ဇာတ်လမ်းတွဲများနဲ့ ပရိသတ်သိရှိခဲ့တဲ့ သရုပ်ဆောင် ခြူးလေးကတော့ တခြားသော ဇာတ်လမ်းများမှာ သရုပ်ဆောင်ရတာထက် ဟာသကားတွေကို သရုပ်ဆောင်ရတာ ခက်ခဲတာကြောင့် Tik Tok မှာ Training ဆင်းနေတယ်လို့ ပြောပါတယ်။
“ဟာသကား ရိုက်ဖို့အတွက် အစီအစဉ် ရှိပါတယ်။ နောက်ထပ် ဟာသကား ရုံကြီးကားတွေလည်း ရှိသေးတယ်။ ၂ကားလောက် ရှိသေးတယ်။ အဲဒီအချိန်မှာက မျက်နှာပိုး သေသွားပြီ။ ဒါပေမယ့် ရယ်ချင်နေတုန်းပဲ။ အခုအချိန်ထိ လည်း ရယ်ချင်နေတုန်းပဲ။ နောက်ထပ် ကမ်းလှမ်းလာရင်လည်း ကြိုးစားဦးမှာပါ။ အဲဒီအတွက်လည်း ခြူးလေးက Tik Tok မှာ Training တွေအများကြီး ဆင်းထားတယ်”လို့ ခြူးလေးက ပြောပါတယ်။
သူမ ပထမဆုံး ရိုက်ကူးခွင့်ရခဲ့ပြီး လွန်ခဲ့တဲ့နှစ်များက ရိုက်ကူးထားခဲ့တဲ့ “ဘာညာဘာညာ” ဆိုတဲ့ ဟာသရုပ်ရှင် ဇာတ်ကားကြီးမှာလည်း ပါဝင်ရတဲ့ အခန်းနည်းသော်လည်း သရုပ်ဆောင်ကြီးများနဲ့ ရိုက်ခွင့်ရတာကြောင့် လက်လွတ်မခံဘဲ ရိုက်ကူးခဲ့တာဖြစ်တယ်လို့ သိရပါတယ်။
“အဲဒီအချိန်က အဲဒါတွေ မစဉ်းစားဖြစ်ဘူး။ ရုပ်ရှင်ကားကြီး ရိုက်ဖူးချင်တာဆိုတော့လေ။ ဗီဒီယိုတောင် ၂ကားပဲ ရိုက်ဖူးသေးတာ။ အဲဒီလောက်ပဲ ရိုက်ရသေးတဲ့အချိန်မှာ ရုံကြီးကားကမ်းလှမ်းတယ်ဆိုတော့ ဘာပဲဖြစ်ဖြစ် လက်လွတ်မခံဘဲ လက်ခံရမှာပဲ။ အဲဒီအချိန် ခြူးတို့လိုမျိုး တက်သစ်စတွေက ဒီတိုင်းတောင် ရိုက်ပေးနေရတဲ့အချိန်မှာ အနုပညာကြေးလေးနဲ့ တန်းလေးတခု ထားပြီးပေးတယ်ဆိုတော့ အတိုင်းမသိ အရမ်းပျော်တာပေါ့။ လိုအပ်ချက်တွေရှိပေမယ့် အရမ်းပျော်ပါတယ်” လို့ ခြူးလေးကပြောပါတယ်။
သရုပ်ဆောင်အသစ်တယောက်အနေနဲ့ ဟာသဇာတ်ရုပ်က အခက်အခဲရှိတဲ့အကြောင်းကိုလည်း အခုလို ပြောပြခဲ့ပါတယ်။
“ဟာသက အရမ်းခက်ခဲတာပေါ့နော်။ ကိုယ်က ပရိသတ်ကို ရယ်စရာအဖြစ် ရယ်ခိုင်းတဲ့အချိန်မှာ ကိုယ်ကရုပ်တည်ကြီးနဲ့ နေရတယ်။ တကယ်ရယ်စရာကောင်းနေတာကို ကိုယ်ကမရယ်ဘဲနဲ့ နေရတော့ စိတ်ထဲမှာ မျိုသိပ်ထားရတော့ ဗိုက်တွေတောင် အောင့်တယ်။ ကိုယ်ကလည်း အရယ်သန်တော့လေ။ ခြူးလေးက ဒရာမာတွေသာ လုပ်လို့ရတာ။ ဟာသက အခုချိန်ထိ ကြိုးစားနေရတုန်း” လို့ ခြူးလေးကပြောပါတယ်။
လတ်တလောမှာလည်း သရုပ်ဆောင်အတွက် ဖိလစ်ပိုင်ဆရာနဲ့ Training များပြုလုပ်နေပြီး အဆိုသင်တန်းလည်း တက်နေတယ်လို့သိရပါတယ်။
“အခုလောလောဆယ်ကတော့ ဓာတ်ပုံတွေ ရိုက်နေတယ်။ နောက်ပြီး သရုပ်ဆောင်အတွက် Training တွေ တက်နေတယ်။ ဖိလစ်ပိုင်ကဆရာနဲ့။ အဆိုသင်တန်းလည်း တက်နေတယ်။ ဒီလကတော့ သင်တန်းပဲတက်မယ်။ ၆ လပိုင်းကတော့ ရုံကြီးကားရိုက်ဖို့ ရှိပါတယ်။ ခေါင်းဆောင်အနေနဲ့ ပထမဆုံး သရုပ်ဆောင်ရမှာပါ” လို့ ခြူးလေးက ပြောပါတယ်။
ခြူးလေးကတော့ ယခုနှစ်မှာ ကျင်းပပြီးစီးသွားခဲ့တဲ့ အကယ်ဒမီထူးချွန်ဆုပေးပွဲရဲ့ နောက်ဆုံးဆန်ခါတင် အမျိုးသမီးဇာတ်ပို့ ၃ ဦးထဲမှာ “မိုးပန်းပွင့်ရဲ့သင်္ကေတ” ဇာတ်ကားနဲ့ ပါဝင်ခဲ့သူတယောက်ဖြစ်ပါတယ်။ မကြာခင် ဇွန်လအတွင်းမှာလည်း ခေါင်းဆောင်မင်းသမီးတယောက်အနေနဲ့ ရုပ်ရှင်ကားကြီးတကားရိုက်သွားဖို့ရှိတယ်လို့ သိရပါတယ်။
The post ဟာသကားတွေ ရိုက်ရင် မရယ်မိအောင် ကြိုးစားနေရသေးတယ်လို့ ပြောတဲ့ ခြူးလေး appeared first on ဧရာဝတီ.