါတယ်။

Ref. Yonhap News

You may also like these stories:

မင်းသား ဆောင်းဂျွန်ကီနဲ့ မင်းသမီး ဆောင်းဟေဂိုတို့ တရားဝင် ကွာရှင်းပြီးစီး

ဇာတ်လမ်းတွဲ မရိုက်ဖြစ်တာ ကွာရှင်းမှုနဲ့ မဆိုင်ဘူးလို့ ဆောင်းဟေဂိုရဲ့ အေဂျင်စီ ပြောကြား 

The post ကွာရှင်းမှုနဲ့ ပတ်သက်ပြီး အမုန်းစကား ရေးနေသူများကို ဆောင်းဟေဂိုရဲ့ အေဂျင်စီ တိုင်ကြား appeared first on ဧရာဝတီ.

သရုပ်ဆောင်အသစ် တယောက်ဖြစ်တဲ့ ဖြိုးရာဇာနိုင်ကတော့ သရုပ်ဆောင်ကောင်း တယောက် ဖြစ်ချင်ပြီး ရိုးရိုးသားသားနဲ့ ကြိုးစားကာ လမ်းမှားမလိုက်ဘူးလို့ ဧရာဝတီကို ပြောပါတယ်။

“အဓိကကတော့ ကျနော်ကလေ ရိုးရိုးသားသားနဲ့ ကြိုးစားတယ်။ လမ်းမှား မလိုက်ဘူး၊ ပေါ်ပင် မလိုက်ဘူး။ အခုခေတ်မှာက သိတဲ့အတိုင်း Facebook မှာ အောင်မြင်သွားရင် ခဏတာ လူသိသွားတယ်။ အောင်မြင်သွားတယ်။ ပြီးတော့လည်း မေ့သွားတာပဲ။ ကျနော်တို့ကျတော့ အစကတည်းက ရိုးရိုးသားသားနဲ့ ကြိုးစားတယ်။ ကိုယ်လျှောက်ရမယ့် လမ်းကိုပဲ လျှောက်တယ်။ ပေါ်ပင်တွေကို သိပ်လိုက် မလုပ်ဘူး။ အဲဒါကြောင့် တနေ့တော့ အောင်မြင်လိမ့်မယ်လို့ ယုံကြည်တယ်”လို့ ဖြိုးရာဇာနိုင်က ပြောပါတယ်။

ဖြိုးရာဇာနိုင်ကတော့ MRTV-4 ရုပ်သံ ဇာတ်လမ်းတွဲများထဲက “ပျားရည်အိုင်” ဇာတ်လမ်းတွဲမှာ ပါဝင်ပြီးနောက် ပရိသတ်များက သူ့ကို သတိထား မိခဲ့ကြပြီး ပါဝင်ခဲ့တဲ့ အခန်းလည်း များတာကြောင့် ပရိသတ်ရဲ့ အသိအမှတ်ပြုခြင်းကို ခံခဲ့ရပါတယ်။

“အဲ့ကားမှာ ပါဝင်ရတာ အရမ်းကို အမှတ်တရဖြစ်တယ်။ အဲ့မတိုင်ခင် ရိုက်ထားတာတွေက လူသိပ်မသိဘူး။ ‘ပျားရည်အိုင်’မှာက တနိုင်ငံလုံးက အရမ်းကို အားပေးကြတဲ့အတွက် ကိုယ်ပါဝင်ရတဲ့ အခန်းကဏ္ဍမှာ ပရိသတ်တွေက အသိအမှတ်ပြုတယ်။ ပြီးတော့ အဲ့ထဲမှာက လူငယ်ဘဝကနေ အသက်ကြီးတဲ့ဘဝထိ အများကြီး သရုပ်ဆောင်ရတယ်။ အခန်းတွေလည်း များတယ်။ ပြီးတော့ ပျားရည်အိုင်က ကျနော့်ရဲ့ပထမဆုံးဇာတ်လမ်းတွဲ။ နောက်မှ လွှင့်တာဆိုတော့ အမှတ်တရတွေ အများကြီးပါ”လို့ ဖြိုးရာဇာနိုင်က ပြောပါတယ်။

အသစ်တယောက်အနေနဲ့ အနုပညာလောကထဲ ဝင်ရောက်ခဲ့ရတာ အခက်အခဲများစွာ ရှိနေပြီး အနုပညာ အလုပ်များ လုပ်လာခဲ့တာဟာ အခုဆိုရင် ၄ နှစ်ခန့် ရှိနေပြီလို့ သိရပါတယ်။

“အခက်အခဲတွေကတော့ အများကြီးပဲ။ နယ်ကနေ လာပြီးတော့ ကြိုးစားရတယ်။ ကျနော်တို့အိမ်က မလိုက်နိုင်ဘူးလေ။ ဆယ်တန်းအောင်ကတည်းက ရန်ကုန်ကို တယောက်တည်း တက်လာတာ။ ကိုယ့်ကျောင်း၊ ကိုယ့်ဘာသာ စုံစမ်းပြီးတော့ အနုပညာတက္ကသိုလ် တက်တယ်။ မျိုးရိုးလည်း မရှိဘူး။ မဖြစ်နိုင်တဲ့ ကြားထဲကနေ ဖန်တီးယူရတာပေါ့။ တွေ့ကြုံရတဲ့ အခက်အခဲတွေက အများကြီးပဲ”လို့ ဖြိုးရာဇာနိုင်က ပြောပါတယ်။

လမ်းမှား မလိုက်တဲ့အတွက် အောင်မြင်တခုရဖို့အတွက် ကြန့်ကြာပြီး ရောက်ရှိနေတဲ့ နေရာအရလည်း လိပ်ပြာလုံတယ်လို့ ဆိုပါတယ်။

“အောင်မြင်မှုကတော့ ကြန့်ကြာတယ်။ ကျနော်ဆိုရင် တခုခုကို ရယူဖို့ဆိုရင် လွယ်လွယ်ကူကူနဲ့ ဘယ်တော့မှ မရဘူး။ အမြဲတမ်း ကြိုးစားရတယ်။ ရုန်းကန် ရတယ်။ အချိန် ပေးရတယ်။ ကိုယ့်ရဲ့ကြိုးစားမှု ရောက်နေတဲ့ နေရာမှာ ကိုယ့်လိပ်ပြာ ကိုယ်လုံတယ်။ ကိုယ့်ရဲ့ရိုးသားမှုကို လက်မ ထောင်နိုင်တယ်။ အဲဒါမျိုးကိုပဲ ကြိုက်တယ်”လို့ ဖြိုးရာဇာနိုင်က ပြောပါတယ်။

MRTV-4 ရဲ့ထိန်းချုပ်မှု အောက်မှာ ရှိနေတဲ့အတွက်လည်း လမ်းလွဲ မရောက်သွားတာ ဖြစ်တယ်လို့ သူက ဆိုပါတယ်။ “အဓိကက MRTV-4 ကြောင့်လည်း ပါတယ်။ ကျနော်တို့ လမ်းလွဲ မရောက်တာ။ MRTV-4 က ကျနော်တို့ကို အမြဲတမ်း သင်တန်းတွေ ပေးတယ်။ မိသားစုလိုပဲ။ သူတို့ ထိန်းချုပ်မှုအောက်မှာ ရှိနေတယ်။ အဲ့အတွက်ကြောင့် ကျနော်တို့ လမ်းလွဲ မရောက်ဘူးပေါ့”လို့ ဖြိုးရာဇာနိုင်က ပြောပါတယ်။

ဖြိုးရာဇာနိုင်ကတော့ “ပျားရည်အိုင်”၊ “မျက်လုံးမှာ အလွမ်း၊ နှုတ်ခမ်းမှာ မာန” ဆိုတဲ့ ဇာတ်လမ်းတွဲများနဲ့ ပရိသတ်များက သိရှိခဲ့ကြပြီး ကြေငြာများလည်း ရိုက်ကူးထားကာ မကြာသေးခင်ကလည်း ဖွေးဖွေးနဲ့ အတူ KBZ Pay ကြေငြာ ရိုက်ထားတယ်လို့ သိရပါတယ်။

You may also like these stories:

“ဂျီဟောသူ” ဇာတ်လမ်းတွဲအတွက် ကာရိုက်တာ လေ့လာမှုတွေ လုပ်နေတဲ့ မေမီကိုကို

“ကျိန်စာပြယ် ဒဏ္ဍာရီ”မှာ ပရိသတ်တွေ အားပေးလို့ ဝမ်းသာနေတဲ့ မေဆူးမောင်

The post ရိုးရိုးသားသားနဲ့ ကြိုးစားပြီး လမ်းမှား မလိုက်ဘူးလို့ ပြောတဲ့ သရုပ်ဆောင် ဖြိုးရာဇာနိုင် appeared first on ဧရာဝတီ.

မကြာခင် ရုံတင်မယ့် “သူစိမ်းအိမ်” ရုပ်ရှင်မှာ ပါဝင်သရုပ်ဆောင်ထားတဲ့ ထွန်းအိန္ဒြာဗိုက ဒီကားမှာ ပါဝင်တဲ့ ကာရိုက်တာဟာ သူနဲ့ အလွန်လိုက်ဖက်တာကြောင့် လက်ခံဖြစ်ခဲ့တာလို့ ဆိုပါတယ်။ ဒီကားကို ရိုက်ကူးတဲ့ ဒါရိုက်တာ ထူးပိုင်ဇော်ဦးရဲ့ “ည” ရုပ်ရှင် ကြည့်ပြီးကတည်းက သူရဲ့ ပရိသတ်ဖြစ်ခဲ့တာလို့လည်း ထွန်းအိန္ဒြာဗိုက ဆိုပါတယ်။

“သူစိမ်းအိမ် ဇာတ်ကားကို လက်မခံမီ ‘ည’ဇာတ်ကားကို ကြည့်ရှုစဉ်ကတည်းက ကျမက ထူးပိုင်ဇော်ဦးရဲ့ ပရိသတ်ပါ။ သူ့ကို ကြိုက်တယ်။ ဇာတ်ညွှန်း ဖတ်ချိန်မှာ ကျမနဲ့ ကွက်တိဖြစ်တယ်လို့ ခံစားရတယ်။ သူကအရာရာ အလွန် အသေးစိတ်ပါတယ်။ ကားရိုက်တုန်းကလည်း သူတို့ Team Work အရမ်း ကောင်းတာ တွေ့ရတယ်”

“နောက်တခုက အသံသွင်းတဲ့အချိန်မှာ ကျမပြောတဲ့ အသံက အစားစားရင်း ပြောတဲ့အသံဆိုရင် အပြင်မှာ တကယ် အစားစားခိုင်းပြီး အသံသွင်းပါတယ်။ Mood ကိုပါ လိုချင်တဲ့အတွက် မရရအောင် ခိုင်းပါတယ်။ အသံသွင်းတာတောင် အကြာကြီး သွင်းရပါတယ်”လို့ သရုပ်ဆောင် ထွန်းအိန္ဒြာဗိုက ပြောပါတယ်။

ဆက်လက်ပြီး ထွန်းအိန္ဒြာဗိုက ကာရိုက်တာ တခုကို အကျိုးအကြောင်း ဆီလျော်တယ်ဆိုရင် လုပ်ရတာ သိပ်ကောင်းတယ်လို့ ပြောပါတယ်။

