မင်းသား Chris Pine ဟာ ပြီးခဲ့တဲ့ ဇူလိုင်လ ၂၁ ရက်နေ့မှာ “Wonder Woman” ရုပ်ရှင်မင်းသမီး Gal Gadot နဲ့အတူ ပရိသတ်ရှေ့မှောက် ထွက်ပေါ်လာခဲ့ပေမယ့် ပြီးခဲ့တဲ့ ရုပ်ရှင်မှာ သူ့ရဲ့ဇာတ်ကောင် သေဆုံးခဲ့ပြီးတဲ့ အတွက် ရုပ်ရှင်အသစ်မှာ ဘယ်လိုဘယ်ပုံ ပြန်လည်ပါဝင်လာမယ်ဆိုတာကို ရှင်းလင်းခဲ့တာတော့ မရှိပါဘူး။
ဆန်ဒီယေဂိုမြို့မှာ ပြုလုပ်တဲ့ Comic-Con ပွဲမှာ မင်းသား Pine ဟာ မင်းသမီး Gadot၊ ဒါရိုက်တာ Patty Jenkins တို့နဲ့အတူ လူပေါင်း ၆၅၀၀ တက်ရောက်ခဲ့တဲ့ ပွဲကိုတက်ရောက်ခဲ့ပါတယ်။ မင်းသားက ဒီပွဲကို ပြီးခဲ့တဲ့သီတင်း ၃ ပတ် လောက်က စတင်ရိုက်ကူးခဲ့တဲ့ “Wonder Woman 1984” ရုပ်ရှင်နဲ့ပတ်သက်လို့ ပြောကြားဖို့ တက်ရောက်ခဲ့တာ ဖြစ်ပါတယ်။
မင်းသား Pine က “တကယ်တော့ အခုကျနော် ဒီနေရာမှာ ရှိနေရမှာမဟုတ်ပါဘူး။ ကျနော့်ရဲ့ မိတ်ဆွေတွေကို စိတ်ပိုင်းဆိုင်ရာအားပေးဖို့ ရောက်လာရုံသက်သက်ပါ” လို့ ရုပ်ရှင်အသစ်မှာ ဘယ်လိုပြန်လည်ပေါ်လာမှာလဲ ဆိုတဲ့ မေးခွန်းကို ပြန်လည်ဖြေကြားခဲ့ပါတယ်။
မင်းသားဟာ ၂၀၁၇ ခုနှစ်တုန်းက ထွက်ရှိခဲ့တဲ့ “Wonder Woman” ဆိုတဲ့ ရုပ်ရှင်မှာ ပထမကမ္ဘာစစ်ပိုင်းလော့ Steve Trevor အဖြစ် ပါဝင်သရုပ်ဆောင်ခဲ့တာ ဖြစ်ပါတယ်။ အဲဒီရုပ်ရှင်အဆုံးမှာ Trevor ဟာ လေယာဉ်ကို ဖောက်ခွဲပစ်ပြီး သူကိုယ်တိုင် အသက်စွန့်၊ အသေခံခဲ့တာဖြစ်ပါတယ်။
“1984” ရုပ်ရှင်ရိုက်ကွင်းမှာ မင်းသား Pine နဲ့အတူ ရိုက်ကူးထားတဲ့ ဓာတ်ပုံတခုကို Twitter မှာ တင်ခဲ့တဲ့ ဒါရိုက်တာ Jenkins က မင်းသားရဲ့ ဇာတ်ရုပ်နဲ့ပတ်သက်လို့ မသေမချာ မရေမရာပုံစံ ပြောကြားခဲ့ပါတယ်။ ဒါရိုက်တာက “သူက ဒီမှာပြန်လာမှာလား။ လူတိုင်းက ဒီရုပ်ရှင်ကို ကြည့်ပြီး သိစေဖို့ ကျနော်က တော်တော်လေး စိတ်လှုပ်ရှားနေပါတယ်။ ဒါဟာ ကျနော်တို့ရုပ်ရှင်ရဲ့ အရမ်းအရေးကြီးတဲ့ အပိုင်းဖြစ်ပါတယ်” လို့ ပြောကြားခဲ့ပါတယ်။
အလွန်အောင်မြင်ခဲ့တဲ့ “Wonder Woman” ရုပ်ရှင်ဟာ Warner Bros ရုပ်ရှင်ထုတ်လုပ်ရေးရဲ့ DC Comics ရုပ်ရှင်တွေမှာ ထူးခြားတဲ့ ရုပ်ရှင်တခုဖြစ်ခဲ့ပြီး အကောင်းမြင်မှတ်ချက်ရော မကောင်းမြင်မှတ်ချက်ပါ ရရှိခဲ့ပေမယ့် Walt Disney Co ရဲ့ Marvel Studios ကနေ ထုတ်လုပ်ထားတဲ့ ရုပ်ရှင်တွေရဲ့ ရုံဝင်ငွေ အောင်မြင်မှုကိုတော့ မီနိုင်ခဲ့ခြင်းမရှိခဲ့ပါဘူး။ “Wonder Woman” ရုပ်ရှင်ဟာ ကမ္ဘာတဝန်းကနေ ရုံဝင်ငွေ ဒေါ်လာ ၈၂၁ ဒဿမ ၈ သန်းရရှိခဲ့ပါတယ်။
ကနဦး ဖြန့်ချိထားတဲ့ “1984” ရုပ်ရှင်ထဲကပုံရိပ်တွေမှာတော့ Wonder Woman ဟာ လူဆိုးနှစ်ယောက်နဲ့ ရင်ဆိုင်နေပြီး ရှော့ပင်းမောလ် တခုက မုန့်ဆိုင်မှာ ဖြစ်ခဲ့တဲ့ တိုက်ခိုက်မှုအတွင်းမှာ ကလေးငယ်တဦးကို ကယ်ဆယ်ခဲ့တာကို မြင်တွေ့ခဲ့ကြရပါတယ်။
အဲဒီရုပ်ရှင်အသစ်ကိုတော့ လာမယ့် ၂၀၁၉ ခုနှစ်၊ နိုဝင်ဘာလမှာ ရုံတင်ပြနိုင်ဖို့ စီစဉ်ထားပါတယ်။ မင်းသမီး Gadot ကတော့ “1984” ဟာ သမရိုးကျအတိုင်းသွားမယ့် နောက်ဆက်တွဲ ဇာတ်လမ်းမဟုတ်ဘူးလို့ ပြောကြားထားပါတယ်။
Ref:Reuters
The post “Wonder Woman” ရုပ်ရှင်မှာ ပြန်လည် ပါဝင်လာနိုင်ချေရှိတဲ့ မင်းသား Chris Pine appeared first on ဧရာဝတီ.