မကြာခင် ရုံတင်ပြသတော့မယ့် “Lady Boy” ရုပ်ရှင်ဇာတ်ကားထဲမှာ သရုပ်ဆောင်ထားတဲ့ ကျော်ကျော်ဗိုက ဒီဇာတ်ကားကို ပြန်ကြည့်ရတာ ရင်ခုန်တယ်လို့ ဆိုပါတယ်။
“ကိုယ့်ကိုယ်ကိုယ် ပြန်ကြည့်ရမှာ ရင်ခုန်နေတဲ့ ရုပ်ရှင်ကား၊ ဒီကားမှာ ကျနော့် နာမည်က ကျော်ကျော်နိုင်၊ Club မှာ Sexy Dance ကတဲ့ အလုပ်ကိုလုပ်ပြီး မိန်းကလေးတွေရဲ့ အသည်းစွဲပေါ့။ မိန်းမတွေကို ဖြားယောင်းမြူဆွယ်ရတာပေါ့။ အက ဖျော်ဖြေရေးသမား အလုပ်အပြင် ဂွင်အကြီးကြီးတွေဆို သီးသန့် လိုက်ဖျော်ဖြေပေးတဲ့ အလုပ်နဲ့ စီးပွားရေးဖြောင့်နေတဲ့ မြန်မာနိုင်ငံသားအဖြစ် ပါဝင်ထားတယ်”လို့ ကျော်ကျော်ဗိုက ပြောပါတယ်။
“ဒီကာရိုက်တာကလည်း ကျနော့်ဘဝမှာ ပထမဦးဆုံး လုပ်ဖူးတဲ့ ကာရိုက်တာပဲ။ ကိုယ်တိုင် ပြန်ကြည့်ရတော့မှာဖြစ်လို့ စိတ်လှုပ်ရှားနေတယ်။ ဟာသဆိုပေမယ့် ရင်ခုန်ရတဲ့ ကာရိုက်တာပေါ့။ ကာရိုက်တာအတွက် အရမ်းရင်ခုန်ပါတယ်။ နောက်ပိုင်းတွေလည်း လုပ်ဖြစ်ချင်မှ လုပ်ဖြစ်တော့မယ့် ကာရိုက်တာပေါ့”လို့ ကျော်ကျော်ဗိုက ဆိုပါတယ်။
အဆိုပါ “Lady Boy” ရုပ်ရှင် ရိုက်ကူးစဉ်က အတွေ့အကြုံတွေနဲ့ ပတ်သက်ပြီးတော့လည်း ကျော်ကျော်ဗိုက အခုလိုပဲ ပြောပါတယ်။
“အတွေ့အကြုံကတော့ ထိုင်းနိုင်ငံနဲ့ တွဲဖက် ရိုက်ကူးရာမှာ ကျနော်တို့ဘာမှ နောက်ဆံတင်းစရာ မရှိဘူး။ Production ပိုင်းကလည်း သပ်သပ်ရပ်ရပ် ရှိတယ်။ အရင်တုန်းက နိုင်ငံတကာကို သွားရိုက်ရင် ခိုးကြောင်ခိုးဝှက် ရိုက်ရတာ အခုက ပေါ်တင်ရိုက်ရတဲ့အတွက် Smart အရမ်းဖြစ်တယ်”လို့ ကျော်ကျော်ဗိုက ပြောပါတယ်။
သူများနိုင်ငံတွေမှာ ရိုက်ကူးရေးနဲ့ ပတ်သက်ရင် အာမခံချက်တွေ ရှိပေမယ့် မြန်မာနိုင်ငံမှာ အာမခံချက်နဲ့ ပတ်သက်ပြီးလည်း ရှိလာဖို့ မျှော်လင့်တယ်လို့လည်း ကျော်ကျော်ဗိုက ဆိုပါတယ်။