“ဇာတ်တခုက ကိုယ်လုပ်ရမယ့် ကာရိုက်တာ တခုကို အကျိုးအကြောင်း ဆီလျော်တယ်ဆိုရင် လုပ်လို့ သိပ်ကောင်းတယ်။ ကျမ လူတွေကို စိတ်ကြိုက် သတ်တယ်။ ဒါပေမဲ့ သတ်ရတဲ့ အကြောင်းရင်း ကျမမှာ အပြည့်အစုံ ရှိတယ်။ တခါတလေ ကျမမျက်နှာ မပျော့ပျောင်းဘူး။ ကျမမျက်နှာ မာတဲ့ဟာတွေ၊ မိုက်မိုက်ရိုင်းရိုင်း မျက်နှာပေးတွေက ဒီကာရိုက်တာနဲ့ သိပ်လိုက်တဲ့အတွက် ကျမလက်ခံ ဖြစ်ခဲ့တာပါ”လို့ ထွန်းအိန္ဒြာဗိုက ဆိုပါတယ်။

“သူစိမ်းအိမ်” ဇာတ်ကားထဲက “သမီးတို့ ဘယ်သွားကြမလို့လဲ”ဆိုတဲ့ ဇာတ်ဝင်ခန်းကို ပရိသတ်တွေ အပျော်သဘောနဲ့ Troll နေကြတာကိုလည်း ကျေနပ်တယ်လို့ သူက ဆိုပါတယ်။

“သမီးတို့ ဘယ်သွားကြမလို့လဲ ဆိုတဲ့ အခန်းလေးကို Facebook မှာ လိုတာလေးတွေ ထည့်ရေးပြီး လုပ်ကြတာတွေ့တော့ အရမ်းဝမ်းသာတယ်။ ကျေနပ်ပါတယ်။ တော်တော်လည်း ရယ်ရတယ်။ ဖတ်ပြီး အူတက်နေတာ ‘သမီးတို့ရဲ့ ကောင်လေးတွေက ဂေးဖြစ်သွားတာ အန်တီသိပ်ဝမ်းသာတာပဲ’။ တော်တော်လည်း ရယ်ရတယ်။ သူတို့ စဉ်းစားတတ်ကြပါတယ်”လို့ ထွန်းအိန္ဒြာဗိုက ပြောပါတယ်။

သရုပ်ဆောင် ထွန်းအိန္ဒြာဗိုကတော့ ဒါရိုက်တာ ထူးပိုင်ဇော်ဦး အပါအဝင် အခုခေတ် လူငယ် ဒါရိုက်တာတွေ အပေါ် အမြင်ကိုလည်း အခုလိုပဲ ပြောပါတယ်။

“ထူးပိုင်တို့ အပါအဝင် အခုနောက်ပိုင်း ဒါရိုက်တာတွေနဲ့ Team တွေ အားလုံးက သေချာ ပညာသင်ပြီး လာကြတဲ့ ကလေးတွေဆိုတော့ နိုင်ငံတကာမှာလုပ်တဲ့ ပုံစံအတိုင်း လုပ်ကြတာကို တွေ့ရတယ်။ ကျမ ကျေးဇူးလည်း တင်တယ်။ ဝမ်းလည်း သာတယ်။ ကြိုလည်း ကြိုဆိုတယ်”

“ကျမ အမေရိကားမှာ တကား သွားရိုက်သေးတယ်။ သူတို့လုပ်တဲ့ ပုံစံအတိုင်း ထူးပိုင်တို့ လုပ်တာ တထပ်တည်း တွေ့ရတယ်။ ကွာခြားမှုတွေလည်း ရှိတယ်။ ကျမတို့က ရေချိုးသွားရုံပဲ။ ကိုယ်လုပ်မယ့် အလုပ်ကိုပဲ ပိုအာရုံစိုက်လို့ ရတယ်။ ဟိုခန်း ဘာဝတ်ရမလဲ၊ ဘာစီးရမလဲ လိုက်ပါ့မလားနဲ့ပေါ့။ အဲ့တော့ အခုလို သရုပ်ဆောင်ရုံပဲ ဆိုတော့ စိတ်ဖြောင့်ဖြောင့်နဲ့ လုပ်လို့ရတာပေါ့”လို့ ထွန်းအိန္ဒြာဗိုက ပြောပါတယ်။

သရုပ်ဆောင် လွင်မိုး၊ ထွန်းအိန္ဒြာဗို၊ ဖွေးဖွေး၊ လင်းဇာနည်ဇော်၊ မြတ်နိုးအေး၊ ကူးကူးဇင်အောင်၊ ချာလီ၊ ရှိန်းတင်ထူး၊ ဂျိုကာတို့ ပါဝင်သရုပ်ဆောင်ထားတဲ့ “သူစိမ်းအိမ်”ရုပ်ရှင်ကိုတော့ သြဂုတ်လ ၁ ရက်နေ့မှာ ရုံတင် ပြသသွားမှာ ဖြစ်ပါတယ်။

You may also like these stories:

“ခသုံးလုံးရဲ့ တတိယမြောက်ရုပ်ရှင် ထူးပိုင်ဇော်ဦးကို အကုန်အပ်ထားတယ်”လို့ ထွန်းအိန္ဒြာဗိုပြော 

လူသတ်ခန်းတွေ ပါလို့ ၁၃ နှစ်အောက် ကလေးတွေ ကြည့်ဖို့ မသင့်တော်တဲ့ “သူစိမ်းအိမ်”

“သူစိမ်းအိမ်” ရုပ်ရှင်ကို ၃ ခေါက် ကြည့်ပြီးပေမယ့် မရိုးသေးဘူးလို့ ပြောတဲ့ လင်းဇာနည်ဇော်

The post “ည” ရုပ်ရှင် ကြည့်ပြီး ဒါရိုက်တာ ထူးပိုင်ဇော်ဦးရဲ့ ပရိသတ် ဖြစ်ခဲ့တာလို့ ထွန်းအိန္ဒြာဗို ပြော appeared first on ဧရာဝတီ.

တိုက်ခန်းတခန်းတွင်းက နံရံထောင့်မှာ ကပ်ထားတဲ့ စင်တခုလုံး စူပါဟီးရိုးတွေရဲ့ Helmet (ခေါင်းဆောင်း) တွေနဲ့ ပြည့်နှက်နေပါတယ်။

အဲဒီခေါင်းဆောင်းတွေကို လူ အများကသာ ယူပြီး ဆောင်းလိုက်မယ် ဆိုရင် ကမ္ဘာကျော် ရုပ်ရှင်တွေက သူရဲကောင်း ဇာတ်ကောင် လို့ ခေါ်ကြတဲ့ စူပါ ဟီးရိုးတွေက တနေရာတည်းမှာ ရောက်ရှိနေတာလို့တောင် ပြောလို့ရမှာပါ။

သစ်အထပ်သားပြားနဲ့ ပြုလုပ်ထားတဲ့ စင်ရဲ့ သုံးဆင့်လုံးမှာ Iron Man, Bat Man, Black Panther, Hell Boy စတဲ့ ဇာတ်ကောင် တခုချင်းဆီရဲ့ Helmet (ခေါင်းဆောင်း) တွေကို တင်ထားတာဖြစ်ပါတယ်။

ဒီအခန်းပိုင်ရှင်ဟာ အဲဒီ စူပါဟီးရိုးခေါင်းဆောင်းတွေကို ဝယ်ယူစုဆောင်းထားတာ မဟုတ်ဘဲ သူကိုယ်တိုင်ဖန်တီး ထားတာပါ။

အသက် ၃၂ နှစ်အရွယ် ကိုဟန်ဇော်ဦးဟာ မင်္ဂလာတောင်ညွန့် မြို့နယ်မှာ ရှိတဲ့ သူ့ရဲ့ အခန်းထဲမှာ စူပါဟီးရိုးတွေရဲ့ ကိုယ်ပွားတွေကို ကိုယ်တိုင်ကြိုးစားပန်းစား ဖန်တီးနေတာ ဖြစ်ပါတယ်။

“စက္ကူအရုပ်လေး ၁ ရုပ်လုပ်ဖို့ ရှာရင်းနဲ့ အဲဒီ ဗွီဒီယိုလေးတွေ့တာ။ ဒီလိုဆောက်လို့ရတဲ့ ပုံကြမ်းလေး သွားတွေ့တာ။ တွေ့တော့ စမ်းလုပ်ကြည့်ခဲ့တယ်။ ၂၀၁၈ အစလောက်မှာ စမ်းကြည့်တယ်။ ဘာရယ်မဟုတ်ဘူး လုပ်ဖြစ်သွားတာ”လို့ စူပါဟီးရိုးတွေကို သူစတင်ဖန်တီးဖြစ်ခဲ့ပုံကို ပြန်ပြောင်းပြောပြပါတယ်။

စင်ပေါ်တင်ထားတဲ့ လက်ရာအများစုဟာ သူ့ရဲ့ ပထမဦးဆုံးလက်ရာတွေလို့ သူက အားပါးတရဆိုပါတယ်။ Black Panther ဇာတ်ကောင်ဟာ သူ့ရဲ့ ပထမဦးဆုံးတွေထဲက ပထမဆုံးလက်ရာလို့လည်း ပြောပါတယ်။

Black Panther ဇာတ်ကောင်ဟာ ၂၀၁၈ ခုနှစ်မှာ Marvel Universe ရဲ့ ၁၈ ကားမြောက်ဇာတ်ကားရဲ့ အဓိက ဇာတ်ကောင်ဖြစ်ပြီး ၂၀၁၈ ခုနှစ်ရဲ့ အအောင်မြင်ဆုံး ဇာတ်ကားတွေထဲက တခုလို့ ဆိုနိုင်ပါတယ်။

Iron Man, Bat Man, Black Panther, Hell Boy စတဲ့ စူပါဟီးရိုး ဇာတ်ကောင်တွေဟာ ကမ္ဘာပေါ်မှာ ပရိတ်သတ် အများဆုံး ရုပ်ရှင်တွေထဲက ဇာတ်ကောင်တွေဖြစ်ပြီး သူတို့ရဲ့ လက်နက်၊အသုံးအဆောင်ပစ္စည်း၊ ဝတ်စုံတွေကို ပရိတ်သတ် တွေဟာ အရူးအမူး စွဲလန်းကြပါတယ်။

Marvel ရုပ်ရှင်ထုတ်လုပ်ရေးက ထုတ်လုပ်ပြီး ၂၀၁၉ ခုနှစ်မှာ ကမ္ဘာတဝှမ်းပြသခဲ့တဲ့ Avenger End Game ဇာတ်ကားဟာ ဆိုရင် အမေရိကန်ဒေါ်လာ ၂ ဘီလီယံကျော် ဝင်ငွေရှာပေးခဲ့ပြီး အဲဒီဇာတ်ကားထဲက များစွာသော ဇာတ်ကောင် တခုချင်းစီဖြစ်တဲ့ Iron Man, Captain America, Black Panther, Thor တို့ကို မြန်မာနိုင်ငံမှာလည်း အရူးအမူးနှစ်သက်သူ များစွာရှိနေပါတယ်။

ဒါကြောင့်လည်း ကိုဟန်ဇော်ဦးဟာ သူကိုယ်တိုင်အလှထားဖို့ ပုံဖော်ဖန်တီးခဲ့ရာကနေ ဝယ်ယူသူ၊ မှာသူတွေ အတွက် အလျင်မီအောင် ထုတ်လုပ်နေရတဲ့ အခြေအနေကို ပြောင်းလဲလာတာပဲဖြစ်ပါတယ်။

