ရန်ကုန်မြို့မှ အလှဖန်တီးရှင်များ ဦးစီးကာ ပထမအကြိမ် ဘဝတူ သက်ကြီး ပုဂ္ဂိုလ်များအား ဂါဝရပြု ပူဇော်ပွဲ အခမ်းအနားကို မတ်လ ၈ ရက်နေ့က ရန်ကုန်မြို့၊ တော်ဝင်ဂါးဒင်း ဟိုတယ်မှာ ပြုလုပ်ခဲ့ပါတယ်။ ဘဝတူ သက်ကြီးရွယ်အိုများကို ဂါရဝပြု လှူဒါန်းရတဲ့ ခံစားချက်တွေကို အလှဖန်တီးရှင်များ ဖြစ်ကြတဲ့ မိတ်ကပ် ခင်စန်းဝင်း၊ လင်းလင်း၊ ညီညီမောင်(စမ်းချောင်း)၊ မထက် (Pop Soul) တို့က အခုလိုပဲ ပြောပြထားပါတယ်။
မိတ်ကပ် ခင်စန်းဝင်း
“သက်ကြီးပူဇော်ပွဲလေး လုပ်ချင်တယ်ပေါ့။ ရှေ့မှာလည်း မိတ်ကပ် ကိုမာတို့၊ မိတ်ကပ် စိုးစိုးတို့ကလည်း လုပ်ချင်တာ အကောင်အထည် မဖော်နိုင်ခဲ့ဘူးဆိုတဲ့ စကားတွေ စုပြီး ပြောကြရင်း အကောင်အထည်ဖော်နိုင်ခဲ့တာပေါ့။ စာရင်းက ပထမ အယောက် ၄၀၊ အခုတော့ အယောက် ၄၀ ကျော်တယ်။ တယောက်ကို ငွေသား ၂ သိန်းနှုန်းနဲ့ ဆေးဝါးတွေနဲ့ ကန်တော့နိုင်တယ်။ ခံစားချက်ကတော့ ကန်တော့နိုင်တယ်။ မတွေ့တာ၊ မမြင်တာကြာတဲ့ သင်ဆရာ မြင်ဆရာ ကြားဆရာတွေ နောက် အခြားနယ်ပယ်က နတ်နဲ့ ပတ်သက်သူတွေ၊ ဒီဇိုင်နာတွေ ပါတယ်”
“မကြီးတို့ကတော့ အသက်အရွယ် ကြီးရင့်တဲ့သူတွေ၊ ရုပ်လတ်မြတ်မရွေး မည်သူမဆို ဂါရဝတရားနဲ့ ကန်တော့နိုင်အောင် ဒီလိုပွဲလေး လုပ်ဖြစ်တာပါ။ အသက်ကြီးတဲ့သူတွေလည်း အဆင်မပြေသူတွေရှိသလို အဆင်ပြေတဲ့သူတွေလည်း ရှိတယ်။ အားလုံး တွေ့ဖြစ်ကြတယ်၊ ဆုံဖြစ်ကြတယ်။ ကွယ်လွန်သွားတဲ့ မကြီးစန်းရဲ့ ဆရာ မိတ်ကပ် ဆန်နီကိုလည်း ရှိစေချင်တယ်။ ဘာပဲဖြစ်ဖြစ် ဆရာသမားတွေကို စုံစုံလင်လင် ရှိစေချင်တယ်”လို့ မိတ်ကပ် ခင်စန်းဝင်းက ပြောပါတယ်။
မိတ်ကပ် လင်းလင်း
