ယခုနှစ် ၂၀၁၉ ခုနှစ်၊ ဇွန်လ ၁၆ ရက်နေ့ (တနင်္ဂနွေနေ့) ဟာ အဖေများနေ့ပါ။ အဖေများနေ့နဲ့ ပတ်သက်ပြီး ကိုယ်တိုင် ဖခင်တယောက်ဖြစ်တဲ့ ဂီတမှူး နိုင်ဇော်က အဖေနဲ့ သူ့အကြားက အမှတ်တရတွေ၊ သားသမီး အပေါ်ထားတဲ့ ဖခင်တယောက်ရဲ့ စိတ်ထားတွေအကြောင်း ဧရာဝတီကို အခုလိုပဲ ပြောပြခဲ့ပါတယ်။
“အဖေတွေဆိုတာ စီးပွားရှာရတဲ့ အလုပ်က နံပါတ် ၁ ပါ။ အဖေတွေ စီးပွားမရှာရင် အမေတွေ ကိုယ်တိုင် စီးပွားရှာတဲ့အခါ သားသမီးတွေဘက်မှာ လစ်ဟင်းနိုင်တဲ့အတွက် အဖေတွေ ကိုယ်တိုင် စီးပွားရှာရပါတယ်။ ပညာရေးနဲ့ ပတ်သက်ပြီးလည်း ကျနော်ဆို ကျနော့်သမီး ဂုဏ်ထူးတွေ ထွက်နိုင်တာ အမေရဲ့ အစွမ်းတွေ အများကြီးပါတယ်”
“အဖေတွေကလည်း အမေတွေ စိတ်ချရတဲ့ အခြေအနေ မရောက်ရင် သားသမီးပေါ်လည်း အမေကလည်း တာဝန် မကျေနိုင်ပါဘူး။ ဒါကြောင့် ကျနော်ကတော့ မိဘဆိုတဲ့အတိုင်း အမေလည်း အရေးကြီးတယ်။ အဖေလည်း အရေးကြီးတယ်။ နိုင်ငံရေးသမားလိုပေါ့။ အမေက တိုင်းပြည် အုပ်ချုပ်တဲ့သူနဲ့ တူပြီး အဖေကတော့ စစ်တပ်နဲ့ တူပါတယ်”လို့ ဂီတမှူး နိုင်ဇော်က ပြောပါတယ်။
“အဖေများနေ့က တနင်္ဂနွေနေ့၊ ကျနော်က အဲ့နေ့ အသံသွင်း ရှိတယ်။ ကျနော်တို့ အဖေတွေအနေနဲ့ သူတို့ ဘဝလေး ဘယ်လို လှပစွာ ဖြတ်သန်းမလဲ။ ကျနော် အလုပ်တွေလုပ်ရင်း သူတို့ ဘဝလေးတွေ လှပအောင် ကျနော်တို့ဘက်က ဆက်လုပ်ပေးမှာပါ”လို့ နိုင်ဇော်က ဆိုပါတယ်။
ဂီတမှူး နိုင်ဇော်အတွက်တော့ သူ့ရဲ့ အဖေဟာ စံပြပုဂ္ဂိုလ်တယောက်ဖြစ်ပြီး အဖေတူ သားတယောက် ဖြစ်အောင် အခုထိ ကြိုးစားနေတယ်လို့ ပြောပါတယ်။
“ကျနော့်အဖေက ကျနော့်ကို အရင်ကတည်းက ဆုံးမခဲ့တာကတော့ ဆေးလိပ် မသောက်ဖို့၊ အရက်မသောက်ဖို့၊ တက်တူးတွေ မထိုးဖို့ ဆုံးမတယ်။ အဖေ ဆုံးမတာတွေကို ကျနော် အကုန် နားထောင်ပါတယ်။ အဖေ မလုပ်ခိုင်းတာတွေ ကျနော် တခုမှ မလုပ်ပါဘူး။ အဖေ ဆုံးမတာတွေ၊ ဖြစ်ချင်တာတွေကို ကျနော်နားထောင်ပါတယ်”
“ကျနော့် အဖေက ပြတ်ပြတ်သားသားနဲ့ ဘယ်သူ့မျက်နှာမှ မထောက်ဘဲ အရာရာကို လုပ်ခဲ့တာပါ။ ကျနော့် အဖေက သူထင်တာ သူလုပ်တဲ့သူပါ။ သူထင်တာလည်း ရာနှုန်းပြည့် မှန်တဲ့အတွက် အဖေက ကျနော့်အတွက် စံပြပုဂ္ဂိုလ် ဖြစ်ပါတယ်။ အဖေတူ သားတယောက်ဖြစ်အောင် အခုထိ ကျနော် ကြိုးစားနေပါတယ်” လို့ နိုင်ဇော်က ဆိုပါတယ်။
ဆက်လက်ပြီး ကိုယ်တိုင်လည်း ဖခင်တယောက်ဖြစ်တဲ့ ဂီတမှူး နိုင်ဇော်က သူ့ရဲ့ သားသမီးအပေါ် ဆုံးမတဲ့ ပုံစံကိုလည်း အခုလိုပဲ ပြောပြပါတယ်။
“ကျနော့် သမီးကို ဆုံးမသင့်တာတွေ ဆုံးမသလို၊ ကျနော့် သမီးကိုတော့ သမီး ဝတ်စားဆင်ယင်မှုနဲ့ ပတ်သက်ပြီး ကျနော် ပြောပါတယ်။ သမီး အနာဂတ်မှာ နာမည်ဆိုး မရှိအောင် ကျနော် အဓိကထားပြီး သမီး သမိုင်းကြောင်းကောင်းဖို့ ထိန်းသိမ်းသွားမယ်”လို့ နိုင်ဇော်က ဆိုပါတယ်။
ဂီတမှူး နိုင်ဇော်ဟာ ဂီတလောကမှာ အောင်မြင်မှု ရရှိထားသူ တဦး ဖြစ်ပါတယ်။ နိုင်ဇော်ရဲ့ သမီးဖြစ်သူ မိုးဖြူစင်ဇော်ကတော့ ယခုနှစ်အတွက် တက္ကသိုလ်ဝင်တန်း စာမေးပွဲမှာ ဂုဏ်ထူး ၆ ဘာသာနဲ့ နှစ်ချင်းပေါက် အောင်မြင်ခဲ့တဲ့သူလည်း ဖြစ်ပါတယ်။
You may also like these stories:
“အဖေများနေ့” အမှတ်တရများနဲ့ ခီမောင်နှံ
“အဖေဟာ ဘဝမှာ အလေးစားရဆုံး ပုဂ္ဂိုလ်”လို့ ဆိုတဲ့ စိုးပြည့်သဇင်
“အဖေ မရှိတော့တာ နှစ် ၂၀ နီးပါး ရှိတော့မယ်”လို့ ဆိုလာတဲ့ ခေမီကို
The post “အဖေများနေ့” နဲ့ ပတ်သက်ပြီး အမှတ်တရတွေ ပြောပြတဲ့ ဂီတမှူး နိုင်ဇော် appeared first on ဧရာဝတီ.