အဲဒီ ရုပ်ရှင်ဇာတ်ကောင် စူပါဟီးရိုး ဝတ်စုံနဲ့ Helmet (ခေါင်းဆောင်း) တွေကို ကိုယ်တိုင်လေ့လာ စမ်းသပ်ပြီး လုပ်ကိုင် ခဲ့ရတာမို့လို့ အခက်အခဲတွေ အများကြီး ကြုံခဲ့သေးတယ်လို့ ဆိုပါတယ်။

“အနုပညာပဲ ပြောရမလား။ ကိုယ်ကိုယ်တိုင်လည်း ဖြည့်တွေးရသေးတယ်။ Template တခုရလာတယ်ဆိုရင်တောင် Print ထုတ်ဖို့က အစ အခက်အခဲရှိတယ်။ File ရလို့ ဆိုင်မှာ ထုတ်ရင်တောင် ဆိုင်က ထုတ်ချင်သလို ထုတ်လိုက်တော့ ကိုယ် လိုချင်တဲ့ ဆိုဒ်မရဘူး။ ဒါပုံဖော်တဲ့ အဆင့်တောင်မရောက်သေးဘူး။ တကယ်တမ်း လက်တွေ့လုပ်တော့ အခက်အခဲတွေက အများကြီးရှိတယ်ဗျ” လို့ ကိုဟန်ဇော်ဦးက ပြောပါတယ်။

၂၀၁၈ ခုနှစ် မှာ ဒါကို စတင်စမ်းသပ်ခဲ့တာဆိုပေမယ့် လပေါင်းအတန်ကြာ ရပ်နားထားခဲ့ပြီး ဒီနှစ် ၂၀၁၉ ခုနှစ်စမှသာ ဒီလုပ်ငန်းကို အသက်သွင်း နိုင်ခဲ့တယ်လို့ ဆိုပါတယ်။

ကိုဟန်ဇော်ဦးရဲ့ အသက်မွေးဝမ်းကျောင်း လုပ်ငန်းစင်စစ်မှာ မိုဘိုင်းလ်ဖုန်း ပြုပြင်ခြင်းနှင့် မိုဘိုင်းလ်ဖုန်း ပြုပြင်နည်း သင်တန်း နည်းပြဖြစ်ပြီး ၁၀ စုနှစ် တခုကျာ်လောက် အဲဒီပညာရပ်နဲ့ပဲ အသက်မွေးလာတယ်လို့ ဆိုပါတယ်။

ဒါပေမယ့် အခုတော့ စူပါဟီးရိုးဝတ်စုံတွေ ပုံဖော်တဲ့လုပ်ငန်းကိုလည်း ဆက်လက် လုပ်ကိုင်သွားဖို့နဲ့ တိုးချဲ့ဖို့ အစီအစဉ် ရှိနေပြီလို့ သူက ပြောပါတယ်။

“အစက ကိုယ့်ဘာသာကိုယ် ပုံဖော်တာ။ အလှထားဖို့။ ကိုယ့်တိုင် ဝတ်ကြည့်ဖို့ ပုံဖော်တာ။ နောက်ပိုင်းကျတော့ ဖေ့စ်ဘုတ်ပေါ်မှာ ပုံတင်ဖြစ်တော့ လူငယ်တချို့က လိုချင်တယ်ဆိုပြီး မှာကြတယ်”လို့ ဒီလုပ်ငန်းဆက်လုပ်ရတဲ့ အကြောင်းကို သူက ပြောပြပါတယ်။

လက်ရှိမှာတော့ အဲဒီခေါင်းဆောင်း Helmet တွေကို မြန်မာငွေ ၁ သောင်းကျပ်မှ ကျပ် ၃ သိန်းအထိ ဈေးနှုန်း အမျိုးမျိုးနဲ့ မှာယူရရှိနိုင်ပြီး ပြုလုပ်ရမယ့် ပုံစံအပေါ် မူတည်ကာ နာရီပိုင်းမှ လပိုင်းအထိ ကြာမြင့်တတ်ပါတယ်လို့ သိရပါတယ်။

ကိုဟန်ဇော်ဦးရဲ့ လက်ရာတွေကိုတော့ Cosplay လိုပွဲတွေမှာ ဝတ်ဆင်ကြဖို့ ဝယ်ကြသလို ဇာတ်ကောင်တွေရဲ့ ပရိသတ်တွေကလည်း အမှတ်တရ သိမ်းဆည်းထားဖို့ ဝယ်ကြတယ်လို့ သိရပါတယ်။

ဘယ်အရာမှတော့ လွယ်လွယ်ကူကူနဲ့ အောင်မြင်မှု မရနိုင်ပါဘူး။ သူဟာ ဒီအရာတွေကို လုပ်ကိုင်စဉ် အစပိုင်းမှာ မိဘ ဆွေမျိုးများရဲ့ ဝေဖန်ပြစ်တင်မှုကိုလည်း ကျော်ဖြတ်ခဲ့ရတယ်လို့ သူက ပြောပါတယ်။ အင်တာနက်ပေါ်က Tutorial ဗွီဒီယိုဖိုင်များကပဲ ကိုဟန်ဇော်ဦးရဲ့ ဘဝလမ်းကြောင်းကို ပြောင်းလဲစေခဲ့တယ်လို့ ဆိုရမှာပါ။

“ဘာလို့လဲဆိုတော့ ဆိုးလ်ပြား(ဖိနပ်အောက်ခံပြား) ဆိုလည်း သွားဝယ်လိုက်တာပဲ။ ဝယ်လာပြန်ပြီ နှစ်လိပ်သုံးလိပ် ထမ်း ပြီး သယ်လာပြန်ပြီ။ ပြီးရင် ပြန်ထွက်သွားတာ အမှိုက်ထုတ်တွေပဲရှိတယ်။ တကယ်တမ်းထွက်လာတဲ့ ခေါင်းလေးက ၁ လုံး လေးပဲ။ ပစ်လိုက်ရတဲ့ အမှိုက်ထုတ်က သူ့ထက်ကြီးတော့ လွှင့်ပစ်ရတာ များတယ်။ ဆော့နေသလိုပဲ။ ကိုယ့်ဟာကို သဘောကျ ပေမယ့် ဘေးကကြည့်တော့ ဆော့နေသလိုပဲလေ”ဟု သူက ရယ်ရယ်မောမောနဲ့ ပြောပြပါတယ်။

ရုပ်ပုံကြမ်းကို စာရွက်နဲ့ ပရင့်ထုတ်ပြီး ဆိုးလ်ပြား(ဖိနပ်အောက်ခံပြား)ကို ဓားနဲ့ လှီးဖြတ် ပုံဖော်ကာ ကော်နဲ့ စနစ်တကျ ကပ်ပြီးနောက် ဆေးမှုတ်ရတာလို့ ရှင်းပြပါတယ်။

လက်ရှိမှာတော့ ခေါင်းဆောင်း Helmet များကိုသာမက ဝတ်စုံပြည့်များကိုလည်း ဖန်တီးပြုလုပ်နေပြီး ဖန်တီးခဲ့တဲ့ ဝတ်စုံပြည့် တခုဆိုရင် Cosplay ပွဲ ဝင်ပြိုင်ခဲ့ရာကနေ ပထမဆု ရရှိခဲ့တယ်လို့ ဆိုပါတယ်။

“ကျနော်က ရုပ်ရှင်အရမ်းကြည့်တယ်။ အကုန် သဘောကျတယ်။ အဲဒီဇာတ်ကောင်တွေကို အပြင်မှာ အဲဒီပုံကို ဖော်ချင်တယ်။ ဒီနည်းလမ်းကိုတွေ့တဲ့အချိန်မှာ ငါလိုချင်တဲ့ အရုပ်ကလေးတွေ၊ သူများလိုချင်တဲ့ အရုပ်လေးတွေကို ဆောက်ကြည့်ချင်တဲ့အခါ ဒါကိုတွေ့တော့ တစိုက်မတ်မတ် လိုက်ဖြစ်သွားတယ်”လို့ ရှင်းပြပါတယ်။

“Workshop တခုအနေနဲ့ လုပ်ချင်တယ်။ ကြည့်ချင်တဲ့သူလည်း လာကြည့်ရမယ်။ လိုချင်ရင်လည်း ဝယ်လို့ရမယ်။ အဲဒီလိုမျိုး Showroom အငယ်စားလေး။ ဝတ်စုံတွေလည်း ပြထားမယ်။ Helmet ဆိုလည်း ပုံစံ အစုံပေါ့”လို့ သူ့ အနာဂတ်စိတ်ကူးကို ပြောပြပါတယ်။

ကိုဟန်ဇော်ဦးဟာ သူ့ရဲ့ မူလအသက်မွေးဝမ်းကျောင်းကနေ သွေဖယ်ပြီး ယခုဆိုရင် သူဟာ စူပါဟီးရိုး ဇာတ်ကောင်တွေကို ပုံဖော်ထုတ်လုပ်ပြသတဲ့ နေရာ တခု ဖန်တီးဖို့ကို ရည်ရွယ်ချက်ထားပြီး စတင်နေပါပြီ။

The post ကမ္ဘာကျော် စူပါဟီးရိုးတွေရဲ့ ကိုယ်ပွားတွေကို ဖန်တီးသူ appeared first on ဧရာဝတီ.

ကမ္ဘာကျော် ဟာသသရုပ်ဆောင်၊ ဒါရိုက်တာ စတီဖင်ချောင် (Stephen Chow) ဟာ သူ့ရဲ့ ပုဂ္ဂလိက ဘဝနဲ့ ပတ်သက်လို့ ကောလာဟလတွေ တော်တော်များများ ထွက်ပေါ်ခဲ့သူလည်း ဖြစ်ပါတယ်။ ပြီးခဲ့တဲ့ ၂၀၁၉ ခုနှစ်၊ ဇန်နဝါရီလမှာပဲ မင်းသမီး Cecilia Cheung ကနေ တတိယမြောက် မွေးဖွားခဲ့တဲ့ ရင်သွေးလေးရဲ့ ဖခင်ဟာ မင်းသား ချောင်ဖြစ်တယ်ဆိုတဲ့ ကောလာဟလတွေ စတင်ထွက်ပေါ်လာခဲ့ပါတယ်။

အခုတော့ သူလက်ထပ်လိုက်ပြီ ဆိုတဲ့ သတင်းထွက်ပေါ်လာပြန်ပါပြီ။ ၂၀၁၀ ခုနှစ်မှာ ကာလကြာရှည်လက်တွဲခဲ့တဲ့ ဆောက်လုပ်ရေးလုပ်ငန်းရှင်ရဲ့ သမီး ချစ်သူ Yu Wenfeng နဲ့ လမ်းခွဲချိန်ကတည်းကစလို့ အသက် ၅၇ နှစ်အရွယ်မင်းသား တကိုယ်တည်း ရှင်သန်နေထိုင်ခဲ့တာလည်း ဖြစ်ပါတယ်။

ဒါပေမဲ့ ပြီးခဲ့တဲ့ ဇူလိုင်လ ၁၅ ရက်နေ့မှာတော့ မင်းသား ချောင် လက်ထပ်လိုက်ပြီလို့ ဟောင်ကောင် အနုပညာလောကထဲက သတင်းထောက်ဟောင်း တယောက်က ထောက်လှမ်း သိရှိခဲ့တာကစပြီး ကောလာဟလတွေ ထွက်ပေါ်လာခဲ့ပြန်ပါတယ်။