“ထိုင်းနိုင်ငံမှာ Insurance (အာမခံချက်) ရှိတယ်။ ဒီနိုင်ငံမှာလည်း ဖြစ်လာဖို့ မျှော်လင့်တယ်။ ရိုက်ကွင်းမှာ မမြင်နိုင်တဲ့ အက်ဆီးဒင့်ဆိုတာ ရှိနိုင်တယ်လေ။ နိုင်ငံတကာမှာတော့ မပါမဖြစ်ပေါ့။ ဒီမှာတော့ ဒီအဆင့်ကို မေ့နေကြတာပေါ့။ မြန်မာနိုင်ငံမှာ ရိုက်ကွင်း အာမခံချက် မရှိတာက ကမ္ဘာ့အမြင် မကျယ်သေးတာပေါ့။ ဒီလို လုပ်ပါလား ဆိုတာကိုလည်း အခုနောက်ပိုင်းမှ စမ်းတဝါးဝါး သိတာ။ တဖြည်းဖြည်းတော့ သိလာပါလိမ့်မယ်”
“ပရိသတ်တွေအတွက် အနုပညာတွေဆက်ပြီး ဖန်တီးပါ့မယ်။ ကျနော် ဖန်တီးတဲ့ အနုပညာတိုင်းက တာဝန်ယူမှု၊ တာဝန်ခံမှု ကျနော့်ပေါ်မှာပဲ မူတည်ပါတယ်။ အဲ့အတွက် ပရိသတ်တွေကို ကျနော့် အနုပညာနဲ့ ပတ်သက်ပြီး တာဝန်ယူနိုင်တဲ့ အနုပညာသမားဖြစ်အောင် ကြိုးစားသွားပါ့မယ်”လို့ ကျော်ကျော်ဗိုက ပြောပါတယ်။
“Lady Boy” ရုပ်ရှင်ဇာတ်ကားကြီးကို ဇွန်လ ၆ ရက်နေ့ကစပြီး မင်္ဂလာ ရုပ်ရှင်ရုံကြီးများမှာ ရုံတင်ပြသသွား မှာ ဖြစ်ပါတယ်။ Lady Boy ရုပ်ရှင်ကို ၂၀၁၈ ခုနှစ်၊ စက်တင်ဘာလ ၅ ရက်နေ့က ထိုင်းနိုင်ငံမှာ ရက် ၂၀ ကြာ ရိုက်ကူးခဲ့တာ ဖြစ်ပါတယ်။ ဒီဇာတ်ကားမှာ သရုပ်ဆောင် ပြေတီဦး၊ ခန့်စည်သူ၊ ကျော်ကျော်ဗို၊ ဂျိုကာနဲ့ အိချောပိုတို့နဲ့အတူ ထိုင်းမင်းသမီး ကရာဗီတို့က အဓိက သရုပ်ဆောင်များအဖြစ် ပါဝင်ထားပါတယ်။
You may also like these stories:
“Lady Boy” ရုပ်ရှင်မှာ ထိုင်းလိုပြောပြီး သရုပ်ဆောင်ထားတဲ့ ထူးအောင်
“Lady Boy” ရုပ်ရှင်ကို ၆ လပိုင်း၊ ၆ ရက်နေ့မှာ ရုံတင်ပြသမယ်လို့ ကိုဘိုစန်း ပြော
“Lady Boy လို့ နာမည်ပေးထားပေမယ့် အခြောက်ဇာတ်ကား မဟုတ်ပါဘူး”
Tom Boy အနေနဲ့ သရုပ်ဆောင်ထားပြီး LGBT တွေကို ထိခိုက်မှာ စိုးရိမ်တဲ့ သဲသဲဆုငြိမ်း
The post “Lady Boy” ရုပ်ရှင်မှာ ကိုယ့်ကိုယ်ကိုယ် ပြန်ကြည့်ရမှာ ရင်ခုန်နေတဲ့ ကျော်ကျော်ဗို appeared first on ဧရာဝတီ.