Baahubali ဇာတ်လမ်းဟာ ရုပ်ရှင်ပိတ်ကားအထက်မှာ ပြီးဆုံးခဲ့ပေမယ့် အခုတော့ Mahishmati မြို့ရဲ့ ဇာတ်ကောင်တွေအကြောင်း တဖန် ပုံဖော်ရိုက်ကူးဦးမှာ ဖြစ်ပါတယ်။
Baahubali စီးရီးရုပ်ရှင်ထဲမှာ ဘုရင်မကြီး Shivagami အဖြစ် မင်းသမီး Ramya Krishnan က ပါဝင် သရုပ်ဆောင်ထားတာ ဖြစ်ပါတယ်။ အခုတော့ အွန်လိုင်း ရုပ်ရှင်ကြည့် ဝက်ဘ်ဆိုက်ဖြစ်တဲ့ Netflix ကတော့ “Shivagami” လို့အမည် ပေးထားတဲ့ Baahubali မတိုင်မီ ဖြစ်ရပ်အခြေအတည် ဇာတ်လမ်းတွဲကို ရိုက်ကူးတော့မှာ ဖြစ်တဲ့အကြောင်း ကြေညာခဲ့ပါတယ်။
အဲဒီဇာတ်လမ်းတွဲကိုတော့ ဒါရိုက်တာတွေ ဖြစ်ကြတဲ့ SS Rajamouli နဲ့ Deva Katta တို့က ပူးတွဲ ရိုက်ကူးကြမှာ ဖြစ်ပါတယ်။ “Shivagami” ဇာတ်လမ်းတွဲကို ရိုက်ကူးကျစရိတ်များများနဲ့ တတိယ Season အထိ ရိုက်ကူးမှာ ဖြစ်ပါတယ်။
Telugu ဒါရိုက်တာ Deva Katta ကတော့ “Baahubali စီးရီးဟာ ထူးခြားတဲ့ ဇာတ်ကြောင်းပြောပုံစံနဲ့ ကြီးမားတဲ့ ရိုက်ခတ်မှုကို လုပ်ဆောင်နိုင်ခဲ့ပါတယ်။ အခုအကြို ဇာတ်လမ်းကတော့ Baahubali ပရိသတ်တွေကို စိတ်လှုပ်ရှားစေလိမ့်မယ်လို့ ကတိပေးပါတယ်။ ဒီဇာတ်လမ်းတွဲမှာ ပါဝင်ရတာနဲ့ Sir Rajamouli နဲ့ အလုပ်အတူ တွဲလုပ်နိုင်တာကို ဂုဏ်ယူမိပါတယ်” လို့ ပြောကြားခဲ့ပါတယ်။
လောလောဆယ် ဒါရိုက်တာ Deva ကတော့ ၂၀၁ဝ ခုနှစ်မှာ နာမည်ကျော်ကြားခဲ့တဲ့ Telugu ရုပ်ရှင် Prasthanam ကို ဟင်ဒီစကားပြောနဲ့ ပြန်လည်ရိုက်ကူးနေပါတယ်။ အဲဒီသည်းထိတ်ရင်ဖို နိုင်ငံရေး ရုပ်ရှင်နဲ့အတူ သူဟာ ဘောလိဝုဒ် အနုပညာလောကထဲကို စတင်ဝင်ရောက်မှာလည်း ဖြစ်ပါတယ်။
“Prassthanam” ရုပ်ရှင်မှာတော့ Sanjay Dutt, Jackie Shroff နဲ့ Manisha Koirala တို့ ပါဝင်ထားကြပါတယ်။ ပြီးခဲ့တဲ့ ဇွန်လတုန်းက Lucknow မြို့မှာ စတင်ရိုက်ကူးခဲ့တာလည်း ဖြစ်ပါတယ်။
Baahubali: The Conclusion ရုပ်ရှင်မဖြန့်ချိမီမှာ ပရိုးမိုးရှင်းတစိတ်တပိုင်းအနေနဲ့ “The Rise of Sivagami” လို့အမည်ရတဲ့ သမိုင်းနောက်စံ စိတ်ကူးယဉ် ဝတ္ထုကိုလည်း ဒါရိုက်တာက ဖြန့်ချိခဲ့ပါ သေးတယ်။
စာရေးဆရာ Anand Neelakantan က ရေးထားတဲ့ အဲဒီဝတ္ထုထဲဟာ “Baahubali: Before the Beginning” ရုပ်ရှင်ထဲက ဖြစ်ရပ်မတိုင်ခင် ကာလကို ဇာတ်အိမ်တည်ထားပြီး ရုပ်ရှင်စီးရီးရဲ့ အကြိုဇာတ်လမ်းဖြစ်ပါတယ်။ အဲဒီဝတ္ထုကို အင်္ဂလိပ်၊ ဟင်ဒီ၊ တမီးလ်၊ Telugu ဗားရှင်းတွေနဲ့ ဖြန့်ချိခဲ့ပါတယ်။
Ref: indianexpress
The post Baahubali ရုပ်ရှင်အကြိုဇာတ်လမ်း “Shivagami” ကို Netflix က ရိုက်ကူးထုတ်လုပ်မည် appeared first on ဧရာဝတီ.