အဆိုတော် Taylor Swift ကတော့ ပရိသတ်တွေရဲ့ အချိန်ကြာမြင့်စွာ စောင့်ဆိုင်းရမှုကို ရပ်တန့်လိုက်တဲ့ အနေနဲ့ သီချင်းအသစ်တပုဒ်ကို ဖြန့်ချိလိုက်ပါတယ်။
Taylor Swift ရဲ့ သတ္တမမြောက် စတူဒီယို အယ်လ်ဘမ်ထဲက “Me!” လို့ အမည်ရတဲ့ အဲဒီ Single သီချင်းဟာ သူ့ရဲ့ မှောင်မိုက်နေတဲ့ စိတ်ခံစားချက်တွေကနေ သက်တံရောင်စုံတဲ့ အနုပညာလောကထဲ ပြန်လည်ခြေချလိုက်ပြီဆိုတဲ့ လက္ခဏာလည်း ဖြစ်ပါတယ်။ အခုလိုမျိုး ပရိသတ်တွေကို အံ့သြသွားအောင် သီချင်းအသစ်ကို မဖြန့်ချိခင် အသက် ၂၉ နှစ်အရွယ် အဆိုတော် Swift ဟာ သီချင်းအသစ်နဲ့ ပတ်သက်တဲ့ သဲလွန်စတွေကို ထုတ်ခဲ့တာ တွေ့ရပါတယ်။
ပြီးခဲ့တဲ့ ဧပြီလ ၁၃ ရက်နေ့မှာတော့ သို့လောသို့လော ပြောဆိုမှုတွေ ကျယ်လောင်လာခဲ့ပါတယ်။ အကြောင်းကတော့ သူဟာ Instagram Story မှာ နံပါတ်စဉ်ကို ပြောင်းပြန်ရေတွက်တဲ့ နာရီဓာတ်ပုံ တပုံကို မျှဝေခဲ့လို့ပဲ ဖြစ်ပါတယ်။ ပြီးတော့ ထန်းပင် ၆ ပင် ပါဝင်တဲ့ ပုံတပုံကို တင်ခဲ့ပြီး ပုံစာမှာတော့ ထန်းပင် ၇ ပင် ပါဝင်တဲ့ emoji ကို ထည့်သွင်းရေးသားခဲ့လို့ ဒါဟာ သူ့ရဲ့ သတ္တမြောက်စတူဒီယို အယ်လ်ဘမ်ကို မကြာခင် ဖြန့်ချိတော့မှာပဲလို့ သိခဲ့ကြရပါတယ်။
အဲဒီသီချင်း Music Video မှာ Panic! At The Disco တီးဝိုင်းရဲ့ ဦးဆောင်အဆိုရှင် Brendon Urie လည်း ပါဝင်သရုပ်ဆောင်ထားပါတယ်။ သီချင်းစာသားတွေထဲမှာတော့ “ငါ့လိုမျိုး တခြားတယောက်ကို မင်းဘယ်တော့မှ ရှာလို့တွေ့မှာ မဟုတ်ဘူး” လို့ ထည့်သွင်းရေးသားထားတဲ့အတွက် အဆိုတော် Swift အနေနဲ့ အရင် ရည်းစားဟောင်းတွေအပေါ် စိတ်ဆိုးမာန်ဆိုးနဲ့ ပြောလိုက်တာဖြစ်တယ်လို့ ဆိုကြပါတယ်။
သူက “Me သီချင်းဟာ ကျမတို့ရဲ့ ကိုယ်ပိုင် တသီးတခြားဖြစ်ခွင့်ကို အားပေးဖို့၊ ဂုဏ်ယူတတ်ဖို့နဲ့ ပိုင်ဆိုင်တတ်ဖို့အကြောင်း ရေးထားတဲ့ သီချင်းတပုဒ်ဖြစ်ပါတယ်။ ပေါ့ပ်သီချင်း တပုဒ်နဲ့အတူ ကျမတို့ဟာ လူတွေရဲ့ဦး ခေါင်းတွေထဲမှာ ပိတ်မိနေတဲ့ မယ်လိုဒီ တခုကို ရနိုင်ပါတယ်။ လူတွေအနေနဲ့ သူတို့ရဲ့ အကြောင်းပိုပြီး ခံစားလို့ကောင်းအောင် ဖန်တီးနိုင်မယ့် သီချင်းဖြစ်စေချင်တာပါ” လို့ အမေရိကန် ရုပ်သံ ABC ကိုပြောကြားထားပါတယ်။
အခုသီချင်းအသစ်ဟာ သူနဲ့ ကာလရှည် လက်တွဲခဲ့တဲ့ Big Machine Label Group နဲ့ လမ်းခွဲပြီး Republic Records နဲ့ Universal Music Group တို့ဆီ ပြောင်းရွေ့ပြီးတဲ့နောက် ပထမဆုံးထွက်လာတဲ့ သီချင်းလည်းဖြစ်ပါတယ်။
Ref: cnalifestyle
The post အရောင်အသွေးစုံတဲ့ သီချင်းအသစ်ကို ဖြန့်ချိလိုက်တဲ့ အဆိုတော် Taylor Swift appeared first on ဧရာဝတီ.