Big Bag အဖွဲ့ရဲ့ပင်တိုင်အဆိုတော် ကျားပေါက် ကိုယ်တိုင်ရေးဆွဲထားတဲ့ #Knott Funni ဆိုတဲ့ ၁၈ နှစ်နဲ့အထက် အသက်အရွယ်များသာ ဖတ်ရှုရန် သတ်မှတ်ထားသော ကာတွန်းစာအုပ်ကို ကာတွန်းချစ်သူများအတွက် မိတ်ဆက်ရောင်းချခဲ့တယ်လို့ သိရပါတယ်။ ။
အဆိုပါ ကာတွန်းစာအုပ်ကို ငါတို့စာပေက ဖြန့်ချိကာ မြန်မာဘာသာ၊ စာမဲ့များနဲ့ သရုပ်ဖော်ထားတဲ့ ကာတွန်းများ စတာတွေအပြင် အင်္ဂလိပ်ဘာသာဖြင့် ရေးဆွဲဖော်ပြထားတဲ့ ကာတွန်းများလည်း ပါဝင်တယ်လို့ သိရပါတယ်။
“ကျနော့် ကာတွန်းစာအုပ်ကို ကျနော်ဘာသာတော့ ထုတ်လို့ရတယ်။ ဒါပေမယ့် မထုတ်ချင်ဘူး။ ကျနော့်ကို Publisher တယောက်က ကမ်းလှမ်းပြီးတော့ ထုတ်ပေးတာမျိုးကို ဖြစ်ချင်တယ်။ အဲဒီအတွက်လည်း စောင့်ခဲ့တယ်။ စောင့်ရကျိုးလည်း နပ်ခဲ့တယ်” လို့ ကျားပေါက်က ပြောပါတယ်။
ကျားပေါက်ရဲ့ #Knott Funni စာအုပ်ကို တအုပ်လျှင် ငွေကျပ် ၄၀၀၀ နှုန်းဖြင့် ဒီဇင်ဘာ ၁၈ ရက်နေ့စတင်ပြီး ငါတို့စာပေ မှ ဖြန့်ချိရောင်းချပေးလျက်ရှိကာ အွန်လိုင်းမှတဆင့် ဝယ်ယူချင်သူများအနေဖြင့် We Distribution မှ အိမ်တိုင်ရာရောက် ဝန်ဆောင်မှုဖြင့် ဝယ်ယူနိုင်တယ်လို့လည်း သိရပါတယ်။
တေးရေး တေးဆိုတဦးလည်းဖြစ်တဲ့ အဆိုတော် ကျားပေါက်ဟာ ယခုထွက်ရှိထားတဲ့ #Knott Funni ကာတွန်းစာအုပ်အပါအဝင် အင်္ဂလိပ်ဘာသာဖြင့် ရေးသားထားတဲ့ “The Strange Old Man” ၊ “ပစ်မှတ်အပြင်က စကားလုံးများ” စတဲ့ စာအုပ်များကိုလည်း ရေးသားထုတ်ဝေခဲ့ပါတယ်။
The post အဆိုတော် ကျားပေါက်ရဲ့ ၁၈ နှစ်အောက်မဖတ်ရ ကာတွန်းစာအုပ် ထွက်ရှိ appeared first on ဧရာဝတီ.