နာမည်ကျော်ကြားလူကြိုက်များလာခဲ့တဲ့ Game of Thrones တီဗီစီးရီးဟာ နောက်ဆုံး Season ရဲ့ ပထမဆုံး Episode ကို စတင်ပြသခဲ့ပြီး ပရိသတ်တွေရဲ့ အားပေးမှုကိုလည်း တခဲနက်ဆိုသလို ဆက်လက်ရရှိခဲ့တာဖြစ်ပါတယ်။
ကမ္ဘာအနှံ့အပြားက စီးရီးရဲ့ ပရိသတ်တွေကလည်း ပြသခဲ့ချိန်မှာရော ပြသနေတုန်းမှာပါ သူတို့နည်း သူတို့ဟန်တွေနဲ့ တမူထူးခြားဆန်းသစ်လှတဲ့ ဗီဒီယိုတွေ ၊ ဓာတ်ပုံတွေနဲ့အတူ အခိုက်အတန့်တိုင်းကို မှတ်တမ်းတင်ခဲ့ကြတာဖြစ်ပါတယ်။ စီးရီးရဲ့ ပရိသတ်တွေဖြစ်တဲ့ နော်ဝေးနိုင်ငံ Trondheim မြို့ ရဲဌာနမှာ တစုတဝေးထဲတွေ့မြင်ရမှာပါ။
စီးရီးရဲ့ အထူးခြားဆုံးဇာတ်ကောင်ဖြစ်တဲ့ Nihgt King ဟာ ဒဏ္ဍာရီလာသက်ရှိတယောက်ဖြစ်ပြီး မသေဆုံးနိုင်တဲ့ များပြားလှတဲ့ White Walkers တွေနဲ့ ဖွဲ့စည်းထားတဲ့ စစ်တပ်ကို ပိုင်ဆိုင်ထားတာဖြစ်ပါတယ်။ Trondheim မြို့ ရဲ့ ရဲဌာနက ဝန်ထမ်းအများစုဟာ စီးရီးရဲ့ အမာခံပရိသတ်တွေဖြစ်သလို သူတို့အနေနဲ့လည်း နောက်ဆုံး Season ကို ကြည့်ရှုရင်း ပျော်ရွှင်ဖွယ် အမှတ်တရတခုဖြစ်ဖြစ် ဖန်တီးချင်ခဲ့ကြတာဖြစ်ပါတယ်။
မြို့ရဲ့ ရဲဝန်ထမ်းတဦးဖြစ်တဲ့ Kristian Akselsen က “ကျနော်တို့ရဲ့ လုပ်ဖော်ကိုင်ဖက် တယောက်က Night King မျက်နှာဖုံးတခုနဲ့ လိမ္မော်ရောင် အကျဉ်းထောင်အင်္ကျီကို သူ့အိမ်နီးနားချင်းဆီကနေ ငှားယူလာခဲ့တာပေါ့။ အခြားဝန်ထမ်းတွေကတော့ ရတဲ့ပစ္စည်းနဲ့ ရသလိုလုပ်ကြတာပဲ။ ကျနော်တို့အားလုံး ထမင်းစားနားချိန်မှာပဲ ကျနော်တို့ စိတ်ကူးကို အကောင်အထည်ဖော်ခဲ့ကြတော့တာ”လို့ အင်တာဗျူးတခုမှာ ဖြေကြားသွားခဲ့ပါတယ်။
သူတို့ရဲ့ စိတ်ကူးကတော့ ရဲဌာနရဲ့ Page မှာ ဓာတ်ပုံတပုံ မျှဝေဖို့ဖြစ်ပြီး အဲဒီဓာတ်ပုံထဲမှာ Night King ဟာ လက်ထိပ်ခတ်ခံထားရတဲ့အပြင် ရာဇဝတ်မှုကျူးလွန်ကြောင်း မှတ်တမ်းတင်ထားတဲ့ပုံပဲဖြစ်ပါတယ်။
“ကျနော်တို့ အသက်မွေးဝမ်းကျောင်းအလုပ်က အမြဲလိုလို ခက်ခဲပင်ပန်းပါတယ်။ ဒါပေမဲ့ တခါတလေမှာလည်း ပျော်ပျော်ရွှင်ရွှင် ပေါ့ပေါ့ပါးပါးရှိဖို့လိုအပ်ပါသေးတယ်။ ဒါကြောင့်ပဲ ကျနော်တို့ အခုလိုဝတ်ဆင်ပြီး ဓာတ်ပုံရိုက် ၊ ဌာနရဲ့ Facebook Page ကို အသုံးချပြီး Night King ပုံကို ပြန်မျှဝေဖြစ်ခဲ့တာပါ။ ဒီလိုလုပ်လိုက်ခြင်းအားဖြင့် လူတွေရဲ့ ဂရုစိုက်မှုကိုရနိုင်မယ်။ ဥပမာ လူပျောက်ကြော်ငြာလိုမျိုး အမှုတွေအတွက် အထောက်အကူဖြစ်သွားနိုင်တာပေ့ါ” လို့ Kristian က ဆက်လက်ဖြည့်စွက်ပြောဆိုသွားခဲ့ပါတယ်။
လွန်ခဲ့တဲ့ Season က ဇာတ်ဝင်ခန်းတခုမှာတော့ Night King ဟာ Daenerys ရဲ့ နဂါးတကောင်ကို သတ်ပစ်ခဲ့တာဖြစ်ပြီး သူ့အတွက် ပြန်လည်အသက်သွင်းကာ နံံရံကို ဖြိုချဖို့ အသုံးပြုခဲ့တာဖြစ်ပါတယ်။ ဒီဓာတ်ပုံဟာ Night King ကျူးလွန်ခဲ့တဲ့အမှုကို ရဲဋ္ဌာနအနေနဲ့ အရေးယူတယ်လို့တောင် ပေါ့ပေါ့ပါးပါးတွေးယူနိုင်ပါသေးတယ်။
ဋ္ဌာနတခုလုံးရဲ့ ဝန်ထမ်းအများစုဟာ အခုလိုဓာတ်ပုံတင်ပြီးတဲ့နောက်ပိုင်းမှာ Trondheim မြို့သူမြို့သားတွေဟာ တာဝန်သိဌာနဝန်ထမ်းတွေရဲ့ ကာကွယ်စောင့်ရှောက်မှုအောက်မှာ အေးအေးဆေးဆေးအိပ်စက်အနားယူ နိုင်မှာဖြစ်တယ်လို့ စိတ်အားထက်သန်စွာ ယုံကြည်လျက်ရှိကြပါတော့တယ်။
Ref. www.boredpanda.com
The post နံရံဖျက်ဆီးမှုနဲ့ Night King ကို နော်ဝေးရဲများ ဖမ်းဆီးအရေးယူတဲ့ပုံများ အပျော်ရိုက်ကူး appeared first on ဧရာဝတီ.