“နောက်နှစ်တွေလည်း လှူလို့ရအောင် ပိုတဲ့ ပိုက်ဆံတွေကို ဘဏ်အကောင့်မှာ သိမ်းထားမယ်။ အလှဖန်တီးရှင်တွေထဲကမှ နာမကျန်းဖြစ်နေသူတွေကို ဖြည့်ဆည်း ပံ့ပိုးပေးဖို့လည်း ရှိပါတယ်။ ဒီလို သက်ကြီးတွေ ကန်တော့တဲ့ပွဲမှာ သက်ကြီးတွေကို ကန်တော့ခွင့်ရတာ အရမ်းကို ဝမ်းသာပါတယ်။ ကန်တော့တဲ့အချိန် ရင်ထဲမှာ တကယ်ကို စိတ်မကောင်းပါဘူး။ တယောက်တည်းလည်း လုပ်လို့ မရပါဘူး။ အားလုံး ညီညွှတ်ဖို့ လိုတယ်ဆိုတာကို ဒီကန်တော့ပွဲကနေ အလှဖန်တီးရှင်တွေ ဘယ်လောက် ညီညွှတ်တယ်ဆိုတာကို ပြလိုက်တာပါပဲ။ အဲ့အတွက် အရမ်းကို ဝမ်းသာ ကျေနပ်ပါတယ်”လို့ မိတ်ကပ် လင်းလင်းက ပြောပါတယ်။
မိတ်ကပ် ညီညီမောင်(စမ်းချောင်း)
“ပီတိလည်း ဖြစ်ရတယ်။ သူတို့ ပျော်တာလေးတွေ ကြည့်ပြီး ကလေးလေးတွေလိုပဲ။ ငါတို့လည်း တချိန်မှာ အသက်ကြီးလာရင် နောက်အငယ်တွေ ဒီလိုလေး လုပ်ပေးရင်ဆိုတဲ့ Respect (လေးစားမှု)ကို လက်ဆင့်ကမ်းပေးချင်တာပါ။ သု ကန်တော့ရမယ့် မိတ်ကပ်ဆရာဆိုလည်း မရှိတော့ဘူးပေါ့။ ဒါပေမဲ့ ကိုယ် ဆရာသမားတွေကို ပူဇော်ထိုက်တဲ့ထဲမှာ ရှိစေချင်တာပေါ့။ ဒီလိုလေး ကန်တော့နိုင်တဲ့အတွက် အရမ်း ပီတိဖြစ်ရပါတယ်။ သုတို့ လုပ်ချင်တဲ့ သက်ကြီးပူဇော်ပွဲကို လုပ်တာပါ။ ဘာ အသင်းအဖွဲ့၊ ဘာ အဖွဲ့အစည်းမှနဲ့လည်း မဆိုင်သလို သုတို့ မိန်းမလျာတွေရဲ့ ရိုသေသမှုကို ပြတဲ့ပွဲပါ”လို့ ညီညီမောင် (စမ်းချောင်း) က ပြောပါတယ်။
မိတ်ကပ် မထက် (Pop Soul)
“ထက်ကတော့ ကိုယ့်အစ်မတွေ အားလုံးရဲ့ စီစဉ်မှုအောက်မှာ ပါဝင်ခဲ့တာပါ။ မထက် ဘာမှ ထွေထွေထူးထူး လုပ်ခဲ့ရတာ မရှိပါဘူး။ ဒီလို စုံစုံညီညီ မတွေ့ခဲ့ဖူးဘူး။ အခုလို တွေ့ရလို့ အရမ်းဝမ်းသာတယ်။ ကိုယ်တွေ အသက်ကြီးလာရင် ဘာတွေ ပြင်ဆင်သင့်တယ်ဆိုတဲ့ စိတ်လေးလည်း ဖြစ်မိတယ်။ ကန်တော့ခွင့် ရတာကိုလည်း ပီတိဖြစ်ပါတယ်”လို့ မိတ်ကပ် မထက် (Pop Soul)က ပြောပါတယ်။
The post ဘဝတူ သက်ကြီး ပုဂ္ဂိုလ်များကို ကန်တော့ခဲ့ကြတဲ့ အလှဖန်တီးရှင်များရဲ့ ပီတိစကား appeared first on ဧရာဝတီ.