မြန်မာ့ရိုးရာ အတာသြင်္ကန် ပွဲတော်ကြီးမှာ ပရိသတ်တွေ ချစ်တဲ့ အနုပညာရှင်များ ဖြစ်ကြတဲ့ သရုပ်ဆောင်ချစ်စနိုးဦး၊ ဆုပန်ထွာ၊ မေသဉ္ဇာဦး၊ မေတိုးခိုင်တို့က ရန်ကုန်မြို့ရဲ့ ဘယ်နေရာမှာ ရှိနေမလဲဆိုတာ ပြောပြထားသလို ပရိသတ်တွေအတွက် နှစ်သစ်ဆုတောင်း စကားသံများနဲ့ ကျန်းမာရေးဂရုစိုက်ဖို့ကိုလည်း ယခုလိုပြောပြထားပါတယ်။
ချစ်စနိုးဦး
သြင်္ကန်ကတော့ အိမ်မှာ ပဲရှိမှာပါ။ Channel K ဖွင့်ပွဲတော့ သွားမယ်။ ချစ်သူအိမ်မှာတော့ စတုဒီသာလေးကျွေးမှာကို ဝိုင်းကူပေးဖြစ်မယ်။ လမ်းလျှောက် သြင်္ကန်လေးတွေ ရှိတာအရမ်း ကောင်းတယ်။ သြင်္ကန်နဲ့ ပတ်သက်ရင် အမှတ်တရက အမြဲ အလုပ်လုပ်ဖြစ်တာလည်း များတယ်။ အလုပ် မရှိတုန်းကလည်း အလုပ် မရှိသလို ပျော်တယ်။ အလုပ်နဲ့ ကျတော့လည်း အလုပ်နဲ့ ပျော်ရတာပေါ့။
ကိုယ့်သီချင်းလေးက ပေါက်ထားတာလည်းကြာပြီ။ ဒါပေမဲ့လည်း ကိုယ့်သီချင်းလေးကို အခုထက်ထိ ပရိသတ်တွေကြိုက်ပြီး အားပေးကြတာ အရမ်းဝမ်းသာပါတယ်။ သြင်္ကန်မှာ စိတ်၏ချမ်းသာခြင်း၊ ကိုယ်၏ ကျန်းမာခြင်းတွေနဲ့ ပြည့်စုံနိုင်ကြပါစေ။ သြင်္ကန်ဆို အကုန်လုံးကတော့ ပျော်ချင်ကြတာပဲပေါ့။ အပျော်ကနေ အပျက် မဖြစ်ဖို့ အရေးကြီးတယ်။ ရာသီဥတုကလည်းပူတော့ ထိန်းထိန်းသိမ်းသိမ်းလေးနဲ့ ပျော်ကြမယ်ဆိုရင်တော့ အရမ်းပျော်စရာ ကောင်းတဲ့ နှစ်သစ် တနှစ်ဖြစ်မှာပါလို့။
ဆုပန်ထွာ
အစ်မ သာယာဝတီမှာ အမိုက်စား ဖျော်ဖြေနေမှုတွေနဲ့ တင်ဆက်မှာပါ။ သြင်္ကန်အတွက် ဘာလုပ်ရမှန်းမသိတာနဲ့ သြင်္ကန်မှာ ကျစ်ဆံမြှီးဆံပင်လေး ကျစ်ချင်တာနဲ့ ကျစ်လိုက်တာပါ။ ရန်ကုန်နဲ့လည်း နီးတော့ နေ့ချင်းပြန်သွားလို့ရတော့ သားသားကိုလည်း ခေါ်သွားမယ်။ သြင်္ကန်ကို ထီးလေးတွေနဲ့ လမ်းလျှောက်သြင်္ကန် လုပ်ထားတာ အရမ်းကောင်းတယ်။ အရမ်းပူလာတော့ ကျန်းမာရေးတော့ ဂရုစိုက်ကြရမယ်။ အဲ့ကျမှ ပျော်ချင်တာတွေ ပျော်ရမယ်။ သောက်ချင်တာတွေ သောက်ရမယ်။ ဒါပေမဲ့ ကိုယ့်ရဲ့ Limit လေးနဲ့ ကျန်းမာရေးကို မထိခိုက်အောင် နေပါ ပျော်ပါလို့။
