ပရိသတ်အချစ်တော် မင်းသမီး အကယ်ဒမီ ထက်ထက်မိုးဦးကတော့ ၂ နှစ်ကျော်ကြာ အစားလျော့၊ လေ့ကျင့်ခန်းလုပ်ကာ ဝိတ်ချခဲ့တယ်လို့ ဧရာဝတီကို ပြောပါတယ်။
“ခန္ဓာကိုယ်က ဝိတ်ကျအောင်လုပ်ဖို့က မလွယ်ဘူးပေါ့။ စပြီး ဝိတ်လျော့တုန်းက တလကို ၂ ပေါင်လောက်ကျဖို့ကို မလွယ်ဘူး။ အရမ်းခက်ခဲတယ်။ ကိုယ့်မှာ ရေသောက်လည်းဝ လေတိုက်လည်းဝနဲ့ဆိုတော့ ဒီ အရွယ်ကလည်း အမက ကလေးမွေးထားတာဆိုတော့ ဝမှာပဲလေ။ ဒါပေမယ့် ဆရာဝန်နဲ့ သေချာဆွေးနွေးပြီးတော့ လေ့ကျင့်ခန်းလုပ် အစား လျော့ပြီး ၂ နှစ်လောက်ကြာအောင် လျော့လိုက်ရတယ်”လို့ ထက်ထက်မိုးဦးက ပြောပါတယ်။
ကျန်းမာရေးအခြေအနေအရ ဆာဂျရီပြုလုပ်၍ မရတာကြောင့် ၂ နှစ်ကျော်ကြာ ဆရာဝန်နဲ့တိုင်ပင်ကာ လေ့ကျင့်ခန်းလုပ်ခြင်း၊ အစားလျော့ခြင်းဖြင့် ဝိတ်ချခဲ့ရတယ်လို့ ပြောပါတယ်။
ထက်ထက်မိုးဦးက လတ်တလောမှာတော့ အနုပညာလုပ်ငန်းများ ဆက်တိုက်လုပ်ဖြစ်နေပြီး ဇူလိုင်လ ၂၀ ရက် နေ့မှာတော့ MRTV 4 က ရိုက်မယ့် ဇာတ်လမ်းတွဲတခုမှာလည်း ပါဝင်သွားဖို့ရှိတယ်လို့ သိရပါတယ်။
ပြီးခဲ့တဲ့ရက်ပိုင်းလောက်က ဆေးရုံတက်ရတဲ့အကြောင်းကို မေးကြည့်တဲ့အခါ “အဲဒီရက်က အမျိုးသားကဇာတ်ရုံ မှာလုပ်တဲ့ အမျိုးသမီးရေးရာပွဲမှာ ကရင်းနဲ့တုပ်ကွေးဖြစ်တာပေါ့။ အဖျားက ၁၀၄ က မကျဘူး။ အဲဒီနေ့က မနက် အစောကြီး ရေချိုးခေါင်းလျှော်လိုက်တာ ကြာသွားတာရယ်၊ အလုပ်ပင်ပန်းတာတွေရယ်ကြောင့်ပေါ့။ ဝိတိုရိယမှာ ၄ ရက်ကြာသွားတယ်။ အခုတော့နေကောင်းသွားပါပြီ” လို့ ပြောပါတယ်။
The post ၂ နှစ်ကျော်ကြာ ဝိတ်လျော့ခဲ့တဲ့ ထက်ထက်မိုးဦး appeared first on ဧရာဝတီ.