ကြမ္မာရဟတ်

ပါပါ ရာထူး တိုးတက်သွားခြင်းကြောင့် ဘရူနိုမှာ များစွာသော အပြောင်းအလဲတို့ ပေါ်ပေါက်လာသည်။ ထိုထိုသော အပြောင်းအလဲ မှန်သမျှ ဆုတ်ယုတ်မှုတွေချည်း၊ နောက်ဆုံး ဘရူနို အားလုံးကို ဆုံးရှုံးသွားလေသည်။

ပထမ ဘာလင်မြို့ကို ခွဲခွာခဲ့ရသည်၊ သူငယ်ချင်းတွေကို ခွဲခွာခဲ့ရသည်။ ကျောင်းကို ခွဲခွာခဲ့ရသည်။ အားလုံးကို စွန့်ခွာခဲ့ပြီး၊ ပါပါ တာဝန်ကျရာ ဝေးခေါင်ပြီး ချောင်ကျလှသော တောရပ်ပိုင်းသို့ ပြောင်းရွှေ့လိုက်ရ၏။

သူ့အခန်း၌ နံရံမြင့်မြင့်ရှိ လေဝင်ပေါက်မှတပါး ပြတင်းပေါက်မရှိ။ ထိုလေဝင်ပေါက်မှ တဆင့် မြင်ရသည်မှာ ခပ်ဝေးဝေး တနေရာ၌ အဆောင်တန်းလျားများ စီစီရီရီ။ ထိုအဆောင်၌ သူနှင့် ရွယ်တူ ကလေးငယ်တို့လည်း ရှိနေ၏။ သူ ကစားဖော် ရပြီ။

တောရပ်ပိုင်းဖြစ်သဖြင့် သူမြင်နေရသော သူတို့သည် လယ်သမားများ ဖြစ်လိမ့်မည်။ ပါပါ တာဝန်ထမ်းဆောင်ရမည့် နေရာ ဖြစ်နိုင်သည်။ ဤစခန်းမှ လယ်သမားများနှင့်အတူ ဖခင် အလုပ်အတူ လုပ်ရတော့မည်။ သို့သော် ပါပါသည် လယ်သမား မဟုတ်။

ထူးခြားသည်မှာ ထိုသူတို့အားလုံး နေခင်းမှာပင် ညဝတ် အကျႌအစင်းကျားများ အဘယ်ကြောင့် ဝတ်ဆင်ထားပါသနည်း။ ခေါင်းတုံးများ အဘယ်ကြောင့် တုံးထားကြပါသနည်း။ ထိုအဆောင်များကို သံဆူးကြိုးဖြင့် အဘယ်ကြောင့် ကာရံထားပါ သနည်း။ စစ်ဘက်အရာရှိ ပါပါသည် ဤလယ်သမားများနှင့် အဘယ်အလုပ်ကို အတူလုပ်ကြပါမည်နည်း။ သူ စဉ်းစားနိုင်စွမ်း မရှိ။

မာမာ့ မီးဖိုချောင်တွင် လာရောက် ကူညီရသော အဖိုးကြီးပင်လျှင် အပေါ်မှ ထပ်ဝတ်ထားသည့် ဘောင်းဘီအောက်မှ အစင်းကျား ဘောင်းဘီ တစွန်းတစ ပေါ်နေသည်ကို သူသတိပြုမိခဲ့သည်။ သည်အရပ်မှ လူတို့သည် ထို အစင်းကျား ဘောင်းဘီ ချွတ်ခွင့်ရှိဟန်မတူ။

ထိုသူတို့သည် လူကောင်းသူကောင်းတွေ မဟုတ်ကြောင်း၊ ပါပါသည် အဖ နိုင်ငံတော်အတွက် တာဝန် ထမ်းဆောင် နေရကြောင်း၊ သို့မှသာ ဘရူနိုတို့၏ အနာဂတ် လုံခြုံစိတ်ချရပေမည်တဲ့။ ထိုအနာဂတ် သာယာရေးအတွက် လူသူကင်းစင်သော တောရပ်၌ တာဝန် ထမ်းဆောင်နေရသော ဖြစ်ရပ်ကိုလည်း ဘရူနို ဉာဏ်လှမ်းမမီ။