Weibo လူမှုကွန်ရက်မှာ မင်းသား ချောင်ရဲ့ ရုပ်ရှင်တွေဟာ ဝင်ငွေကောင်းရတဲ့အကြောင်း အင်တာနက် သုံးစွဲသူ တယောက်ရဲ့ မေးခွန်းကို တုံ့ပြန်ဖြေကြားခဲ့တဲ့ အဲ့ဒီသတင်းထောက်က “ဇနီးအသစ်ရဲ့ တွန်းအားပေးမှုနဲ့ စတီဖင်ချောင်ရဲ့ တိုက်ခိုက်ရေး စိတ်ဓာတ်ဟာ အသစ်တဖန် ပြန်ပြီးထွန်းလင်းလာပါလိမ့်မယ်”လို့ ပြောဆိုခဲ့ပါတယ်။

ဒါ့အပြင် သူက “စတီဖင်ရဲ့ နှစ်ပေါင်းများစွာကြာ သရုပ်ဆောင်မှုတွေကို မြင်တွေ့ခဲ့ရပြီးတဲ့နောက် ပရိသတ်တွေ ဟာ ကျိန်းသေပေါက် စိတ်လှုပ်ရှားရမှာပါ။ အဲ့ဒီ ရုံဝင်ငွေစာရင်းမှာလည်း စံချိန်ချိုးမှုတွေ ရှိလာမယ်လို့ ကျနော် မျှော်လင့်ပါတယ်”လို့ ဆိုပါတယ်။

အဲ့ဒီ တုံ့ပြန်ပြောဆိုမှုကြောင့် အင်တာနက် သုံးစွဲသူတွေဟာ အံ့သြခဲ့ကြရပြီး “ဟာသဘုရင်”လို့ တင်စားကြတဲ့ မင်းသားဟာ လျှို့ဝှက်လက်ထပ်လိုက်ပြီလို့ ယူဆခဲ့ကြပါတယ်။ အဲ့ဒီအတွက် ပရိသတ်တွေဟာ မင်းသားထံ ဆုတောင်းစကားတွေ၊ ဆုမွန်ကောင်းတောင်းဆိုမှုတွေကို ဆိုရှယ် မီဒီယာပေါ်မှာ ပြောကြားခဲ့ကြပါတယ်။

တချိန်တုန်းက မင်းသားရဲ့ အဆက်ဟောင်းဖြစ်တဲ့ မင်းသမီး Karen Mok ကတော့ အခုလိုမျိုး မင်းသားရဲ့ လျှို့ဝှက် လက်ထပ်လိုက်ပြီလို့ ဆိုတဲ့ ကောလာဟလ သတင်းတွေနဲ့ ပတ်သက်လို့ ဇူလိုင်လ ၂၄ ရက်နေ့တုန်းက တုံ့ပြန်ပြောဆိုခဲ့ပါတယ်။

မင်းသမီးက သူလည်း အဲ့ဒီသတင်းတွေကို ကြားထားပေမယ့် အဲ့ဒီသတင်းရဲ့ တိကျခိုင်မာမှုကို သူအတည်မပြုနိုင်ဘူးလို့ ဆိုပါတယ်။ ပြီးတော့ မင်းသမီးက “သူကတော်တော်လေး ထူးဆန်းတယ်။ ရှင်တို့အားလုံး သူ့ကိုမေးသင့်တယ်” လို့ ရယ်ရယ်မောမောနဲ့ ပြောဆိုခဲ့ပါတယ်။

တကယ်လို့သာ အဲ့ဒီသတင်းက အမှန်ဖြစ်ခဲ့မယ်ဆိုရင် ဂုဏ်ပြုရမှာပေါ့လို့ သူက ဆိုခဲ့ပါတယ်။ တချို့သတင်းတွေမှာတော့ အဲ့ဒီထွက်ပေါ်နေတဲ့ ကောလာဟလသတင်းတွေဟာ အမှားတွေသာ ဖြစ်တယ်လို့ မင်းသားချောင်ရဲ့ လက်ထောက်က ပြောဆိုရှင်းလင်းထားပါတယ်။

Ref: asiaone

You May Also Like This Story:

“Kung Fu Hustle” နောက်ဆက်တွဲရုပ်ရှင် ရိုက်ကူးဖို့ရှိတယ်လို့ စတီဗင်ချောင် အတည်ပြု

The post လျှို့ဝှက် လက်ထပ်လိုက်ပြီလို့ သတင်းထွက်လာတဲ့ မင်းသား စတီဖင်ချောင် appeared first on ဧရာဝတီ.

ဒါရိုက်တာ ထူးပိုင်ဇော်ဦး ရိုက်ကူးတဲ့ “သူစိမ်းအိမ်” ရုပ်ရှင်နဲ့ ပတ်သက်ပြီး ရုပ်ရှင် ရိုက်ဖြစ်ခဲ့ပုံနဲ့ ဇာတ်ကားရိုက်ရင်း သူ့ကြောင့် ဖွေးဖွေး ဒဏ်ရာ နှစ်ခု ရရှိခဲ့ပုံကို လွင်မိုးက အခုလိုပဲ ပြောပါတယ်။

“ထူးပိုင်ဇော်ဦးနဲ့ ပရိုဂျူဆာနဲ့ ကျနော်ကို ဇာတ်ကားရိုက်ဖို့ ဆက်သွယ်လာပါတယ်။ ထူးပိုင်ဇော်ဦးက ဇာတ်ညွှန်း ပေးဖတ်တယ်။ ကျနော့်နေရာလည်း သရုပ်ဆောင် တယောက်အနေနဲ့ လုပ်သင့်တယ်။ ငြင်းဖို့ ခက်တဲ့ နေရာလေးပေါ့။  အဲ့ဒါနဲ့ရိုက်ဖြစ်သွားတာပါ။ ကျနော်တို့ ဇာတ်ကားကိုကြည့်တော့ ငါရိုက်ခဲ့တဲ့ ရုပ်ရှင်ကားထဲမှာတော့ ဂုဏ်ယူစရာ ကောင်းတဲ့ ဇာတ်ကားတကားလို့ ပြောလို့ရတယ်”

“ဖွေးဖွေးက ကျနော့်ကြောင့် ဒဏ်ရာ နှစ်ခုရခဲ့တယ်။ တခုက ဖွေးဖွေးက ဇာတ်ကားထဲမှာ မခိုင်ကြီးနဲ့ ပိုဖိုက်ရတယ်။ တခုက ဇက်ပိုး အုပ်လိုက်တဲ့အခန်း တီးလိုက်တာ မူးထွက်သွားတယ်။ ကျနော်လည်း တောင်းပန်လိုက်တယ်။ သူလည်း ‘ဦး ရပါတယ်’ပေါ့။ နောက်တချက်က ရေချိုးခန်းမှာ မျက်နှာကို ဆွဲရတဲ့ အခန်းမှာ မျက်နှာကို လက်သည်းနဲ့ ကုတ်မိသွားတယ်။ ကျနော် တမင်မလုပ်ဘူးဆိုတာ သူကလည်း နားလည်ပါတယ်” လို့ လွင်မိုးက ပြောပါတယ်။

ဟာသကားတွေနဲ့ ပရိသတ် အားပေးမှုရရှိတဲ့ သရုပ်ဆောင်ဖြစ်တာကြောင့် ဇာတ်ကားထဲက ကာရိုက်တာကို ကြောက်ပါ့မလားလို့ စိတ်ပူတယ်လို့လည်း လွင်မိုးက ပြောပါတယ်။

“လွင်မိုးဆိုတဲ့ ပေါတောတော တယောက်က သရဲကားရိုက်တာ ပိုပြီး အံ့သြသင့်တယ်။ ကျနော်က ဟာသတွေနဲ့ နာမည်ကြီးတဲ့သူဆိုတော့ စိတ်ပူတာက လူသတ်တာကို ကြောက်ပါ့မလားဆိုတဲ့ စိတ်ပူတယ်။ ကျနော်ကို ကျနော်လည်း မှန်သွားသွား ကြည့်တယ်။ ဒါရိုက်တာ လိုချင်တာတွေကို Mood တွေ သွင်းပြီးလုပ်ပေးရပါတယ်။ အပိုင်း၂ လုပ်ဖို့ အများကြီး စဉ်းစားကြရမယ်။ ကျနော်က အသက်ကြီးမှ ကလေးတွေနဲ့ ပြန်စုဖွဲ့ပြီး လုပ်ရတဲ့နေရာမှာ အားလည်း ရှိတယ်”

“သူစိမ်းအိမ်က ထူးခြားတဲ့ ဇာတ်ကားတကားဆိုတာ ပရိသတ်တွေ ကြည့်ပြီးရင်သိမှာပါ။ ‘ညကြီး သမီးတို့ ဘယ်သွားကြမလို့လဲ’ဆိုတဲ့ စကားလေးကို အင်တာနက်မှာ မျိုးစုံလုပ်ကြပြီး ဒါလေးကို ရေးနေကြတာပေါ့။ လူတွေမှာလည်း ဟာသဉာဏ်နဲ့ Creation တွေနဲ့  ဖြစ်လာတာပေါ့။ Facebook မကောင်းဘူး ပြောနေတာမျိုး မဟုတ်ဘဲနဲ့ ကောင်းတွေ စဉ်းစားရင်လည်း ကောင်းပါတယ်”လို့ လွင်မိုးက ပြောပါတယ်။

ဒါရိုက်တာ ထူးပိုင်ဇော်ဦး ရိုက်ကူးတဲ့ “သူစိမ်းအိမ်” ရုပ်ရှင်ကားမှာ သရုပ်ဆောင် လွင်မိုး၊ ထွန်းအိန္ဒြာဗို၊ ဖွေးဖွေး၊ လင်းဇာနည်ဇော်၊ မြတ်နိုးအေး၊ ကူးကူးဇင်အောင်၊ ချာလီ၊ ရှိန်းတင်ထူး၊ ဂျိုကာတို့ ပါဝင်သရုပ်ဆောင်ထားပြီး ဒီရုပ်ရှင်ကိုတော့ သြဂုတ်လ ၁ ရက်နေ့မှာ ရုံတင် ပြသသွားမှာ ဖြစ်ပါတယ်။

You may also like these stories:

“သူစိမ်းအိမ်” ရုပ်ရှင်ကို ၃ ခေါက် ကြည့်ပြီးပေမယ့် မရိုးသေးဘူးလို့ ပြောတဲ့ လင်းဇာနည်ဇော်

လူသတ်ခန်းတွေ ပါလို့ ၁၃ နှစ်အောက် ကလေးတွေ ကြည့်ဖို့ မသင့်တော်တဲ့ “သူစိမ်းအိမ်”

“ဘယ်ဇာတ်ကား အမျိုးအစားရိုက်ရိုက် အရည်အသွေးကောင်းဖို့က အရေးကြီးတယ်”

The post “သူစိမ်းအိမ် ရိုက်ရင်း ကျနော့်ကြောင့် ဖွေးဖွေး ဒဏ်ရာနှစ်ခု ရခဲ့တယ်”လို့ လွင်မိုး ပြော  appeared first on ဧရာဝတီ.

