ဒါရိုက်တာ Richie Mehta ရိုက်ကူးတဲ့ ရဲလုပ်ငန်းနောက်ခံစီးရီး “Delhi Crime” ကို လာမယ့် မတ်လ ၂၂ ရက်နေ့၊ Netflix မှာ ကြည့်ရှုနိုင်တော့မယ်လို့ ဇန်နဝါရီလ ၂၉ ရက်နေ့မှာပဲ ကြေညာလိုက်ပါတယ်။ အပိုင်း ၇ ပိုင်းပါဝင်မယ့် အဲဒီ စီးရီးကိုတော့ 2019 Sundance Film Festival မှာ ပွဲဦးထွက်အဖြစ်ပြသခဲ့ပါတယ်။
“Delhi Crime” ရဲ့ ပထမဆုံး Season ကို ၂၀၁၂ ခုနှစ်တုန်းက ဒေလီမှာဖြစ်ခဲ့တဲ့ အုပ်စုဖွဲ့မုဒိန်းကျင့်မှု ဖြစ်ရပ်နဲ့ ဇာတ်အိမ်တည်ထားပါတယ်။ မင်းသမီး Shefali Shah က အဲဒီ့အဖြစ်အပျက်နောက်ကွယ်က ကြောက်မက်ဖွယ် အမှန်တရားတွေကို စုံစမ်းဖော်ထုတ်ရမယ့် ဒေလီအမျိုးသမီး ရဲအရာရှိ Vartika Chaturvedi အဖြစ် သရုပ်ဆောင်ထားပါတယ်။
အဲဒီ စီးရီးမှာ မင်းသမီး Shefali အပြင် Rasika Dugal, Rajesh Tailang နဲ့ Adil Hussain တို့လည်း ပါဝင်ထားကြပါတယ်။ သူတို့တွေဟာ ကျူးလွန်သူတွေကို ပစ်ဒဏ်ချမှတ်နိုင်ဖို့ စုံစမ်းစစ်ဆေးရမယ့် အဖွဲ့တခုမှာ ပါဝင်ခဲ့ပါတယ်။
အဲဒီ စီးရီးနဲ့ ပတ်သက်လို့ ဒါရိုက်တာ Richie က “Delhi Crime ဒရာမာကို ဖန်တီးရတာဟာ ကိုယ်ကိုတိုင်ပြောင်းလဲသွားရတဲ့ ခရီးဖြစ်ပါတယ်။ အဲဒီအဖြစ်အပျက်မှာ ပါဝင်ခဲ့သူတိုင်းကို စကားပြောခဲ့ရတယ်။ စုံစမ်းစစ်ဆေးနေချိန်အတွင်းမှာ ရဲတပ်ဖွဲ့တွေ လိုက်ခဲ့ရတဲ့ လမ်းကြောင်းအတိုင်း လိုက်ခဲ့ရတယ်။ အကန့်အသတ် တော်တော်များများ ရှိခဲ့ပေမယ့် အမှုကို ပိတ်နိုင်တဲ့အချိန်အထိ ကြားနာမှုတွေ ပါဝင်ပါတယ်”လို့ ပြောဆိုထားပါတယ်။
ဒေလီမှာပဲ ရိုက်ကူးခဲ့တဲ့ ဒီစီးရီးမှာတော့ သုတေသနအလုပ်အတွက် အချိန် ၆ နှစ်လောက် ယူခဲ့ရတယ်လို့ ဆိုပါတယ်။ ပြီးတော့ တကယ့်ဖြစ်ရပ်ကို စုံစမ်းစစ်ဆေးခဲ့တဲ့နေရာမှာ တစိတ်တပိုင်း ပါဝင်ခဲ့ရတဲ့ တရားရေးဆိုင်ရာမှတ်တမ်း ရာနဲ့ချီတဲ့ စာရွက်စာတမ်းတွေကို ပေးအပ်ခဲ့ပြီး စုံစမ်းရေးအဖွဲ့ကိုလည်း မိတ်ဆက်ပေးခဲ့တဲ့ ဒေလီရဲတပ်ဖွဲ့ကော်မရှင်နာမင်းကြီးဟောင်း Neeraj Kumar နဲ့လည်း တွေ့ဆုံစကားပြောနိုင်ခဲ့တယ်လို့ ဆိုပါတယ်။
အခုဇာတ်လမ်းဟာ တာဝန်ယူမှုနဲ့ အကဲဆတ်မှုတို့ရဲ့ အရေးကြီးတဲ့ ဇာတ်လမ်းတစ်ခုကို ပုံဖော်ထားတဲ့ အကြောင်းဖြစ်ပြီး အိန္ဒိယနဲ့ ကမ္ဘာတဝန်းက ပရိသတ်တွေကို ပြသနိုင်မှာဖြစ်တာကြောင့် ဂုဏ်ယူမိတယ်လို့ Netflix မှ တာဝန်ရှိသူ Simran Sethi ကဆိုပါတယ်။
Ref: indianexpress
The post အိန္ဒိယမှ အုပ်စုဖွဲ့ မုဒိမ်းကျင့်မှုများအကြောင်း ရိုက်ထားတဲ့ “Delhi Crime” စီးရီး မကြာမီ ပြမည် appeared first on ဧရာဝတီ.