ထူးအိမ်သင်၏ သီချင်းပေါင်းချုပ် (ဓာတ်ပုံ – ယုမွန်ကျော်/ဧရာဝတီ)
ကွယ်လွန်သွားပြီဖြစ်တဲ့ တေးရေး၊ တေးဆို ထူးအိမ်သင်ရဲ့ သီချင်းတွေကို စုစည်းပြီး သီချင်းပေါင်းချုပ်အဖြစ် ပြန်လည် ထုတ်ဝေမယ်လို့ သိရပါတယ်။
အဲ့ဒီတေးသီချင်းပေါင်းချုပ်ကို ထူးအိမ်သင်ရဲ့ ကွယ်လွန်ခြင်း ၁၂ နှစ်ပြည့် အမှတ်တရ အနေနဲ့ ထုတ်ဝေတာလည်း ဖြစ်ပါတယ်။ ဒီ တေးသီချင်းပေါင်းချုပ် အမည်ကို “ထူးအိမ်သင်၏ သီချင်းပေါင်းချုပ်” လို့ ပေးထားပြီး သီချင်း စုစုပေါင်း ၄၀၀ နီးပါး ပါဝင်မယ်လို့ သိရပါတယ်။
“ကိုငှက်ရဲ့ ကွယ်လွန်ပြီး ၁၂ နှစ် အမှတ်တရအနေနဲ့ သီချင်းတွေကို တစုတစည်းတည်း လုပ်ပေးနိုင်ခဲ့တဲ့အတွက် ကျမ ၀မ်းသာပါတယ်။ သီချင်းတွေ စုစည်းပြီး ပြန်ထုတ်ဖို့တော့ မရှိသေးပါဘူး။ ဒီ စာအုပ်လေးကျတော့ သူ့သီချင်းလေးတွေ ဂစ်တာတီးပြီး ပြန်ဆိုချင်ကြတဲ့သူတွေအတွက် ပြန်ရှာရရင် လွယ်သွားအောင် တစုတစည်းတည်း ထုတ်လိုက်တဲ့ သဘောပါ” လို့ သီချင်းများကို ပြန်လည်စုစည်းပေးထားတဲ့ ထူးအိမ်သင်ရဲ့ဇနီးဖြစ်သူ ဒေါ်သွယ်သွယ်ထွေးက ဧရာဝတီကို ပြောပါတယ်။
ဒါ့အပြင် အဲ့ဒီ တေးသီချင်းပေါင်းချုပ်မှာ ထူးအိမ်သင်ရဲ့ တကိုယ်တော်ခွေ ၁၄ ခွေထဲက တေးသီချင်းတွေ အားလုံး ပါဝင်ကြောင်း၊ တခြားသော အတွဲခွေများမှာ ထူးအိမ်သင် သီဆိုထားတဲ့ တေးသီချင်း တချို့တော့ မပါဝင်ကြောင်း သူက ဆက်ပြောပါတယ်။
အဆိုတော် ထူးအိမ်သင်ရဲ့ ဇနီးဖြစ်သူ ဒေါ်သွယ်သွယ်ထွေးနဲ့ သမီး မိကွန်ထော (ဓာတ်ပုံ- ယုမွန်ကျော်/ ဧရာဝတီ)
“တတ်နိုင်သမျှတော့ အကုန်နီးပါးပါအောင် ကျမ စုစည်းထားပါတယ်။ ဟိုးအရင် ကက်ဆက်ခွေခေတ်က သီချင်းတွေတော့ မပါဘူး။ ဘာဖြစ်လို့လဲဆိုတော့ တချို့သီချင်းတွေဆို ဘယ်သူရေးပေးမှန်းတောင် မသိတော့တဲ့ သီချင်းမျိုး တွေပေါ့” လို့ ဒေါ်သွယ်သွယ်ထွေးက ရှင်းပြပါတယ်။
တေးသီချင်း ပေါင်းချုပ်ထဲမှာ ပါဝင်မယ့် ထူးအိမ်သင်ရဲ့ တကိုယ်တော်ခွေ ၁၄ ခွေကတော့ နာရီပေါ်က မျက်ရည်စက်များ၊ မှော်ဆရာအိပ်မက်၊ သက်ငြိမ်၊ အတ္တပုံဆောင်ခဲများ၊ အကြင်နာအိပ်မက်၊ အရင်အတိုင်း၊ စကားလုံးမရှိတဲ့ ကောင်းကင်၊ မြို့ပြလရောင်တမ်းချင်း၊ ၀င်ရိုးစွန်းမီး၊ အကြွင်းမဲ့ မေတ္တာတော်သီချင်း (သို့) အမေ၊ အစိမ်းရောင်ရက်စွဲများ၊ အမှတ်တရဒဏ်ရာ သီချင်းများ၊ တနေ့စာအလွဲများ၊ ချစ်ခြင်းအားဖြင့် တို့ပဲ ဖြစ်ပါတယ်။
ထူးအိမ်သင်ရဲ့ သီချင်းပေါင်းချုပ်စာအုပ်ကို စိတ်ကူးချိုချို စာအုပ်တိုက်ကနေ သြဂုတ်လ ၅ ရက်နေ့မှာ စတင်ဖြန့်ချိ ရောင်းချပေးမှာဖြစ်ပြီး တအုပ်ကို ၅၅၀၀ ကျပ်ဖြစ်ကြောင်း သိရပါတယ်။
The post ထူးအိမ်သင် သီချင်းပေါင်းချုပ် စာအုပ် ထွက်မည် appeared first on ဧရာဝတီ.