လတ်တလော ဆိုရှယ်မီဒီယာပေါ်မှာ ပျံ့နှံ့နေတဲ့ လမ်းဘေးခွေး ပြဿနာတွေနဲ့ ပတ်သက်ပြီး မကြာသေးခင်က စည်ပင်ရွေးကောက်ပွဲမှာ ဝင်ရောက် ယှဉ်ပြိုင်ခဲ့တဲ့ အလှမယ် ထက်ထက်ထွန်းက လမ်းဘေးခွေးတွေကို အဆိပ်ကျွေး သတ်တာမျိုးကိုတော့ သဘောမတူဘူးလို့ ဧရာဝတီကို ပြောပါတယ်။
“ထက်ကို မဲမထည့်လို့ ခွေးကိုက်ခံရတယ်ဆိုတာမျိုးတွေ ရေးနေတာ တွေ့တယ်။ တွေ့တော့ ရယ်ချင်တယ်။ အမှန်တော့ ထက်မှ မဟုတ်ဘူး။ ဘယ်သူပဲ ဒီနေရာ ရောက်လာရောက်လာ ကြိုးစားကြတဲ့သူတွေချည်းပဲ။ တယောက်နဲ့ တယောက်ကတော့ ရည်ရွယ်ချက်ခြင်း မတူကြဘူးပေါ့။ ထက် ရွေးခံရတာ မရွေးခံရတာနဲ့ တော့ မဆိုင်ဘူး။ ဘယ်သူပဲ တက်လာ တက်လာ အကောင်းဆုံး ကြိုးစားကြမှာပဲ”
“ဘယ်အရာမဆို ပြောင်းလဲဖို့က အချိန်တခုတော့ ပေးရတာပေါ့။ သူတို့လည်း ဒီအပိုင်းလေးတွေ သေချာမလုပ်ဖြစ်သေးပဲ တခြားအပိုင်းလေးတွေ အရင်လုပ်နေလို့ ဖြစ်မှာပါ။ စောင့်ကြည့်ပေးကြပါ။ ထက်လည်း စောင့်ကြည့်နေပါတယ်။ ဘယ်လို လုပ်ကြမလဲပေါ့။ ရှင်းလင်းရေးကို အဆိပ်ပစ်ကျွေး သတ်တဲ့နည်းနဲ့ လုပ်တာတော့ ထက်က သဘောမတူဘူး။ ကိုယ်ချင်းစာ စိတ်နဲ့ပေါ့”လို့ ထက်ထက်ထွန်းက ဧရာဝတီကို ပြောပါတယ်။
ဆက်လက်ပြီး ထက်ထက်ထွန်းက အခုလိုမျိုး လမ်းဘေးခွေးတွေကို အဆိပ်ကျွေး သတ်တာဟာ စာနာစိတ်အရ ကြည့်မယ်ဆိုရင် မတရားဘူးလို့ ဆိုပါတယ်။
“ကိုယ့်အသားတောင် အနာ မခံနိုင်တာ။ သူတို့လည်း အသက် တချောင်းပဲ။ သူတို့လည်း သက်ရှိသတ္တဝါတွေ။ လွတ်လပ်ခွင့်အရ၊ ဒီမိုကရေစီအရ တွေးမယ်ဆိုရင် သူတို့လည်း သက်ရှိသတ္တဝါတွေ ဒီကမ္ဘာမြေပေါ်မှာ နေချင်တဲ့နေရာ နေခွင့် ရှိတယ်။ စာနာစိတ်အရ ကြည့်ရင်တော့ မတရားဘူး။ သက်ရှိ သတ္တဝါတိုင်းပေါ်မှာ တူညီတဲ့ မေတ္တာထားသူတိုင်းက ဒီလို အဆိပ်ကျွေးသတ်တာမျိုးကို မကြိုက်ဘူး”လို့ ထက်ထက်ထွန်းက ပြောပါတယ်။
“ထက်ဆိုရင်တော့ စာနာစိတ်လေးတွေ ထည့်ပြီးတော့ နှစ်ဦးနှစ်ဖက် ကောင်းအောင် လုပ်သွားမယ်လို့ အာမခံတယ်။ သက်ရှိတိုင်း အသက်ရှင်ခွင့်ရှိတဲ့ ကမ္ဘာမြေမှာ ဦးနှောက်ရှိသူတွေက အုပ်စိုးပြီး နေရာ အရင် ဦးလိုက်တယ်။ ဦးနှောက် မရှိတဲ့ တိရိစ္ဆာန်တွေကို ရက်ရက်စက်စက် မောင်းထုတ်တာမျိုး၊ နှိပ်စက်တာမျိုး မလုပ်စေချင်ဘူး”
“အဘွားတယောက်က ခွေးတွေကို အစာကျွေးပေးတယ်။ သူ့ကိုတော့ ခွေးတွေအတွက် အလှူငွေလေးတွေ ပေးဖြစ်တယ်။ ဂေဟာလေး ဆောက်ပေးချင်တယ်။ ထက်ကိုယ်တိုင်တော့ မမွေးထားပါဘူး။ ကိုယ်တိုင်က မအားတာကြောင့် သူတို့ကို နှိပ်စက်သလို ဖြစ်မှာစိုးလို့ပါ”လို့ ထက်ထက်ထွန်းက ပြောပါတယ်။
အလှမယ် ထက်ထက်ထွန်းဟာ Miss Universe Myanmar 2016 ကိုယ်စားပြု အလှမယ်တဦး ဖြစ်ပြီး Miss Universe ပြိုင်ပွဲကြီးမှာ National Costume ဆုကို ရရှိခဲ့ပါတယ်။ ပြီးခဲ့တဲ့ စည်ပင်ရွေးကောက်ပွဲမှာလည်း ထက်ထက်ထွန်းဟာ မဲဆန္ဒနယ် အမှတ်(၃) ကနေ တသီးပုဂ္ဂလအနေနဲ့ ဝင်ရောက် ယှဉ်ပြိုင်ခဲ့ပါတယ်။
You may also like these stories:
ရွှေအိမ်စည်အကြောင်းပြောပြတဲ့ အလှမယ်မေမြတ်နိုး
“ထိုက်တန်လို့ပေးတဲ့ မဲမျိုးရဖို့အတွက် ကြိုးစားနေတယ်”လို့ ထက်ထက်ထွန်း ပြော
ရန်ကုန်မြို့ အပြောင်းအလဲကို မြင်တွေ့ရမည်ဟု ဒု မြို့တော်ဝန် ပြော
The post “လမ်းဘေးခွေးတွေကို အဆိပ်ကျွေးသတ်တာမျိုး သဘော မတူဘူး”လို့ ထက်ထက်ထွန်း ပြော appeared first on ဧရာဝတီ.