ပရိသတ်တွေ ချစ်တဲ့ အနုပညာရှင် စုံတွဲ အောင်ခိုင်နဲ့ ဝါဝါအောင်က သြင်္ကန်မှာ ဘာတွေ လုပ်မလဲ သြင်္ကန်နဲ့ ပတ်သက်ပြီး သြင်္ကန်ရောက်တိုင်း ခွဲနေရတာလည်း အမှတ်တရလို့ အောင်ခိုင်က ဆိုပါတယ်။
“အန်တီဝါနဲ့ သြင်္ကန် အမှတ်တရကတော့ ဘာမှထွေထွေထူးထူး မရှိပါဘူး။ သြင်္ကန်ရောက်ရင် ကျနော်ကတော့ ရန်ကုန်မှာ အထိုင်ချတယ်။ အန်တီဝါကတော့ မမများ အဖွဲ့နဲ့ သွားတယ်။ သြင်္ကန်ရောက်ရင်တော့ ခဏတော့ ခွဲနေကြရတာပေါ့။ တနှစ်ကတော့ ကျနော်ရော အန်တီဝါတို့အဖွဲ့ရော နေပြည်တော်မှာ အတူတူ ဆုံရတယ်။ အဲ့ဒါတာ့ အမှတ်တရပေါ့။ သြင်္ကန်ရောက်တိုင်း ခွဲနေရတာလည်း အမှတ်တရပေါ့”
“သြင်္ကန်မှာ ပျော်ကြမယ့်သူတွေအတွက် ရေစိုလိုက် ပူလိုက်ဆိုတော့ ကျန်းမာရေးလေး ဂရုစိုက်ကြပါလို့ ပြောချင်တယ်။ ကျနော် သြင်္ကန်ဆိုရင် မက်မက်မောမော ကဲတာ တခါမှ မရှိဘူး။ သြင်္ကန်ကို သူများပက်ရင် ပက်လိုက်တယ်။ ဒီလောက်ပါပဲ”လို့ အောင်ခိုင်က ပြောပါတယ်။
မမများ အဖွဲ့ကို ချစ်ကြတဲ့ ပရိသတ်တွေကို ကျေးဇူးတင်သလို အဖွဲ့ကရတဲ့ ဆုကြေးတွေနဲ့လည်း ၃ ပုံ တပုံ လှူဖို့အတွက် ထားတယ်လို့ ဆိုပါတယ်။
“သြင်္ကန်မှာတော့ မများအဖွဲ့နဲ့ ကပြဖျော်ဖြေပေးမှာပါ။ ကျမတို့က နယ်ဘက်ရော ရန်ကုန်ရော ကပြဖျော်ဖြေတာ ကွာခြားချက်ကတော့ ရန်ကုန်မှာတော့ မဏ္ဍပ်တွေနဲ့ အနုပညာရှင်တွေ များများနဲ့ သြင်္ကန်ပွဲ ကျင်းပကြတာပေါ့။ နယ်နဲ့လည်း သိပ်မကွာခြားလှပါဘူး။ အန်တီဝါတို့အဖွဲ့က ဆုကြေးတွေရရင် ၃ ပုံ ၁ ပုံ လှူဖို့အတွက် ထားတယ်။ လှည်းကူးက မဟာရေယမင်း ကျောင်းတိုက်မှာ မမလေးသိမ်ကိုလည်း မမများအဖွဲ့က လှူဒါန်းနေပါတယ်”
“ဒီနှစ်တော့ ရေစက်ချ အလှူလုပ်ဖို့ပဲ ကျန်ပါတော့တယ်။ မမများအဖွဲ့ကို ချစ်ပေးကြတာကိုလည်း အရမ်းကို ကျေးဇူးတင်ပြီး ဝမ်းသာရပါတယ်။ ပရိသတ်ချစ်အောင်လည်း သီချင်းတွေရော အကအလှတွေရော ကြိုးစားထားပါတယ်။ နှစ်သစ်မှာ ပရိသတ်တွေ စိတ်၏ ချမ်းသာခြင်း၊ ကိုယ်၏ ကျန်းမာခြင်းတွေနဲ့ ပြည့်စုံကြပါစေ”လို့ ဝါဝါအောင်က ပြောပါတယ်။
သရုပ်ဆောင် အောင်ခိုင်ဟာ လက်ရှိမှာ ဇာတ်ကားများကို လက်ခံရိုက်ကူးနေပြီး မြန်မာနိုင်ငံရုပ်ရှင် အစည်းအရုံးမှာလည်း အဖွဲ့ဝင်တယောက်ဖြစ်ပါတယ်။ ပရိသတ်တွေ အားပေးမှုကြောင့် အကယ်ဒမီ အောင်ခိုင် ဆိုတဲ့ နာမည်တလုံး ရရှိခဲ့သလို “ကိုလူချော” အဖွဲ့နဲ့လည်း ပရဟိတ လုပ်ငန်းများ လုပ်ကိုင်နေသူ ဖြစ်ပါတယ်။ သရုပ်ဆောင် ဝါဝါအောင်ကလည်း လက်ရှိမှာ ဇာတ်ကားများကို လက်ခံရိုက်ကူးနေပြီး “မမများ” အဖွဲ့ဝင် တယောက် ဖြစ်ပါတယ်။
The post သြင်္ကန် အမှတ်တရတွေ ပြောပြတဲ့ သရုပ်ဆောင် အောင်ခိုင်နဲ့ ဝါဝါအောင် appeared first on ဧရာဝတီ.