ဒီတခါမှာတော့ ၂၀၁၂ ခုနှစ်က ထွက်ရှိခဲ့ပြီး IMDB rating (8.2) နဲ့ Rotten Tomatoes (၉၆) ရာခိုင်နှုန်းအထိ ရရှိထားတဲ့ ဘောလိဝုဒ်ဂိုဏ်းစတား ဇာတ်ကား ကောင်းတကားနဲ့ မိတ်ဆက်ပေးချင်ပါတယ်။
ဒီဇာတ်ကားဟာ Part-1 နဲ့ Part-2 ဆိုပြီး ၂ ကား ထွက်ရှိထားတာဖြစ်ပြီး ဇာတ်ကားတကားနဲ့ တကားကို အချိတ် အဆက်မိမိ၊ ဇာတ်အိမ်ခိုင်ခိုင်နဲ့ ရိုက်ကူးထားတာပဲ ဖြစ်ပါတယ်။ ဒီဇာတ်ကားကို ဒါရိုက်တာ Anurag Kashyap ကရိုက်ကူးထားတာဖြစ်ပြီး သရုပ်ဆောင်တွေအနေနဲ့ကတော့ Manoj Bajpayee, Nawazuddin Siddiqui,Richa Chadda,Huma Qureshi,Tigmanshu Dhulia နဲ့တခြားသော နာမည်ကြီးသရုပ်ဆောင်တွေ ပါဝင် ထားကြပါတယ်။
ဘောလိဝုဒ် ဂိုဏ်းစတားကားတွေထဲမှာမှ ဖြစ်ရပ်မှန်ကို အခြေခံပြီး သဘာဝကျကျ ရိုက်ကူးထားတဲ့ ဒီဇာတ်ကားကိုတော့ တယောက်နဲ့တယောက် အကျော်အခွ အသတ်အဖြတ်တွေ၊ နောက်ခံသီချင်း ကောင်းကောင်းတွေ ၊ အက်ရှင်ခန်းတွေနဲ့ မြိုင်မြိုင်ဆိုင်ဆိုင် ကြည့်ရှုကြရမှာပဲ ဖြစ်ပါတယ်။
ဇာတ်လမ်းအကျဉ်းကတော့ အိန္ဒိယနိုင်ငံကို အင်္ဂလိပ်အစိုးရ အုပ်ချူပ်ခဲ့စဉ်အချိန်ကာလတွေမှာ Wasseypur ဆိုတဲ့ မြို့မှာတော့ တောပုန်းဓားပြတွေနဲ့ ဒုစရိုက်လောကသားတွေ ကြီးစိုးနေတဲ့အချိန်ပဲ ဖြစ်ပါတယ်။ ဒီလိုအချိန် ကာလမှာ ဓားပြဗိုလ် ဆူလ်တာနာရဲ့နာမည်ကို အသုံးချပြီး ကြားဖြတ်လုယက်နေသူကတော့ ရှဟီးဒ်ခန်းမ်ပဲ ဖြစ်ပါတယ်။
ရှဟီးဒ်ခန်းမ်ရဲ့မလိမ့်တပတ် လုပ်ရပ်ကို ဆူလ်တာနာ သိသွားတဲ့အခါမှာတော့ တခြားတနေရာကို အသက်လု ပြေးခဲ့ရပြီး ရာမာဒီးရ်ဆိုတဲ့ စီးပွားရေးသမားလက်အောက်မှာ တိုက်ခိုက်ရေးသမားအဖြစ် လုပ်ကိုင်ခဲ့ပါတယ်။ အကြံကြီးတဲ့ ရှဟီးဒ်ခန်းမ် တယောက် သူ့အလုပ်ရှင် ခရိုနီစီးပွားရေးသမား ရာမာဒီးရ်ကို လုပ်ကြံမယ့် အကြံအစည်ကို ရာမာဒီးရ်က ရိပ်မိသွားတဲ့နောက်မှာတော့ မပြန်လမ်းကိုပဲ မြန်းခဲ့ရပါတော့တယ်။
ရှဟီးဒ်ခန်းမ်တယောက် လုပ်ကြံခံရပြီး သေဆုံးသွားပေးမယ့် သူ့ရဲ့သားဖြစ်သူ ဆဒါးရ်ခန်းမ်ကိုတော့ တပည့် ဖြစ်သူက လုပ်ကျွေးပြုစုခဲ့ပြီး ဆဒါးရ်ခန်းမ်ရဲ့ဘဝတလျှောက်လုံးဟာလည်း သူ့ဖခင်အတွက် လက်စားချေဖို့ ရှင်သန်နေတာဖြစ်ပြီး သူ့ရဲ့သားစဉ်မြေးဆက်တလျှောက်လုံးကပါ ဒီဆန္ဒကို ဖြည့်ဆည်းနိုင်မှာလားဆိုတာကိုတော့ ဇာတ်ကားမှာ ဆက်လက်ကြည့်ရှုဖို့ တိုက်တွန်းချင်ပါတယ်။
ဒီဇာတ်ကားဟာ ဘောလိဝုဒ်ရဲ့ Godfather ရုပ်ရှင်လို့တောင် ပြောလို့ရပြီး Over Action တွေနဲ့ Long Coat ကြီး ဝတ်၊ တက်တူးတွေထိုးထားတဲ့ ပေါပေါပဲပဲ ဂိုဏ်းစတားကားတကား မဟုတ်ဘူးဆိုတာတော့ အသေအချာ ပြောရဲပါတယ်။
မျက်နှာသစ် သရုပ်ဆောင်တော်တော်များများကို ပွဲထုတ်ထားတဲ့ ဒီဇာတ်ကားဟာ ၂၀၁၂ ခုနှစ်ရဲ့ နာမည်ကြီး သရုပ်ဆောင် အများစု ပါဝင်တဲ့ ဇာတ်ကားတွေနဲ့အပြိုင် အောင်မြင်ခဲ့တဲ့ ဇာတ်ကားတကားဖြစ်တာကြောင့် ရုပ်ရှင်ချစ် ပရိသတ်တွေ အတွက် ညွှန်းဆိုပေးလိုက်ပါတယ်။
The post ဘောလိဝုဒ် ရုပ်ရှင်လောကကို တဆင့်မြှင့်တင်ပေးနိုင်ခဲ့တဲ့ “Gangs Of Wasseypur” ရုပ်ရှင် appeared first on ဧရာဝတီ.