မကြာခင်မှာ ရိုက်ကူးမယ့် တက္ကသိုလ်နောက်ခံ ရုပ်သံ ဇာတ်လမ်းတွဲအသစ်အတွက် သရုပ်ဆောင် အသစ်များ ခေါ်ယူဖို့ အစီအစဉ်ရှိတယ်လို့ ဒါရိုက်တာ သားညီက သူ့ Facebook အကောင့်ကနေ ကြေညာထားပါတယ်။
“သိပ်မကြာခင်မှာ ဇာတ်လမ်းတွဲ အသစ်တခုအတွက် သရုပ်ဆောင်များ ခေါ်ယူဖို့ အစီအစဉ်ရှိပါတယ်။ တက္ကသိုလ် နောက်ခံ ဇာတ်လမ်းတွဲဖြစ်လို့ တက္ကသိုလ် ကျောင်းသူ၊ ကျောင်းသားများအဖြစ် သရုပ်ဆောင်မယ့် အဓိက ဇာတ်ကောင်တွေကို လိုချင်တာပဲ ဖြစ်ပါတယ်” လို့ သားညီက ရေးသားထားပါတယ်။
အဆိုပါ ဇာတ်ကောင်များအတွက် ကိုက်ညီမယ့် ထူးထူးခြားခြား ရုပ်ရည်များနဲ့ သရုပ်ဆောင်အသစ်များကို ဦးစားပေး ရွေးချယ်သွားမှာဖြစ်ပြီး အသေးစိတ် အချက်အလက်များကို ထပ်မံ ကြေငြာသွားမယ်လို့ သိရပါတယ်။
“ကျောင်းကို ချစ်တဲ့၊ ကျောင်းကို ချစ်ခဲ့တဲ့၊ ကျောင်းကို ချစ်နေတုန်းဖြစ်တဲ့ ကျနော့်အတွက်၊ ကျောင်းသူ၊ ကျောင်းသား ဟောင်းတွေအတွက် ကျောင်းအလွမ်းလေး ပြေလိုပြေငြားပေါ့ဗျာ” လို့ သားညီက ရေးသားထားပါတယ်။
ကွယ်လွန်သွားပြီဖြစ်တဲ့ ရုပ်ရှင်သရုပ်ဆောင် အကယ်ဒမီ ဒွေး (ခ) ကိုသားကြီးရဲ့ ညီတဝမ်းကွဲ ဖြစ်သူ သားညီဟာ လက်ရှိအချိန်မှာ ဒါရိုက်တာအနေနဲ့ ဇာတ်လမ်းတွဲများ၊ ရုပ်ရှင်ဇာတ်ကားများနဲ့ Music Video များ ရိုက်ကူးလျက် ရှိပါတယ်။
The post တက္ကသိုလ်နောက်ခံ ဇာတ်လမ်းတွဲအတွက် သရုပ်ဆောင်အသစ်များ ခေါ်ယူမယ့် သားညီ appeared first on ဧရာဝတီ.