အဆိုတော်ဂျီလတ်ကတော့ သူ့ရဲ့စိတ်ကြိုက်ဖန်တီးထားတဲ့ တေးသီချင်းအသစ်များကို ၂၀၁၉ခုနှစ်အတွင်းမှာ ပရိသတ်နားထောင်နိုင်ဖို့အတွက် ထွက်ရှိသွားမယ်လို့ ပြောပါတယ်။
“အခွေထွက်ပါမယ်။ အခွေထွက်ဖို့အတွက် ဆိုလိုက် Mixing လုပ်တဲ့အပိုင်းလေးတွေနဲ့ Cover ဒီဇိုင်းတွေဘာတွေ ကျန်တာလေးတွေဖြတ်နေတယ်။ သီချင်းတွေကတော့ ကိုယ်ကြိုက်တဲ့သီချင်းတွေလို့ ပြောရမှာပဲ။ ကိုယ်ကြိုက်တာ ပဲကိုယ်ဆိုတာပါပဲ။ တသက်လုံးလည်း ကိုယ်ကြိုက်တာတွေကိုယ်ဆိုနေတာပါပဲ”
“ ဒီထဲမှာ တချို့ဟာလေးတွေက အပြောင်းအလဲလေးတွေပါတော့ ရှေ့အခွေ အစွန်းနှစ်ဖက်နဲ့တော့ နည်းနည်းလေးပုံစံခြင်းတူချင်မှတူမယ်ပေါ့။ အဓိကကတော့ ကျနော့်စိတ်ခံစားချက်ပါပဲ။ သီချင်းတွေကတော့ ကျနော့်ခံစားချက်တွေပါပဲ” လို့ ဂျီလတ်က ပြောပါတယ်။
နောက်ထပ်ထွက်ရှိမယ့် တတိယမြောက်အခွေထဲမှာတော့ လက်ရှိသူဖြစ်ပေါ်နေတဲ့ ခံစားချက်များ ၊ စဉ်းစားတွေးခေါ်မှုများပါဝင်သွားမှာဖြစ်ပြီး အချစ်သီချင်းနည်းသွားမှာဖြစ်တယ်လို့ ဆိုပါတယ်။
“ကျနော်ဘာဖြစ်နေတယ်။ ဘာလုပ်နေတယ်ဆိုတာ၊ ဘာတွေစဉ်းစားနေတယ်ဆိုတာ အခွေထဲမှာမြင်ရမှာ။ အရင်ထက်စာရင်တော့ အချစ်သီချင်းနည်းသွားတယ်လို့ ထင်တယ်။ ဒါပေမယ့် ပျော်တယ်” လို့ ဂျီလတ်က ပြောပါတယ်။
ဒီအခွေကိုတော့ ဒုတိယမြောက်အခွေဖြစ်တဲ့ “အစွန်းနှစ်ဖက်”အခွေမထွက်ခင်ကတည်းက စတင်ပြင်ဆင်နေတာဖြစ်ပြီး သီချင်း ၁၇ပုဒ် ၊ ၁၈ပုဒ်ထဲမှာ သီချင်း ၁၀ပုဒ်ကို ပြန်လည်ရွေးချယ်ထားတာဖြစ်တယ်လို့ သိရပါတယ်။
“အမှန်တော့ အစွန်းနှစ်ဖက်မထွက်ခင်ကတည်းက ဒီအခွေကို တီးနေပြီ။ အစွန်းနှစ်ဖက်ကလည်း အားလုံးလက်စသတ်ပြီးတော့ တနှစ်လောက်နေမှထွက်ဖြစ်တာပါ။ ၂၀၁၁ခုနှစ် အကုန်မှာထွက်တာဆိုတော့ ၂၀၁၁ အစမှာကတည်းက ဒီအခွေကတီးနေပြီ။ အခုသီချင်းတွေက စီးရီးတခွေစာကျော်တယ်။ ၁၇ပုဒ် ၊ ၁၈ပုဒ်ရှိတယ်။ အဲဒီထဲကမှ သီချင်း ၁၀ပုဒ်ပြန်ရွေးပြီးထုတ်ဖြစ်တာပေါ့။” လို့ ဂျီလတ်ကပြောပါတယ်။
သူ့ရဲ့သီချင်းအသစ်တွေကိုတော့ အွန်လိုင်းပေါ်မှာ မတင်ဖြစ်တဲ့အကြောင်းနဲ့ ပတ်သက်ပြီးတော့လည်း အခုလိုပြောပြခဲ့ပါတယ်။
“အွန်လိုင်းမှာသီချင်းတွေ တင်ချင်ပါတယ်။ ဒီအလုပ်တွေကို ခေါင်းထဲမှာဘာမှမရှိဘဲလုပ်ချင်တယ်။ ဒါပေမယ့်အခုချိန်က အဲဒီလိုလုပ်လို့မရဘူးဖြစ်နေတာပေါ့။ အွန်လိုင်းပေါ်မှာတင်တဲ့နောက်မှာ မလိုလားအပ်တဲ့အကျိုးအပြစ်တွေ အရမ်းများတယ်။ အဲဒါတွေကို စဉ်းစားတယ်။ အဲဒါတွေကိုကာကွယ်နိုင်ရင် တင်မှာပေါ့” လို့ ဂျီလတ်က ပြောပါတယ်။
ဂျီလတ်ကတော့ မကြာခင်မှာလည်း Rock တေးသီချင်းများဖြင့် သီဆိုဖျော်ဖြေသွားမယ့် “9 Dreams” ဆိုတဲ့ Show ပွဲကြီးမှာ ပါဝင်သီဆိုဖျော်ဖြေသွားမှာဖြစ်တယ်လို့ သိရပါတယ်။
The post ၂၀၁၉ခုနှစ်အတွင်းမှာ သီချင်းအသစ်တွေထွက်ဖို့ရှိတဲ့ အဆိုတော်ဂျီလတ် appeared first on ဧရာဝတီ.