ဥရောပ အနောက်ပိုင်းမှာ အပူလှိုင်းဖြတ်မှု ဆက်တိုက်ဖြစ်ပေါ်နေပြီး နောက်မှာတော့ ပြင်သစ်နိုင်ငံ၊ ပဲရစ်မြို့ဟာ အပူချိန် ၄၂ ဒဿမ ၆ ဒီဂရီ ဆဲလ်ဆီးယပ်နဲ့ မြို့ရဲ့ အပူချိန်အမြင့်ဆုံးစံချိန်ကို ရောက်ရှိနေတယ်လို့ သိရပါတယ်။

ပြင်သစ်နိုင်ငံမြောက်ပိုင်းမှာ အပူဒဏ် အန္တရာယ် သတိပေးချက်ကို အနီရောင်အဆင့် ထုတ်ပြန်ထားပြီး ဂျာမနီနိုင်ငံမှာလည်း ဇူလိုင်လ ၂၄ရက်နေ့က စံချိန်တင်ခဲ့တဲ့ အပူဒဏ်ကို ကျော်လွန်ပြီး ၄၁ ဒီဂရီဆဲလ်ဆီးယပ်အထိ မြင့်တက်ခဲ့ပါသေးတယ်။

ပြင်သစ်ရဲ့ အာဏာပိုင်တွေကတော့ နိုင်ငံတွင်းနေထိုင်သူတွေကို အတတ်နိုင်ဆုံး အပြင်ထွက်ခြင်းကို ရှောင်ကြဉ်ကြဖို့ သတင်းထုတ်ပြန်ထားပြီး နေ့ကလေးထိန်း ဌာနတော်တော်များများကတော့ ပိတိထားပြီလို့ သိရပါတယ်။ ကျွမ်းကျင်သူတွေကတော့ အပူချိန်မြင့်တက်မှုကြောင့် လူသေဆုံးမှုတွေ ရှိနိုင်တယ်လို့ ခန့်မှန်းထားပြီး ကာကွယ်မှုတွေ ပြုလုပ်ဖို့ တွန်းအားပေးနေတာကို တွေ့ရပါတယ်။

၂၀၀၃ ခုနှစ် သြဂုတ်လမှာ ဖြစ်ခဲ့တဲ့ အပူချိန်မြင့်တက်မှုမှာ သေဆုံးသူ တသောင်းကျော်ရှိခဲ့တဲ့ အတွက် အဲဒီအခြေအနေလောက် မဆိုးရွားသေးဘူးလို့ နှိုင်းယှဉ်ချက်တွေ အရ သိရပါတယ်။ ဂျာမနီနိုင်ငံ မြောက်ပိုင်းမှာလည်း ရေကန်တွေမှာ ရေခမ်းခြောက်မှုတွေ ဖြစ်ပေါ်နေပြီး ငါးတွေသေဆုံးမှုရှိနေပါတယ်။

နယ်သာလန်မှာ အပူချိန်မြင့်တက်မှုကြောင့် ယခု ရက်သတ္တပတ်အတွင်း ဝက် အကောင်ရေ ၁၀၀ ခန့် သေဆုံးခဲ့ရပါသေးတယ်။ ၂၀၁၉ ခုနှစ်မှာ ဥရောပတိုက်တလျှောက် အပူချိန်မြင့်တက်မှုတွေ ဆက်တိုက်နီးပါး ဖြစ်ပေါ်နေပြီး ဇွန်လမှာလည်း စံချိန်တင် အပူချိန်မြင့်တက်မှု ဖြစ်ခဲ့ပါတယ်။

ပြင်သစ်နိုင်ငံကတော့ ချက်နိုင်ငံ၊ သြစတေးလျနိုင်ငံ၊ ဂျာမနီနိုင်ငံနဲ့ ပိုလန်နိုင်ငံတို့ကို ကျော်ပြီး အပူဆုံး စံချိန်ချိုးခဲ့တယ်လို့ ဘီဘီစီသတင်းမှာ ဖော်ပြထားပါတယ်။ ဒီလို စံချိန်တင် အပူချိန်မြင့်မားမှုတွေ ဖြစ်ပေါ်ရခြင်းဟာ ရာသီဥတုပြောင်းလဲမှု၊ ကမ္ဘာကြီး ပူနွေးလာမှု၊ လူဦးရေ ထူထပ်မှု စတာတွေကြောင့် ဖြစ်တယ်လို့ ကျွမ်းကျင်သူတွေက ဆိုပါတယ်။

Ref. BBC

The post ပဲရစ်မြို့မှာ အပူချိန်အမြင့်ဆုံး စံချိန်ထိ ရောက်နေ appeared first on ဧရာဝတီ.

ပြီးခဲ့တဲ့လတုန်းက ထိုင်းနိုင်ငံ၊ ဘန်ကောက်မြို့က ကိုရီးယာ ထုတ်ကုန်ပစ္စည်း ကုန်စည်ပြပွဲတပွဲအတွင်း ခင်း ကျင်း ပြသနေတဲ့ ပြခန်းတခုမှာ Jake Choi ဟာ သူ့ရဲ့ စမတ်ဖုန်းကို အသုံးပြုပြီး ဗီဒီယိုကလစ်တွေကို တခုချင်းစီ ပြသနေပါတယ်။ ၃ မိနစ်တောင် မကြာတဲ့ အဲ့ဒီဗီဒီယိုထဲမှာ နာမည်ကျော် Maychic မျက်ခုံးမွှေးဆွဲတံ ကြော်ငြာနေတဲ့ တောင်ကိုရီးယားမင်းသမီး Song Ji Hyo ရဲ့ ပုံရိပ်ပါဝင်လာခဲ့ပါတယ်။

သူတို့ရဲ့ ထုတ်ကုန်ကို တကယ့် နာမည်ကျော်တဦးကို အသူံးပြုပြီးကြော်ငြာနေတဲ့ တောင်ကိုရီးယား အလှကုန်ပစ္စည်း ကုမ္ပဏီ MCBrains ဟာ များမကြာခင်မှာပဲ သူတို့ရဲ့ ထုတ်ကုန်တွေအပေါ် ပွဲလာပရိသတ်တွေရဲ့ အာရုံစူးစိုက်မှုကို လက်ခံရရှိခဲ့ပါတယ်။

ထိုင်းနဲ့ အခြားအရှေ့တောင်အာရှ ဝယ်သူတွေဟာ MCBrains နဲ့ အဲ့ဒီကုမ္ပဏီရဲ့ ထုတ်ကုန်တွေနဲ့ ပတ်သက်လို့ ကြားတောင် မကြားဖူးခဲ့ကြပေမယ့် Choi ရဲ့အဆိုအရ ကြော်ငြာဗီဒီယိုကို ပြသခဲ့ပြီးတဲ့နောက်မှာ ဝယ်သူတွေရဲ့ စိတ်နဲ့ ပိုက်ဆံအိတ်တွေကို သူတု့ိ လျင်လျင်မြန်မြန်ပဲ ဖွင့်နိုင်ခဲ့တယ်လို့ ဆိုပါတယ်။

ကိုရီးယားရုပ်သံအစီအစဉ် “Running Man” ထဲက သရုပ်ဆောင်တယောက်ဖြစ်တဲ့ မင်းသမီး Song ဟာ MCBrains ရဲ့ အလှကုန်ပစ္စည်းတွေနဲ့ အခြား တောင်ကိုရီးယားကုမ္ပဏီလေးတွေရဲ့ ကုန်ပစ္စည်း ၁၅ ခုလောက်ကို ပရိုမိုးရှင်းလုပ် ပေးဖို့ အခမဲ့ ပါဝင်ပေးထားတာလည်း ဖြစ်ပါတယ်။

မင်းသမီးရဲ့ ကြော်ငြာပေးမှုကြောင့် ဝယ်သူတွေအနေနဲ့ တောင်ကိုရီးယား လူသုံးကုန်ပစ္စည်းတွေဟာ အသုံးပြုဖို့ လုံခြုံစိတ်ချရတယ်လို့ သတ်မှတ်လာကြပါတယ်။ သူ့ရဲ့ ပါဝင်မှုကြောင့် ဝယ်သူတွေနဲ့ ညှိနှိုင်းတဲ့နေရာမှာ အတားအဆီးတချို့ကို ဖယ်ရှားပေးနိုင်ခဲ့တယ်လို့ ဆိုပါတယ်။

Choi ရဲ့အဆိုအရ သူတို့ဟာ ကြီးမားတဲ့ မားကတ်တင်း အကျိုးဆက်ကို ရရှိခံစားခဲ့ရတယ်လို့ သိရပါတယ်။ သူ့ရဲ့ ကုမ္ပဏီဟာ Hallyu လို့ခေါ်တဲ့ ကိုရီးယား အနုပညာရေလှိုင်းရဲ့ အင်အားကို ကြိုးကိုင်ထားပြီး ၂ ရက်ကြာကျင်းပခဲ့တဲ့ အဲ့ဒီကုန်စည်ပြပွဲမှာ နိုင်ငံခြား သုံးစွဲသူတွေထံ သူတို့ရဲ့ ထုတ်ကုန်တွေကို ပရိုမိုးရှင်းပြုလုပ်ပေးနိုင်ခဲ့ပါတယ်။

MCBrains ကုမ္ပဏီဟာ ပြီးခဲ့တဲ့သီတင်းပတ်မှာပဲ ထိုင်းကုမ္ပဏီတခုဆီ ဒေါ်လာ ၅ ထောင်ဖိုးရှိတဲ့ ကုန်ပစ္စည်းတွေကို တင်ပို့နိုင်ခဲ့ပြီး ဒါဟာ ၂၀၁၆ ခုနှစ်တုန်းမှာ လုပ်ငန်းစတင်ခဲ့တဲ့အချိန်ကစလို့ ပထမဆုံး ဖြစ်တယ်လို့ဆိုပါတယ်။ အဲ့ဒီဖြစ်ရပ်ကြောင့် ကိုရီးယား အနုပညာထုတ်ကုန်တွေရဲ့ မြင့်တက်လာတဲ့ နာမည်ကျော်ကြားမှုတွေဟာ တောင်ကိုရီးယား တင်ပို့ကုန်တွေကို ဘယ်လိုမြှင့်တင်ပေးနိုင်တယ်ဆိုတာကို မြင်တွေ့ခဲ့ကြရတာပဲ ဖြစ်ပါတယ်။

ဒါ့အပြင် အကရော အဆိုပါ ပိုင်နိုင်ကြတဲ့ အမျိုးသားနဲ့ အမျိုးသမီးအဖွဲ့တွေရှိတဲ့ K-pop ဟာလည်း အာရှတွင်သာမက လက်တင်အမေရိက၊ ဥရောပနဲ့ အမေရိကန်နိုင်ငံတွေဆီ မကြာသေးခင်နှစ်များအတွင်း ပေါက်မြောက်လာကြပြီး ယဉ်ကျေးမှုဘောင်ကိုတောင် ကျော်လွန်လာပြီလို့ ဆိုနိုင်မှာပါ။

ကိုရီးယားအနုပညာ ရေလှိုင်းဟာ ၁၉၅၀-၅၃ ကိုရီးယား စစ်ပွဲနဲ့ ရင်ဆိုင်ခဲ့ရပြီး ဒီနေ့အချိန်အထိ မြောက်ကိုရီးယား ရဲ့နျူကလီးယား စမ်းသပ်မှုတွေ၊ ဒုံးကျည်စမ်းသပ်မှုတွေကြောင့် တင်းမာမှုဖြစ်နေရတဲ့ နိုင်ငံတခုအတွက်တော့ အဓိကကျတဲ့ ယဉ်ကျေးမှုအပြောင်းအလဲ အဖြစ်ပုံဖော်နေပါတယ်။