နောက်တနေ့တွင် သူ့အခန်းထဲမှ လေဝင်ပေါက်ကို အသေ ပိတ်ပစ်လိုက်ကြလေသည်။

စခန်းထဲမှ ကလေးငယ် တို့နှင့်အတူ သူ ကစားချင်သည့်တိုင် မာမာက သည်းသည်းသန်သန်၊ ငြင်းငြင်းဆန်ဆန်။ အိမ်ပေါ်မှာ ကစားမည်၊ ငြီးငွေ့လျှင် ခြံထဲဆင်းမည်။ နောက်ဖေး ဂိုထောင်ဘက်သို့မူ သူ လုံးဝ သွားခွင့်မရှိ။ ထိုနေရာကား သူ့အတွက် ကန့်သတ်နယ်မြေတည်း။

တနေ့တွင် ဘရူနို အလိုပြည့်ချေပြီ။ သူ ဒန်းစီးချင်သည်၊ ကားတာယာဟောင်းတခု ရမှဖြစ်မည်။ သူ အလွန် ရောက်ချင်လှသော ဂိုထောင်ထဲသို့ အိမ်အကူ အဖိုးကြီးနှင့်အတူ ရောက်ခဲ့ရ၏။ ဂိုထောင်နံရံတွင် ပြတင်းပေါက်တခု ရှိ၏။ ထိုပြတင်းပေါက်သည် ပဥ္စလက်ကမ္ဘာသို့ သူ့ကို ဆောင်ပေးမည့်အကြောင်း သူကောင်းကောင်းသိလေသည်။

ပါပါသည် သူတို့ မောင်နှမကို ကျောင်းသို့ မပို့သည့်တိုင် ကျောင်းဆရာကိုမူ အိမ်သို့ ခေါ်သင်ပေး၏။ စက်ဘီးတစီးနှင့် အိမ်သို့ ရောက်ရှိလာသည့် ကျောင်းဆရာကို ဘရူနို အလိုမရှိ။ ဂျူးမုန်းတီးရေး မှတပါး တခြားဘာမျှမသင်၊ မမသည် အသက် ၁၂ နှစ် အရွယ်သာ ရှိသေးသည့်တိုင် ထိုသင်ခန်းစာတို့ကို ကျွမ်းကျင်လှချေသည်။

သူတို့လုံခြုံရေးကို စောင့်ကြပ်သော ပါပါ့ လက်ထောက် ဗိုလ်လေးနှင့် မမတို့ ထိုအမုန်းအကြောင်း စာဖွဲ့နေလေ့ရှိကြသည်ပဲ။ ဤတောရပ်၌ ရှိသော ကျောင်းပင်လျှင် ဘာလင်မှ ကျောင်းနှင့် စိုးစဉ်းမျှ မတူ။

တခါတရံ လယ်တော စခန်းဆီမှ မီးခိုးတို့သည် ကောင်းကင်၌ မည်းမည်းမှောင်မှောင်၊ ထိုအချိန်တွင် အလွန်ဆိုးရွား၍ အခံရခက်လှသော အနံ့တခု ပေါ်ပေါက်လာတတ်သည်။ မာမာ့ကို ပြောပြရဦးမည်။ မာမာအိမ်မှာ မရှိမှန်း သတိပြုမိသွားသော ဘရူနိုသည် ကားဂိုဒေါင်မှ တဆင့်၊ ခြံပြင်တောစပ်ဆီသို့ ရောက်ရှိသွားသည်။ လယ်စခန်းနားသို့ ရောက်ရှိသွားသည်။ ထိုစခန်း ခြံစည်းရိုးနားတွင် ထူးဆန်းသော အရာတို့ကို သူ့ဆီခေါ်ဆောင်မည့် ရှမူးနှင့် သူငယ်ချင်း ဖြစ်ခဲ့ရလေသည်။

လူအလစ်ကို စောင့်၍ ရှမူးထံ သူ မကြာခဏ လာလည်လေ့ရှိ၏။ စည်းရိုးပင် ခြားသော်လည်း ထိုကလေးနှစ်ဦး၏ နှလုံးသားမှာ တထပ်တည်း။ ရှမူးထံမှ ကြားရသော အကြောင်းတို့မှ နတ်သမီး ပုံပြင်တို့ကဲ့သို့ ဆန်းကျယ်၏။

ရှမူးအဖေမှာ နာရီပြင်ဆရာတဲ့၊ ယခု နာရီတို့ကို မပြင်ရမူဘဲ ဖိနပ်တိုက်နေရသည်တဲ့၊ ဘရူနို မအံ့သြပေ။ သူတို့ မီးဖိုချောင်ထဲ ရှိ အဖိုးကြီး ပါဗယ်သည်လည်း ယခင်က ဆရာဝန်တဲ့။ သူဒန်းပေါ်မှ လိမ့်ကျစဉ်၊ သူ့ကို ဂရုတစိုက် ကြင်ကြင်နာနာ ဆေးထည့်ပေး၏။ အရိုးမကျိုး စိုးရိမ်ဖွယ် မရှိဟုဆို၏။ ယခုမူ နေ့စဉ် အာလူးသင်လျက်ရှိ၏။

