ကနေဒါနိုင်ငံ Montreal မြို့က ရုပ်ရှင်ရုံတခုမှာ သရဲကားနဲ့ Pikachu ဇာတ်ကား မှားပြမိခဲ့တာကြောင့် ရုပ်ရှင်ရုံထဲမှာ ကလေးငယ်တွေ အထိတ်တလန့်ဖြစ်ပြီး ငိုကြွေးခဲ့ကြရတဲ့ ဖြစ်ရပ်တခု ဖြစ်ပွားခဲ့ပါတယ်။ “Pokemon Dectective Pikachu” ဇာတ်ကား ပြသမယ့် ရုပ်ရှင်ရုံမှာ Pikachu အစား “La Llorona” သရဲကား မှားပြခဲ့မိတာပဲ ဖြစ်ပါတယ်။
“Annabelle Comes Home” သရဲကား Trailer ပြသခဲ့ပြီးနောက်မှာ “La Llorona” ကို ပြသခဲ့တာကြောင့် ရုပ်ရှင်ကြည့်ရှုသူတွေဟာ Pikachu ရုပ်ရှင် မပြသခင် အစောပိုင်း Trailer ပြသတယ် အထင်နဲ့ ကြည့်ရှုခဲ့ကြတာပါ။ ကြည့်ရှုနေချိန် မိနစ်ပိုင်းခန့် အကြာမှာတော့ ဒါဟာ Trailer အစား ရုပ်ရှင်ဇာတ်ကားမှားပြီးပြသတာသာ ဖြစ်နေကြောင်းကို ရုပ်ရှင်လာရောက်ကြည့်ရှုသူ၊ နိုင်ငံတကာရုပ်ရှင်ဇာတ်ကား သတင်းဝက်ဘ်ဆိုက် တခုမှာ အလုပ်လုပ်တဲ့ Ryan George ဆိုသူက စတင်သတိထားမိသွားတာ ဖြစ်ပါတယ်။
အဲဒီအချိန်မှာ ရုပ်ရှင်ရုံတွင်းက ကလေးငယ်တွေဟာ ထိတ်လန့်တကြား အော်ဟစ် ငိုယိုနေကြပြီး ကလေးမိဘတွေကလည်း ရုပ်ရှင်ရုံက တာဝန်ရှိသူတွေကို ခေါ်ယူမေးမြန်းကြည့်ဖို့ တောင်းဆိုနေခဲ့ကြတာပါ။ ရုပ်ရှင်ရုံက ရုပ်ရှင် မှားပြခဲ့တာကို စတင်သတိထားမိသွားတဲ့ Ryan George ကတော့ ဒီအဖြစ်အပျက်ကို သတင်းသမားပီပီ သူရဲ့ Twitter အကောင့်မှာ အချိန်နဲ့ တပြေးညီ ဓာတ်ပုံနဲ့တကွ တင်ခဲ့တာကြောင့် ဒီဖြစ်ရပ်ကို လူတော်တော်များများ သိရှိသွားခဲ့ကြတာလည်း ဖြစ်ပါတယ်။
“Annabelle trailer ပြသပြီးတဲ့အချိန်မှာ ရုပ်ရှင်ရုံထဲက ကလေးငယ်တချို့က ငိုနေကြပါပြီ၊ နောက်ထပ်ဆက်ပြီးပြတဲ့ La Llorona လည်းကျရော ကလေးမိဘတချို့ကရော ကျနော် ကိုယ်တိုင်ပါ နည်းနည်းအူကြောင်ကြောင် ဖြစ်သွားမိတယ်။ တကယ်ဆို Pikachu ဇာတ်ကား စပြရတော့မှာကို ဘာလို့ ဒီသရဲကား ပြရတာလဲ ဆိုပြီးတော့ပေါ့။ သိပ်မကြာလိုက်ဘူး သူတို့ပြနေတာဟာ La Llorona သရဲကားရဲ့ဇာတ်ကားအစဆိုတာလည်း သိလိုက်ရော ရုံထဲကတာဝန်ရှိသူတွေကိုလည်း အသိပေး၊ ကျနော့် Twitter အကောင့်မှာလည်း တင်လိုက်တာပါ” လို့ Ryan က ဆိုပါတယ်။
ဒီလို မှားယွင်းပြသခဲ့မိတာကြောင့် ကလေးတွေကို Pikachu ပြသနေတဲ့ တခြား ရုပ်ရှင်ရုံတရုံကို ပြောင်းပေးခဲ့ရပြီး အဲဒီရုပ်ရှင်ရုံမှာတော့ ဇာတ်လမ်းကို ခဏရပ်ကာ ကလေးတွေကို စောင့်ဆိုင်းပေးခဲ့ရပါတယ်။ ဒီလိုမျိုး ရုပ်ရှင်ဇာတ်ကား မှားပြသမိခဲ့တဲ့ အဖြစ်အပျက်ဟာ ၂၀၁၈ ခုနှစ်တုန်းက သြစတြေးလျက ရုပ်ရှင်ရုံတခုမှာလည်း ဖြစ်ပျက်ခဲ့ဖူးပြီး အဲဒီတုန်းကတော့ “Peter Rabbit” နဲ့ “Hereditary” သရဲကား မှားပြသမိခဲ့တာ ဖြစ်ပါတယ်။
Ref. www.tellerreport.com
You may also like these stories:
မြောက်အမေရိက ရုံဝင်ငွေစာရင်းမှာ စံချိန်တင် ဝင်ငွေရရှိခဲ့တဲ့ “Detective Pikachu” ရုပ်ရှင်
“Game of Thrones” သီးခြား ခွဲထွက်ဇာတ်လမ်း ၃ ခု ရိုက်ကူးရန် ပြင်ဆင်နေပြီလို့ သိရ
Jennifer Aniston ရဲ့ ညစာစားဖို့ ဖိတ်ကြားချက်ကို ငြင်းပယ်လိုက်တဲ့ အင်ဂျလီနာဂျိုလီ
Trailer အစား ရုပ်ရှင်ကား တကားလုံးကို YouTube ပေါ် မှားတင်မိခဲ့တဲ့ Sony
The post သရဲကားနဲ့ Pikachu ဇာတ်ကား မှားပြမိခဲ့တဲ့ ကနေဒါနိုင်ငံက ရုပ်ရှင်ရုံ appeared first on ဧရာဝတီ.