ဒီဇာတ်ကားဟာ ပြင်သစ်စကားပြော ရုပ်ရှင်တခုပါ။ “A Bag Of Marbles” ရဲ့ မူရင်းက “un sac de billes” ဖြစ်ပြီး တကယ့်ဖြစ်ရပ်မှန်လို့လည်း ပြောကြပါတယ်။ သူက ဒီဇာတ်လမ်းရဲ့ စာရေးဆရာ ုဖြစ်တဲ့ Joseph Joffo ရဲ့ အကြောင်းကို ပြန်လည် ရိုက်ကူးထားတာပါ။
ဇာတ်လမ်းက ဒုတိယကမ္ဘာစစ် ဖြစ်တဲ့အခါ ပြင်သစ်ပြည်ကို ဂျာမန်တွေ ဝင်ရောက်လာခဲ့ကြပါတယ်။ ပြင်သစ်မှာရှိတဲ့ ဂျူးလူမျိုးတွေဟာ အရင်က အေးအေးချမ်းချမ်း ရှိခဲ့ပေမဲ့ ဂျာမန်တွေဝင်ပြီးနောက်မှာ ပုန်းလျှိုးကွယ်လျှိုးနဲ့ အသက်ဆက် ရပါတယ်။
ဆံသဆိုင် ဖွင့်ထားတဲ့ ဂျူးမိသားစုမှာ သားချည်းပဲ ၄ ယောက် ရှိပြီး ဂျာမန်တွေ ပိုက်စိပ်တိုက် လိုက်လံ ဖမ်းဆီးချိန်မှာတော့ တကွဲတပြားနဲ့ ထွက်ပြေးရပါတယ်။ ဒီထဲက သားအငယ်ဆုံးလေး ဂျိုးတယောက် ကလေးဖြစ်ပေမယ့် ဘယ်လိုတွေ အသက်ရှင်ရတယ်၊ ကြိုးစားခဲ့ရတယ်ဆိုတာမျိုးကို ရိုက်ကူးပြထားတာ ဖြစ်ပါတယ်။
“မင်းဂျူးလား” လို့မေးတိုင်း မဟုတ်ပါဘူးလို့ ငြင်းပယ်တတ်ဖို့ ဖခင်ဖြစ်သူကိုယ်တိုင်က ပါးရိုက်ပြီး သင်ကြားပေးခဲ့ပုံတွေ၊ လက်ရှိခံစားရတဲ့ ဒုက္ခတွေထက် မိသားစုကို ပြန်မတွေ့နိုင်တော့မယ့် နာကျင်ခြင်းက ပိုကြီးမားတာကြောင့် အခက်အခဲတွေကို သည်းခံခဲ့ရပုံတွေကို စိတ်လှုပ်ရှားစွာနဲ့ ကြည့်ရှုရမှာ ဖြစ်ပါတယ်။
အဖမ်းခံရတဲ့ ဂျူးတွေရဲ့ကြောက်လန့်မှုကို မီးမောင်းထိုး ရိုက်ပြထားသလို ညီအစ်ကိုနှစ်ယောက် အသက်ဘေးက လွတ်မြောက်ဖို့ ကြိုးစားရပုံ၊ မိသားစု ပြန်လည်ဆုံစည်းချိန်မှာ ဖခင်ကို ပြန်မတွေ့နိုင်တော့တဲ့ အခန်းတွေဟာ ကြည့်ရှုသူကို ရသတခု ပေးစွမ်းမှာ ဖြစ်ပါတယ်။
ဇာတ်လမ်းက အလယ်လောက်မှာအေးသွားပေမယ့် ပရိသတ်တွေပျင်းစေမှာတော့ မဟုတ်ပါဘူး။ ရုပ်ရှင်ဇာတ်ကားကောင်း ကြိုက်နှစ်သူတွေအတွက်တော့ သဘောကျ နှစ်ခြိုက်စေမယ့် ဇာတ်ကားကောင်း တကားပါ။
ဒီဇာတ်ကားဟာ စာရေးသူရဲ့ကိုယ်တွေ့ အတွေ့အကြုံလို့ ဆိုကြပေမယ့် မတိကျဘူးလို့ပြောတဲ့သူတွေလည်း ရှိသလို စာအုပ်ထုတ်ဝေဖို့ အတွက်လည်း အတော်လေး ရုန်းကန်ခဲ့ရပါတယ်။ ထုတ်ဝေပြီး၂ နှစ်ကြာမှ Best Seller စာရင်းဝင်ခဲ့ပါတယ်။
ဇာတ်ကားရဲ့အဓိကသရုပ်ဆောင်ဖြစ်တဲ့ Dorain Le Clech က ငယ်ရွယ်ပြီး ချစ်စရာကောင်းသလို သူ့ရဲ့သရုပ်ဆောင်မှု တွေကလည်း ဇာတ်နဲ့ အံဝင်ခွင်ကျဖြစ်တာကြောင့် ကြည့်ရှုသင့်တဲ့ ဇာတ်ကားကောင်း တကားဖြစ်တယ်ဆိုတာ ပြောပါရစေ။
The post ဂျူးလူမျိုးတွေရဲ့ ရုန်းကန်မှုပေါင်းများစွာကို ကြည့်ရှုရမယ့် ဖြစ်ရပ်မှန်ရုပ်ရှင် “A Bag Of Marbles” appeared first on ဧရာဝတီ.