၂၀၁၀ ခုနှစ်ကစလို့ လူကုန်သုံးတွေကို တိုးမြှင့် တင်ပို့ဖို့အတွက် တောင်ကိုရီးယားဟာ တရုတ်၊ အင်ဒိုနီးရှား၊ ဗီယက်နမ်နဲ့ အခြားနိုင်ငံတွေမှာ ကိုရီးယားအနုပညာရေလှိုင်းကို အခြေခံတဲ့ ကုန်စ္စည်းပြပွဲတွေကို ကျင်းပလာခဲ့ကြပါတယ်။

မကြာသေးခင်တုန်းကပဲ တောင်ကိုရီးယားဟာ အလှကုန်နဲ့ အဝတ်အထည်တွေ အပါအဝင် အဓိကကျတဲ့ လူသုံးကုန်ပစ္စည်း ငါးခုမှ တင်ပို့ကုန်တွေကို မြှင့်တင်ဖို့ ရည်မှန်းချက်ကြီးမားတဲ့ အစီအမံတခုကို ချပြခဲ့ပါတယ်။ ၂၀၁၈ ခုနှစ်မှာ ဒေါ်လာ ၂၇ ဒဿမ ၇ ဘီလီယံရှိရာကနေ ၂၀၂၂ ခုနှစ်မှာ ဒေါ်လာ ၃၅ ဘီလီယံအထိ ရယူမယ်လို့ မျှော်မှန်းထားတာ ဖြစ်ပါတယ်။

ကိုရီးယားကုန်သွယ်ရေးရင်းနှီးမြှုပ်နှံမှုမြှင့်တင်ရေး အေဂျင်စီ (KOTRA) ရဲ့ အဆိုအရ ဘန်ကောက်ကုန်စည်ပြပွဲမှာ ထိုင်း၊ အခြားအရှေ့တောင်အာရှဝယ်သူတွေနဲ့ လက်မှတ်ရေးထိုးနိုင်ခဲ့တဲ့ ကိုရီးယားကုမ္ပဏီ ၇ ခုဟာ ဒေါ်လာ ၉ သိန်း ၉ သောင်းကျော်ဖိုး ရှိခဲ့တယ်လို့ ဆိုပါတယ်။ ခန့်မှန်းချက်တွေအရ မကြာခင်တနှစ်၊ နှစ်နှစ်အတွင်းမှာပဲ သဘောတူညီချက် တန်ဖိုး ဒေါ်လာ ၃၁ သန်းအထိ ရောက်ရှိလာလိမ့်မယ်လို့လည်း သိရပါတယ်။

Ref:Yonhap

You may also like these stories:

BTS အဖွဲ့ကြောင့် ရရှိတဲ့ စီးပွားရေးတန်ဖိုးမှာ နှစ်စဉ် ကန်ဒေါ်လာ ၃ ဘီလီယံခွဲကျော်ရှိ

ညစ်ညမ်းဗီဒီယို၊ မုဒိမ်းမှု၊ ပြည့်တန်ဆာအမှုများနဲ့ ပတ်သက်ပြီး Kpop စတားနှစ်ဦးကို ရဲတပ်ဖွဲ့စစ်ဆေးနေ

ကိုရီးယား K-Pop ဖျော်ဖြေပွဲများ ပြုလုပ်နိုင်မည့် ကွင်းကို ၂၀၂၄ ခုနှစ်မှာ ဖွင့်လှစ်မည်

အိမ်ခြံမြေတွေကတဆင့် အမြတ်အစွန်းတွေရနေတဲ့ နာမည်ကျော် K-Pop အိုင်ဒေါများ

The post ကိုရီးယား လူသုံးကုန်ပစ္စည်းတွေအတွက် အင်အားကောင်း မားကတ်တင်းလက်နက် ဖြစ်လာတဲ့ K-pop appeared first on ဧရာဝတီ.

Miss Universe Myanmar အလှမယ်တဦးဖြစ်တဲ့ မိုးစက်ဝိုင်ကတော့ ယခုနောက်ပိုင်းမှာ အနုပညာအလုပ်တွေ သိပ်မလုပ်ဖြစ်တော့တဲ့အကြောင်း အခုလိုပဲ ပြောပြခဲ့ပါတယ်။

“အနုပညာလှုပ်ရှားမှုနဲ့ မိုးစက်ရဲ့ ပုံမှန်နေထိုင် ဖြတ်သန်းမှုကို ယှဉ်လိုက်ရင်တော့ အလုပ်နဲ့ အိမ်နဲ့ အဲ့လိုမျိုးပဲရှိပါတယ်။ နည်းတယ်ဆိုတာက မိုးစက်ရဲ့ မိသားစု အသိုင်းအဝိုင်း ပတ်ဝန်းကျင်းက အနုပညာ အသိုင်းအဝိုင်း မဟုတ်ဘူး။ အဲ့မှာမှ မိုးစက်က ပထမဆုံး တယောက် ဖြစ်နေတယ်။ တခုခု လုပ်မယ်ဆိုတိုင်း သူတို့ကို ပြောနေရတယ်။ မိဘကလည်း ဒီစီးပွားရေးအလုပ်ပဲ လုပ်တာဆိုတော့လေ တခုခုဆိုရင် ရှင်းပြရတယ်။ အဲ့ရှင်းပြရတာတွေလည်း ပါတာပေါ့နော်”လို့ မိုးစက်ဝိုင်က ပြောပါတယ်။

မိုးစက်ဝိုင်အနေနဲ့ အခုအချိန်မှာတော့ အနုပညာလှုပ်ရှားမှုထက် သူ့ရဲ့ကိုယ်ပိုင်စီးပွားရေးအနေနဲ့ ကိုယ်ပိုင် Brand ဖြစ်တဲ့ Mozey Brand အတွက် အလုပ်များ လုပ်ဖြစ်နေတယ်လို့ ဆိုပါတယ်။

“မိုးစက်က ငယ်ငယ်ကတည်းက အနုပညာလောကထဲ ဝင်တာ မဟုတ်တဲ့အတွက် ဦးစားပေးရမယ့် အရွယ် မဟုတ်တော့ဘူးလို့ ထင်တာပေါ့။ ကိုယ်အလုပ်လုပ်ရမယ့် အရွယ်လည်း ရောက်ပြီ။ စီးပွားရေး လုပ်ရမယ်ဆိုပြီး လုပ်ဖြစ်တာပါ”လို့ မိုးစက်ဝိုင်က ပြောပါတယ်။

စီးပွားရေးလုပ်တဲ့အခါမှာလည်း အတွေ့အကြုံရှိတဲ့သူများကို မေးမြန်းကာ အဆိုးဆုံးအခြေအနေထိ ရင်ဆိုင်နိုင်အောင်လည်း ပြင်ဆင်ထားတယ်လို့ ဆိုပါတယ်။

“ကိုယ်ပိုင်အလုပ်လုပ်တဲ့အခါမှာ အဆိုးဆုံးအထိ ရင်ဆိုင်နိုင်ဖို့အတွက် စဉ်းစားထားပါတယ်။ တော်တဲ့၊ အတွေ့အကြုံရှိတဲ့ သူတွေကို မေးကြည့်ပါတယ်။ သူတို့က ပြောတယ်။ အရှုံးဒဏ် ခံနိုင်ရမယ်။ ပထမဆုံးမှာတော့ ရှုံးမယ်၊ ဒုက္ခတွေ ရောက်မယ်။ အသီးမစားခင်တော့ ရင်ဆိုင်ရမှာပေါ့”လို့ မိုးစက်ဝိုင်က ပြောပါတယ်။

စီးပွားရေးဘက်ကို များစွာ အားထည့်ထားပေမယ့် မကြာခင်မှာတော့ ရုပ်ရှင်ကားတကား ရိုက်ဖို့အတွက် ပြင်ဆင်နေပြီး မိုးစက်ဝိုင်အနေနဲ့ ရင်ခုန်ရတဲ့ ဇာတ်ကားတကားဖြစ်တယ်လို့ သိရပါတယ်။

“အနုပညာအလုပ်နဲ့ ပတ်သက်ပြီးတော့ သိပ်အများကြီးတော့ မလုပ်ဖြစ်ပါဘူး။ မိုးစက်ရဲ့ Mozey by Moeset လုပ်ကတည်းက အဲ့အပိုင်းကိုပဲ အားထည့်ထားပါတယ်။ ဒါပေမဲ့ ရုပ်ရှင်တကား ရိုက်ဖို့ ရှိပါတယ်။ အဲ့ကားရိုက်ဖို့လည်း ပြင်ဆင်နေပါတယ်။ ဇာတ်ညွှန်းတွေ ဘာတွေ မထွက်သေးတဲ့အတွက် အတည်တကျတော့ မဖြစ်သေးဘူး။ ဖြစ်ရင်လည်း ပြောပြပါမယ်။ မိုးစက်အရမ်းရင်ခုန်တဲ့ ကားတကား ဖြစ်ပါတယ်။ ကာရိုက်တာကတော့ ပြောလို့ မရသေးပါဘူး။ ဒါပေမဲ့ ဒီခေတ် မဟုတ်ဘူးပေါ့။ ၂၀၁၉ မဟုတ်ဘူး” လို့ မိုးစက်ဝိုင်က ပြောပါတယ်။

မိုးစက်ဝိုင်ကတော့ Miss Universe Myanmar 2013 ဆုကို ရရှိထားပြီး သူ့ရဲ့ပထမဆုံး ရုပ်ရှင် ဇာတ်ကား ဖြစ်တဲ့ “ပက်ပက်စက်စက်ညို့” ကိုလည်း နေတိုး၊ ရွှေထူးတို့နဲ့အတူ သရုပ်ဆောင်ခဲ့ပါတယ်။

The post အနုပညာအလုပ်တွေ သိပ်မလုပ်ဖြစ်တော့တဲ့အကြောင်း ပြောပြတဲ့ အလှမယ် မိုးစက်ဝိုင် appeared first on ဧရာဝတီ.

ပျော်စရာကောင်းတဲ့ မိသားစု ဘဝကို ပိုင်ဆိုင်ထားတဲ့ သရုပ်ဆောင် လူမင်းကတော့ ဒီဘဝမှာ ရရှိလာတဲ့ မိသားစု ဘဝကို ဘယ်အရာနဲ့မှ မလဲနိုင်အောင် တန်ဖိုးထားပြီး၊ မင်းသား၊ မင်းသမီးတွေရဲ့ ပါရမီဖြည့်ဖက်တွေက ပိုပြီးတော့ ခံနိုင်ရည် ရှိရမယ်လို့ ဆိုပါတယ်။

“မိသားစုဆိုတာ ဘဝမှာ တန်ဖိုး အရှိဆုံး၊ တန်ဖိုးအထားဆုံး အရာပါ။ ဒီဘဝမှာတော့ အခု ရထားတဲ့ ဇနီးမယား၊ သားသမီးနဲ့ ကိုယ့်မိသားစုလေးက ဘာနဲ့မှ မလဲနိုင်လောက်အောင် ကိုယ်တန်ဖိုးထားရတဲ့ မိသားစုဘဝလေးပါ။ ဒီဘဝလေးကို ကျေနပ်တယ်၊ ဂုဏ်လည်း ဂုဏ်ယူပါတယ်။ အနုပညာသမားတွေရဲ့ ပါရမီဖြည့်ဖက်တွေက သာမန် အိမ်ထောင်ရေးနဲ့ မတူဘူး။ အထူးသဖြင့် မင်းသား၊ မင်းသမီးတွေရဲ့ ပါရမီဖြည့်ဖက်တွေက ပိုပြီးတော့ ခံနိုင်ရည် ရှိရတယ်”