မေသဉ္ဖာဦး
သြင်္ကန်ဆိုရင် ငယ်ငယ်တုန်းကတော့ ပျော်တာပေါ့။ အခု အသက်ကြီးလာတော့ ကြည့်တာနဲ့တင် အရသာရှိပါတယ်။ လမ်းလျှောက်သြင်္ကန်ရှိတာ ကောင်းတယ်။ စည်းကမ်းရှိရှိလေးတွေနဲ့ သွားရင်တော့ ချစ်စရာကောင်းမှာပေါ့။ အရင်တုန်း သြင်္ကန်ကြောက်စရာတွေ ဘာတွေ ကောင်းသွားသေးတာ။ အဲ့လိုမျိုး မဖြစ်ချင်ဘူး။
တယောက်နဲ့ တယောက် စကြ ညီအစ်ကို မောင်နှမတွေလို ချစ်စရာလေးတွေ ဖြစ်ချင်တယ်။ ကိုယ်တွေလည်းကြုံခဲ့ဖူးတယ်။ ကိုယ်တွေ မောင်နှမတွေသွားတာကို မကြားဝံ့ မနာသာတွေ ပြောကြတာ။ သြင်္ကန်ကတော့ စိုင်းစိုင်းနဲ့ အကြိုနေ့က ကားရိုက်ပြီး နောက်ရက်တွေ Channel K မှာ ရှိပါမယ်။ သြင်္ကန်ဆိုတာနဲ့ ဘာမှကို လူတွေက မဖြစ်ကြဘူး။ မဖြစ်ဘူးဆိုပေမယ့် ကျန်းမာရေးတော့ ဂရုစိုက်ပါလို့။ အန္တရာယ်ကင်းကင်းနဲ့ပျော်ကြပါလို့။
မေတိုးခိုင်
သြင်္ကန်ဆိုရင် ပျော်တယ်။ ရေလည်း ပက်ရတယ်။ ရေလည်းကြိုက်တဲ့သူဆိုတော့ သြင်္ကန်ရောက်ရင်ကိုပျော်နေတာ။ အိမ်မှာပဲရေပက်ဖြစ်ဖို့ များပါတယ်။ အိမ်မှာကတော့ သြင်္ကန်ဆို မိသားစုဆုံတဲ့ အချိန်ပေါ့။ အဲ့တော့ မုန့်တွေလုပ်စား၊ တီဗီကြည့် ကိုယ့်လူနဲ့ကိုယ် ရေတွေ ပက်ပေါ့။ ကျောင်းသြင်္ကန်တို့ ဘာတို့တော့ သွားတယ်။ သြင်္ကန်ထွက်လည်ရတာကို မကြိုက်ဘူး။
အခုခေတ်တော့ အရင်တုန်းကလို သြင်္ကန်အငွေ့အသက်တွေ သိပ်မရတော့ဘူးလို့ ခံစားရတယ်။ အခုခြောက်ကပ်ပြီး EDM ပွဲတွေ ပိုများလာတယ်။ ရိုးရာ သြင်္ကန်တွေ သိပ်မရှိတော့ဘူး။ အဲ့ဒါတော့ ဝမ်းနည်းဖို့ ကောင်းတယ်။ ရေများများသောက်ပြီး နေပူဒဏ်ခံနိုင်ဖို့ ဦးထုပ်လေးတွေ ဆောင်းကြပါလို့။ သြင်္ကန်မှာ အန္တရာယ်ကင်းကင်းနဲ့ ပျော်ပျော်ပါးပါး ကဲကြပါလို့။
The post သြင်္ကန်မှာ အန္တရာယ်ကင်းကင်း လျှောက်လည်ကြဖို့ ပျော်ကြဖို့ အနုပညာရှင်များ တိုက်တွန်း appeared first on ဧရာဝတီ.