သီချင်းအေးအေးလေးတွေ သီဆိုတတ်တဲ့ ရှင်ဖုန်းက အစားအသောက် အရမ်းကြိုက်သူလည်းဖြစ်တာကြောင့် အိမ်မှာ အွန်လိုင်း Food Service လုပ်ငန်း လုပ်ကိုင်နေတယ်လို့ သိရပါတယ်။
“အနုပညာအလုပ်တွေ ဝေးနေတာက လူမှုရေးတွေရော စီးပွားရေးတွေရော အိမ်ထောင်ရေးတွေရောပေါ့။ နောက်ကိုယ်ကလည်း အစားအသောက် အရမ်းကြိုက်တဲ့ သူဆိုတော့ အိမ်မှာ အွန်လိုင်း food service ပေးနေတာ ရှိတယ်။ ‘မရွှေသော်’ ဆိုတဲ့ နာမည်လေးနဲ့ လုပ်နေတယ်။ မကြော်ငြာရသေးဘူး။ ကိုယ့်အသိ မိတ်ဆွေတွေ၊ အော်ဒါများတာတွေကိုပဲ လုပ်ပေးဖြစ်နေပါတယ်” လို့ ရှင်ဖုန်းက ပြောပါတယ်။
“ဆိုင်အနေနဲ့တော့ လုပ်ဖို့ မရှိဘူး။ ဆိုင်လုပ်ဖို့ အတွက် အချိန်မပေးနိုင်သလို လူလည်းပင်ပန်းတယ်။ စရိတ်လည်း ပိုကြီးတော့ ဆိုင်လုပ်ဖို့ စိတ်မပါဘူး။ အိမ်မှာပဲ ပျော်ပျော်ပါးပါး အော်ဒါတွေ လုပ်ပေးဖြစ်တယ်။ အိမ်မှာ မြန်မာမုန့်တွေ လုပ်တယ်။ သူငယ်ချင်းတွေကမှာရင်းနဲ့ လုပ်ပေးရင်း တဆင့်တဆင့်ကနေ လုပ်ဖြစ်သွားတာပါ။ မြန်မာအချိုပွဲလေးတွေ မြန်မာမုန့်လေးတွေရယ် နောက် မြန်မာထမင်းဟင်း၊ ထောပတ်ထမင်းတို့ မြီးရှည်တို့ မျိုးစုံပေါ့။ အကုန်ရတယ်။ အိမ်မှာ လုပ်စားနေကြဆိုတော့ တကူးတကကြီး သွားသင်စရာ မလိုဘူးပေါ့”လို့ ရှင်ဖုန်းက ဆိုပါတယ်။
ဂီတလောကနဲ့ ၅ နှစ်လောက် ဝေးကွာနေပြီဖြစ်တဲ့ ရှင်ဖုန်းက သူမရဲ့သီချင်းတွေကို cover song ပြန်လည်သီဆိုကြတဲ့အပေါ် ဝမ်းသာတယ်လို့လည်း ပြောပါတယ်။ သီချင်းတွေ ထွက်ဖို့ မရှိသေးတဲ့ ရှင်ဖုန်းက အွန်လိုင်းကနေလည်း Mini Album တွေ ထွက်နိုင်အောင် ကြိုးစားသွားမယ်လို့ ဆိုပါတယ်။
“သီချင်းတွေ ထွက်ဖို့ မရှိသေးဘူး။ ထွက်ဖြစ်ရင်တော့ ပြောပါမယ်။ ခွေကတော့ စီစဉ်တာ လွယ်လည်း မလွယ်ဘူ။း ကြာလည်းကြာတယ်ပေါ့။ တင်ဖြစ်ရင်တော့ အွန်လိုင်းကနေ တင်ဖြစ်ပါမယ်။ အခုကတော့ သီချင်းလည်း မရှာရသေးသလိုရှိလည်း မရှိသေးပါဘူး။ ဖျော်ဖြေပွဲတော့ တခါတလေသွားဖြစ်ပါတယ်။
“သီချင်းတွေကို cover song အနေနဲ့ ရှင်ဖုန်းရဲ့ သီချင်းတွေ ပြန်ဆိုတာတွေ့တယ်။ နီလန်းက ‘ခုံတန်းလေး’ကို ပြန်ဆိုတာတွေ့တယ်။ ပရိသတ်တွေ ခံစားမှုအသစ်ရတာပေါ့။ သူတို့လေးတွေပြန်ဆိုတာလည်းကောင်းပါတယ်။ တခါတလေ ကိုယ့်သီချင်းလေးတွေကို ပြိုင်ပွဲမှာဆိုတော့ ကြိုက်လည်းကြိုက်တယ်။ ဝမ်းလည်း ဝမ်းသာတယ်။ ရှင်ဖုန်းရဲ့ အချို့ သီချင်းလေးတွေက လွယ်တယ်။ လွယ်တော့ ပြိုင်ပွဲစည်းမျဉ်းနဲ့ မလိုက်ဖက်မှာတော့ စိုးရိမ်တာပေါ့။ ပြိုင်မယ်ဆိုရင်လည်း သေချာလေးရွေးကြပါပေါ့”
“ပြိုင်သင့်တဲ့ သီချင်းမျိုးကိုရွေးပြီး ပြိုင်တာကပို ပြီးတော့ အဆင်ပြေတယ်။ ပိုပြီးတော့ ကောင်းတယ်။ ၂၀၁၆ လောက်တုန်းက သီချင်းလေးတခွေထွက်ခဲ့တယ်။ တပုဒ်ကို Mini Album လေး ထွက်ဖြစ်အောင်တော့ ကြိုးစားပါ့ဦးမယ်”လို့ ရှင်ဖုန်းက ပြောပါတယ်။
အဆိုတော် ရှင်ဖုန်းကတော့ “တယ်လီဖုန်း”၊ “ကိုယ်ပိုင်တဲ့ ကိုယ့်နေရာ” စတဲ့ သီချင်းတွေနဲ့ ပရိသတ်ရင်ထဲရောက်ခဲ့ပြီး တကိုယ်တော် သီချင်းခွေများစွာလည်း ထွက်ရှိထားပါတယ်။
The post “မရွှေသော်” နာမည်နဲ့ Food Service လုပ်ငန်း လုပ်ကိုင်နေတဲ့ အဆိုတော် ရှင်ဖုန်း appeared first on ဧရာဝတီ.