“ကိုယ့်ကို ဝေဖန် တိုက်ခိုက်ရင် သူလည်း ခံစားရတာပေါ့။ ကိုယ်တို့က ယောကျာ်းဆိုတော့ မေ့မေ့ပျောက်ပျောက် နေနိုင်ပေမယ့် သူတို့က မနေနိုင်ဘဲ ကြိတ်ငိုနေတာတွေ ရှိတယ်”လို့ လူမင်းက ပြောပါတယ်။

လူမင်းကတော့ အိမ်ထောင်သက် ကြာလာတာနဲ့အမျှ အိမ်ထောင်ဖက်ဆီက နားလည်မှုတွေ ရရှိထားတယ်လို့ ဆိုပြီး ဖက်ရှင်တွေနဲ့ ပတ်သက်ရင် ဇနီးဖြစ်သူ ခင်စံပယ်ဦးက အိုင်ဒီယာပေးတယ်လို့ ဆိုပါတယ်။

“အသက်အရွယ် ကြီးတာ၊ ငယ်တာနဲ့တော့ မဆိုင်ဘူး၊ မိန်းမမှန်ရင် ကြီးကြီးငယ်ငယ် လင်ယောကျ်ားအပေါ်မှာ သဝန်တိုမှာပဲ။ ရင့်ကျက်လာတယ် ဆိုတာကတော့ အိမ်ထောင်သက် ကြာလာတာနဲ့ အမျှ ရန်ဖြစ်တာတွေ နည်းလာတယ်။ ပိုပြီးတော့ နားလည်လာတယ်ဆိုတာကလည်း အိမ်ထောင်သည်တိုင်း ဒီလိုဖြစ်လိမ့်မယ်လို့ ထင်ပါတယ်။ ဒါတွေကလည်း တယောက်နဲ့ တယောက် နားလည်မှုတွေ ရှိသလို ဆင်ခြင်စောင့်ထိန်းရတဲ့ အပိုင်းတွေလည်း ရှိတယ်”

“ဒါမှလည်း အိမ်ထောင်တစ်ခုမှာ လိုတိုး ပိုလျှော့ ပုံစံမျိုးလေးနဲ့ ရပ်တည်နိုင်မှာပေါ့။ ဒီနေ့ ဒီအချိန်ထိ အနုပညာရှင်တယောက်ရဲ့ ပါရမီဖြည့်ဖက်အနေနဲ့ ရှိနေပေးတဲ့ ဇနီးကိုလည်း ကျေးဇူးတင်ပါတယ်။ ဖက်ရှင်တွေနဲ့ ပတ်သက်ရင် တော်တော် များများကတော့ စံပယ့် အိုင်ဒီယာတွေ များတယ်”လို့ လူမင်းက ပြောပါတယ်။

လူမင်းရဲ့ ဇနီးဖြစ်သူ ခင်စံပယ်ဦးကတော့ ခင်ပွန်းအပေါ် ဖက်ရှင် အကြံဉာဏ်တွေ ပေးဖြစ်သလို လူမင်းကို တိုက်ခိုက်တာတွေရှိရင်လည်း အမြဲအားပေးဖြစ်တယ်လို့ ဆိုပါတယ်။

“ကိုလူမင်းက သူကြိုက်တာ သူဝတ်တာ များပါတယ်၊ ကျမက အဝတ်တွေ မှာပေးတာပေါ့။ ဖက်ရှင်နဲ့ ပတ်သက်ပြီး အကြံပေးဖြစ်တာတော့ ရှိတယ်။ ကိုလူမင်းကို တိုက်ခိုက်တာတွေ ရှိရင်တော့ အမြဲအားပေးပါတယ်။ ကျမကတော့ စိတ်ညစ်လာရင် ဘုရား ရှိခိုးတယ်။ ကိုလူမင်းကို အားပေးတဲ့ ပရိသတ်တွေရော၊ အားမပေးတဲ့ ပရိသတ်တွေကိုလည်း ကျေးဇူးတင်ပါတယ်”လို့ ခင်စံပယ်ဦးက ပြောပါတယ်။

သရုပ်ဆောင် လူမင်းနဲ့ ခင်စံပယ်ဦးတို့ ဇနီးမောင်နှံဟာ သားတယောက် သမီးတယောက်နဲ့ သာယာတဲ့ အိမ်ထောင်ရေးကို ပိုင်ဆိုင်ထားပြီး လူမင်းဟာ လတ်တလောမှာတော့ ဗိုလ်ချုပ်ရုပ်ရှင် အတွက် ဒါရိုက်တာ အဖြစ် တာဝန်ယူကာ ရိုက်ကူးရေးများကို ပြင်ဆင်နေတယ်လို့ သိရပါတယ်။

You may also like these stories:

“လောဘနွံ” ရုပ်ရှင်ရိုက်ရင်း ကျောက်အောင်ခဲ့တဲ့ သရုပ်ဆောင် လူမင်း

“ဗိုလ်ချုပ်ရုပ်ရှင်”ကို စက်တင်ဘာလကုန်မှာ စတင်ရိုက်ကူးတော့မယ် လို့ လူမင်းပြော

ဗိုလ်ချုပ်ရုပ်ရှင်အတွက် စိုးရိမ်နေတဲ့ ပရိသတ်တွေကို မစိုးရိမ်ကြဖို့ လူမင်း ပြော

The post “မင်းသား၊ မင်းသမီးတွေရဲ့ ပါရမီဖြည့်ဖက်တွေက ပိုပြီးတော့ ခံနိုင်ရည်ရှိရမယ်”လို့ လူမင်း ပြော appeared first on ဧရာဝတီ.

တောင်ကိုရီးယားနိုင်ငံက OCN ရုပ်သံလိုင်းရဲ့ “Voice” ရုပ်သံစီးရီးကို ထိုင်းနိုင်ငံက ပြန်လည် ရိုက်ကူးတော့မယ်လို့ သိပါတယ်။ အဲ့ဒီဇာတ်လမ်းတွဲကို၂၀၁၇ ခုနှစ်မှာ ထုတ်လွှင့်ခဲ့တာဖြစ်ပြီး 112 Emergency Call Center နဲ့ ပတ်သက်တဲ့ သည်းထိတ်ရင်ဖို ဒရာမာ ဖြစ်ပါတယ်။

ပထမဆုံး Season ကတော့ လူမှုဘဝနဲ့ ပတ်သက်တဲ့ အကြောင်းအရာ အသစ်ဖြစ်တာကြောင့် ချီးကျူးမှုတွေ ခံခဲ့ရပါတယ်။ ဒုတိယ Season ကတော့ OCN ရုပ်သံလိုင်းအတွက် လူကြည့်နှုန်း အများဆုံး စံချိန်တင်ခဲ့ပါတယ်။

မကြာသေးခင်တုန်းကပဲ “Voice” ဒရာမာကို ဂျပန်နိုင်ငံမှာ “Voice 110 Emergency Control Room” ဆိုတဲ့ နာမည်နဲ့ စီးရီးပြန်လည် ရိုက်ကူးခဲ့ပြီး လက်ရှိအချိန်မှာတော့ ထုတ်လွှင့်ပြသနေပါတယ်။ အခုတော့ ထိုင်းနိုင်ငံက အသစ်တဖန် ပြန်လည် ရိုက်ကူးတော့မှာပဲ ဖြစ်ပါတယ်။ ဒါ့အပြင် အဲ့ဒီဒရာမာ ပြန်လည် ထုတ်လွှင့်ခွင့်အတွက် အမေရိကန်၊ ကနေဒါ၊ ပြင်သစ်၊ဆွစ်ဇာလန်၊ ဟောင်ကောင်နဲ့ စင်ကာပူနိုင်ငံတွေ အပါအဝင် နိုင်ငံပေါင်း ၅၆ နိုင်ငံကို ရောင်းချထားပါတယ်။

ထိုင်းကနေ ပြန်လည် ရိုက်ကူးမယ့် “Voice” စီးရီးကို ပြီးခဲ့တဲ့ ဇန်နဝါရီလတုန်းက “GOT7’s Real Thai” အစီအစဉ် ထုတ်လွှင့်ခဲ့တဲ့ True4U ရုပ်သံကနေ နိုဝင်ဘာလ ၅ ရက်နေ့ကစလို့ စတင်ပြသမှာ ဖြစ်ပါတယ်။ နာမည်ကျော် သရုပ်ဆောင်တွေဖြစ်တဲ့ Andrew Gregson နဲ့ Khemanit Jamikorn တို့က ခေါင်းဆောင် သရုပ်ဆောင်တွေအဖြစ် ပါဝင်မှာ ဖြစ်ပါတယ်။

အခုလိုမျိုး တနှစ်တည်းမှာ “Voice” ဒရာမာကို ဗားရှင်း ၂ မျိုးနဲ့ သက်ဆိုင်ရာ နိုင်ငံတနိုင်ငံချင်းစီရဲ့ ဇာတ်လမ်းနဲ့ ပြန်လည် စီစဉ်ပြီး ပြန်လည် ရိုက်ကူးကြတာကို ဝမ်းမြောက်မိတဲ့ အကြောင်း CJ ENM ရဲ့ နိုင်ငံရပ်ခြား အချက်အလက်ဌာန အကြီးအကဲ Seo Jang Ho က ပြောပါတယ်။

OCN ကနေ ထုတ်လွှင့်ခဲ့တဲ့ “The Guest” ဇာတ်လမ်းတွဲဟာ နိုင်င့တကာ ရုပ်ရှင်ပွဲတော်တွေရဲ့ ဖိတ်ကြားမှုကို လက်ခံရရှိထားတယ်လို့ ဆိုပါတယ်။ “Voice” ရဲ့ Season တခုချင်းစီဟာ ချီးကျူးမှုတွေခံခဲ့ရပြီး “Voice 3” ကတော့ နာမည်ကျော်ကြားခဲ့ပြီး အဆုံးသတ်ခဲ့ပြီ ဖြစ်ပါတယ်။

Ref. Soompi

You may also like these stories:

“Game of Thrones” နဲ့ ဆင်တူနေလို့ ဝေဖန်ခံနေရတဲ့ “Arthdal Chronicles” စီးရီး

တောင်ကိုရီးယားနိုင်ငံရဲ့ လက်ရှိနိုင်ငံရေးအကြောင်း မြင်တွေ့ရမယ့် စီးရီးအသစ်များ

The post နာမည်ကျော် ကိုရီးယားစီးရီး “Voice” ကို ထိုင်းနိုင်ငံက ပြန်လည် ရိုက်ကူးမည် appeared first on ဧရာဝတီ.

