မြို့ရွှေမန်းသား ဖိုးချစ်က “ထာဝရဝိန့်စိန်” စိန်ရွှေရတနာဆိုင်နဲ့ ပူးပေါင်းပြီး ပရဟိတလုပ်ငန်းများနဲ့ အနုပညာလုပ်ငန်းများ လုပ်ဆောင်သွားမှာ ဖြစ်ပြီး၂၀၁၉ ခုနှစ်မှာ ပုဂံနဲ့ ပတ်သက်တဲ့ ပြဇာတ်တခုလည်း ကဖို့ရှိတယ်လို့ မီဒီယာတွေကို ပြောပါတယ်။
“၅ လပိုင်းလောက်ကတည်းက မီဒီယာနဲ့ မတွေ့ဆုံဖြစ်တာ။ ဝိန့်စိန်ရွှေဆိုင်နဲ့ သူတို့သွားမယ့်လမ်းကြောင်းတွေမှာ ကျနော်ပါဝင်ဖို့ ရှိတယ်။ ပရဟိတတွေ၊ ရိုးရာယဉ်ကျေးမှုတွေ အကြောင်း ကျနော်တို့ အတူတကွ ပူးပေါင်း လုပ်ဆောင်သွားမယ်”
“၂၀၁၉ မှာ သီးခြားပြဇာတ်နဲ့ နှစ်ပါးသွား ကဖို့ လုပ်တယ်။ ဆရာ မြို့တော်မောင်ရင်အောင်က မပြောသေးလို့ ကျနော်စောင့်နေတယ်။ ဆရာပြောရင် ကပါ့မယ်။ ကျိုက်ခေါက်ဘုရားပွဲမှာလည်း ကပြလို့ကောင်းမှာတွေကို အများကြီး ကပြမှာပါ။ ပုဂံနဲ့ ပတ်သက်တဲ့ ပြဇာတ်တခုလည်း ကဖို့လုပ်နေပါတယ်”လို့ ဖိုးချစ်က ပြောပါတယ်။
“၂၀၁၈ မှာ လုပ်ခဲ့တဲ့ ကုသိုလ်၊ အကုသိုလ်တော့ ပြန်စစ်ကြည့်တယ်။ ကျနော် ဒီနေ့ အကုသိုလ် ဘယ်လောက်များသွားလဲ။ ကုသိုလ် ဘယ်လောက်လုပ်နိုင်လဲ။ လူတော်တော်များများက အောင်မြင်မှုနဲ့ တိုင်းတာတယ်။ လူငယ်တယောက်အနေနဲ့ တမျိုးပဲလို့ မြင်တယ်။ သူဘယ်လောက်အောင်မြင်လဲ ဆိုတာထက် သူဘယ်လောက် စိတ်ချမ်းသာလဲရယ်။ သူဝါသနာပါတဲ့ အလုပ်တွေမှာ ဘယ်လောက် စိတ်နှစ်ပြီးလုပ်လဲ ဆိုတာပိုအရေးကြီးတယ်”လို့ ဖိုးချစ်က ပြောပါတယ်။
ဒီဘက်ခေတ်မှာ ဖျော်ဖြေရေးကို ဦးစားပေးသွားရင်းနဲ့ ဇာတ်သဘင်ဆိုတာ ပွဲအဆင့်ပဲ ရှိပြီး ရိုးရာယဉ်ကျေးမှုနဲ့ ပတ်သက်ရင် ဇာတ်ခုံတွေပေါ်မှာ နည်းနေသေးတာကြောင့် များအောင်ကြိုးစားရမယ်လို့ ဖိုးချစ်က ပြောပါတယ်။
“ကျနော်တို့ ကပြနေတာတွေကို ဇာတ်လို့ မတတ်ရသေးဘူး။ မပြည့်စုံဘူး။ မမှန်ဘူး။ ပွဲလို့ပဲ တတ်ရမယ်။ ဇာတ်ဆိုတာ ပါဠိစကား ဇာတက ကလာတာ။ ဇာတ်တော် ဗုဒ္ဓဝင်၊ မဟာဝင်၊ရာဇဝင် မြန်မာရာဇဝင် ဇာတ်တော်ကြီးတွေကို ကလို့ ဇာတ်သဘင်လို့ ခေါ်တာ။ ကျနော်တို့က ဒီဘက်ခေတ်မှာ ဖျော်ဖြေရေးကို ဦးစားပေးသွားရင်း သွားရင်းနဲ့ ဇာတ်သဘင် ဆိုတာ ပွဲအဆင့်ပဲ ရှိနေကြသေးတယ်”
