ရုပ်ရှင်ရုပ်ဝင်ငွေစာရင်းမှာ အောင်မြင်မှုတွေရခဲ့တဲ့အပြင် ကမ္ဘာပေါ်များ လူကြိုက်အများဆုံး ကာတွန်း ဇာတ်ကောင် တွေဖြစ်တဲ့ Spider-Man (ပင့်ကူလူသား) ၊ Iron Man, the Hulk, Black Panther နဲ့ အခြား Marvel Comics စူပါဟီးရိုးတွေရဲ့ ဖန်တီးရှင်ကြီး Stan Lee ဟာ အသက် ၉၅ နှစ်အရွယ်မှာပဲ ကွယ်လွန်သွားခဲ့ပြီ ဖြစ်တဲ့အကြောင်း သူ့ရဲ့ သမီးက နိုဝင်ဘာလ ၁၂ ရက်နေ့မှာ ပြောဆိုလိုက်ပါတယ်။
စာရေးသူ၊ အယ်ဒီတာတဦး အနေနဲ့ Lee ဟာ Jack Kirby နဲ့ Steve Ditko တို့လိုမျိုး အနုပညာရှင်တွေနဲ့အတူ ၁၉၆၀ ပြည့်လွန်နှစ်တွေတုန်းက Comic စာအုပ်တွေထဲမှာ Marvel ဆိုပြီး နာမည် ကျော်ကြားစေခဲ့တဲ့အထဲ သူဟာ အဓိက နေရာကနေ ပါဝင်ခဲ့ပါတယ်။
သူဟာ လူငယ်စာဖတ် ပရိသတ်မျိုးဆက်သစ်တွေ အားကျကြတဲ့ စူပါဟီးရိုးတွေကို ဖန်တီးခဲ့ပါတယ်။ သမီးဖြစ်သူ J.C. Lee က “ဆက်လက်ဖန်တီးနေဖို့ဆိုတာ ပရိသတ်တွေအတွက် သူ့ရဲ့ တာဝန်တခုလို ခံစားခဲ့ရတာပါ။ သူ့ရဲ့ ဘဝကို သူချစ်ပါတယ်။ သူအသက်ရှင်ဖို့ လုပ်ခဲ့ရတာတွေကိုလည်း သူချစ်ပါတယ်။ သူ့မိသားစုကလည်း သူ့ကိုချစ်ပါတယ်။ ပြီးတော့ သူ့ရဲ့ ပရိသတ်တွေကလည်း သူ့ကိုချစ်ပါတယ်။ သူဟာ အစားထိုး မရပါဘူး” လို့ ပြောကြားခဲ့ပါတယ်။
Lee ကွယ်လွန်ခဲ့တဲ့ အခြေအနေအကြောင်း သမီးဖြစ်သူက ပြောဆိုခဲ့တာ မရှိခဲ့ပေမယ့် TMZ မီဒီယာရဲ့ အဆိုအရ ဟောလိဝုဒ်မှာရှိတဲ့ သူ့ရဲ့ အိမ်ကို နိုဝင်ဘာ ၁၂ ရက် အစောပိုင်းက လူနာတင်ကား ခေါ်ခဲ့ပြီး Cedars-Sinai ဆေးကုသရေးစင်တာမှာ ကွယ်လွန်ခဲ့တာလို့ ဆိုပါတယ်။
Disney ဟာ Marvel Entertainment ကို ဒေါ်လာ ၄ ဘီလီယံနဲ့ ၂၀၀၉ ခုနှစ်မှာ ဝယ်ယူခဲ့ပြီး Lee ရဲ့ ဖန်တီးမှု လက်ရာတွေ ဖြစ်လာမယ့် ဇာတ်ကောင်တွေကို ဖန်တီးဖို့ ဖြစ်လာခဲ့ပါတယ်။ ဒါ့အပြင် ဆရာကြီး Lee ဟာ Marvel ရုပ်ရှင်တော်တော်များများမှာ ဧည့်သည်သရုပ်ဆောင်အဖြစ် ပါဝင်ခဲ့ဖူးပါတယ်။
၂၀၀၂ ခုနှစ်မှာ ထွက်ရှိခဲ့တဲ့ “Spider-Man” ရုပ်ရှင်ကနေ ၂၀၁၆ ခုနှစ်မှာ ထွက်ရှိခဲ့တဲ့ “Deadpool” ရုပ်ရှင်အထိ သရုပ်ဆောင်ခဲ့တာကိုတွေ့ရပါတယ်။ သူကိုယ်တိုင်ဖန်တီးခဲ့တဲ့ လူမည်းစူပါဟီးရိုး “Black Panther” မှာလည်း လောင်းကစားရုံက အကြီးအကဲတဦးအဖြစ် သရုပ်ဆောင်ခဲ့ပါတယ်။
Marvel ရုပ်ရှင်တွေမှာ Captain America အဖြစ် သရုပ်ဆောင်ထားတဲ့မင်းသား Chris Evans က “နောက်ထပ် Stan Lee လိုမျိုး ပုဂ္ဂိုလ်ဘယ်တော့မှရှိလာမှာမဟုတ်ပါဘူး။ ဆယ်စုနှစ်များစွာ သူဟာ စွန့်စားမှု၊ လွတ်မြောက်မှု၊ စိတ်သက်သာရာရမှု၊ စိတ်အားတက်ကြွမှု၊ စိတ်အင်အားယူမှု၊ စိတ်ခွန်အား၊ သူငယ်ချင်း စိတ်ဓာတ်နဲ့ ပျော်ရွှင်မှုတွေနဲ့အတူ လူကြီးလူငယ်တွေကို ထောက်ပံ့ပေးခဲ့ပါတယ်” လို့ ပြောကြားခဲ့ပါတယ်။
Ref: reuters
The post ပင့်ကူလူသားနဲ့ အခြားစူပါဟီးရိုးတွေရဲ့ ဖန်တီးရှင်ကြီး Stan Lee ကွယ်လွန်ပြီ appeared first on ဧရာဝတီ.