ရုပ်ရှင်ဇာတ်ကားတကား ကြည့်ပြီးတဲ့အချိန်မှာ ရုပ်ရှင်ရဲ့ အဆုံးသတ်အပေါ် ကြည့်ရှုသူတွေရဲ့ စိတ်ခံစားချက်နဲ့ ကြည့်ရှုသူ အချင်းချင်း ထင်မြင် ဆွေးနွေးမှုဟော ကျန်ရစ်ခဲ့ကြစမြဲပါ။ အခု ဖော်ပြပေးမှာကတော့ လွန်ခဲ့တဲ့ နှစ်တွေက ရိုက်ကူးပြသခဲ့ဖူးပြီး အေင်မြင်ကျော်ကြားပြီးသား ရုပ်ရှင်တွေကို နောက်တကြိမ် ပြန်လည် ရိုက်ကူးမယ်ဆိုရင်တောင် လူကြိုက်များနေဦးမယ့် ရုပ်ရှင်တွေပဲ ဖြစ်ပါတယ်။

(၁) The Chronicles of Narnia

ဗီရိုထဲကနေ တခြားကမ္ဘာတခုကို ရောက်ရှိသွားတဲ့ မောင်နှမ သုံးယောက်နဲ့အတူ ခွန်အားကြီးမားလှတဲ့ ခြင်္သေ့ကြီး ပါဝင်တဲ့ “Narnia” ရုပ်ရှင်ကို မှတ်မိကြဦးမှာပါ။ Netflix ကနေ “Narnia” ရုပ်ရှင်ကို ပြန်လည် ရိုက်ကူးဖို့အတွက် ဒါရိုက်တာနေရာနဲ့ ဇာတ်ညွှန်း ရေးသားဖို့အတွက် Mathew Aldrich ကို ခန့်အပ်ထားပြီး ဖြစ်ပါတယ်။

Mathew ဟာ Animation ရုပ်ရှင်ကားတကားဖြစ်တဲ့ “Coco” ကို ဇာတ်ညွှန်း ရေးသားခဲ့သူ တဦးဖြစ်ပြီး “The Chronicles of Narnia” ကို ဘယ်လို ပုံဖော်မလဲဆိုတာ စိတ်ဝင်တစား စောင့်ကြည့်ရမှာ ဖြစ်ပါတယ်။

(၂) Home Alone

တခေတ်တခါက အောင်မြင်ကျော်ကြားခဲ့တဲ့ “Home Alone” ရုပ်ရှင်ကို “Deadpool” မင်းသား Ryan Reynolds က Producer အဖြစ် ထုတ်လုပ်မှာဖြစ်ပြီး  ဇာတ်လမ်းကတော့ အရင့်အရင်က “Home Alone” နဲ့ ကွဲပြားသွားမှာ ဖြစ်ပါတယ်။ ဆေးစွဲနေတဲ့ လူတယောက်က အိမ်တချို့ကို ဝင်ရောက် ဖောက်ထွင်းပုံနဲ့ ဇာတ်အိမ် တည်ထားမှာဖြစ်ပြီး “Stoned Alone” လို့ ရုပ်ရှင်နာမည်ကို လျာထားတာ ဖြစ်ပေမယ့် တရားဝင် သတင်း ထွက်ရှိထားခြင်း မရှိသေးပါဘူး။

(၃) Mulan

လွန်ခဲ့တဲ့ ရက်သတ္တပတ်တွေ အတွင်းကမှ Trailer ထွက်ရှိထားတဲ့ Disney ရဲ့ “Mulan” ရုပ်ရှင်ဟာဆိုရင်လည်း အခြား Disney ရုပ်ရှင်တွေထက် စိတ်ဝင်စားမှု များပြားခဲ့တာဖြစ်ပြီး၂၀၁၈ ခုနှစ်မှာ ပြသဖို့ လျာထားခဲ့ပေမယ့် အကြောင်းအမျိုးမျိုးကြောင့် နှောင့်နှေးခဲ့ရတဲ့ ရုပ်ရှင်ဇာတ်ကား တကားလည်း ဖြစ်ပါတယ်။

Ref. www.brightside.me

You may also like these stories:

ဘယ်အချိန် ပြန်ကြည့်ကြည့် ရိုးမသွားတဲ့ ရုပ်ရှင်ဇာတ်ကားများ

တရုတ်မင်းသမီး Liu Yifei ပါဝင်ထားတဲ့ “Mulan” ရုပ်ရှင် အမြည်းဗီဒီယို ထွက်ရှိ

Disney ကုမ္ပဏီကနေ ဆက်လက် ထွက်ရှိလာမယ့် Live-action ရုပ်ရှင်များ

အပြင်မှာ တကယ်မရှိတဲ့ နာမည်ကြီးရုပ်ရှင်ဇာတ်ကားတွေရဲ့ ဇာတ်ကောင်များ

The post နောက်တကြိမ် ပြန်လည် ရိုက်ကူးမယ်ဆိုရင်တောင် လူကြိုက်များနေဦးမယ့် ရုပ်ရှင်များ appeared first on ဧရာဝတီ.

အချစ်ရေးနဲ့ ပတ်သက်ပြီး ပရိသတ်တွေရဲ့ စိတ်ဝင်စားခြင်းကို ခံရတဲ့ နိုင်ငံကျော် Makeup Artist မထက် (Pop Soul) ကတော့ နောက်ထပ် ချစ်သူ ထပ်ထားဖို့ ခဲယဉ်းသွားပြီလို့ ပြောပါတယ်။

“လောလောဆယ်တော့ ဘယ်ရည်းစားမှ ရွေးချယ်ချင်စိတ်လည်း မရှိဘူး။ ရည်းစားထားဖို့ကတော့ သိပ်ပြီး Feeling မရှိတော့ဘူး။ ဟိုဟာလေး ကြိတ်ကြိုက်လိုက်၊ ဒီဟာလေး ကြိတ်ကြိုက်လိုက်ပဲ ပျော်တယ်။ အချစ်ရေးက ကိုယ်နဲ့ အဝေးကြီး မဖြစ်နိုင်ဘူးလို့ ထင်သွားပြီ။ ရည်းစားထားဖို့ ကြောက်လည်း မကြောက်ဘူး။ စိတ်လည်း မနာဘူး။ လက်တွေ့ကျတာကို ပိုကြိုက်တဲ့အတွက် ရည်းစားထားဖို့ ခက်ခဲသွားပြီ”လို့ မထက်က ပြောပါတယ်။

အသည်းကွဲပြီးနောက်ပိုင်းမှာ ပိုလှလာတဲ့ မထက်ကတော့ နောက်တခါ ချစ်သူ ထပ်ထားဖြစ်ရင် ဘယ်သူ့ကိုမှ ပေးမသိတော့ဘူးလို့ ဆိုပါတယ်။

“သေချာ ရည်းစားမထားသေးဘဲ အေးဆေးပဲ နေပါဦးမယ်။ အသည်းကွဲပြီးနောက်ပိုင်း ပိုလှလာတာက ပိုလှရမယ်လေ။ ရည်းစားရှိတုန်းက စုတ်ပြတ်ပြီး နေခဲ့တာဆိုတော့ အခုချိန်မှာ ကိုယ်လှကြောင်း ပြရတာပေါ့။ ချစ်သူ ထပ်ထားဖြစ်ရင်လည်း ဘယ်သူမှ ထုတ်မပြဖြစ်တော့ဘူး။ ကိုယ့်မိတ်ဆွေတွေတောင် အသိမပေးချင်တော့ဘူး။ ဘာဖြစ်လို့လဲတော့ မပြောတတ်ဘူး။ ဘယ်သူမှ ပေးမသိချင်တော့တာ”လို့ မထက်က ပြောပါတယ်။

Makeup Artist တဦးအဖြစ် ရပ်တည်နေတဲ့ မထက် (Pop Soul) ဟာ ဒီနှစ်အတွင်း ဒါရိုက်တာ ပြည်ဟိန်းသီဟ ရိုက်ကူးတဲ့ “ကျားကျားကြိုက်ကြိုက်” ရုပ်ရှင်မှာ သရုပ်ဆောင်အနေနဲ့ ပါဝင်ထားပြီး အဲဒီရုပ်ရှင်နဲ့ ပတ်သက်ပြီးလည်း အခုလိုပဲ ပြောပါတယ်။

“ကျားကျားကြိုက်ကြိုက် ဇာတ်ကားက ရုံတင်ဖို့တော့ နီးပြီ။ အဲ့ကားအတွက် ရင်တုန်နေတယ်။ သရုပ်ဆောင်တာ ကြည့်ပြီးသွားပြီ။ ဘယ်လို သရုပ်ဆောင်ထားမှန်း မသိဘူး။ ကိုယ့်ကိုယ်ကိုယ် ကြည့်ရတာ တမျိုးကြီးပဲ။ ကျန်တဲ့သူတွေက ကြည့်ရတာ အကုန်ကောင်းတယ်။ လှလည်း မလှဘူး။ ဇာတ်ကား ရိုက်နေတုန်းကတော့ အဆင်ပြေတယ်၊ ကောင်းတယ်တော့ ပြောကြတယ်။ အဆင်ပြေတယ်ပေါ့၊ ပျော်နေတာ။ တကယ် ထွက်လာတော့ လုပ်နေကျ မဟုတ်မှန်း သိသာနေတယ်။ သဘာဝမကျဘဲ ပဲများနေတယ်လို့ ခံစားရတယ်”လို့ မထက်က ဆိုပါတယ်။

ဆက်လက်ပြီး မထက်ကတော့ ကိုယ်တိုင်က သရုပ်ဆောင် မဟုတ်တဲ့အတွက် သရုပ်ဆောင် အလုပ်က မလွယ်ကူမှန်း ရုပ်ရှင်ရိုက်ပြီး သိလာတယ်လို့ ပြောပါတယ်။

“တကယ်တော့ မလွယ်ကူဘူးဆိုတာ သိလိုက်ရတယ်။ တခါလောက် လုပ်ဖူးတဲ့ အလုပ်လေးဆိုတော့ ကောင်းချင်တာပေါ့။ ကားက အရမ်းရယ်ရတော့ ကျေနပ်ပါတယ်။ ဇာတ်ကား ရိုက်ကူးဖို့ ကမ်းလှမ်းလာရင်တော့လည်း အခြေအနေအရပေါ့။ မြန်မာဝတ်စုံလေးတွေ ဝတ်ပြီး သရုပ်ဆောင်ရတဲ့ ကာရိုက်တာ ရိုက်ချင်သေးတယ်။ ရုပ်ရှင် မဟုတ်လည်း ဓာတ်ပုံ ရိုက်မယ်တော့ စဉ်းစားထားတယ်”လို့ မထက်က ပြောပါတယ်။

မြန်မာနိုင်ငံက Makeup Artist တဦးဖြစ်တဲ့ မထက် (Pop Soul) ကတော့ နိုင်ငံကျော် မိတ်ကပ် ပညာရှင် တဦးဖြစ်ပြီး လိင်ပြောင်းလဲ ခွဲစိတ်ထားသူလည်း ဖြစ်ပါတယ်။ သူပါဝင် သရုပ်ဆောင်ထားတဲ့ “ကျားကျားကြိုက်ကြိုက်” ရုပ်ရှင်ဇာတ်ကားဟာလည်း ဒီနှစ်အတွင်းမှာ မကြာခင် ရုံတင် ပြသသွားမယ်လို့ သိရပါတယ်။

You may also like these stories:

၅ နှစ်တာ ကြိုက်ခဲ့တဲ့ချစ်သူနဲ့ လမ်းခွဲပြီး အသည်းကွဲနေတဲ့ မထက် (Pop Soul)

မိတ်ကပ်ဖန်တီးရှင်များကို ပွဲထုတ်ရိုက်ကူးမယ့် “ကျားကျားကြောက်ကြောက်” ရုပ်ရှင်ဇာတ်ကားကြီး

“အများစုက ရေရှည် လက်မတွဲနိုင်သလို ပတ်ဝန်းကျင်ရဲ့ ရိုက်ခတ်တဲ့ ဒဏ်ကို မခံနိုင်ကြဘူး”

“ချစ်သူက လူရှေ့ထွက်ပြနိုင်တဲ့ အနေအထား မရှိတဲ့အတွက် ဝမ်းနည်းတာပါ”

The post အသည်းကွဲပြီးနောက်ပိုင်းမှာ ပိုလှလာတဲ့ Makeup Artist မထက် (Pop Soul)  appeared first on ဧရာဝတီ.