အိမ်သို့ရောက်လာသော ဆရာသည်ပင် တချိန်က သားသတ်သမား ဖြစ်ချင်ဖြစ်နေဦးမည်။ ဤအရပ်၌ လူတို့သည် အလုပ် တခုကို စွဲမြဲလုပ်ကိုင်လေ့ ရှိကြဟန်မတူ။ ပြီးတော့ ရှမူးတို့ အားလုံးကို တခြား အဝတ်ဝတ်ခွင့် မပြုတဲ့၊ သူတို့အဝတ်အစား မှန်သမျှ သိမ်းဆည်းကာ၊ နံပါတ်စဉ် တပ်ထားသော ညဝတ်အကျႌများကိုသာ ဝတ်ရတော့သည် ဆို၏။

ဘရူနို့အထင် သူတို့ကစားနည်း တမျိုးကို ကစားနေဟန်တူ၏။ ပြိုင်ပွဲဝင်တို့သည်သာ နံပါတ်ရေးထိုးထားသော အကျႌများကို ဝတ်လေ့ရှိသည် မဟုတ်လား။ ဘရူနိုလည်း ကစားချင်လာသည်။

ထိုအတောအတွင်း ဘရူနိုတို့ အိမ်၌ အပြောင်းအလဲများစွာ ဖြစ်ပေါ်လာသည်။ ပါပါနှင့် မာမာသည် မကြာခဏ ခွန်းကြီးခွန်းငယ် စကားများလာကြသည်။ မာမာသည် စိတ်မချမ်းမြေ့သောအသွင် အမြဲရှိနေ၏။ လယ်တောစခန်းမှ မီးခိုးများ၊ အနံ့ဆိုးများကြောင့် မာမာ ဤမျှ ဝမ်းနည်းနေရန် မလိုဟု သူ ယူဆပြန်သည်။

တညနေ ထမင်းစားပွဲတွင် ဗိုလ်လေး ကာ့တ် ကော်တလာ၏ ဖခင်သည် ဆွစ်ဇာလန်သို့ တိမ်းရှောင်သွားမှန်း အားလုံး သိလိုက်ရသည်။ နိုင်ငံတော် သစ္စာဖောက်မှု၊ တာဝန်ပျက်ကွက်မှု။ ထိုဝေါဟာရတို့ကို ဘရူနို နားမလည်သည့်တိုင် ပါပါ အလွန်စိတ်ဆိုးနေမှန်း တွေ့ရသည်။ ဒုတိယ စိတ်ဆိုးသူမှာ ဗိုလ်လေး ကာ့တ် ကော်တလာ ဖြစ်၏။ သူ့ခွက်ထဲ ထည့်လိုက်သော ဝိုင်အနည်းငယ် ဖိတ်စင်သွားသဖြင့် ပါဗယ်ကို ရက်စက်စွာ ရိုက်နှက်ပြီး အပြင်သို့ ခေါ်သွား၏။

ထိုညမှစ၍ ပါဗယ်ကို သူတို့ မတွေ့ရတော့။ နောက်တနေ့မှစ၍ ဗိုလ်လေးကို မတွေ့ရတော့၊ ရှေ့တန်းသို့ ပို့လိုက်ပြီဟု ဆို၏။ ပါဗယ်မူ ဘယ်အရပ်ဆီမှာ မသိရ။

ဘွားဘွားဆုံးသွားပြီတဲ့၊ ဘာလင်မြို့ကို ဗုံးကြဲတိုက်ခိုက်ရာ၌ ဘွားဘွား ကွယ်လွန်သွားပြီတဲ့။ မာမာ၏ စိတ်ဆင်းရဲမှုတို့သည် တနေ့တခြား ထင်ရှားလာ၏။ ပါပါ့ကိုပင် သူစိမ်းဆန်ဆန်။ သို့သော် ဘရူနိုနှင့် ရှမူးမှာမူ တနေ့တခြား ရင်းရင်းနှီးနှီး၊ မမနှင့် သူ့ကို ဤအရပ်၌ မထားတော့ပြီတဲ့။ ဘေးကင်းစိတ်ချရသော တနေရာသို့ ပို့ကြတော့မည်။  ဘရူနို သူငယ်ချင်းကို နှုတ်ဆက်ရဦးမည်။

