ဆီးချိုသွေးချိုရောဂါနဲ့ ကျောက်ကပ်ရောဂါများကြောင့် မျက်လုံးကွယ်နေပြီး အနုပညာအလုပ်များကိုမလုပ်နိုင်တော့တဲ့ လူရွှင်တော်ကြီး မန်းဝင်းကတော့ ကျန်းမာရေးမကောင်းတဲ့ အချိန်များမှာ တချိန်ကပြက်လုံးများနဲ့ ပျော်မွေ့ခဲ့တဲ့ လူရွှင်တော် ဘဝကို အောက်မေ့သတိရကာ တချို့သော ပွဲများမှာ ထိုင်ပြီးပြက်လုံးပြက်လို့ရပါသေးတယ်လို့ ဧရာဝတီကို ပြောပါတယ်။
“ဦးမန်းက ပိုက်ဆံမရရင် နေပါစေ။ အငြိမ့်တွေ ကချင်တယ်။ ပြက်လုံးတွေ ပြက်လိုက်ချင်တယ်။ ရုပ်ရှင်တွေ၊ ဗီဒီယိုတွေ ရိုက်လိုက်ချင်တယ်။ ကျန်းမာရေးမကောင်းတော့ ဘယ်သူကမှ လာမခေါ်တော့ ကိုယ်က ငေါင်နေရော။ ဟိုတုန်းကဟာတွေ စဉ်းစား၊ ကခဲ့တာတွေ စဉ်းစားနဲ့ပဲ တနေကုန် တနေကုန်ရင်းနဲ့ပဲ အသက် ၇၅ နှစ်ကျော်လာပြီ။ အလှူပဲဖြစ်ဖြစ် မင်္ဂလာဆောင်ပဲဖြစ်ဖြစ် ဆွမ်းကျွေးပဲဖြစ်ဖြစ်ပျော်ပွဲရွှင်ပွဲတွေမှာ ဦးမန်းထိုင်ပြီး ပြက်လုံးပြက်လို့ရပါတယ်။ ပိုက်ဆံကို ပေးချင်လည်းပေး မပေးချင်လည်းရပါတယ်” လို့ လူရွှင်တော် ဦးမန်းဝင်းက ပြောပါတယ်။
မျက်လုံး ၂ ဖက်လုံးကလည်း ဆိးချိုသွေးချိုဖြစ်ခဲ့တဲ့ ဒဏ်တွေကြောင့် သဲသဲကွဲကွဲ မမြင်ရတော့ဘဲကျောက်ကပ်ကိုလည်း ၂ ရက်ကို တခါဆေးနေရတယ်လို့ သိရပါတယ်။
“ဆီးချိုသွေးချိုက ၂၂ နှစ်ဖြစ်တယ်။ အဲဒီဆီးချိုသွေးချိုကို နင်းကုတာ။ ဆိုးကျိုးက ဘာမှမရှိဘူးလို့ထင်တာလေ။ ဆီးချိုသွေးချို ဆေးတွေစားရင်းနဲ့ ကျောက်ကပ်ကို သွားထိတာ။ ဆီးချိုက ၄၄၄ ထိတက်သွားပြီးတော့ သွေးကြောတွေ ပေါက်ထွက်ကုန်တာ။ လင်းတော့ လင်းတယ်။ အဖြူပလိန်းကြီးတော့။ မင်တော့မြင်တယ်။ မိန်းမယောကျာ်း ခွဲမရဘူး” လို့ ဦးမန်းဝင်းက ပြောပါတယ်။
လက်ရှိမှာတော့ ကျန်းမာရေးအခြေအနေမှာ အလှူရှင်များကြောင့် သက်သာလျက်ရှိပြီး အစားလည်းပုံမှန်စားဖြစ်တယ်လို့ သိရပါတယ်။
“အခုတလောကျန်းမာရေးကတော့ အလှူရှင်တွေကြောင့် ကောင်းနေတယ်။ ကျောက်ကပ်ဆေးတာတလကို ၁၀ သိန်းကုန်တယ်။ ၂ ရက်ကို တခါဆေးနေရတယ်။ အလှူရှင်တွေကတော့ ကြိုက်သလောက်စား၊ ကြိုက်သလောက်လှူ ဘာမှမပူနဲ့။ အဲဒါတွေကြောင့် ကျန်းမာပြီး အောင်မြင်လာတယ်။ အရင်ကဆို အစားမစားချင်ဘူး။ အခုဆို မနက်ဘာစားမလဲ ဆိုတာကို ညကတည်းက ပြောထားပြီးသားပဲ” လို့ ဦးမန်းဝင်းက ပြောပါတယ်။
ယခင်က လူရွှင်တော်တယောက်ဖြစ်တဲ့အတွက် အခုချိန်မှာတော့ အိမ်မှာစကားပြောဖော် မရှိဘဲနေ့စဉ်ဖြတ်သန်းနေရတဲ့ အခက်အခဲမှာတော့ အထီးကျန်ပြီး တခါတခါ သေချင်စိတ်ဖြစ်မိတယ်လို့ဦးမန်းဝင်းက ပြောပါတယ်။
“နေ့တိုင်းကို ဘယ်လိုဖြတ်သန်းလဲဆိုရင် ကိုယ့်ကိုယ်ကိုယ် သေတောင်သေချင်တယ်။ ဘာလို့သေချင်လဲဆိုရင် ကိုယ်လုပ်ချင်တာလည်း မလုပ်ရဘူး။ ပရိသတ်ကိုလည်း ဟာဒယရွှင်ဆေးလည်း မတိုက်ကျွေးရဘူး။ အိမ်မှာလည်း ကိုယ်က တလမှ မဟုတ်တာ နှစ်နဲ့ချီပြီး ကျန်းမာရေးက ချို့တဲ့နေတော့သားသမီးတွေကလည်း သူ့အလုပ်နဲ့သူ ကိုယ့်ကိုလည်း စကားပြောနိုင်တဲ့အချိန် မရှိတာက များနေတော့ စကားပြောမယ့်သူ ဘယ်ကနေဘ ယ်လိုလာမလဲဆိုတာ ထိုင်ပြီး အိပ်ငိုက်ပြီး အိပ်ရတာလည်းငြီးငွေ့နေတော့ စကားပြောမယ့်သူပဲရှာပြီး အထီးကျန်ကြီးဖြစ်နေတာ”လို့ ဦးမန်းဝင်းက ပြောပါတယ်။
လူရွှင်တော်ကြီး မန်းဝင်းကတော့ လက်ရှိမှာ ဆီးချိုသွေးချိုရောဂါကြောင့် အမြင်အာရုံချို့တဲ့သွားပြီး ကျောက်ကပ်မကောင်းတော့တဲ့အတွက်း ၂ ရက်ကို တကြိမ် ကျောက်ကပ်ဆေးနေရတယ်လို့ သိရပါတယ်။
The post ပိုက်ဆံ မရရင် နေပါစေ၊ ပွဲတွေမှာ ပြက်လုံးတွေ ပြက်ချင်သေးတဲ့ လူရွှင်တော် မန်းဝင်း appeared first on ဧရာဝတီ.