“ကျနော်က ဇာတ်သဘင်လောကကို ရောက်လာကတည်းက ကျနော် စတိတ်ရှိုးတွေကို သိပ်မလုပ်ခဲ့ပါဘူး။ နှစ်ပါးသွားပြဇာတ်တို့ကို သေချာ ကခဲ့တယ်။ ကျနော်အခုလိုပြောတာ ခေတ်ပေါ် အနုပညာကို စော်ကားလိုစိတ် မရှိပါဘူး။ ကျနော် လူငယ်တယောက်အနေနဲ့ နှစ်သက်တဲ့ အပိုင်းတွေလည်း ရှိတယ်။ ကျနော် စတိတ်ရှိုးလည်း ကိုလေးဖြူတို့ကို သွားကြည့်တယ်။ သဘောကျတယ်။ ခုန်ပေါက်ပြီးလည်း ကျနော်ကပါတယ်”လို့ ဖိုးချစ်က ဆိုပါတယ်။
“ကျနော်တို့ ဇာတ်ပွဲကိုလည်း ကိုလေးဖြူတို့ လာကြည့်ဖူးတယ်။ သူတို့လည်း ခေတ်ပေါ်ဘယ်လောက်လုပ်လုပ် မြန်မာသွေး ရှိတယ်။ ဇာတ်သဘင်တွေ နည်းပါးလာတာကို များအောင်လုပ်ရမယ်။ ဇာတ်ပွဲက ကပြားဖြစ်နေတယ်။ ရိုးရာယဉ်ကျေးမှုနဲ့ ပတ်သက်ရင် ဇာတ်ခုံတွေပေါ်မှာ နည်းပါတယ်။ များအောင်ကြိုးစားရပါဦးမယ်”လို့ ဖိုးချစ်က ပြောပါတယ်။
သူ့ဘဝမှာ အခက်အခဲတွေ၊ စိတ်ညစ်စရာတွေနဲ့ ကြုံတွေ့ရတဲ့အခါတိုင်း ဘာသာရေးကိုဦးစားပေးလုပ်ဆောင်ဖြစ်ကာ ဘောလုံးအားကစားကိုလည်း ကစားဖြစ်ပြီး စိတ်ဖိစီးမှုတွေကိုလည်း လျှော့ချဖြစ်တယ်လို့ ဆိုပါတယ်။
“အခက်အခဲ ပြဿနာ ဆိုတာ လူတိုင်းမှာ ရှိတယ်။ တသက်လုံးကြီး ခက်ခဲနေတာမျိုးတော့ မဟုတ်ဘူး။ ကျနော်တို့ရဲ ဗုဒ္ဓဘာသာ မြန်မာအယူအဆအရတော့ ဖြစ်ပျက်ဆိုပြီး ရှိတယ်။ ပြဿနာ အခက်အခဲက ဖြစ်နေပြီး ပြန်ပျက်မှာပဲ။ တည်ဆောက်ထားတဲ့ဖြစ်ခြင်း တွေကလည်း ပျက်ခြင်းကိုသွားမှာပဲ”
“အဲဒါကိုနှလုံးသွင်း လိုက်တဲ့အခါမှာတော့ ဒါကြီးကကြာကြာ မဟုတ်ဘူး။ ဘယ်အရာမှ အကြာကြီး မဟုတ်ဘူး။ အဲဒီလိုနှလုံးသွင်းပြီးတော့ ရင်ဆိုင်တယ်။ ဖြေရှင်းတယ်”လို့ သူ့ဘဝမှာ တွေ့ကြုံခဲ့ရတဲ့ ခက်ခဲကြမ်းတမ်းမှုတွေကို ဘယ်လို စိတ်ထားမျိုးတွေနဲ့ ကျော်ဖြတ်ခဲ့လဲဆိုတာကို ဖိုးချစ်က ပြောပြခဲ့ပါတယ်။
The post ရိုးရာယဉ်ကျေးမှုနဲ့ ပတ်သက်ရင် ဇာတ်ခုံတွေပေါ်မှာ နည်းနေသေးတယ် appeared first on ဧရာဝတီ.