ရှမူးသည် ညှိုးညှိုးငယ်ငယ်၊ သူ့အဖေ အဆောင်သို့ပြန်မလာသည်မှာ သုံးလေးရက်မကပြီတဲ့။ နေမကောင်းသဖြင့် အဆောင် ရွှေ့လိုက်ကြသည်ဟု သူတို့နှစ်ဦး ယူဆသည်။ သူ မပြောင်းခင် သူငယ်ချင်းကို နောက်ဆုံးကူညီမှ ဖြစ်မည်။ ရှမူးက သူ့အဖေကို ရှာချင်နေပြီ။

လျှပ်စစ်ဓာတ်အား လွှတ်ထားသော သံဆူးကြိုးကို ထိ၍မဖြစ်။ ကိုင်၍ မဖြစ်၊ အကာအရံအောက်မှ မြေပျော့ပျော့ကို သူတို့ တူးကြသည်။ ဘရူနို တကိုယ်စာ လစ်လပ်သွားခဲ့ပြီ။ ရှမူး၏ အဆိုအရ သူက သည်ဝတ်စုံနှင့် အဆင်မပြေ။ ရှမူး တို့ကဲ့သို့သော အကျႌအစင်းကို ဝတ်မှဖြစ်မည်။ ငါတို့ဆီမှာ အဲ့လိုအကျႌတွေ အများကြီးပဲတဲ့။ ဝတ်စုံရပေပြီ။ ခေါင်းတုံး မဟုတ်သော သူ့ခေါင်းကို ဦးထုပ်ဆောင်းလိုက်၏။

သူတို့ တဆောင်ပြီး တဆောင်လိုက်ရှာနေစဉ် ပေါ်ပေါက်လာသော ဝီစီမှုတ်သံသည် စူးစူးရှရှ။ သူတို့အားလုံးကို တနေရာ၌ စုစည်းခိုင်းလိုက်သည်။ ထိုလူများစွာကို အခန်းတခုအတွင်းသို့ ဝင်ခိုင်းလိုက်၏။ အဝတ်အစားတွေ ချွတ်ကြတဲ့။ သူတို့ ရေချိုးခိုင်းတော့မည် ထင်သည်။ တခန်းလုံး မီးမှောင်ကျသွား၏။ ဘရူနိုနှင့် ရှမူး တဦးလက်ကိုတဦး တင်းတင်း ဆုတ်လျက်ရှိ၏။

အားလုံး အဆင်သင့်ဖြစ်ပြီ၊ ကလေးတွေ သွားကြရတော့မည်။

ဘရူနိုကော ဘရူနို။ နောက်ဖေး ကားဂိုဒေါင်ကို မြင်လျှင် မာမာသည် ရူးသွပ်မတတ်။ ပါပါသည် အကျဉ်းစခန်း သံဆူးကြိုးနား၌ သူ့သား၏ အဝတ်အစားများကို တွေ့သောအါ ဂိတ်ဝဆီသို့ အလျင်မြန်ဆုံး ပြေးသွားတော့သည်။ တဆောင်ပြီး တဆောင် လိုက်ရှာသည့်တိုင် သားကိုမတွေ့၊ သားမရှိ၊ အဆိပ်ငွေ့ ရုံဘက်သို့ ကြည့်လိုက်သည်။

ထိုအခိုုက် မည်းမည်းမှောင်သော မီးခိုးတို့ ကောင်းကင်သို့ တလိမ့်လိမ့်၊ မိုးကောင်းကင်ကို ကြည့်ပြီး သား … ဟူ၍ ရင်ကွဲမတတ် အော်ဟစ်ရင်း မြေပြင်ပေါ်သို့ သူ အလဲလဲအပြိုပြို၊ အားလုံး နောက်ကျသွားခဲ့ပြီ။

ဒါရိုက်တာ မာ့ခ် ဟာမန် (Mark Herman) ၏ ၂၀၀၈ တွင် ပြသခဲ့သော The Boy in the Striped Pajamas ရုပ်ရှင် ဖြစ်ပါသည်။ ဖခင်အဖြစ် ဒေးဗစ် သယူးလစ် (Davids Thewlis) က သရုပ်ဆောင်ထားပြီး မိခင်အဖြစ် ဗီရာ မာမီဂါ (Vera Farmiga) က သရုပ်ဆောင်ထားကာ ဘရူနို၊ ရှမူးအဖြစ် ဂျက်ခ် စကန်လွန် (Jack Scanlon) အဖြစ် အာဆာ ဘတ်တာဖီးလ် (Asa Butterfield) က သရုပ် ဆောင်ထားကြသည်။

The post ကြမ္မာရဟတ် appeared first on ဧရာဝတီ.